104. മരുഭൂമിയിൽപ്പെയ്ത സങ്കടപ്പെരുമഴ

മരുഭൂമിയിൽപ്പെയ്ത സങ്കടപ്പെരുമഴ

ബൈബിളിലെ കഥകൾ 104

ദാവീദിനെയും അനുയായികളെയും പിടികൂടാൻ സാവൂളും സൈന്യവും അടുത്തുകൊണ്ടിരുന്നു. മാവോൻമലയുടെ ഒരു വശത്തു സാവൂളും സംഘവും ദാവീദിനെത്തിരയുമ്പോൾ, മറുവശത്തുകൂടെ, ദാവീദും അനുചരന്മാരും സുരക്ഷാസ്ഥാനങ്ങൾതേടിയലയുകയായിരുന്നു...

സാവൂൾ വീണ്ടും ദാവീദിനു പിന്നാലെപോയെന്നറിഞ്ഞ ഫിലിസ്ത്യർ, ഇസ്രയേലിനെ ആക്രമിക്കാൻ മടങ്ങിയെത്തി. 

ഇസ്രായേലിൻ്റെ സൈന്യംമുഴുവൻ സാവൂളിനോടൊപ്പം ദാവീദിനെ വേട്ടയാടാനിറങ്ങിയിരുന്നു. വളരെക്കുറച്ചുപേർമാത്രമാണു സൈനികത്താവളത്തിലവശേഷിച്ചിരുന്നത്. ആ ചെറിയഗണം സൈന്യവുമായി, ഫിലിസ്ത്യർക്കെതിരേ പുറപ്പെടാൻ ജോനാഥൻ നിശ്ചയിച്ചു..

അവൻ, തൻ്റെ സഹോദരന്മാരായ അബിനാദാബിനും മല്‍ക്കീഷുവായ്ക്കുമൊപ്പം ഫിലിസ്ത്യരെ നേരിടാനിറങ്ങി.

സാവൂളിനെ ഇക്കാര്യമറിയിക്കാൻ അവനൊരു ദൂതനെയുമയച്ചു.

മാവോൻമലയുടെ മറുവശത്ത്, ദാവീദും അനുയായികളുമൊളിച്ചിരുന്ന ഗിരിശിഖരത്തിനടുത്തേക്ക് സാവൂളിൻ്റെ സംഘം അടുത്തുകൊണ്ടിരുന്നു. അപ്പോളാണ്, ജോനാഥൻ്റെ സന്ദേശവുമായി ദൂതനെത്തിയത്.

ദാവീദിനെ പിന്തുടരുന്നതവസാനിപ്പിച്ച്, സാവൂൾ യുദ്ധമുന്നണിയിലേക്കു കുതിച്ചു.

സാവൂളും സംഘവും പെട്ടെന്നു പിന്തിരിഞ്ഞതു ദാവീദിനാശ്വാസമായി. അവൻ തൻ്റെ അനുയായികൾക്കൊപ്പം സിഫ് മരുഭൂമിയിലേക്കു രക്ഷപ്പെട്ടു. അവിടെ, ജഷിമോന്റെ കിഴക്കുള്ള ഹക്കീലാക്കുന്നിലെ ഗുഹകളിൽ അവർ താവളമടിച്ചു. 

സാവൂളിൻ്റെയും ജോനാഥൻ്റെയും ശക്തമായ ആക്രമണത്തിനുമുമ്പിൽ പിടിച്ചുനില്ക്കാനാകാതെ, ഫിലിസ്ത്യർ തോറ്റോടി.

വിജയലഹരിയിൽ മടങ്ങിവന്ന സാവൂൾ, ദാവീദിനെ പിടികൂടാൻ പുതിയ തന്ത്രങ്ങളൊരുക്കി. ദാവീദിനെ തിരഞ്ഞുപിടിക്കാൻമാത്രമായി മൂവായിരം സൈനികരടങ്ങിയ പ്രത്യേകസൈനികദളം സാവൂൾരാജാവു രൂപീകരിച്ചു.

ദാവീദിനെ പിന്തുടരാൻ പിതാവു  പുതിയ പദ്ധതികളൊരുക്കുന്നതറിഞ്ഞപ്പോൾ, മീഖേൽ സാവൂളിനെച്ചെന്നു കണ്ടു. 

"ഒരു കുറ്റവാളിയെയെന്നപോലെ അങ്ങെന്തിനാണിപ്പോഴും ദാവീദിനെ പിന്തുടരുന്നത്? അദ്ദേഹമെൻ്റെ ഭർത്താവാണ്. അദ്ദേഹം മരുഭൂമിയിലോ വനത്തിലോ ഗിരിനിരകളിലെ ഗുഹകളിലോ എവിടെയായാലും അദ്ദേഹത്തോടൊപ്പമായിരിക്കാൻ എൻ്റെ ഹൃദയം കൊതിക്കുന്നു. ദയവായി അദ്ദേഹത്തെ വെറുതേവിടൂ... ഭൂമിയുടെ ഏതെങ്കിലുമൊരു കോണിൽ സമാധാനത്തോടെ ജീവിക്കാൻ ഞങ്ങളെയനുവദിക്കൂ...!" മിഖാൽ പിതാവിനോടു കേണുപറഞ്ഞു.

"ദാവീദ് എന്തുതിന്മയാണു ചെയ്തത്? രാജ്യത്തിനും രാജാവിനും അവനിൽനിന്ന് നന്മയല്ലാതെയൊന്നുമുണ്ടായിട്ടില്ല. അതൊന്നുമോർത്തില്ലെങ്കിലും അവൻ നമ്മുടെ മിഖാലിൻ്റെ ഭർത്താവാണെന്നെങ്കിലുമോർക്കണ്ടേ?"

ജോനാഥനും അനുജത്തിയെ പിന്തുണച്ചുസംസാരിച്ചു.

"ങ്ഹും... ഭർത്താവ്!" സാവൂൾ പൊട്ടിത്തെറിച്ചു. "നിൻ്റെ വാക്കുകേട്ടു ഞാൻചെയ്തുപോയ ഒരബദ്ധമായിരുന്നു ആ വിവാഹം!  ആ തെറ്റുതിരുത്താൻ ഞാൻ നിശ്ചയിച്ചുകഴിഞ്ഞു. ഈ ബന്ധം ഇന്നുകൊണ്ടവസാനിച്ചിരിക്കുന്നു. ഇസ്രായേൽരാജാവിൻ്റെ പുത്രിയുടെ ഭർത്താവാകാൻ രാജ്യത്തോടുകൂറുള്ള ചെറുപ്പക്കാർ ഇവിടെ വേറെയുണ്ട് അവരിലൊരുവനുമായി എന്റെ പുത്രിയുടെ വിവാഹംനടക്കും! ഇത് ഇസ്രായേൽരാജാവിൻ്റെ നിശ്ചയമാണ്"

സാവൂളിൻ്റെ കണ്ണുകളിലെരിഞ്ഞ അഗ്നിനാളങ്ങൾ മിഖാലിനെ ഭയപ്പെടുത്തി. അവൾ പൊട്ടിക്കരഞ്ഞുകൊണ്ട് അന്തഃപുരത്തിലേക്കോടി.

ഒരു നിമിഷം സ്തബ്ധനായിനിന്ന ജോനാഥൻ, അനുജത്തിയെ ആശ്വസിപ്പിക്കാനായി അവളുടെ പിന്നാലെ ചെന്നു .

രാജപുരോഹിതന്മാർ കൊട്ടാരത്തിലേക്കാനയിക്കപ്പെട്ടു. രണ്ടുദിവസങ്ങൾക്കപ്പുറം കൊട്ടാരമുറ്റത്തു വീണ്ടുമൊരു വിവാഹപ്പന്തലൊരുങ്ങി. 

ഗല്ലിംകാരനായ, ഫാല്‍ത്തിയെന്ന പ്രഭുകുമാരൻ വരനായെത്തി. 

കരഞ്ഞുതളർന്ന മിഖാൽ, പിതാവിൻ്റെ ഉഗ്രശാസനത്തിനു വഴങ്ങി, ഒരിക്കൽക്കൂടെ വിവാഹവസ്ത്രമണിഞ്ഞു... 

ജോനാഥൻ എല്ലാക്കാര്യങ്ങളിൽനിന്നും വിട്ടുനിന്നു. വിവാഹഘോഷങ്ങൾ അഭംഗുരംനടക്കുമ്പോഴും ജോനാഥൻ തൻ്റെ മുറിക്കുള്ളിൽനിന്നു പുറത്തിറങ്ങിയില്ല.

ഫാൽത്തിയുടെ വധുവായെത്തിയപ്പോഴും മിഖാലിൻ്റെ ഹൃദയത്തിൽ, ഒരിടയച്ചെറുക്കൻ്റെ കിന്നരഗീതങ്ങൾമാത്രമാണു മുഴങ്ങിക്കൊണ്ടിരുന്നത്. ആ കൈകളിലൊരു കിന്നരവീണയായി, പ്രണയസംഗീതംപൊഴിക്കാൻ ഇനിയൊരിക്കലുമാകില്ലല്ലോയെന്ന ചിന്തയിൽ അവളുടെ ഹൃദയം പൊള്ളി. എങ്കിലുമാഹൃദയത്തിൽ, ദാവീദൊഴികെ മറ്റാർക്കുമിടമില്ലായിരുന്നു. 

അന്നുരാത്രിയിൽ, സാമുവൽപ്രവാചകൻ്റെ ദേഹി, നശ്വരമായ ദേഹമുപേക്ഷിച്ചു നിത്യതയിലേക്കു യാത്രയായി.

ഹക്കീലാക്കുന്നുകൾക്കുമപ്പുറത്തുനിന്നുദിച്ചുയർന്ന ബാലസൂര്യനെ,  കാർമേഘങ്ങളുടെ സൈന്യം, വളഞ്ഞാക്രമിച്ചു. അതുകണ്ടു ഭയന്ന പ്രകൃതി, ചെറിയചലനംപോലുമില്ലാതെ ശ്വാസമടക്കിനിന്നു. 

കഴിഞ്ഞ രാത്രിയിൽ ദാവീദിനുറങ്ങാൻകഴിഞ്ഞിരുന്നില്ല. മനസ്സിനുള്ളിൽ അകാരണമായൊരു ഭീതി..  എന്തെന്നറിയാത്ത എന്തൊക്കെയോ അസ്വസ്ഥതകൾ.. കടുത്ത ഉഷ്ണത്തിൽ അവൻ്റെ ശരീരമാകെ വിയർത്തൊലിച്ചിരുന്നു.

പ്രഭാതത്തിലെ ആദ്യപ്രകാശകിരണങ്ങൾ ഭൂമിയിൽ പതിച്ചപ്പോൾത്തന്നെ ദാവീദ് ഗുഹയിൽനിന്നു പുറത്തിറങ്ങി. കാർമേഘങ്ങൾനിറഞ്ഞു മൂകമായി നിൽക്കുകയാണാകാശം. മഴക്കാലമല്ലാതിരുന്നിട്ടും എവിടെനിന്നെത്തിയീ മേഘങ്ങൾ?

അനിലൻ ഏതോ ഗുഹയ്ക്കുള്ളിൽ ശ്വാസമടക്കിക്കിടന്നുറങ്ങുകയാണിപ്പോഴും. കിളികളുടെ ശബ്ദങ്ങളും കേൾക്കാനില്ല. നിശ്ശബ്ദതയെ ഭഞ്ജിച്ച്, ചീവിടുകൾമാത്രം എവിടെയോ മറഞ്ഞിരുന്ന്, ഉറക്കെക്കരയുന്നുണ്ട്...

ദാവീദ് ചുറ്റുമൊന്നു കണ്ണോടിച്ചു. കണ്ണെത്താദൂരത്തോളം ചെറുകുന്നുകളും മലകളും കാണാം. സമൃദ്ധമായിവളർന്ന പുൽമേടുകൾ.. അതിന്നിടയിൽ അങ്ങിങ്ങു ചില കുറ്റിച്ചെടികളല്ലാതെ വലിയ വൃക്ഷങ്ങളൊന്നും ഒരിടത്തും കാണാനില്ല.

അവൻ ഒരു പാറമേലിരുന്നു. അസ്വസ്ഥമായ തൻ്റെ മനസ്സിനെ യാഹ്വേയുടെ സന്നിധിയിലേക്കുയർത്താൻ ദാവീദ് ശ്രമിച്ചു. കണ്ണുകളടച്ച്, ശാന്തമായിരുന്ന ദാവിദിൻ്റെ ഹൃദയത്തിൽനിന്നുയർന്ന പ്രാർത്ഥനകൾ, ചുണ്ടുകളിൽ ഒരു സങ്കീർത്തനമായൊഴുകിയെത്തി.

"*സ്വർഗ്ഗത്തിൽവാഴുന്ന നാഥാ,  ഞാനെൻ്റെ

കണ്ണുകൾ നിൻനേർക്കുയർത്തും..

....................................................

....................................................

സുഖാലസർതൻ പരിഹാസം, 

അഹംഭാവികൾതൻ നിന്ദനങ്ങൾ...

സർവ്വംസഹിച്ചു തളർന്നോ-

രെൻ്റെ ഹൃത്തടംകാണണേ നാഥാ..."

"പ്രഭോ" 

അക്ഷാദെന്ന ചാരൻ്റെ ശബ്ദമാണു ദാവീദിനെ പ്രാർത്ഥനയിൽനിന്നുയർത്തിയത്.

നാട്ടിലെല്ലാം സഞ്ചരിച്ച്, നാട്ടുവാർത്തകളും അപായസൂചനകളുമറിഞ്ഞ്, യഥാസമയം ദാവീദിനെയറിയിക്കുന്ന സേവകരിലൊരാളായിരുന്നു അയാൾ.

അക്ഷാദിൽനിന്നുകേട്ട വർത്തമാനങ്ങൾ ദാവീദിൻ്റെ ഹൃദയം തകർത്തുകളയുന്നവയായിരുന്നു.!

"ഇന്നലെ മിഖാൽ രാജകുമാരി വീണ്ടും വിവാഹിതയായി..."

ദാവീദ് ഞെട്ടിപ്പോയി. ഈ നിമിഷംവരെ എൻ്റെ അത്മാവിൻ്റെ ഭാഗമായിരുന്നവൾ...  ആത്മാവിലും ശരീരത്തിലുമൊന്നായി അലിഞ്ഞുചേർന്നിരുന്നവൾ... ഇന്നിതാ തികച്ചുമൊരന്യയായിരിക്കുന്നുവെന്നോ..? മിഖാൽ.. നിനക്കിതെങ്ങനെ ചെയ്യാൻകഴിഞ്ഞു?!

സാവൂളിൻ്റെ കിങ്കരന്മാരിൽനിന്നു രക്ഷപ്പെട്ട്, മുറിയുടെ ജനാലവഴി, താഴേയ്ക്കിറങ്ങാൻ ദാവീദിനെ സഹായിച്ചത്, അവൻ്റെ ഭാര്യയായ മിഖാലാണ്. 

ദാവീദിനെ നെഞ്ചോടുചേർത്തു പുണർന്നുകൊണ്ട്, മിഖാൽ പറഞ്ഞു. "ഇനിയുമിവിടെ നിൽക്കുന്നതപകടമാണ്. എത്രയുംവേഗം രക്ഷപ്പെടൂ.. അങ്ങു തിരികെവരുന്നതുവരെ പ്രാർത്ഥനയോടെ ഞാനങ്ങയെക്കാത്തിരിക്കും. അങ്ങെവിടെയായാലും എൻ്റെ ഹൃദയം അങ്ങയോടൊപ്പമായിരിക്കും.."

മിഖാലിൻ്റെ ചുണ്ടുകൾ ദാവീദിൻ്റെ ചുണ്ടുകളിലമർന്നു.

ദാവീദ് സ്വയമറിയാതെ തൻ്റെ ചുണ്ടുകളിൽ വിരലോടിച്ചു. അന്നത്തെയാ ചുംബനത്തിൻ്റെ ലഹരി, ഇപ്പോഴുമീ ചുണ്ടുകളിലുണ്ട്...

''മിഖാൽ, നീയെന്നെ തോല്പിച്ചുവെന്നു കരുതണ്ടാ. ഈ നിമിഷംവരെ നീയൊഴികെ വേറൊരു പെണ്ണിനെക്കുറിച്ചു ഞാൻ ചിന്തിച്ചിട്ടില്ല. ഇനിയതു വേണ്ടാ... എൻ്റെയോർമ്മകളിൽപ്പോലും അന്യൻ്റെ ഭാര്യയായിത്തീർന്ന നിൻ്റെ മുഖമുണ്ടായിക്കൂടാ..."

അക്ഷാദിൻ്റെ ശബ്ദം ചിന്തകളെ മുറിച്ചു. "മറ്റൊരു വാർത്തകൂടെയുണ്ടു പ്രഭോ. സാമുവൽപ്രവാചകൻ..."

കാൽമുട്ടുകൾ നിലത്തുകുത്തി, മുന്നോട്ടാഞ്ഞ്, മുഖം മണ്ണോടുചേർത്ത്, ദാവീദ് പൊട്ടിക്കരഞ്ഞു. 

ആടുകളെ മേയിച്ചുനടന്ന ഒരിടയച്ചെറുക്കൻ്റെ ശിരസ്സിൽ അഭിഷേകതൈലംപുരട്ടി വേർതിരിച്ചുനിറുത്തിയ ദൈവപുരുഷൻ...  അന്നുമുതലിന്നുവരെ, പിതാവിനേക്കാൾ കരുതലോടെ ചേർത്തുപിടിച്ചു വഴിനടത്തിയ ഗുരു...

"എൻ്റെ പിതാവേ..." സാമുവലിനെയോർത്ത്, ദാവീദ് ഉറക്കെക്കരഞ്ഞു. 

ഏതു ദുരന്തത്തിലും തണലേകുമെന്നു കരുതിയ രണ്ടു ദുർഗ്ഗങ്ങൾ ഒരേദിവസത്തിൽ തകർന്നടിഞ്ഞിരിക്കുന്നു. 

ഭാര്യയും ഗുരുവും തനിക്കു നഷ്ടപ്പെട്ടിരിക്കുന്നു.

അനുചരന്മാരെല്ലാം ദാവീദിനു ചുറ്റുംകൂടി. ആർക്കുമവനെയാശ്വസിപ്പിക്കാൻ കഴിഞ്ഞില്ല...

ദാവീദിൻ്റെ തീരാസങ്കടംകണ്ട  കാർമേഘങ്ങൾ നൊമ്പരത്തോടെ കണ്ണീർപൊഴിച്ചുതുടങ്ങി... ആർത്തലച്ചു കരഞ്ഞുകൊണ്ട്, മഴത്തുള്ളികൾ ഭൂമിയിൽപതിച്ചു...

----------------------------------------------------

*സങ്കീർത്തനം 123

103. കെയ്‌ലാ

ബൈബിൾക്കഥകൾ 103

ദാവീദ്, സാവൂൾരാജാവിൻ്റെ അപ്രീതിസമ്പാദിച്ചെന്നും സാവൂളിനെഭയന്ന് ദാവീദ് ഒളിവിൽക്കഴിയുകയാണെന്നുമറിഞ്ഞപ്പോൾ ഫിലിസ്ത്യർ സന്തോഷിച്ചു. അവർ ഇസ്രയേലിനെ ആക്രമിക്കാൻ തക്കംകൂട്ടി. ഇസ്രയേൽ അതിർത്തിയിലുള്ള കെയ്‌ലാ പട്ടണത്തിലേക്ക് അവർ പടനീക്കമാരംഭിച്ചു

ഫിലിസ്‌ത്യര്‍ കെയ്‌ലാ ആക്രമിക്കുന്നെന്നും കൊയ്തു മെതിക്കളങ്ങളിൽവച്ചിരിക്കുന്ന കറ്റകൾ കവര്‍ച്ചചെയ്യുന്നെന്നും ദാവീദറിഞ്ഞു 

ഫിലിസ്ത്യരെ ചെറുത്ത്, കെയ്ലാ സംരക്ഷിക്കാൻ ദാവീദാഗ്രഹിച്ചു. എന്നാൽ അവൻ്റെ സംഘത്തിലുള്ളവർ അതിനോടു യോജിച്ചില്ല.

:"സാവൂൾരാജാവിനെ ഭയന്നാണു

നമ്മള്‍ യൂദായില്‍ത്തന്നെ കഴിയുന്നത്‌? ഫിലിസ്‌ത്യരെനേരിടാന്‍ കെയ്‌ലായിലേക്കു പോയാലുള്ള അവസ്ഥയെന്താകും? എണ്ണത്തിൽക്കുറവായതിനാൽ, ഒന്നുകിൽ നമ്മൾ ഫിലിസ്ത്യരുടെ കൈയിലകപ്പെടും. അല്ലെങ്കിൽ സാവൂളിൻ്റെ കരങ്ങളിലേല്പിക്കപ്പെടും."

ദാവീദ് പറഞ്ഞു. "മാതൃഭൂമിയെ ശത്രുക്കളാക്രമിക്കുമ്പോൾ നമ്മൾ നിസ്സംഗരായിനിൽക്കുന്നതെങ്ങനെ? സൈനികരുടെ എണ്ണത്താലല്ലാ, കർത്താവിൻ്റെ കൃപയാലാണു യുദ്ധത്തിലെ വിജയംനിർണ്ണയിക്കപ്പെടുന്നത്. നമുക്കു കർത്താവിനോടു പ്രാർത്ഥിക്കാം. അവിടുന്നരുൾചെയ്യുന്നതനുസരിക്കാം."

ദാവീദും അനുചരന്മാരും അഹിമലെക്കിന്റെ പുത്രനായ അബിയാഥറിനൊപ്പം കർത്താവിനോടു പ്രാർത്ഥിച്ചു.

കര്‍ത്താവ്‌ അവർക്കുത്തരം നല്കി: "കെയ്‌ലായിലേക്കു പോകുക. ഫിലിസ്‌ത്യരെ ഞാന്‍ നിങ്ങളുടെ കൈകളിലേല്പിക്കും."

 പിന്നെ വൈകിയില്ല. അനുചരന്മാരായ നാന്നൂറുപേരും കെയ്‌ലായിലേക്കു പുറപ്പെട്ടു. ദാവീദെത്തിയെന്നറിഞ്ഞപ്പോൾത്തന്നെ ഫിലിസ്ത്യസേനയിൽ ഭയമുളവായി. 

കെയ്‌ലാ, ചുറ്റംകോട്ടയും കവാടങ്ങളുമുള്ളൊരു പട്ടണമായിരുന്നു. പ്രധാനകവാടത്തിലൂടെ പട്ടണത്തിലേക്കുകടന്ന

ദാവീദും സംഘവും ശത്രുസൈന്യവുമായി ഏറ്റുമുട്ടി. നിരവധി ഫിലിസ്ത്യർ വധിക്കപ്പെട്ടു. അവശേഷിച്ചവർ പിന്തിരിഞ്ഞോടി. 

ഫിലിസ്ത്യർ അപഹരിച്ചതൊക്കെയും ദാവീദ് തിരികെപ്പിടിച്ചു. ദാവീദിൻ്റെ അനുചരന്മാരിൽ ഒരാൾക്കുപോലും ജീവൻ നഷ്ടപ്പെട്ടില്ല.

ഫിലിസ്ത്യർ ആക്രമണത്തിനെത്തിയെന്നറിഞ്ഞപ്പോൾ

കെയ്‌ലായിലേക്കു പുറപ്പെടാൻ സാവൂൾ സൈന്യത്തെയൊരുക്കി. അപ്പോഴേയ്ക്കും ദാവീദ്‌ കെയ്‌ലാനിവാസികളെ ഫിലിസ്ത്യരിൽനിന്നു രക്ഷിച്ചുവെന്ന് സാവുളറിഞ്ഞു.

അതൊരു സന്തോഷവാർത്തയാണെന്നു സാവൂൾരാജാവിനു തോന്നി. സാവൂൾ ഉന്മാദത്തോടെ ചിരിച്ചു.... 

"ഇതാ, ദൈവമവനെ എന്റെ കൈയിലേല്പിച്ചിരിക്കുന്നു. അവൻ ഇസ്രായേൽജനതയുടെമുമ്പിൽ സാവൂളിനെക്കാൾ കേമനാകാൻശ്രമിച്ചു. എനിക്കുമുമ്പേ കെയ്‌ലായിലെത്തി ഫിലിസ്ത്യരെത്തുരത്തി. എന്നാൽ ഇരിമ്പുവാതിലുകളും ഓടാമ്പലുകളുമുള്ള പട്ടണത്തില്‍പ്രവേശിച്ച്‌, അവന്‍ സ്വയം കുടുങ്ങിയിരിക്കുന്നു..."

കെയ്‌ലായില്‍ച്ചെന്ന്‌ ദാവീദിനെയും കൂട്ടരെയുമാക്രമിക്കാനായി സാവൂൾ സൈന്യവുമായി പുറപ്പെട്ടു. 

യുദ്ധവിജയത്തിനു നന്ദിപറഞ്ഞുകൊണ്ട്,

ദാവീദ്‌ കർത്താവിനോടു പ്രാർത്ഥിച്ചു. 

അഹിമലെക്കിന്റെ പുത്രനായ അബിയാഥറിലൂടെ കർത്താവ് ദാവീദിനോടു പറഞ്ഞു. "നിന്നെപ്രതി, കെയ്‌ലായെ നശിപ്പിക്കാൻ സാവൂൾ നിശ്ചയിച്ചിരിക്കുന്നു. നിന്നെ സാവൂളിൻ്റെ കൈയിലേല്പിക്കാൻ തീരുമാനമെടുത്ത ചിലർ ഈ പട്ടണത്തിലുണ്ട്. അതിനാൽ ഇവിടംവിട്ടു പുറത്തുപോകുക. ഞാൻ നിന്നോടൊപ്പമുണ്ടായിരിക്കും.."

ദാവീദ് കർത്താവിനെയനുസരിച്ചു. തൻ്റെ അനുചരന്മാർക്കൊപ്പം പട്ടണകവാടത്തിൽനിന്നു പുറത്തിറങ്ങി. കെയ്‌ലായിൽനിന്നുള്ള കുറേ ചെറുപ്പക്കാർ ദാവീദിൻ്റെ സംഘത്തിൽച്ചേർന്നതിനാൽ ദാവീദിൻ്റെ അനുചരരന്മാരുടെ എണ്ണം അറുന്നൂറിലധികമായി.

ദാവീദ് കെയ്‌ലായില്‍നിന്നു രക്ഷപെട്ടുവെന്നു സാവൂൾരാജാവറിഞ്ഞു. അതിനാൽ സാവൂളും സംഘവും പാതിവഴിയിൽ യാത്രനിറുത്തി മടങ്ങിപ്പോയി.

ദാവീദ്‌, സിഫ്‌ മരുഭൂമിയിലെ ഹോറെഷ്ക്കുന്നുകളിൽ ഒളിത്താവളംകണ്ടെത്തി. അതറിഞ്ഞ സിഫ് നിവാസികളായ ചിലർ കൊട്ടാരത്തിലെത്തി, സാവൂളിനെ മുഖംകാണിച്ചു. 

"ഞങ്ങളുടെ ഗ്രാമത്തിനുസമീപം ഹോറെഷിലുള്ള കുന്നിൻപ്രദേശത്തുള്ള സങ്കേതങ്ങളില്‍ അങ്ങയുടെ ശത്രുവായ ദാവീദും സംഘവും  ഒളിച്ചുപാർക്കുന്നുണ്ട്. ആകയാല്‍, മഹാരാജാവേ, അങ്ങേയ്ക്കിഷ്‌ടമുള്ളപ്പോള്‍ അവിടേയ്ക്കു വരിക. അവനെ അങ്ങയുടെ കൈയിലേല്പിച്ചുതരുന്നകാര്യം ഞങ്ങളേറ്റിരിക്കുന്നു."

സാവൂള്‍ പറഞ്ഞു: "കര്‍ത്താവു നിങ്ങളെയനുഗ്രഹിക്കട്ടെ! നിങ്ങള്‍ക്ക്‌, എന്നോടു ദയതോന്നാനിടയായല്ലോ. നിങ്ങള്‍പോയി സൂക്ഷ്‌മമായന്വേഷിക്കുവിന്‍. അവന്റെ ഒളിസ്‌ഥലം കൃത്യമായി മനസ്സിലാക്കണം. അവന്‍ വലിയ തന്ത്രശാലിയാണെന്നോർമ്മവേണം. അതിനാൽ അവനു സംശയംതോന്നാത്തവണ്ണം വിവരങ്ങൾ ശേഖരിക്കണം

അവന്റെ ഒളിസ്ഥലങ്ങളെല്ലാം കണ്ടുപിടിച്ചതിനുശേഷം തിരികെവന്ന് എന്നെയറിയിക്കുവിന്‍. അപ്പോള്‍ ഞാന്‍ നിങ്ങളോടുകൂടെ വരാം." 

സിഫിൽനിന്നു വന്നവർക്കു് കൈനിറയെ സമ്മാനങ്ങൾ നല്കി, സാവൂളവരെ യാത്രയാക്കി.

ജോനാഥാന്‍ ഹോറെഷിലെത്തി ദാവീദിനെക്കണ്ടു. സിഫ് നിവാസികളുടെ സഹായത്തോടെ ദാവീദിനെപ്പിടികൂടാൻ സാവൂൾരാജാവു തയ്യാറാക്കുന്ന പദ്ധതിയെക്കുറിച്ച് അവൻ ദാവീദിനെയറിയിച്ചു.

"ഭയപ്പെടേണ്ട, എന്റെ പിതാവിനു നിന്നെ പിടികിട്ടുകയില്ല. നീ ഇസ്രായേലിന്റെ രാജാവാകുമെന്നതു കർത്താവിൻ്റെ നിശ്ചയമാണ്. ഞാന്‍ നിനക്കു രണ്ടാമനായിരിക്കും. എന്റെ പിതാവിനുമിതറിയാം. എന്നിട്ടും നിന്നെയില്ലാതാക്കാൻ ശ്രമിക്കുമ്പോൾ, കർത്താവിനെതിരായാണു പടവെട്ടുന്നതെന്നുതിരിച്ചറിയാൻ അദ്ദേഹത്തിനു കഴിയുന്നില്ല."

കര്‍ത്താവിന്റെ സന്നിധിയില്‍ ജോനാഥനും ദാവീദും തങ്ങളുടെ ഉടമ്പടി പുതുക്കി. ജോനാഥാന്‍ കൊട്ടാരത്തിലേക്കു തിരിച്ചുപോയി. 

ദാവീദും സംഘവും അന്നുതന്നെ സിഫിൽനിന്ന്, അരാബായിലെ മാവോന്‍മരുഭൂമിയിലേക്കു പോയി. 

സാവൂൾ സൈന്യസമേതം സിഫിലേക്കു പുറപ്പെട്ടു. പാതിദൂരമെത്തിയപ്പോൾ, ദാവീദ് അരാബായിലേക്കു രക്ഷപ്പെട്ടെന്ന വിവരം സാവൂളറിഞ്ഞു. അതിനാൽ അവർ അരാബായിലേക്കു തിരിച്ചു.

പതിനായിരക്കണക്കിനംഗബലമുള്ള ഇസ്രായേൽസൈന്യം തങ്ങളുടെനേരേ വരുന്നത്, മാവോൻമരുഭൂമിയിലെ പാറക്കെട്ടുകൾക്കിടയിലെ ഒളിയിടങ്ങളിലിരുന്ന ദാവീദും സംഘവും കണ്ടു. സാവൂളിൻ്റെയും സൈന്യത്തിൻ്റെയും ദൃഷ്ടിയിൽപ്പെടാതെ, അവർ മലയുടെ മറുവശത്തേക്കിറങ്ങി. 

സാവൂളും സൈന്യവും മലയുടെ താഴ്വാരത്തിലെത്തി. ദാവീദ്, പാറക്കെട്ടിൻ്റെ ഒരു വശത്തും സാവൂൾ അതിന്റെ മറുവശത്തുമായി. 

സാവൂളിൻ്റെ സംഘത്തിലെ ആരുടെയെങ്കിലും കണ്ണിൽപ്പെട്ടാൽ മുഴുവൻപേരും പിടിക്കപ്പെടുമെന്നുറപ്പായിരുന്നതിനാൽ ദാവീദും കൂട്ടരും ജാഗ്രതയോടെ നിലയുറപ്പിച്ചു.

102.പുരോഹിതരുടെ രക്തം

ബൈബിൾക്കഥകൾ 102

സാമുവൽപ്രവാചകന്റെ സമീപമെത്തിയ സാവൂൾ, പ്രവാചകനോടൊപ്പം പ്രാർത്ഥിക്കുകയും പ്രവചിക്കുകയുംചെയ്തു.  ദാവീദിനെ ഉപദ്രവിക്കില്ലെന്ന്, പ്രവാചകനു സാവൂൾ വാക്കുകൊടുത്തു. ദാവീദിനെയന്വേഷിച്ചുപോയ മുഴുവൻ സൈനികരോടുമൊപ്പം സാവൂൾ കൊട്ടാരത്തിലേക്കുമടങ്ങി.

എന്നാൽ ജറുസലേമിൽ മടങ്ങിയെത്തുന്നതിനുമുമ്പേ സാമുവേൽപ്രവാചകനു സാവൂൾനല്കിയ ഉറപ്പെല്ലാം കാറ്റിൽപ്പറന്നിരുന്നു. ദാവീദ് ജോനാഥനെ വന്നുകണ്ടുവെന്നും ജോനാഥൻ അവനെ സഹായിച്ചെന്നും സാവൂളറിഞ്ഞു. അയാൾ കോപാക്രാന്തനായി.

സാവൂൾ ജോനാഥനോടു കയർത്തു: "നീ നിൻ്റെ പിതാവിനെതിരായി, ജസ്സെയുടെ പുത്രന്റെ പക്ഷംചേര്‍ന്നിരിക്കുന്നോ? ഒന്നോർത്തോളൂ...

അവന്‍ ജീവിച്ചിരിക്കുന്നിടത്തോളംകാലം നിനക്കു രാജാവാകാനോ ബഞ്ചമിൻഗോത്രത്തിൻ്റെ രാജത്വം നിലനിർത്താനോ സാധിക്കില്ല. അതുകൊണ്ട്‌, നീതന്നെ അവനെ ആളയച്ചുവിളിച്ച് എന്റെയടുത്തുകൊണ്ടു വരൂ. അവന്‍ മരിക്കേണ്ടവനാണ്..."

ജോനാഥാന്‍ചോദിച്ചു: "എന്തിനവനെ വധിക്കണം? എന്താണവൻചെയ്‌ത കുറ്റം?"

ആ ചോദ്യത്തിനുത്തരംനല്കുന്നതിനു പകരം സാവൂള്‍ ജോനാഥാനെക്കൊല്ലാന്‍ അവന്റെനേരേ കുന്തമെറിഞ്ഞു. 

ജോനാഥൻ അതിൽനിന്നൊഴിഞ്ഞുമാറി. അവിടെനിന്നോടി രക്ഷപ്പെട്ടു.

ദാവീദ്‌ നോബിൽ, അഹിമലേക്കിൻ്റെയടുത്തുനിന്നു പുറപ്പെട്ട്,, വനത്തോടുചേർന്നു സ്ഥിതിചെയ്യുന്ന അദുല്ലാംപ്രദേശത്തെ വിശാലമായൊരു ഗുഹയിലെത്തി. 

ദാവീദിൻ്റെ വിശ്വസ്തരായ ചില ഭടന്മാരും അവൻ്റെ മാതാപിതാക്കളും സഹോദരന്മാരുമടക്കമുള്ള കുടുംബംമുഴുവനും അവിടെ അവനെക്കാത്തിരിപ്പുണ്ടായിരുന്നു

തനിക്കൊപ്പം ചേർന്നവരെ അദുല്ലാം ഗുയിൽനിറുത്തി, ദാവീദ്‌,  മൊവാബിലുള്ള മിസ്‌പേയിലെത്തി, മൊവാബുരാജാവിനോടു സഹായമപേക്ഷിച്ചു.

 "എൻ്റെയും കുടുംബാംഗങ്ങളുടേയും ജീവരക്ഷയ്ക്കായി, സ്വന്തദേശത്തുനിന്ന് എനിക്കു പലായനംചെയ്യേണ്ടതായിവന്നിരിക്കുന്നു. എന്റെ പ്രപിതാമഹി മൊവാബ്യവംശജയായതിനാൽ മൊവാബ്യരുടെ അധിപനായ അങ്ങേയ്ക്കുമുമ്പിൽ സഹായത്തിനായി ഞാൻ ശിരസ്സുനമിക്കുന്നു.

ദൈവം എനിക്കുവേണ്ടി എന്താണുചെയ്യാന്‍പോകുന്നതെന്നറിയുന്നതുവരെ എന്റെ മാതാപിതാക്കളേയും ബന്ധുക്കളായ സ്ത്രീകളേയും ബാലകരേയും അങ്ങയുടെ സംരക്ഷണത്തിൽക്കഴിയാൻ അനുവദിക്കണം."

മൊവാബുരാജാവ് ദാവീദിൻ്റെ സഹായാഭ്യർത്ഥന സ്വീകരിച്ചു. യുദ്ധംചെയ്യാൻ പ്രാപ്തരായ പുരുഷന്മാരൊഴികെ എല്ലാവരേയും മൊവാബുരാജാവിൻ്റെ സംരക്ഷണയിലേല്പിച്ചു. 

ദാവീദും അനുചരന്മാരും അദുല്ലാംഗുഹയിൽത്തന്നെ താമസിച്ചു. യുദ്ധംചെയ്യാൻശക്തരായ. നാനൂറോളംപേര്‍ ആ സംഘത്തിലുണ്ടായിരുന്നു.

ഏദോമ്യനായ ദോയെഗ്‌ സാവൂൾരാജാവിനെ മുഖം കാണിച്ചു അവൻ സാവൂളിനോടു പറഞ്ഞു: "ജസ്സെയുടെ മകനെ ഞാന്‍ കണ്ടു. നോബിലെ ദേവാലയത്തില്‍, പുരോഹിതനായ അഹിമലെക്കിന്റെയടുത്ത് അവനുണ്ടായിരുന്നു. അഹിമലെക്ക്‌ അവനുവേണ്ടി കര്‍ത്താവിനോടു പ്രാര്‍ത്ഥിച്ചു; അവനു ഭക്ഷണവും  ഗോലിയാത്തിന്റെ വാളും കൊടുത്തു."

സാവൂൾ അഹിമലെക്കിനെയും അവന്റെ കുടുംബാംഗങ്ങളേയും നോബിലുള്ള എല്ലാ പുരോഹിതന്മാരെയും ആളയച്ചു കൊട്ടാരത്തിലേക്കുവരുത്തി. 

സാവൂള്‍രാജാവ്  അഹിമലെക്കിനോടു

പറഞ്ഞു: "അഹിത്തൂബിന്റെ പുത്രാ, നീയും ജസ്സെയുടെ മകനുംചേർന്ന് എനിക്കെതിരായി ഗൂഢാലോചനനടത്തിയതെന്തിന്? അവനു നീ അപ്പവും വാളുംകൊടുക്കുകയും അവനുവേണ്ടി കര്‍ത്താവിനോടു പ്രാർത്ഥിക്കുകയുംചെയ്‌തില്ലേ? അതുകൊണ്ടല്ലേ, അവന്‍ എനിക്കെതിരായി പ്രവര്‍ത്തിക്കുന്നത്‌?"

അഹിമലെക്ക്‌ മറുപടി പറഞ്ഞു: "മഹാരാജാവേ, അങ്ങയുടെ ഈ ദാസൻ്റേയോ കുടുംബാംഗങ്ങളുടേയോ ഈ പുരോഹിതരുടേയേമേൽ ഗൂഢാലോചനക്കുറ്റമാരോപിക്കരുതേ...!

ദാവീദ് അങ്ങയുടെ മരുമകനും സഹസ്രാധിപനും ഇസ്രായേലിൽ സർവ്വർക്കുമാദരീയണനുമല്ലേ? പുരോഹിതരായ ഞങ്ങൾ,

അവനുവേണ്ടി മുമ്പും കർത്താവിൻ്റെ ഹിതമാരാഞ്ഞിട്ടുണ്ടെന്ന് അങ്ങേയ്ക്കറിവുള്ളതാണല്ലോ. 

അങ്ങയുടെ സേവകന്മാരില്‍ ദാവീദിനെപ്പോലെ വിശ്വസ്‌തനായി വേറെയാരാണുള്ളത്? എന്നാലവനിപ്പോൾ അങ്ങേയ്ക്കെതിരാണെന്ന് ഈ ദാസനറിഞ്ഞിരുന്നില്ല."

രാജാവ്‌ പറഞ്ഞു: "ഹിത്യനായ ദോയഗ് നിന്നെക്കുറിച്ചു പറഞ്ഞതെല്ലാം സത്യമാണെന്ന് നീതന്നെ ഇപ്പോൾ സാക്ഷ്യപ്പെടുത്തിയിരിക്കുന്നു. രാജദ്രോഹികൾക്കുള്ള ശിക്ഷയെന്തെന്ന് ഇസ്രായേലിൽ എല്ലാവരുമറിയണം; അഹിമലെക്ക്‌, നീയും നിന്റെ കുടുംബവും മരിക്കണം..."

മറ്റു പുരോഹിതന്മാർക്കും സാവൂൾ വധശിക്ഷതന്നെ വിധിച്ചു. അടുത്തുനിന്ന അംഗരക്ഷകനോട് അവനാജ്ഞാപിച്ചു:  

"ഈ പുരോഹിതന്മാരെയെല്ലാം ഇപ്പോൾത്തന്നെ വധിക്കുക. അവരും ദാവീദിനോടു ചേര്‍ന്നിരിക്കുന്നു. അവന്‍ ഒളിച്ചോടിയതറിഞ്ഞിട്ടും അവരിലൊരുവൻപോലും അതെന്നെയറിയിച്ചില്ല." 

എന്നാല്‍ കര്‍ത്താവിന്റെ പുരോഹിതന്മാരുടെമേല്‍ കൈവയ്‌ക്കാന്‍ രാജഭൃത്യന്മാർ ഭയന്നു. സാവൂൾരാജാവ്‌ കൂടുതൽ കോപിഷ്ടനായി. അവൻ ദോയെഗിനോടു കല്പിച്ചു: ''നീതന്നെ ഈ പുരോഹിതന്മാരെ വധിക്കുക."

ദോയെഗ്‌ രാജകല്പന നിറവേറ്റി.. അഹിമലേക്കിൻ്റെ കുടുംബാംഗങ്ങളടക്കം എണ്‍പത്തഞ്ചുപേർ അന്നവൻ്റെ വാളിനിരയായി.

അഹിമലെക്കിന്റെ പുത്രന്മാരിലൊരുവനായ അബിയാഥര്‍ അന്നു സ്ഥലത്തുണ്ടായിരുന്നില്ല. തൻ്റെ കുടുംബത്തിൻ്റെ ദുര്യോഗമറിഞ്ഞ അബിയാഥർ ദാവീദിൻ്റെപക്കൽ അഭയംതേടി.

കുറച്ചുദിനങ്ങൾക്കപ്പുറം

പ്രവാചകനായ ഗാദ്‌, അദുല്ലാംഗുഹയിലെത്തി. ഗാദ് ദാവീദിനോടു പറഞ്ഞു: "നിൻ്റെ ഒളിസങ്കേതത്തില്‍നിന്നു പുറത്തിറങ്ങി, യൂദാദേശത്തേക്കു പോവുക. കർത്താവ് നിന്നോടുകൂടെയുണ്ടായിരിക്കും" 

പ്രവാചകനിലൂടെ സംസാരിച്ച കർത്താവിൻ്റെ വാക്കുകൾ ദാവീദനുസരിച്ചു അവൻ തൻ്റെ അനുയായികൾക്കൊപ്പം യൂദായിലെ ഹേരെത്ത് എന്ന വനപ്രദേശത്തെത്തി.

101. പലായനം

ബൈബിൾക്കഥകൾ 101

ദാവീദിനെ പിടികൂടാനെത്തിയ ഭടന്മാർ, റാമാപട്ടണത്തിലെ നയോത്തിൽ, സാമുവേൽപ്രവാചകന്റെ ഭവനത്തിലെത്തി. സാമുവൽ അവർക്കായി പ്രാർത്ഥിച്ചു. അവരിൽ ദൈവാത്മാവു നിറഞ്ഞപ്പോൾ അവർക്കു രാജശാസനത്തെ അവഗണിക്കാനുള്ള ധൈര്യമുണ്ടായി. അവർ പ്രവാചകനോടൊപ്പം താമസിച്ചു.

ആദ്യസംഘം തിരികെയെത്താതായപ്പോൾ, സാവൂൾ വീണ്ടും ഭടന്മാരുടെ ഒരു സംഘത്തെക്കൂടെ അയച്ചു. അവരും ദാവീദിനെ ബന്ധിക്കുകയോ സാമുവൽപ്രവാചകന്റെയടുത്തുനിന്നു മടങ്ങിപ്പോകുകയോ ചെയ്തില്ല.

മൂന്നാമത്തെ സംഘവും ആദ്യരണ്ടു സംഘങ്ങളെപ്പോലെതന്നെ തിരികെയെത്താതായപ്പോൾ, മറ്റൊരു സംഘത്തെ നയിച്ചുകൊണ്ട്, സാവൂൾനേരിട്ട് നയോത്തിലേക്കു തിരിച്ചു.

സാവൂൾ നയോത്തിലേക്കുതിരിച്ചെന്നറിഞ്ഞപ്പോൾ, ദാവീദ്, മറ്റൊരു വഴിയിലൂടെ ബത്ലഹേമിലെത്തി, ജോനാഥനെക്കണ്ടു.

ജോനാഥാനും ദാവീദും പരസ്‌പരം ആലിംഗനംചെയ്തു. ദാവീദിനു പരിസരബോധംവരുന്നതുവരെ അവര്‍ കരഞ്ഞു.

ജോനാഥാന്‍ അവനോടു പറഞ്ഞു:  "എന്റെ പിതാവു നിന്നോടു ശത്രുതകാട്ടുന്നതെന്തിനാണെന്നെനിക്കറിയില്ല. രാജസിംഹാസനം എന്നെ ഭ്രമിപ്പിക്കുന്നുമില്ല. എന്റെ പിതാവിനുശേഷം ഇസ്രായേലിന്റെ സിംഹാസനാവകാശിയായി കർത്താവു നിന്നെയാണു നിശ്ചയിച്ചിരിക്കുന്നതെങ്കിൽ അതു തടയാൻ ഞാനാരാണ്? കര്‍ത്താവ്‌ ദാവീദിന്റെ ശത്രുക്കളെയെല്ലാം ഭൂമുഖത്തുനിന്ന്‌ ഉന്മൂലനംചെയ്യുമ്പോള്‍ ജോനാഥാന്റെയും സാവൂളിന്റെയും നാമങ്ങൾ ഇസ്രായേലിൽനിന്നു വിച്ഛേദിക്കപ്പെടാതിരിക്കട്ടെയെന്നുമാത്രം ഞാൻ പ്രാർത്ഥിക്കുന്നു! 

നീ സമാധാനത്തോടെ പോവുക; കര്‍ത്താവ്‌, എനിക്കും നിനക്കും എന്റെ സന്തതികള്‍ക്കും നിന്റെ സന്തതികള്‍ക്കുംമദ്ധ്യേ എന്നും സാക്ഷിയായിരിക്കട്ടെയെന്ന്, കര്‍ത്താവിന്റെ നാമത്തില്‍ നമ്മൾ സത്യംചെയ്‌തിട്ടുള്ളതല്ലേ? എന്റെ ഹൃദയം എപ്പോഴും നിന്നോടൊപ്പമുണ്ടായിരിക്കും."

ഒരിക്കൽക്കൂടെ ദാവീദിനെ ആലിംഗനംചെയ്തശേഷം ജോനാഥാന്‍ ജറുസലേമിലേക്കു മടങ്ങിപ്പോയി.

തന്റെ സൈനികദളത്തിൽപ്പെട്ട വിശ്വസ്തരായ ചില സൈനികരോട് ഗത്ത് രാജ്യവുമായുള്ള ഇസ്രയേലിന്റെ അതിർത്തിയായ നോബ് ഗ്രാമത്തിലെത്താൻ ഏർപ്പാടുചെയ്തശേഷം ദാവീദ് ബത്ലഹേമിൽനിന്നു യാത്രയായി.

അന്നുതന്നെ ദാവീദ്, ഗത്ത് അതിർത്തിയിലെത്തി. എന്നാലവിടെ മറ്റൊരു ദുർവിധി അവനെക്കാത്തിരിക്കുന്നുണ്ടായിരുന്നു. ഗത്ത്‌ രാജാവായ അക്കീഷിന്റെ ഭടന്മാരുടെ കൈകളിൽ അവനകപ്പെട്ടു.

അക്കീഷിന്റെ ഭടന്മാര്‍തമ്മിൽ പറഞ്ഞു: "ഇവൻ ദാവീദല്ലേ? '.'സാവൂള്‍ ആയിരങ്ങളെക്കൊന്നു; ദാവീദോ, പതിനായിരങ്ങളെയു'മെന്ന്‌ ഇസ്രായേൽക്കാർ പാടി  നൃത്തംചെയ്‌തത്‌ ഇവനെക്കുറിച്ചല്ലേ?"

അവരവനെ ബന്ധിച്ച്, ഗത്തിലെ രാജാവായ അക്കീഷിന്റെ കൊട്ടാരത്തിലെത്തിച്ചു. രാജസന്നിധിയിലെത്തിയപ്പോൾ, ദാവീദ് താടിയിലൂടെ തുപ്പലൊലിപ്പിച്ചു. പരസ്പരബന്ധമില്ലാത്ത കാര്യങ്ങൾ സംസാരിക്കുകയും ഭ്രാന്തനെപ്പോലെ ചിരിക്കുകയുംചെയ്തു. 

അക്കീഷിന്റെ ചോദ്യങ്ങൾക്ക്, ഭ്രാന്തമായ മറുപടികളാണു ദാവീദ് നല്കിയത്. അവൻ രാജാവിനുമുമ്പിൽ ചിരിക്കുകയും കരയുകയുംചെയ്തു. തറയിൽക്കിടന്നുരുണ്ടു.

അക്കീഷ്‌ ഭൃത്യന്മാരോടു ചോദിച്ചു: "ഇവന്‍ ഭ്രാന്തനാണെന്നു നിങ്ങള്‍ കാണുന്നില്ലേ? എന്റെ മുമ്പിൽ ഭ്രാന്തുകളിപ്പിക്കാന്‍ ഇവനെയെന്തിനിവിടെ കൊണ്ടുവന്നു? ഗത്തിൽ ഭ്രാന്തന്മാർക്കു കുറവുണ്ടോ?"

അക്കീഷിന്റെ കല്പനപ്രകാരം ഭടന്മാരവനെ അതിർത്തിയിലേക്കു തിരികെക്കൊണ്ടുപോയി. ഗത്തിന്റെ അതിർത്തിയിൽനിന്നു നോബിലേക്കോടിച്ചു.

അവൻ നോബില്‍, പുരോഹിതനായ അഹിമലെക്കിന്റെയടുത്തെത്തി. 

ദാവീദിനെക്കണ്ടപ്പോൾ അഹിമലെക്ക്‌ അവനെയെതിരേറ്റു 

"അങ്ങെന്താണു തനിച്ചു.വന്നിരിക്കുന്നത്? എന്തെങ്കിലും രഹസ്യദൗത്യമുണ്ടോ?"

ദാവീദ്‌ പറഞ്ഞു: "അതേ. മറ്റാരുമറിയാതെ ചെയ്യേണ്ട ഒരു ദൗത്യം രാജാവ് എന്നെയേല്പിച്ചിരിക്കുന്നു. എന്റെ ഭടന്മാരോട് ഇവിടെയടുത്തൊരു സ്ഥലത്തു കാത്തുനില്ക്കാൻ ഞാൻ കല്പിച്ചിട്ടുണ്ട്. 

രഹസ്യമായ യാത്രയായതിനാൽ ഒരിടത്തുനിന്നും ഭക്ഷണംകഴിക്കാൻ സാധിച്ചില്ല. അങ്ങയുടെ കൈവശമുണ്ടെങ്കിൽ അഞ്ചപ്പം എനിക്കുതരിക; ഇല്ലെങ്കില്‍, ഉള്ളതു തരിക."

അഹിമലേക്ക് പറഞ്ഞു: "കർത്താവിനർപ്പിച്ച വിശുദ്ധയപ്പമല്ലാതെ സാധാരണയപ്പമൊന്നും എന്റെ കൈവശമില്ല. അതുകൊണ്ട്, ഞാൻ പറയുന്നതു ക്ഷമിക്കണം, അങ്ങയും ഭൃത്യന്മാരും സ്‌ത്രീകളില്‍നിന്നകന്നുനിന്നവരാണെങ്കില്‍മാത്രമേ അതു തരാനാകൂ."

"സത്യമായും യാത്രപോകുമ്പോഴൊക്കെ ഞങ്ങള്‍ സ്‌ത്രീകളില്‍നിന്നകന്നിരിക്കും. സാധാരണയാത്രയില്‍പ്പോലും ഞാനുമെന്റെ ഭടന്മാരും ശുദ്ധിയുള്ളവയായിരിക്കും. ഈ യാത്രയാകട്ടെ അത്യന്തം പ്രധാനപ്പെട്ടതാണ്" ദാവീദ് മറുപടി നല്കി.

പുരോഹിതന്‍ ദാവീദിനു വിശുദ്ധയപ്പം കൊടുത്തു. 

സാവൂളിന്റെ വിശ്വസ്തനും കൊട്ടാരത്തിലെ ആടുമാടുകളുടെ പരിപാലനച്ചുമതലയുള്ളവനുമായ ദോയഗ് അപ്പോൾ അവിടെയെത്തി. സാവൂൾ ദാവീദിനെ വധിക്കാനായി അന്വേഷിക്കുന്നത് അവനറിയാമായിരുന്നു. 

പുരോഹിതനായ അഹിമലേക്ക് ദാവീദുമായി സംസാരിക്കുന്നതുകണ്ടപ്പോൾ, അയാൾ ദാവീദിനെ രഹസ്യമായി സഹായിക്കുന്നുണ്ടെന്നു ദോയഗിനുതോന്നി. അയാൾ മറഞ്ഞുനിന്ന് അഹിമലേക്കിനേയും ദാവീദിനേയും നിരീക്ഷിച്ചു.

ദാവീദ് അഹിമലേക്കിനോടു പറഞ്ഞു: "അങ്ങെനിക്ക് ഒരു സഹായംകൂടെ ചെയ്യണം അങ്ങയുടെ കൈവശം ആയുധങ്ങളെന്തെങ്കിലുമുണ്ടോ?  തിടുക്കത്തില്‍ പുറപ്പെട്ടപ്പോൾ എന്റെ ആയുധങ്ങളെടുക്കാൻ മറന്നുപോയി."

 "ഏലാതാഴ്‌വരയില്‍വച്ചുണ്ടായ യുദ്ധത്തിൽ അങ്ങു വധിച്ച ഗോലിയാത്തിന്റെ വാള്‍ ഇവിടെയുണ്ട്. അതു വേണമെങ്കില്‍ അങ്ങേയ്ക്കെടുക്കാം. മറ്റായുധങ്ങളൊന്നും ഇവിടെയില്ല."

ഞാൻ ആദ്യം വധിച്ച ശത്രുവിന്റെ വാൾ.. അതുപയോഗിച്ചുതന്നെയാണു ഞാനാ മല്ലന്റെ കഴുത്തരിഞ്ഞത്. അതിനേക്കാൾ നല്ലൊരായുധം എനിക്കു കിട്ടാനുണ്ടോ?"

ആ വാൾ ദാവീദ് ഏറ്റുവാങ്ങി. അവിടെനിന്നു തന്റെ സൈനികർ കാത്തുനില്ക്കുന്നിടത്തേക്കു യാത്രയായി. 

ദാവീദും അഹിമലെക്കുംതമ്മിൽ സംസാരിച്ചതെന്തെന്നു മനസ്സിലായില്ലെങ്കിലും പുരോഹിതൻ ദാവീദിനു ഭക്ഷണവും വാളും നല്കുന്നതു ദോയെഗ്‌ കണ്ടു. 

സാവൂളിനെ വിവരമറിയിക്കാൻ അവൻ അപ്പോൾത്തന്നെ അവിടെനിന്നു പുറപ്പെട്ടു.

100. പ്രവാചകസന്നിധിയിൽ

ബൈബിൾക്കഥകൾ 100

ദാവീദും മിഖാലുംതമ്മിലുള്ള വിവാഹം സമംഗളംനടന്നു. ഇസ്രയേലിലെ മറ്റെല്ലാ സ്ത്രീകളേയുംകാൾ ഭാഗ്യവതിയാണുതാനെന്നു മിഖാൽ സ്വയംകരുതി. എന്നാൽ അവളുടെ സന്തോഷങ്ങൾക്കു് അധികമായുസ്സില്ലെന്ന് അപ്പോൾ അവളറിഞ്ഞിരുന്നില്ല.

സാവൂളേല്പിച്ച കാര്യങ്ങളെല്ലാം ദാവീദ് നന്നായി നടത്തിപ്പോന്നു. ഫിലിസ്‌ത്യര്‍ യുദ്ധത്തിനുവന്നപ്പോളെല്ലാം ദാവീദ്‌ വിജയശ്രീലാളിതനായി. അവന്റെ നാമം, കൂടുതൽ വിശ്രുതമായിത്തീര്‍ന്നു. 

കര്‍ത്താവു ദാവീദിനോടുകൂടെയുണ്ടെന്നും മിഖാല്‍ അവനെ അത്യധികമായി സ്നേഹിക്കുന്നെന്നുംകണ്ടപ്പോള്‍, സാവൂള്‍ അവനെ കൂടുതല്‍ ഭയപ്പെട്ടു. തന്റെ സിംഹാസനം, ഏറെവൈകാതെ ദാവീദ് തട്ടിയെടുക്കുമെന്നു സാവൂൾ ഭയന്നു.

സാവൂൾ ജോനാഥനെ വിളിച്ചുപറഞ്ഞു: "എനിക്കുശേഷം ഇസ്രായേലിന്റെ സിംഹാസനത്തിലുപവിഷ്ടനാകേണ്ടതു നീയാണ്. എന്നാലിപ്പോൾ നമ്മുടെ ജനങ്ങളെല്ലാം ദാവീദിനുപിന്നാലെയാണ്. ഒന്നിനുപിന്നാലെ ഒന്നായി അവൻനേടുന്ന വിജയങ്ങളും ജനങ്ങളുടെ പിന്തുണയും രാജസിംഹാസനത്തെ ലക്ഷ്യംവയ്ക്കാൻ അവനെ പ്രേരിപ്പിക്കും. എന്നെയും നിന്നെയും വധിച്ച്, അധികാരം പിടിച്ചെടുക്കുംമുമ്പ്, അവൻ വധിക്കപ്പെടണം."

''ആബാ, അങ്ങെന്താണീ പറയുന്നത്? ദാവീദ് വിശ്വസ്തനാണ്. അവനൊരിക്കലും നമുക്കെതിരായി കരമുയർത്തില്ല. ഇപ്പോളാകട്ടെ അവൻ മിഖാലിന്റെ ഭർത്താവുകൂടെയാണ്. ആബയുടെ കാലശേഷം, അവൻ അധികാരമാഗ്രഹിക്കുന്നെങ്കിൽ അതു വിട്ടുകൊടുക്കാൻ എനിക്കു മടിയുമില്ല."

ജോനാഥന്റെ വാക്കുകളൊന്നും സാവൂൾ ചെവിക്കൊണ്ടില്ല. ദാവീദിനെ കൊന്നുകളയണമെന്ന് അവൻ ജോനാഥാനോടു കല്പിച്ചു. 

"അങ്ങയുടെ ആജ്ഞയെന്തായാലും ഞാനതു ശിരസ്സാവഹിക്കും. എന്നാലിക്കാര്യത്തിൽ എന്തെങ്കിലുംചെയ്യുന്നതിനുമുമ്പ് എനിക്കൊരുദിവസത്തെ സമയംതരണം. നാളെ പ്രഭാതത്തിൽ ഞാനങ്ങയെ മുഖംകാണിക്കാം. ഒന്നുമാത്രം ഞാനാവശ്യപ്പെടുന്നു. ഞാനറിയാതെ ദാവീദ് വധിക്കപ്പെടരുത്..." ജോനാഥൻ സാവൂളിനോടപേക്ഷിച്ചു.

ജോനാഥൻ രഹസ്യമായി ദാവീദിനെക്കണ്ടു. "അപ്രതീക്ഷിതമായ ചിലതു സംഭവിക്കുന്നുണ്ട് ആബാ നിന്നെ വധിക്കാൻ പദ്ധതിയിടുന്നു. അതിനാല്‍ നീ എവിടെയെങ്കിലുംപോയി കരുതലോടെ ഒളിച്ചിരിക്കുക. അപായസൂചനയുണ്ടെങ്കിൽ ഞാൻ നിന്നെയറിയിക്കാം, സുരക്ഷിതമായി രക്ഷപ്പെടാനുള്ള വഴിയൊരുക്കുകയുംചെയ്യാം."

ജോനാഥൻ സുരക്ഷിതമായ ഒരൊളിയിടം ദാവീദിനൊരുക്കിക്കൊടുത്തു. പിതാവിന്റെ നീക്കങ്ങളെക്കുറിച്ച് മിഖാലിനും മുന്നറിയിപ്പു നല്കി. 

പിറ്റേന്നു പ്രഭാതത്തിൽ ജോനാഥൻ സാവൂളിനെ മുഖംകാണിച്ചു. തലേദിവസത്തേതിൽനിന്നു വ്യത്യസ്തമായി, സാവൂൾ സൗമ്യനും ശാന്തനുമായിരുന്നു..

ജോനാഥാന്‍ സാവൂളിനോടു പറഞ്ഞു: "അങ്ങയുടെ ദാസനും ജാമാതാവുമായ ദാവീദിനോട്‌ രാജാവു തിന്മ പ്രവര്‍ത്തിക്കരുതെന്ന്  ഒരിക്കൽക്കൂടെ ഞാനപേക്ഷിക്കുന്നു! അവന്‍ അങ്ങയോടോ രാജ്യത്തോടോ തിന്മ പ്രവര്‍ത്തിച്ചിട്ടില്ല. അവന്റെ പ്രവൃത്തികള്‍ എല്ലായ്പോഴും അങ്ങേയ്ക്കും രാജ്യത്തിനും ഗുണകരമായിരുന്നു.

സ്വജീവനെ തൃണവൽഗണിച്ചാണ് അവൻ ഗോലിയാത്തിനെ വധിച്ചത്; ശത്രുക്കൾ നമ്മളെ ആക്രമിച്ചപ്പോളെല്ലാം മഹത്തായ വിജയങ്ങളാണ്, അവനിലൂടെ കര്‍ത്താവ്‌ ഇസ്രായേല്യര്‍ക്കു നല്കിയത്. അകാരണമായി ദാവീദിനെ വധിക്കാനും നിഷ്‌കളങ്കരക്തംചൊരിഞ്ഞ്‌, പാപംചെയ്യാനും അങ്ങയെ പ്രേരിപ്പിക്കുന്നതെന്താണ്?"

സാവൂള്‍ ജോനാഥാന്റെ വാക്കുകേട്ടു; 

"നീ പറയുന്നതാണു ശരി. അകാരണമായ ഭയം, അതുണ്ടാക്കുന്ന ചില അസ്വസ്ഥതകൾ... ചില നേരങ്ങളിൽ ഞാൻ എന്തുകൊണ്ടിങ്ങനെ പെരുമാറുന്നെന്ന് എനിക്കുതന്നെ മനസ്സിലാകുന്നില്ല. ഇതാ ഇപ്പോൾ കര്‍ത്താവിന്റെ നാമത്തില്‍ ഞാൻ ശപഥചെയ്യുന്നു: ദാവീദിനെതിരായി ഒരു പ്രവൃത്തിയും ഇനിയെന്നിൽനിന്നുണ്ടാകില്ല."

ജോനാഥാന്‍ ദാവീദിനെ സാവൂളിന്റെയടുത്തു കൊണ്ടുവന്നു. മുമ്പെന്നപോലെ ദാവീദ് വീണ്ടും രാജസേവനങ്ങളിൽ വ്യാപൃതനായി.

****    ****    ****    ****    ****    ****

ഇരുൾ പരന്നുതുടങ്ങി. ചന്ദ്രോദയമായിട്ടില്ല. കൊട്ടാരത്തിനുചുറ്റും കത്തിനിന്ന പന്തങ്ങളുടെ ദീപ്തിയിൽ കൊട്ടാരവും പരിസരവും അരുണാഭപൂണ്ടു തിളങ്ങി. രാജസദസ്സിനോടു ചേർന്നുള്ള വിശ്രമമുറിയുടെ പുറത്ത്, ഉദ്യാനത്തിലെ സരളവൃക്ഷച്ചുവട്ടിൽ മിഖാലിരുന്നു. അവൾക്കുമുമ്പിൽ, വിശ്രമമുറിയുടെ ചുമരിൽച്ചാരിനിന്ന്, ദാവീദ്‌ കിന്നരംവായിച്ചുകൊണ്ടിരുന്നു. 

സാവൂൾ വിശ്രമമന്ദിരത്തിലുണ്ടായിരുന്നു. സാവൂളിലെ ദുരാത്മാവ് അവനോടു പറഞ്ഞു: "ഇതാ നിന്റെ ശത്രു! അവൻ കൂടുതൽ ശക്തനായിരിക്കുന്നു. നിന്റെ പുത്രിയുടെ ഹൃദയം അവന്റെ ഹൃദയത്തോടു ചേർന്നിരിക്കുന്നു. സിംഹാസനാവകാശിയായ നിന്റെ കടിഞ്ഞൂൽപ്പുത്രൻ അവനുവേണ്ടി അധികാരമൊഴിഞ്ഞുകൊടുക്കാൻ സന്നദ്ധനാകുന്നു. ഒന്നൊന്നായി അവൻ ഓരോന്നും കൈപ്പിടിയിലൊതുക്കുകയാണ്. അവനിനിയും ജീവിച്ചിരുന്നാൽ, നീയും നിന്റെ പിതൃഭവനമായ *ബഞ്ചമിൻ ഗോത്രവും ഇസ്രായേലിന്റെ ചരിത്രത്തിൽനിന്നുതന്നെ നിഷ്കാസിതരാകും. ദാവീദും അവന്റെ പിതൃഭവനമായ യൂദാഗോത്രവും ഇസ്രായേലിൽ പ്രബലരാകും... പോകൂ. ഇപ്പോൾ ഈ നിമിഷം അവൻ വധിക്കപ്പടണം..."

ജോനാഥനു നല്കിയ വാഗ്ദാനം സാവൂൾ മറന്നു. ചുമരിൽത്തൂക്കിയിരുന്ന ഒരു കുന്തമൂരിയെടുത്ത്, അയാൾ ദാവീദിനടുത്തേക്കു കുതിച്ചു. സാവൂളവനെ കുന്തംകൊണ്ട്‌, ചുമരോടുചേര്‍ത്തു തറയ്‌ക്കാന്‍ ശ്രമിച്ചു. ദാവീദ് ഒഴിഞ്ഞുമാറി. കുന്തം ചുമരില്‍ തറഞ്ഞുകയറി. ദാവീദ്‌ ഓടി രക്ഷപെട്ടു. സാവൂളിനു് കുന്തം തിരികെ ഊരിയെടുക്കാൻ കഴിഞ്ഞില്ല. ദാവീദിന്നു പിന്നാലെ  ഓടാൻശ്രമിച്ച സാവൂൾ നിലത്തുവീണുപോയി.

ദാവീദ്, കൊട്ടാരത്തിന്റെ മുകൾനിലയിലെ തന്റെ കിടപ്പുമുറിയിലേക്കോടിക്കയറി. മിഖാലും അവന്റെ പിന്നാലെയോടിയെത്തി.

മിഖാല്‍ പറഞ്ഞു: "ഈ രാത്രി രക്ഷപെട്ടില്ലെങ്കില്‍ നാളെ അങ്ങു വധിക്കപ്പെടും. വേഗം, ഇപ്പോൾത്തന്നെ രക്ഷപ്പെടൂ... "

ശബ്ദവും ബഹളവുംകേട്ട് ഓടിയെത്തിയ രാജസേവകരോടു് സാവൂൾ പറഞ്ഞു.

"വേഗം, ദാവീദിനെ പിടികൂടി എന്റെ മുമ്പിൽ ഹാജരാക്കൂ.. അവൻ എന്നെ വധിക്കുന്നതിനുമുമ്പ്, അവൻ വധിക്കപ്പെടണം..."

ജനല്‍വഴി, മുറിയിൽനിന്നിറങ്ങിപ്പോകാന്‍ മിഖാല്‍ ദാവീദിനെ സഹായിച്ചു; അവന്‍ ഓടി രക്ഷപെട്ടെന്നുറപ്പായപ്പോൾ, മിഖാല്‍ ആട്ടിന്‍രോമംകൊണ്ടുള്ള തലയണകൾ കിടക്കയിൽവച്ച്‌, തുണികൊണ്ട്‌ പുതപ്പിച്ചു.

ദാവീദിനെ പിടിക്കാനായി സാവൂളയച്ച ഭടന്മാരെത്തിയപ്പോള്‍ അവന്‍ സുഖമില്ലാതെ കിടക്കുകയാണെന്ന്‌ അവളവരോടു പറഞ്ഞു.

ഭടന്മാർ മുറിക്കകത്തുകടക്കാതെ തിരികെപ്പോയി സാവൂളിനെ വിവരമറിയിച്ചു.

"കിടക്കയോടെ അവനെ എന്റെയടുത്തു കൊണ്ടുവരൂ " സാവൂള്‍ അലറി.

ഭടന്മാര്‍ മുറിക്കകത്തുകടന്നപ്പോള്‍ കട്ടിലില്‍ ആട്ടിന്‍രോമംകൊണ്ടുള്ള തലയണയും പുതപ്പുമാമാണ്‌ കണ്ടത്‌.

വിവരമറിഞ്ഞ സാവൂൾ കോപാക്രാന്തനായി മിഖാലിനു മുമ്പിലെത്തി. 

"എന്റെ ശത്രു രക്ഷപെടാന്‍ അനുവദിച്ചുകൊണ്ട്‌, നീ എന്തിനാണെന്നെ വഞ്ചിച്ചത്‌? 

മിഖാല്‍ ഭയത്തോടെ പറഞ്ഞു: "നിന്നെ ഞാന്‍ കൊല്ലാതിരിക്കണമെങ്കില്‍ രക്ഷപ്പെടാൻ എന്നെ സഹായിക്കണമെന്ന്

അദ്ദേഹമെന്നോടു പറഞ്ഞു.

അദ്ദേഹം ജനൽവഴിയിറങ്ങി ഓടിരക്ഷപെട്ടു." 

സാവൂൾ ദേഷ്യത്തോടെ അവിടെനിന്നിറങ്ങിപ്പോയി.

ദാവീദ്‌, റാമായില്‍ സാമുവൽപ്രവാചകന്റെയടുത്തെത്തി. സാവൂള്‍ തന്നോടു പ്രവര്‍ത്തിച്ചതെല്ലാം അവൻ സാമുവലിനോടു പറഞ്ഞു. 

"കർത്താവു നിന്നോടുകൂടെയുണ്ട്. അവിടുന്നു നിന്നെ കൈവിടില്ല. കുറച്ചുനാൾ നിനക്കെന്നോടൊപ്പം താമസിക്കാം."

ദാവീദ്, സാമുവലിനോടൊപ്പം റാമായിലെ നായോത്ത് എന്ന പട്ടണത്തിൽ താമസിച്ചു. 

ദാവീദ്‌, റാമായിലെ നായോത്തിലുണ്ടെന്ന്‌ സാവൂളിനറിവുകിട്ടി.

ദാവീദിനെ പിടികൂടാനായി ഒരു സംഘം സൈനികരെ അവന്‍ റാമായിലേക്കയച്ചു.

- - - - - - -- - - - - - -- - - - - - -- - - - - - -

*സാവൂൾ ബഞ്ചമിൻഗോത്രജനാണ്. ദാവീദ് യൂദാഗോത്രത്തിലാണു പിറന്നത്.

99. മിഖാൽ

ബൈബിൾക്കഥകൾ 99

എവിടെയോനിന്നൊഴുകിയെത്തിയ കിന്നരവീണയുടെ സംഗീതമാധുരിയിലലിഞ്ഞാണ് മിഖാൽ അതിന്റെയുറവിടംതേടിയെത്തിയത്. രാജസദസ്സിനോടു ചേർന്നുള്ള വിശ്രമമുറിയുടെ ജനാലകളിലൂടെയാണാ സംഗീതപ്രവാഹമെന്ന് അവളറിഞ്ഞു. വിശ്രമമുറിയുടെ പുറത്ത്, ഉദ്യാനത്തിലെ സരളവൃക്ഷച്ചുവട്ടിൽ അവളിരുന്നു.

അന്ന്, ആ വിശ്രമമുറിയുടെ ജനലഴികൾക്കിടയിലൂടെയാണ്,

വെള്ളാരംകല്ലുകൾപോലെ തിളങ്ങുന്ന കണ്ണുകളും കറുത്തുചുരുണ്ടു തോളൊപ്പം വളർന്നെത്തിക്കിടക്കുന്ന മുടിയിഴകളുമുള്ള ആ ചെറുപ്പക്കാരനെ മിഖാൽ ആദ്യമായി കാണുന്നത്.. ആദ്യദർശനത്തിൽത്തന്നെ ആ സുന്ദരമുഖവും സാന്ദ്രസംഗീതവും അവളുടെ ഹൃദയതന്ത്രികളിൽ ഒരു പ്രണയരാഗത്തിന്റെ ശ്രുതിമീട്ടിത്തുടങ്ങിയിരുന്നു...

സാവൂളിന്റെ ഇളയമകളായ മിഖാല്‍, അവളുടെ ഹൃദയകോവിലിൽ തന്നെക്കുടിയിരുത്തിയതൊന്നും ദാവീദറിഞ്ഞിരുന്നില്ല. എന്നാൽ അവന്റെ കിന്നരവീണയിൽനിന്നുയരുന്ന സംഗീതമാധുരി കൊട്ടാരത്തെ തഴുകിയൊഴുകുമ്പോളെല്ലാം മിഖാലിന്റെ ഹൃദയതന്ത്രികളും പ്രണയസംഗീതമുതിർത്തിരുന്നു.

രണ്ടുതവണ ഹൃദയംതകർക്കുന്ന ചില വാർത്തകൾ അവളെത്തേടിയെത്തി. ഗോലിയാത്തിനെത്തകർത്ത ദാവിദിന് രാജാവു തന്റെ മൂത്തപുത്രിയായ മേരബിനെ വിവാഹംചെയ്തു നല്കുമെന്ന അടക്കംപറച്ചിലുകൾ അന്തഃപുരത്തിൽ കേട്ടിരുന്നു. തന്റെ ഹൃദയനാഥൻ സഹോദരിയുടെ ഭർത്താവായി കടന്നുവരുമോയെന്നു മിഖാൽ ഭയന്നു. തന്റെ പ്രണയം ആരോടെങ്കിലുമൊന്നു തുറന്നുപറയണമെന്ന് ആഗ്രഹിച്ചിരുന്ന ദിവസങ്ങളിലൊന്നിലാണ്, സാവൂൾരാജാവ്, ദാവീദിനെ ലക്ഷ്യമാക്കി കുന്തമെറിഞ്ഞത്...

എന്നാൽ സാവൂൾ വീണ്ടും മനസ്സുമാറ്റി. ഫിലിസ്ത്യരെ പരാജിതരാക്കിതിരിച്ചെത്തിയാൽ  മേരബിനെ വധുവായി നല്കാമെന്ന്

പിന്നെയുമൊരിക്കൽക്കൂടെ ആബാ വാഗ്ദാനംചെയ്തു! വിജയം ദാവീദിനു സുനിശ്ചിതമാണെന്നുറപ്പുണ്ടായിരുന്നതിനാൽ, ആബാ വാഗ്ദാനത്തിൽനിന്നു പിന്തിരിയണേയെന്നുമാത്രമാണു മിഖാൽ പ്രാർത്ഥിച്ചിരുന്നതു്.

പ്രാർത്ഥനയ്ക്കുത്തരം ലഭിച്ചിരിക്കുന്നു. പ്രഭുകുമാരനായ അദ്രിയേൽ മേരബിനെ വിവാഹംചെയ്തിരിക്കുന്നു...

എങ്കിലുമെങ്ങനെയാണു പ്രിയനോടു പ്രണയം തുറന്നുപറയുക? അവനെങ്ങാന പ്രതികരിക്കും? 

മിഖേലിന്റെ മാറ്റങ്ങൾ ജോനാഥൻ ശ്രദ്ധിക്കുന്നുണ്ടായിരുന്നു. ഒടുവിലവൻ അവളുടെ ഹൃദയരഹസ്യം കണ്ടെത്തുകതന്നെ ചെയ്തു.. 

ജോനാഥൻ ദാവീദിനോടു പറഞ്ഞു. "ആബാ നിനക്കു നല്കിയ വാഗ്ദാനം നിറവേറ്റാതിരുന്നതിൽ എനിക്കു ഖേദമുണ്ട്. എന്നാലത്, കർത്താവിന്റെ നിശ്ചയമാണെന്നു ഞാൻ കരുതുന്നു. മറ്റാരുമറിയാതെ എന്റെ ഇളയ സഹോദരി അവളുടെ ഹൃദയത്തിൽ നിന്നെ പ്രതിഷ്ഠിച്ചിരുന്നുവെന്നു ഞാനറിയാൻ വൈകി. നിനക്കു സമ്മതമെങ്കിൽ ആബായോടു ഞാൻ സംസാരിക്കാം. നിങ്ങളുടെ വിവാഹം ഇസ്രായേലിലെ പ്രജകൾക്കെല്ലാം ആഹ്ലാദദായകമായിരിക്കും!"

"രാജകുമാരി എന്നെ പ്രണയിക്കുന്നുവെന്നോ!" ദാവീദ് അദ്ഭുതംകൂറി. 

"സ്നേഹിതാ, ഇസ്രായേലിലെ ഓരോ യുവതിയും കൊതിക്കുന്നതാണു നിന്റെ ഭാര്യാപദം... എന്റെ സഹോദരിയുടെ ഹൃദയം നീ സ്വീകരിക്കുക! അവളെ നിന്റെ ഹൃദയത്തോടു ചേർത്തുവയ്ക്കുക... ആബയോടു ഞാനിക്കാര്യം സംസാരിക്കാം!"

സന്ദർഭമൊത്തുവന്നപ്പോൾ സാവൂളിനുമുമ്പിൽ ജോനാഥൻ കാര്യമവതരിപ്പിച്ചു.

''ഇസ്രായേലിന്റെ രാജാവ് തന്റെ വാക്കുപാലിക്കാതിരിക്കുന്നതുചിതമല്ലെന്ന് അങ്ങേയ്ക്കുതന്നെ അറിയാമല്ലോ! പ്രത്യേകിച്ച്, ജനങ്ങൾ ഒരു വീരനായിക്കരുതുന്ന ദാവീദിനെപ്പോലൊരുവനു നല്കിയ വാക്കു്! അങ്ങയുടെ വാക്കുപാലിക്കുന്നതിനായി മിഖാലിനെ ദാവീദിനു വിവാഹംചെയ്തു നല്കിയാലോ? ഞാനവളോടു സംസാരിക്കട്ടേ?"

സാവൂളിലെ ദുരാത്മാവ്, അവന്റെ ഹൃദയത്തിൽ ദാവീദിനെ നശിപ്പിക്കാനുള്ള പുതിയൊരു പദ്ധതി മെനഞ്ഞുതുടങ്ങി. 

"നിന്റെ നിർദ്ദേശം സ്വീകാര്യംതന്നെ! എന്നാൽ നാട്ടുനടപ്പനുസരിച്ച് വരൻ തന്റെ വധൂപിതാവിനു വിവാഹസമ്മാനമായി നല്കേണ്ട പെൺപണം നല്കാൻ ദാവീദെന്തുചെയ്യും?"

സാവൂൾതന്നെ അതിനുത്തരവും നല്കി. 

"ദാവീദ് എന്റെ ജാമാതാവായി വരുന്നത് എനിക്കിഷ്ടംതന്നെ! എന്റെ ശത്രുക്കളോടുള്ള പ്രതികാരത്തിന് അവനെന്നെ സഹായിക്കട്ടെ! ഫിലിസ്‌ത്യരുടെ നൂറ്‌ അഗ്രചര്‍മ്മമല്ലാതെ യാതൊരു വിവാഹസമ്മാനവും അവനിൽനിന്നു ഞാനാഗ്രഹിക്കുന്നില്ല." 

ഇത്തവണ അറiൻ ഫിലിസ്ത്യരാൽ വധിക്കപ്പെടുമെന്നു സാവൂൾ ഉറപ്പിച്ചു.

"ഇസ്രായേലിന്റെ രാജാവിന്റെ ശത്രുക്കൾ എന്റെയും ശത്രുക്കൾതന്നെ!,"

സാവൂളിന്റെ വാക്കുകളേക്കുറിച്ചറിഞ്ഞപ്പോൾ ദാവീദ് പറഞ്ഞു. താൻ സഹസ്രാധിപനായ സൈനികദളത്തോടൊപ്പം അവൻ ഫിലിസ്ത്യർക്കെതിരേ യുദ്ധത്തിനിറങ്ങി. നിരവധി ഫിലിസ്ത്യർ വധിക്കപ്പെട്ടു. 

വധിക്കപ്പെട്ടവരുടെ ഇരുന്നൂറുപേരുടെ അഗ്രചർമ്മങ്ങൾ ഛേദിച്ച് അവൻ സാവൂൾരാജാവിനുമുമ്പിൽ സമർപ്പിച്ചു.

ജോനാഥനു നല്കിയ വാഗ്ദാനം സാവൂളിനു പാലിക്കേണ്ടതായിവന്നു . മിഖാലിന്റെ സ്വപ്നനായകൻ അവൾക്കു സ്വന്തമായി. ഇസ്രായേൽജനത അവരുടെ വീരനായകന്റെ വിവാഹം അത്യുത്സാഹത്തോടെ നാടെങ്ങുമാഘോഷിച്ചു. 

എന്നാൽ കര്‍ത്താവു ദാവീദിനോടുകൂടെയാണെന്നും മിഖാല്‍ അവനെ സ്‌നേഹിക്കുന്നെന്നുംകണ്ടപ്പോള്‍, സാവൂൾ അവനെ കൂടുതൽ ഭയപ്പെട്ടു. തന്റെ ഏറ്റവും വലിയ ശത്രുവാണു തന്റെ മക്കളുടേയും പ്രജകളുടെയും ഹൃദയങ്ങളിൽ ഒരു വീരനായകനായി നിറഞ്ഞു നില്ക്കുന്നതെന്ന് സാവൂളിന്റെ ഹൃദയം പറഞ്ഞു.

98. ശത്രു

ബൈബിൾക്കഥകൾ 98

സാവൂളും സംഘവും കൊട്ടാരത്തിൽ മടങ്ങിയെത്തി. ദാവീദിന് കൊട്ടാരത്തിൽത്തന്നെ താമസിക്കാനനുവാദമുണ്ടായിരുന്നു. സാവൂളിനും ജോനാഥനുമൊപ്പം രാജകീയമേശയിൽത്തന്നെ അവനു ഭക്ഷണംലഭിച്ചു.

ദാവീദിന് ആയുധപരിശീലനംനേടാനുള്ള സൗകര്യങ്ങളെല്ലാം ജോനാഥൻ ചെയ്തുകൊടുത്തു. കർത്താവിന്റെയാത്മാവു ദാവീദിനോടൊപ്പമുണ്ടായിരുന്നതിനാൽ, വാളും കുന്തവും അമ്പും വില്ലുമുപയോഗിച്ചുള്ള യുദ്ധമുറകളിലെല്ലാം അവൻ പെട്ടെന്നു നിപുണനായി

ജോനാഥൻ ദാവീദിനുചെയ്യുന്ന സഹായങ്ങളെക്കുറിച്ചെല്ലാം സാവൂളറിഞ്ഞിരുന്നു. സാവൂൾ അതൊന്നും തടഞ്ഞില്ല. എങ്കിലും ദാവീദിനെയവൻ സംശയദൃഷ്‌ടിയോടെതന്നെ വീക്ഷിച്ചുതുടങ്ങിയിരുന്നു. 

ഒരു പ്രഭാതത്തിൽ, സാവൂൾ കൊട്ടാരത്തിലായിരിക്കുമ്പോൾ ദുരാത്മാവ്‌ അവനില്‍ പ്രവേശിച്ചു. അവനൊരു ഭ്രാന്തനെപ്പോലെ പുലമ്പിക്കൊണ്ട്, കൊട്ടാരത്തിനുള്ളില്‍ അങ്ങോട്ടുമിങ്ങോട്ടുമുലാത്തി.  

രാജാവിന്റെ ' ഹൃദയത്തിനാശ്വാസംനല്കാനായി ദാവീദ്, പതിവുപോലെ തന്റെ കിന്നരം മീട്ടിത്തുടങ്ങി. ഒരു കുളിർകാറ്റായി, ആ വീണാനാദം കൊട്ടാരത്തിലെങ്ങുമൊഴുകി. 

മുമ്പല്ലാം ദാവീദിന്റെ കിന്നരത്തിൽനിന്നൊഴുകുന്ന സംഗീതമാധുരി സാവൂളിന്റെ മനസ്സിനെ സ്വച്ഛശാന്തമാക്കിയിരുന്നു. 

എന്നാലിപ്പോൾ...

ദാവീദിന്റെകിന്നരത്തിൽനിന്നുതിരുന്ന സാന്ദ്രസംഗീതത്തേയുംമായ്ച്ച്, സാവൂളിന്റെ തലച്ചോറിനുള്ളിൽ പ്രകമ്പനംകൊണ്ടതു മറ്റൊരു ശബ്ദമാണ്... 

ഗോലിയാത്തിനെത്തകർത്ത ദാവീദിനായി, ഇസ്രായേൽജനത നൃത്തച്ചുവടുകളോടെയുയർത്തിയ വാഴ്ത്തുപാട്ടിന്റെ ശബ്ദം... 

''സാവുൾ ആയിരങ്ങളെക്കൊന്നു... ദാവീദ് പതിനായിരങ്ങളേയും..."

''സാവുൾ ആയിരങ്ങളെക്കൊന്നു... ദാവീദ് പതിനായിരങ്ങളേയും..."

''സാവുൾ ആയിരങ്ങളെക്കൊന്നു... ദാവീദ് പതിനായിരങ്ങളേയും..."

കൊട്ടാരത്തിന്റെ ചുമരോടുചേർന്നുനിന്നു കിന്നരംവായിക്കുന്ന ദാവീദിനെക്കണ്ടപ്പോൾ സാവൂളിന്റെ ശരീരത്തിലേക്കു കോപമിരച്ചുകയറി. അയാൾ ചുറ്റുംനോക്കി. കൈയെത്തുംദൂരത്ത്, ചുമരിൽത്തൂക്കിയിരുന്നൊരു കുന്തം വലിച്ചെടുത്ത്, ദാവീദിന്റെ നെഞ്ചിനെ ലക്ഷ്യമാക്കി, സാവൂൾ ആഞ്ഞെറിഞ്ഞു. 

ദാവീദിന്റെ ആറാമിന്ദ്രിയം പ്രവർത്തിച്ചു. പെട്ടെന്നുതന്നെ അവനൊഴിഞ്ഞുമാറി. അല്ലായിരുന്നെങ്കിൽ സാവൂളെറിഞ്ഞ കുന്തം, അവനെ ചുമരോടു ചേർത്തു തറയ്ക്കുമായിരുന്നു. ദാവീദ് നിന്നിരുന്നിടത്തിനുനേരേതന്നെ, കുന്തം ചുമരിൽത്തറഞ്ഞുനിന്നു വിറച്ചു.

അടുത്തനിമിഷത്തിൽ മറ്റൊരു കുന്തംകൂടെ ദാവീദിനുനേരെ പാഞ്ഞുവന്നു. രണ്ടാംപ്രാവശ്യവും അവനൊഴിഞ്ഞുമാറി. പിന്നെയവൻ അവിടെ നിന്നില്ല. ഇനിയുമൊരാക്രമണത്തിനിടകൊടുക്കാതെ അവനവിടെനിന്നോടി രക്ഷപ്പെട്ടു.

അന്നു സാവുൾ ശാന്തനാകാൻ പതിവിലുമേറെ സമയമെടുത്തു. മനസ്സു ശാന്തമായപ്പോൾ തന്റെ പ്രവൃത്തിയെക്കുറിച്ചു സാവൂൾ ഖേദിച്ചു. അയാൾ ദാവീദിനെ തന്റെയടുത്തേക്കു വിളിപ്പിച്ചു.

രാജാവിനുമുമ്പിലെത്തിയ ദാവീദ്, ആചാരപൂർവ്വം വലതു കാൽമുട്ടുമടക്കി, ശരീരം അല്പമൊന്നു മുമ്പോട്ടുവളച്ച്, വലതുകൈ നെഞ്ചിൽച്ചേർത്ത്, അവനെ വണങ്ങി. സാവൂൾ, ദാവീദിന്റെ തോളുകളിൽപ്പിടിച്ച് അവനെയുയർത്തി, തന്റെ നെഞ്ചോടുചേർത്തു. രാജാവിന്റെ കണ്ണുകൾ നിറഞ്ഞൊഴുകുന്നുണ്ടായിരുന്നു.

"ദാവീദേ, എന്റെ മകനേ!" സാവൂൾ വാത്സല്യത്തോടെ ദാവീദിനെത്തലോടി. രാജാവിന്റെ നെഞ്ചിൽ മുഖംചേർത്ത്, ദാവീദും കരഞ്ഞു. സാവൂൾ അവന്റെ മൂർദ്ധാവിൽ ചുംബിച്ചു.

അപ്പോളും എന്തിനെന്നറിയാത്തൊരു ഭയം സാവൂളിന്റെ ഹൃദയത്തിൽ നിറഞ്ഞിരുന്നു. തന്റെ പുത്രനായ ജോനാഥനോടെന്നവണ്ണം അതിയായ വാത്സല്യം ദാവീദിനോടു തോന്നിയിരുന്നെങ്കിലും ദാവീദിനെയവൻ വല്ലാതെ ഭയപ്പെട്ടു. അവൻ കൊട്ടാരത്തിൽ തന്റെയൊപ്പമായിരിക്കുന്നതപകടമാണെന്നുപോലും സാവൂളിനുതോന്നി. 

അവനെ തന്റെയടുക്കല്‍നിന്നകറ്റാൻ സാവൂൾ തീരുമാനിച്ചു. സൈന്യത്തിലെ *സഹസ്രാധിപന്മാരിലൊരാളായി അവൻ ദാവീദിനെ നിയമിച്ചു.  

കര്‍ത്താവു കൂടെയുണ്ടായിരുന്നതിനാല്‍, സാവൂളേല്പിച്ച ഉദ്യമങ്ങളിലെല്ലാം ദാവീദ്‌ വിജയംവരിച്ചു.

അതു സാവൂളിനെ കൂടുതല്‍ ചകിതനാക്കുകയാണു ചെയ്തത്. അസൂയയും ഭയവും വാത്സല്യവുമിടകലർന്ന, എന്തെന്നവനുതന്നെ നിർവ്വചിക്കാനാവത്ത, എന്തോ ഒരു മനോഭാവമായിരുന്നൂ, സാവൂളിനു ദാവീദിനോടുണ്ടായിരുന്നത്.

ഇസ്രായേൽക്കാർ ദാവീദിനെ അവരുടെ നെഞ്ചേറ്റി സ്‌നേഹിച്ചു; അവരുടെ കണ്ണിലവന്‍ സമര്‍ത്ഥനായൊരു നേതാവും ജേതാവുമായിരുന്നു.

അടുത്ത വസന്തത്തിൽ വർദ്ധിച്ച സൈന്യശേഷിയുമായി ഫിലിസ്ത്യർ ഇസ്രായേലിനോടു യുദ്ധത്തിനുവന്നു. 

ഫിലിസ്തർ യുദ്ധത്തിനുവരുന്നെന്നു കേട്ടപ്പോൾ സാവൂളിന്റെ ഹൃദയത്തിലൊരു കുബുദ്ധിയുണർന്നു. സാവൂള്‍ ദാവീദിനെ വിളിപ്പിച്ചു.

"ഫിലിസ്ത്യർക്കെതിരേ യുദ്ധം നയിക്കാൻ ഞാനോ ജോനാഥനോ ഇറങ്ങുന്നില്ല. പകരം നിന്നെ ഞാൻ ആ ചുമതലയേല്പിക്കുന്നു. ഈ യുദ്ധം വിജയിച്ചു നീ മടങ്ങിയെത്തുമ്പോൾ, എന്റെ മൂത്ത പുത്രിയായ മേരബിനെ നിനക്കു ഭാര്യയായി ഞാൻ നല്കും!"

വേണ്ടത്ര യുദ്ധപരിചയമില്ലാത്ത ദാവീദ്, ഫിലിസ്‌ത്യരുടെ കൈയാൽ വധിക്കപ്പെടുമെന്നുതന്നെ സാവൂൾ ഉറപ്പിച്ചിരുന്നു.

ദാവീദ്‌ പറഞ്ഞു: "രാജാവെന്നെയേല്പിക്കുന്ന ഏതു ദൗത്യവും ഞാനേറ്റെടുക്കാം. എന്നാൽ രാജാവിന്റെ ജാമാതാവാകാന്‍ ഞാനാരാണ്‌? എനിക്കോ എന്റെ പിതാവിനോ എന്റെ കുടുംബത്തിനോ ഇസ്രായേലില്‍ എന്തുമേന്മയാണുള്ളത്? എനിക്കങ്ങയുടെ അനുഗ്രഹവും പ്രാർത്ഥനയുംമാത്രംമതി!" 

സാവൂൾ ദാവൂദിന്റെ ശിരസ്സിൽ കൈവച്ച്, അവനെയനുഗ്രഹിച്ചു യാത്രയാക്കി.

സാവൂളിന്റെ പ്രതീക്ഷകൾക്കുവിപരീതമായി, ഫിലിസ്ത്യർക്കെതിരേ അനായസവിജയംനേടി ദാവീദ് മടങ്ങിയെത്തി. എന്നാല്‍ സാവൂൾ വാക്കുപാലിച്ചില്ല.

ഒരു പ്രഭുകുമാരനായ അദ്രിയേലിന്‌, സാവൂള്‍ മേരബിനെ വിവാഹംചെയ്തു നല്കി. 

അദ്രിയേലും മേരബുംതമ്മിലുള്ള വിവാഹഘോഷങ്ങളിലെല്ലാം വിശ്വസ്തദാസനായി ദാവീദ് ഓടിനടന്നു. ആഘോഷകാര്യങ്ങളിൽ അവന്റെ ശ്രദ്ധപതിയാത്ത ഒരിടവുമുണ്ടായിരുന്നില്ല.

രാജാവു ദാവീദിനുനല്കിയ വാക്കു പാലിക്കപ്പെടാത്തതിനെക്കുറിച്ച്, ചില ഭൃത്യന്മാര്‍ ദാവീദിനോടു ചോദിക്കാതിരുന്നില്ല. 

അവരെയെല്ലാം ദാവീദ് മറുചോദ്യത്താൽ നിശ്ശബ്ദരാക്കി: "ദരിദ്രനും ദുർബ്ബലനുമായ ഞാന്‍ രാജാവിന്റെ ജാമാതാവാകുന്നത്‌ അത്ര നിസ്സാരമാണെന്നു നിങ്ങള്‍ കരുതുന്നുവോ? ഇസ്രായേലിന്റെ രാജാവായ സാവൂളിനുമുമ്പിൽനിൽക്കാൻ വെറുമൊരാട്ടിടയനായ എനിക്കെന്താണു യോഗ്യത!"

രാജാവു വാക്കുപാലിക്കാത്തതിൽ ദാവീദിനു വിഷമം തോന്നിയില്ല. പക്ഷേ

തന്റെ പിതാവിന്റെ പ്രവൃത്തിയിൽ രാജകുമാരനായ ജോനാഥൻ ഖിന്നനായിരുന്നു. എങ്കിലും പിതാവിനോടെന്തെങ്കിലുമെതിർത്തുപറയാൻ അവനശ്ശക്തനുമായിരുന്നു.

എന്നാൽ സാവൂൾ തന്റെ വാക്കുപാലിക്കാതിരുന്നതിനെപ്രതി ദൈവത്തിനു നന്ദി പറഞ്ഞുകൊണ്ടിരുന്ന മറ്റൊരാൾ ആ കൊട്ടാരത്തിലുണ്ടായിരുന്നു! സാവൂളിന്റെ കിന്നരവാദകനായി ദാവീദ് കൊട്ടാരത്തിലെത്തിയ ദിനംമുതൽ അവനിലനുരക്തയായിപ്പോയൊരുവൾ! അവളുടെ ഹൃദയത്തിലുറപൊട്ടിയ പ്രണയനദി, ദാവീദ് എന്ന സമുദ്രത്തിലെത്തിയലിയാൻ കൊതിച്ചിരുന്നെങ്കിലും  തന്റെ പ്രിയനോടതു തുറന്നുപറയാൻ അവൾക്കായിരുന്നില്ല...!  

--------------------------------------------------------

*സഹസ്രാധിപൻ - ആയിരംപേരടങ്ങുന്ന ഒരു സൈനികദളത്തിന്റെ തലവൻ

97. ദാവീദും ഗോലിയാത്തും

ബൈബിൾക്കഥകൾ 97

ദാവീദ് സാവൂളിനുമുമ്പിൽ ഹാജരാക്കപ്പെട്ടു.

"മഹാരാജാവേ, ആ ഫിലിസ്ത്യനെയോര്‍ത്ത്‌ ഇസ്രായേലിലാർക്കും ഭയംവേണ്ടാ. അങ്ങയുടെ അനുവാദമുണ്ടെങ്കിൽ ഈ ദാസന്‍ അവനെ കീഴ്പെടുത്താം.".

''കുഞ്ഞേ, നീ ചെറുപ്പമല്ലേ? ഗോലിയാത്തിനെ നേരിടാനുള്ള കരുത്തുനിനക്കില്ല. യുദ്ധപരിചയമോ പരിശീലനമോയില്ല. അവനാകട്ടെ ബാല്യംമുതല്‍ പരിശീലനംനേടിയ കരുത്തനായ യോദ്ധാവാണ്‌." സാവൂൾ ദാവീദിനെ നിരുത്സാഹപ്പെടുത്താൻ ശ്രമിച്ചു.

എന്നാൽ ദാവീദ്‌ പിന്മാറാൻ തയ്യാറായിരുന്നില്ല: 

"അങ്ങയുടെ ഈ ദാസന്‍ ഒരാട്ടിടയനാണ്. സിംഹമോ കരടിയോ വന്ന്‌, ഒരാട്ടിന്‍കുട്ടിയെ തട്ടിയെടുത്താല്‍, അതിനെ പിന്തുടര്‍ന്ന്‌ ആട്ടിന്‍കുട്ടിയെ രക്ഷിക്കുന്നവനാണു ഞാൻ. അങ്ങയുടെ ഈ ദാസന്‍ സിംഹങ്ങളെയും കരടികളെയും കൊന്നിട്ടുണ്ട്‌. ജീവിക്കുന്ന ദൈവത്തിന്റെ സൈന്യത്തെയും രാജാവിനേയുമപമാനിക്കുന്ന ഈ ഫിലിസ്‌ത്യനും അവയിലൊന്നിനെപ്പോലെയാകും. സിംഹത്തിന്റെയും കരടിയുടെയും കൈയില്‍നിന്ന്‌ എന്നെ രക്ഷിച്ച കര്‍ത്താവ്‌, ഇവന്റെ കൈയില്‍നിന്നും എന്നെ രക്ഷിക്കും. "

സാവൂള്‍ പിന്നീടവനെത്തടഞ്ഞില്ല. "പോവുക; കര്‍ത്താവു നിന്നോടുകൂടെയുണ്ടായിരിക്കട്ടെ!"

ഗോലിയാത്തിനെ നേരിടാൻ  ദാവീദിനു സാവൂളനുവാദംനല്കി. അവൻ, ദാവീദിനെ പോര്‍ച്ചട്ടയും പടത്തൊപ്പിയും കവചവുമണിയിച്ചു. ദാവീദിന്റെ കരങ്ങളിലേക്കു് ഒരു വാൾ നല്കി.

എന്നാൽ, പോര്‍ച്ചട്ടയും വാളുംധരിച്ച്, ഒന്നുനേരേനടക്കാന്‍പോലും  ദാവീദിനു സാധിച്ചില്ല. 

''മഹാരാജാവേ, ഇതൊന്നുമെനിക്കു വേണ്ടാ.. പരിചയിച്ചിട്ടില്ലാത്തതിനാല്‍, ഇവധരിച്ചു നടക്കാന്‍പോലുമെനിക്കാവില്ല."

അവന്‍ അതെല്ലാമഴിച്ചുമാറ്റി. 

ദാവീദിന്റെ കൈയിൽ ഒരു കവിണയുണ്ടായിരുന്നു. ആടുകളെ മേയ്ക്കാൻപോകുമ്പോൾ അവന്റെ സഹചാരിയായ ഒരു വടിയുമുണ്ടായിരുന്നു അവൻ തന്റെ കവിണയും വടിയും സാവൂളിനെക്കാണിച്ചു.

"ആ ഫിലിസ്ത്യനെ നേരിടാൻ, ഇതിനേക്കാൾ വലിയ ആയുധങ്ങളൊന്നുമാവശ്യമില്ല..."

ദാവീദ്, ഗോലിയാത്തിനെ നേരിടാനായിപ്പുറപ്പെട്ടു.

തോട്ടില്‍നിന്ന് മിനുസമുള്ള അഞ്ചു കല്ലുകൾ തിരഞ്ഞെടുത്ത്‌, അവൻ കൈയിൽക്കരുതി.

ദാവീദിന്റെ ധൈര്യവുമാത്മവിശ്വാസവുംകണ്ടപ്പോൾ, സാവൂൾ തന്റെ സൈന്യാധിപനായ അബ്നേറിനോടു ചോദിച്ചു: "ഇവനാരാണ്? ആരാണിവന്റെ പിതാവ്?"

"എനിക്കറിയില്ലാ. പക്ഷേ... അവനല്ലേ അങ്ങേയ്ക്കുവേണ്ടി കിന്നരംവായിക്കുന്നത്? അങ്ങേയ്ക്കവനെയറിയില്ലേ?"

ഇസ്രായേൽപ്പാളയത്തിൽനിന്നു മുമ്പോട്ടിറങ്ങിയ ദാവീദ്, ഗോലിയാത്തിനെ വെല്ലുവിളിച്ചു. തന്റെ ഇടയവടി, അവൻ അന്തരീക്ഷത്തിൽ ചുഴറ്റിക്കൊണ്ടിരുന്നു.

ഗോലിയാത്ത് പാളയത്തിൽനിന്നിറങ്ങിവന്നു. തുടുത്തുകോമളനായ ഒരു കൗമാരക്കാരൻ ഒരു വടിയുമായി തന്റെനേരെ വരുന്നതുകണ്ടപ്പോള്‍ അവനു പുച്ഛംതോന്നി.  

"എന്റെനേരേ വടിയുമായിവരാന്‍ ഞാനൊരു പട്ടിയാണെന്നു നീ കരുതിയോ?" ഗോലിയാത്ത്, ഫിലിസ്ത്യരുടെ ദേവന്മാരുടെ പേരുചൊല്ലി ദാവീദിനെ ശപിച്ചു. "എന്നെ നേരിടാൻവരാൻ നിനക്കെങ്ങനെ ധൈര്യം വന്നൂ? നിന്റെയീ തുടുത്ത ശരീരം ഇന്നു കുറുക്കന്മാരുടെയും കഴുകന്മാരുടേയും ആഹാരമായിത്തീരും!"

ദാവീദ് ഗോലിയാത്തിനടുത്തേക്കു വേഗത്തിലോടിയടുത്തു. അവൻ വിളിച്ചുപറഞ്ഞു.

"വാളും കുന്തവും ചാട്ടുളിയുമായി നീയൊരു ബാലനെ നേരിടാന്‍വരുന്നു. ഞാനാകട്ടെ നീ നിന്ദിച്ച ദൈവമായ കര്‍ത്താവിന്റെ നാമത്തിലാണു വരുന്നത്‌. കര്‍ത്താവു നിന്നെ എന്റെ കൈയിലേല്പിച്ചുകഴിഞ്ഞു. നിന്റെ തല, ഞാൻ കൊയ്തെടുക്കും. ഫിലിസ്‌ത്യരുടെ ശവശരീരങ്ങള്‍ പറവകള്‍ക്കും കാട്ടുമൃഗങ്ങള്‍ക്കും ഇരയാകുമ്പോൾ ഇസ്രായേലിലൊരു ദൈവമുണ്ടെന്നു ലോകമെല്ലാമറിയും.. . കര്‍ത്താവു വാളുംകുന്തവുംകൊണ്ടല്ല രക്ഷിക്കുന്നതെന്ന്‌ ഈ ജനതതികളെല്ലാം മനസ്സിലാക്കും."

ദാവീദിന്റെ വാക്കുകൾ ഗോലിയാത്തിനെ ക്രുദ്ധനാക്കി. അവൻ അലറിക്കൊണ്ടു ദാവീദിനോടടുത്തു.

തന്റെ കവിണയിൽനിന്നു പായുന്ന കല്ലിന്റെ പരിധിക്കുള്ളിൽ ഗോലിയാത്ത് എത്തിയെന്നുകണ്ടപ്പോൾ, ദാവീദ് നിന്നു. വടി താഴെയിട്ടശേഷം കുപ്പായക്കീശയിൽനിന്ന് ഒരു കല്ലെടുത്തു കവിണയിൽത്തൊടുത്തു. ഒരു നിമിഷാർദ്ധത്തിൽ കല്ലുപാഞ്ഞു. അണുവിട ലക്ഷ്യംതെറ്റാതെ അതു ഗോലിയാത്തിന്റെ മൂക്കിനുമുകളിൽ, നെറ്റിയുടെ മദ്ധ്യത്തിലൂടെ തലയോട്ടിയിലേക്കു തുളച്ചുകയറി.

എന്താണു സംഭവിച്ചതെന്നു തിരിച്ചറിയുംമുമ്പേ, ഗോലിയാത്ത് നിലംപതിച്ചു. അവന്റെ ആയുധവാഹകൻ പിന്തിരിഞ്ഞോടി. 

ദാവീദ്‌ ഓടിച്ചെന്നു ഗോലിയാത്തിന്റെമേല്‍ക്കയറി നിന്നു. ഗോലിയാത്തിന്റെ വാൾ ഉറയില്‍നിന്നു വലിച്ചൂരി, അവന്റെ കഴുത്തു വെട്ടിമുറിച്ചു. ഗോലിയാത്തിന്റെ ശരീരത്തിൽനിന്നു വേർപെട്ട ശിരസ്സ്, ദാവീദ് ഉയർത്തിപ്പിടിച്ചപ്പോൾ ഫിലിസ്‌ത്യര്‍ തങ്ങളുടെ പാളയങ്ങളിൽനിന്നിറങ്ങി പിന്തിരിഞ്ഞോടി. ഇസ്രായേൽസൈന്യവും ജനതയും അവരെ പിന്തുടർന്നാക്രമിച്ചു. 

ഗോലിയാത്തിനെ വധിച്ചുമടങ്ങിവന്ന ദാവീദിനെ, സൈന്യാധിപനായ അബ്‌നേര്‍ സാവൂളിന്റെയടുത്തേക്കു കൂട്ടിക്കൊണ്ടുവന്നു. ഗോലിയാത്തിന്റെ ശിരസ്സ്, അപ്പോഴുമവന്റെ കൈയിലുണ്ടായിരുന്നു.

സാവൂള്‍ അദ്ഭുതംകൂറുന്ന മിഴികളോടെ ദാവീദിനെ നോക്കി. അവനോടു ചോദിച്ചു: "സത്യത്തിൽ നീയാരാണ്? ആരുടെ മകനാണു നീ?"

"അങ്ങയുടെ ദാസനായ ബേത്‌ലെഹെംകാരന്‍ ജസ്സെയുടെ മകൻ" ദാവീദ്‌ പറഞ്ഞു.

സാവൂൾ, വാത്സല്യത്തോടെ ദാവീദിനെ തന്നോടുചേർത്തു പുണർന്നു.

സാവൂൾ ദാവീദിനോടു സംസാരിക്കുമ്പോൾ സാവൂളിന്റെ പുത്രനായ ജോനാഥനും അവിടെയുണ്ടായിരുന്നു. ജോനാഥനു ദാവീദിനോടു വലിയ സ്നേഹംതോന്നി. അവൻ തന്റെ മേലങ്കി ദാവീദിനെയണിയിച്ചു. തന്റെ പടച്ചട്ടയും വാളും വില്ലും അരക്കച്ചയും ദാവീദിനു സമ്മാനമായിക്കൊടുത്തു.

"ആയുധവിദ്യകളെല്ലാം ഞാൻ നിന്നെയഭ്യസിപ്പിക്കാം. എന്റെ ജീവിതാന്ത്യംവരെ നിയെന്റെ സ്നേഹിതനായിരിക്കും. " ജോനാഥൻ ദാവിദിനോടു പറഞ്ഞു.

ഫിലിസ്ത്യരെത്തോല്പിച്ച്, അവര്‍ സാവൂളിന്റെ കൊട്ടാരത്തിലേക്കു മടങ്ങിവരുമ്പോള്‍ ഇസ്രായേലിലെ എല്ലാ നഗരങ്ങളിലും  വാദ്യഘോഷങ്ങളോടെ, ആടിപ്പാടിയെത്തിയ സ്ത്രീകൾ, സന്തോഷത്തോടെ സാവൂളിനെയെതിരേറ്റു.

അവര്‍ മതിമറന്നു പാടിക്കൊണ്ടിരുന്നു: "സാവൂള്‍ ആയിരങ്ങളെക്കൊന്നു. ദാവീദ്‌ പതിനായിരങ്ങളെയും...." 

എന്നാൽ ആ ഗാനം സാവൂളിനെയസ്വസ്ഥനാക്കി. വെറുമൊരിടയച്ചെറുക്കന് പതിനായിരങ്ങളെ നേരിട്ടു തോല്പിച്ചതിന്റെ ഖ്യാതിനല്കിയിരിക്കുന്നു. ഇസ്രായേലിന്റെ രാജാവിനോ ആയിരങ്ങൾമാത്രം! അവൻ സംശയത്തോടെ ദാവീദിനെ നോക്കി. 

അവന്റെ ഹൃദയത്തിൽ വീണ്ടും ആ ചോദ്യമുയർന്നു. "ഇവനാരാണ്?"

എന്നാൽ ദാവീദാകട്ടെ, തന്റെ ആടുകളെ വേട്ടയാടാനെത്തുന്ന വന്യമൃഗങ്ങളിലൊന്നിനെക്കൊല്ലുന്നതിൽക്കവിഞ്ഞ ഒന്നായി, തന്റെ വിജയത്തെ കണക്കാക്കിയിരുന്നതേയില്ല.

96. ഗോലിയാത്ത്

ബൈബിൾക്കഥകൾ - 96

തന്റെ കല്പന നിരാകരിച്ചതിനാൽ കർത്താവു സാവൂളിനെ തള്ളിക്കഞ്ഞു. കർത്താവിന്റെ ആത്മാവ് അവനെ വിട്ടുപോയി. അവനെ പീഡിപ്പിക്കാൻ ഒരു ദുരാത്മാവിനു കർത്താവനുവാദം നല്കി.

ദുരാത്മാവു പീഡിപ്പിക്കുമ്പോളെല്ലാം സാവൂൾ അസാധാരണമായി പെരുമാറി. അയാൾ അകാരണമായി കോപിക്കുകയും തന്റെയടുത്തെത്തുന്നവരെ ആക്രമിക്കുകയുംചെയ്തു. ദുരാത്മാവിന്റെ പിടിയിൽനിന്നു മോചിതനായി ശാന്തനാകുമ്പോൾ തന്റെ പ്രവൃത്തികളെക്കുറിച്ചു സാവൂൾ ഖേദിച്ചു.

"ദൈവമയച്ചൊരു ദുരാത്മാവ്‌ അങ്ങയെ പീഡിപ്പിക്കുന്നുണ്ട്."

സാവൂൾ ശാന്തനായിരുന്നപ്പോൾ വിശ്വസ്തരായ ചില ഭൃത്യന്മാര്‍ അവനോടു പറഞ്ഞു. 

"ബേത്‌ലെഹെംകാരനായ ജസ്സെയ്ക്ക് ആട്ടിടയനായ ഒരു മകനുണ്ടു്. അവന്‍ കിന്നരവായനയില്‍ നിപുണനും പരാക്രമിയായ യോദ്ധാവുമാണ്. തന്റെ ആടുകളെ ആക്രമിക്കാനെത്തുന്ന സിംഹങ്ങളെപ്പോലും അവൻ നേരിടാറുണ്ടത്രേ! കര്‍ത്താവ്‌ അവനോടുകൂടെയുണ്ട്‌. ദുരാത്മാവ്‌, അങ്ങയിലാവസിക്കുമ്പോള്‍ കിന്നരംവായിച്ച്‌, അങ്ങേയ്ക്കാശ്വാസംനല്കാൻ അവനു കഴിയും.

'ആട്ടിടയനായ നിന്റെ മകന്‍ ദാവീദിനെ കൊട്ടാരത്തിലേക്കയയ്ക്കുക.' എന്ന രാജകല്പനയുമായി  ജസ്സെയുടെയടുത്തു രാജാവിന്റെ ദൂതന്മാരെത്തി

രാജാവിന്റെ ഇംഗിതമറിഞ്ഞപ്പോൾ ജെസ്സെ സന്തോഷചിത്തനായി.  ഒരു കഴുതപ്പുറത്ത്‌ അപ്പം, വീഞ്ഞ്‌,  തുടങ്ങിയവ കയറ്റി, പുത്രനായ ദാവീദിനൊപ്പം സാവൂളിനു തിരുമുൽക്കാഴ്ചയായി അവൻ കൊടുത്തയച്ചു. അതുകൂടാതെ ഒരാട്ടിന്‍കുട്ടിയും കാഴ്ചവസ്തുക്കൾക്കൊപ്പമുണ്ടായിരുന്നു.

സാവൂൾരാജാവിന്റെ കൊട്ടാരത്തിലെത്തിയ ദാവീദ്, തന്റെ സേവനമാരംഭിച്ചു. ദൈവമയച്ച ദുരാത്മാവ്‌ സാവൂളിനെ പീഡിപ്പിക്കുമ്പോഴൊക്കെ ദാവീദ്‌ കിന്നരം വായിക്കും. അതുവഴി, രാജാവിനാശ്വാസംലഭിക്കുകയും ദുരാത്മാവ്‌ അവനെ വിട്ടുമാറുകയുംചെയ്‌തിരുന്നു.

സാവൂളിന്‌ ദാവീദിനെ വളരെയധികമിഷ്‌ടപ്പെട്ടു. അവനു കൊട്ടാരത്തിൽത്തന്നെ താമസിക്കാനുള്ള സൗകര്യങ്ങൾ നല്കി.

വസന്തകാലമെത്തിയപ്പോൾ ഫിലിസ്ത്യർ ഇസ്രായേലിനെതിരേ സൈന്യത്തെയണിനിരത്തി. സാവൂളും ജോനാഥനും അവർക്കെതിരേ ഇസ്രായേൽസൈന്യത്തെ നയിച്ചുകൊണ്ട് ഏലാതാഴ്‌വരയോടുചേർന്ന കുന്നിൻമുകളിൽ പാളയമടിച്ചു. 

രാജാവു യുദ്ധത്തിനായി പുറപ്പെട്ടപ്പോൾ, ദാവീദ് തന്റെ ഭവനത്തിലേക്കു മടങ്ങി. അവൻ വീണ്ടും തന്റെ ആടുകളെമേയ്ക്കാൻ വനാതിർത്തിയിലേക്കു പോയി.

ഏലാതാഴ്‌വരയുടെ മറുവശത്തുള്ള കുന്നിൻമുകളിൽ, ഫിലിസ്ത്യസൈനികരും പാളയമടിച്ചു. ഇസ്രായേൽ സൈന്യവും ഫിലിസ്ത്യസൈന്യവും മുഖാഭിമുഖം കണ്ടു.

അപ്പോള്‍ ഫിലിസ്‌ത്യപ്പാളയത്തില്‍നിന്ന്‌ ആറുമുഴവും ഒരു ചാണും ഉയരമുള്ള ഒരു മല്ലനിറങ്ങിവന്നു.

അവന്‍ തലയില്‍ ഒരു പിച്ചളത്തൊപ്പി ധരിച്ചിരുന്നു.  പിച്ചളക്കവചവും പിച്ചളകൊണ്ടുള്ള കാല്‍ച്ചട്ടയും ധരിച്ചിരുന്ന അവന്റെ തോളിൽ, പിച്ചളകൊണ്ടുള്ള കുന്തം തൂക്കിയിട്ടിരുന്നു. അവന്റെ ആയുധവാഹകൻ പരിചയുമായി മുമ്പിൽ നടന്നു.

ഭീമാകാരനായ ആ മല്ലൻ മുമ്പോട്ടു വന്നപ്പോൾ, ഫിലിസ്ത്യർ  "ഗോലിയാത്ത്, ഗോലിയാത്ത്" എന്നുറക്കെ വിളിച്ചു.

അവൻ ഇസ്രായേല്‍പ്പടയുടെനേരേ അട്ടഹസിച്ചു: "നിങ്ങള്‍ ഫിലിസ്ത്യരുമായി യുദ്ധത്തിനു വന്നിരിക്കുകയാണോ? സാവൂളോ അവന്‍ തിരഞ്ഞെടുക്കുന്ന ഏതെങ്കിലുമൊരുവനോ വന്ന്, എന്നോടെതിർത്തു നോക്കൂ.....

അവനെന്നോടുപൊരുതിജയിച്ച്, എന്നെക്കൊല്ലുകയാണെങ്കില്‍, ഫിലിസ്ത്യർ നിങ്ങളുടെ ദാസന്മാരായിരിക്കും. ഞാന്‍ അവനെക്കൊന്നാല്‍ സാവൂളും ഇസ്രായേലും ഞങ്ങള്‍ക്കടിമകളാകും."

കർത്താവിന്റെ ആത്മാവു കൂടെയില്ലാതിരുന്നതിനാൽ സാവൂൾ ഗോലിയാത്തിനെ ഭയന്നു. ജോനാഥൻ ഗോലിയാത്തിനെ നേരിടാനൊരുങ്ങിയെങ്കിലും സാവൂളതനുവദിച്ചില്ല.

ഇരുസൈന്യങ്ങളും യുദ്ധസജ്ജരായി നിന്നിരുന്നെങ്കിലും യുദ്ധമാരംഭിച്ചിരുന്നില്ല. എല്ലാ ദിവസവും പ്രഭാതത്തിൽ ഗോലിയാത്ത് തന്റെ ഭീഷണിയാവർത്തിച്ചുകൊണ്ടിരുന്നു.

ഗോലിയാത്തിന്റെ ആകാരവും മുഴങ്ങുന്ന ശബ്ദവും ഇസ്രായേൽക്കാരെ ചകിതരാക്കി. അവനെ നേരിടാൻ ഇസ്രായേൽപ്പാളയത്തിൽ ആരുമുണ്ടായിരുന്നില്ല.

ഗോലിയാത്തിനെ വധിക്കുന്നവന്, തന്റെ പുത്രിയെ വിവാഹംചെയ്‌തുകൊടുക്കുകയും, അവന്റെ പിതൃഭവനത്തിന്‌ ഇസായേലില്‍ കരമൊഴിവു കല്പിച്ചുകൊടുക്കുകയുംചെയ്യുമെന്ന്, സാവൂൾ വിളംബരംചെയ്തു.

എങ്കിലും അവനെ നേരിടാൻ ആരും തയ്യാറായില്ല. 

ദാവീദിന്റെ സഹോദരന്മാരില്‍ മൂത്ത മൂന്നുപേരായ ഏലിയാബ്‌, അബിനാദാബ്‌, ഷമ്മാ എന്നിവർ

ഇസ്രായേൽസൈന്യത്തോടൊത്ത്‌ യുദ്ധരംഗത്തുണ്ടായിരുന്നു.

പിതാവായ ജസ്സെ. ദാവീദിനോടു പറഞ്ഞു: "നിന്റെ അമ്മ, കുറച്ചു മലരും കുറച്ചപ്പവും തയ്യാറാക്കിവച്ചിട്ടുണ്ട്. സൈനികപ്പാളയത്തിലുള്ള നിന്റെ സഹോദരന്മാര്‍ക്ക്, അതു നീ കൊണ്ടുപോയിക്കൊടുക്കുക. അവരുടെ സഹസ്രാധിപനു നല്കാനായി പത്തു പാല്‍ക്കട്ടിയുമുണ്ട്. വേഗംപോയി. സഹോദരന്മാരുടെ ക്ഷേമമന്വേഷിച്ചു വരിക. അവർ സുരക്ഷിതരാണെന്നു ബോദ്ധ്യമാക്കുന്ന ഒരടയാളവും അവരില്‍നിന്ന്‌, എനിക്കായി കൊണ്ടുവരണം"

പിതാവിന്റെ നിർദ്ദേശാനുസരണം സൈനികപ്പാളയത്തിലെത്തിയ ദാവീദ്, തന്റെ സഹോദരങ്ങളും സഹസ്രാധിപനുംവരുമ്പോൾ അവർക്കു നല്കണമെന്നു പറഞ്ഞ്, കൊണ്ടുവന്ന പൊതി, പടക്കോപ്പു സൂക്ഷിപ്പുകാരനെയേല്പിച്ചു. ,

പിന്നെയവൻ യുദ്ധരംഗത്തേക്കോടിച്ചെന്നു. തന്റെ സഹോദരന്മാരെക്കണ്ട്, അവരോടു ക്ഷേമാന്വേഷണംനടത്തി. അപ്പോഴാണ് തന്റെ  പതിവു ഭീഷണിയുമായി ഗോലിയാത്തെത്തിയത്.

ഗോലിയാത്തിനെക്കണ്ടപ്പോൾ ഇസ്രായേൽസൈനികർ ഭയന്നു പിന്നോട്ടുമാറി.

ദാവീദ്‌ അടുത്തുനിന്നവരോടു ചോദിച്ചു: "ജീവിക്കുന്ന ദൈവത്തിന്റെ അഭിഷിക്തനായ സാവൂൾരാജാവിനെ നിന്ദിക്കാന്‍ ഈ ഫിലിസ്ത്യനാരാണ്‌? ഇവനെ വധിച്ച്, ഇസ്രായേലിനുവന്നിരിക്കുന്ന അപമാനം നീക്കിക്കളയുവാൻ ഇവിടെയാരുമില്ലേ? ഞാനിവനെക്കൊന്നാൽ  എനിക്കെന്തു കിട്ടും?"

സാവൂൾരാജാവിന്റെ വാഗ്ദാനത്തെക്കുറിച്ച്, ഒരു സൈനികൻ ദാവീദിനോടു പറഞ്ഞു.

ദാവീദ്‌ സൈനികരോടു സംസാരിക്കുന്നത്‌, മൂത്തസഹോദരന്‍ ഏലിയാബ്‌ കേട്ടു. അവന്‍ ദാവീദിനോടു കുപിതനായി: "നീയെന്തിനിവിടെ വന്നു? അഹങ്കാരി! കുറെയാടുകളുള്ളതിനെ  ആരെയേല്പിച്ചിട്ടാണു നീ പോന്നത്?  ആബയെ പറഞ്ഞു കബളിപ്പിച്ച്, ആടുകളെയുമുപേക്ഷിച്ച്, യുദ്ധംകാണാൻ വന്നിരിക്കുന്നു, അല്ലേ?"

 ''അതിനു ഞാനെന്തുചെയ്‌തു? ഇവരോട്, ഒരു വാക്കു പറഞ്ഞതല്ലേയുള്ളു? ആബാ തന്നുവിട്ടതെല്ലാം പടക്കോപ്പുസൂക്ഷിപ്പുകാരനെയേല്പിച്ചിട്ടുണ്ട്. പേടിത്തൊണ്ടന്മാരുടെ യുദ്ധംകാണാനൊന്നും ഞാനില്ല. ഞാൻപോകുന്നു..." 

ദാവീദ്‌ ജ്യേഷ്ഠനോടു 

അവന്‍ ജ്യേഷ്‌ഠന്റെയടുക്കല്‍നിന്നു പോയെങ്കിലും താവളം വിട്ടില്ല. പലസൈനികരോടും അവൻ തന്റെ ചോദ്യമാവർത്തിച്ചു. 

"ഞാനിവനെക്കൊന്നാൽ  എനിക്കെന്തു കിട്ടും?"

എല്ലാവരും ഒരേ ഉത്തരംതന്നെ പറഞ്ഞു.

ദാവീദിന്റെ ചോദ്യംകേട്ടവരിൽച്ചിലർ സാവൂളിനെ അതറിയിച്ചു. രാജാവവനെ തന്റെയടുത്തേക്കു വിളിപ്പിച്ചു.

95. ഇടയച്ചെറുക്കൻ

ബൈബിൾക്കഥകൾ 95

സാവൂളിനെയോര്‍ത്ത്‌, സാമുവല്‍ ദുഃഖിക്കുകയും അവനുവേണ്ടി, കർത്താവിനോടു പ്രാർത്ഥിക്കുകയുംചെയ്തു.

എന്നാൽ, സാവൂൾ തന്റെ കല്പന നിരാകരിച്ചതിനാൽ, കർത്താവവനെ തള്ളിക്കളഞ്ഞു. സാവൂളിനെ ഇസ്രായേലിന്റെ രാജാവാക്കിയതില്‍ കര്‍ത്താവു ഖേദിച്ചു.

കര്‍ത്താവു സാമുവലിനോടു പറഞ്ഞു: "സാവൂളിനെയോർത്തു നീയെന്തിനു വിലപിക്കുന്നു? ഇസ്രായേലിന്റെ രാജത്വത്തില്‍നിന്ന്‌ അവനെ ഞാന്‍ തള്ളിക്കളഞ്ഞിരിക്കുന്നു. അവന്റെ വിധി, അവൻതന്നെ തിരഞ്ഞെടുത്തതാണ്.

നീയിപ്പോൾ അഭിഷേകതൈലം കുഴലിൽ നിറയ്ക്കുക. ബേത്‌ലെഹെം പട്ടണത്തിലേക്ക്, ഇപ്പോൾത്തന്നെ നീ പുറപ്പെടണം. ഇസ്രായേലിന്റെ രാജാവായി അഭിഷേകംചെയ്യേണ്ടവനെ അവിടെ നീ കണ്ടെത്തും.

മൊവാബ്യയായ റൂത്തിൽനിന്നു ബോവാസിനു ജനിച്ച, ഓബദിന്റെ പുത്രൻ ജസ്സെയുടെ ഭവനത്തിലേക്കു നീ പോകുക.. അവന്റെ മക്കളിലൊരുവനെ, ഞാന്‍ ഇസ്രായേലിന്റെ രാജാവായി നിശ്ചയിച്ചിരിക്കുന്നു."

കർത്താവിന്റെ വാക്കുകൾ സാമുവേലിനെ ചകിതനാക്കി
"കർത്താവേ, ഇപ്പോഴും സാവൂൾ ഇസ്രായേലിന്റെ രാജസിംഹാസനത്തിലാണുള്ളത്. അവനുപകരം മറ്റൊരുവനെ ഞാൻ രാജാവായി അഭിഷേകംചെയ്യുന്നുവെന്നുകേട്ടാൽ, അവനെന്നെ കൊന്നുകളയും."

കര്‍ത്താവു പറഞ്ഞു: "ഭയപ്പെടേണ്ടാ, ഒരു പശുക്കിടാവിനെക്കൂടെ നിന്നോടൊപ്പം കൊണ്ടുപോവുക, ജസ്സെയുടെ ഭവനത്തിൽവച്ച്, അതിനെ എനിക്കായി ബലിയർപ്പിക്കുക. നിന്നോടു ചോദിക്കുന്നവരോട്, കര്‍ത്താവിന്റെ കല്ലനയനുസരിച്ച്, ജസ്സേയുടെ ഭവനത്തിൽവച്ച് ഒരു ബലിയർപ്പിക്കാനുണ്ടെന്നുമാത്രം പറയുക."

സാമുവേൽ പിന്നീടു മറുത്തൊന്നും പറഞ്ഞില്ല. അയാൾ യാത്രയ്ക്കു തയ്യാറായി. ഒരു കുഴലിൽ അഭിഷേകത്തിനുള്ള തൈലമെടുത്ത്, ഒരുവയസ്സുതികയാത്ത ഊനമറ്റൊരു പശുക്കിടാവിനെയുംകൊണ്ട് സാമുവേൽ ബേത്‌ലെഹമിലേക്കു യാത്രയായി.

സാമുവേൽപ്രവാചകൻ തങ്ങളുടെ നഗരത്തിലേക്കെത്തുന്നുവെന്നറിഞ്ഞ്, നഗരത്തിലെ ശ്രേഷ്‌ഠന്മാര്‍, ജെസ്സേയോടൊപ്പം സാമുവലിനെ സ്വീകരിക്കാനായി നഗരകവാടത്തിലെത്തി.

അവര്‍ പ്രവാചകനോടു ചോദിച്ചു: "ഞങ്ങളുടെ പട്ടണത്തിലേക്കുള്ള അങ്ങയുടെ വരവ്‌, ശുഭസൂചകംതന്നെയല്ലേ?"

"അതേ", സാമുവൽ പറഞ്ഞു, "ജസ്സേയുടെ ഭവനത്തിൽവച്ച്, കര്‍ത്താവിനൊരു ബലിയര്‍പ്പിക്കാനായാണു ഞാൻ വന്നിരിക്കുന്നത്. നിങ്ങളും എന്നോടൊപ്പംവന്ന്, ബലിയർപ്പണത്തിൽ പങ്കുകൊള്ളുവിൻ."

ശ്രേഷ്ഠന്മാർ, പ്രവാചകന്റെ ക്ഷണം സന്തോഷത്തോടെ സ്വീകരിച്ചു. മോശയുടെ നിയമമനുസരിച്ച്, തങ്ങളെത്തന്നെ ശുദ്ധീകരിച്ച്, ബലിയർപ്പണത്തിനൊരുങ്ങാനായി അവർ പോയി,

സാമുവേൽ ജസ്സെയുടെ ഭവനത്തിലെത്തി. ജെസ്സെ, അത്യധികമായ ആഹ്ലാദത്തോടെയും അഭിമാനത്തോടെയും പ്രവാചകനെ തന്റെ ഭവനത്തിൽ സ്വീകരിച്ചു. പ്രവാചകനുവേണ്ടി, അവൻ നല്ലൊരു വിരുന്നൊരുക്കിയിരുന്നു.

"നിന്റെ പുത്രന്മാരെ എന്റെയടുത്തേക്കു കൊണ്ടുവരുവിൻ. അവരിലൊരുവനെ, ഒരു പ്രത്യേകദൗത്യത്തിനായി കർത്താവു തിരഞ്ഞെടുത്തിരിക്കുന്നു. അവനെ ആ ദൗത്യത്തിനായി അഭിഷേകംചെയ്യാനും കർത്താവിനു കൃതജ്ഞതാബലിയർപ്പിക്കാനുമാണു ഞാൻ വന്നിരിക്കുന്നത്. കർത്താവ്, അവനായി കരുതിവച്ചിരിക്കുന്ന ദൗത്യമെന്തെന്ന് അതിനുള്ള സമയമാകുമ്പോൾ അവിടുന്നുതന്നെ വെളിപ്പെടുത്തും"

ജെസ്സെയുടെ മൂന്നുപുത്രന്മാർ സാവൂളിന്റെ സൈന്യത്തിൽ സേവനംചെയ്യുകയായിരുന്നു. നാലുപേർ സൈനികപരിശീലനത്തിലുമായിരുന്നു. ജെസ്സെ ആളയച്ച്, അവരെ ഏഴുപേരെയും വീട്ടിലേക്കു വിളിപ്പിച്ചു. അവർ വീട്ടിലെത്തിയപ്പോൾ, ബേത്‌ലെഹെമിലെ ശ്രേഷ്ഠന്മാരും
അംഗശുദ്ധീകരണംകഴിഞ്ഞ്
ബലിയര്‍പ്പണത്തിനായെത്തി.

ജെസ്സെയുടെ മൂത്തപുത്രനായ ഏലിയാബ് സാമുവലിനു മുമ്പിൽവന്നു. സാവൂൾരാജാവിനൊപ്പം തലയെടുപ്പും കരുത്തുറ്റ മാംസപേശികളുമുള്ള ഏലിയാബിനെക്കണ്ടപ്പോൾ, കര്‍ത്താവിന്റെ അഭിഷിക്തൻതന്നെയാണു തന്റെമുമ്പിൽ വന്നുനില്‍ക്കുന്നതെന്നു സാമുവലിനു തോന്നി.

എന്നാല്‍, കര്‍ത്താവു സാമുവലിനോടു പറഞ്ഞു:
"മനുഷ്യന്‍ ബാഹ്യരൂപത്തില്‍ ശ്രദ്ധിക്കുന്നു; ഞാനാകട്ടെ, ഹൃദയഭാവത്തിലും.
അവന്റെ ആകാരവടിവോ ഉയരമോ കണ്ടു നീ ഭ്രമിക്കേണ്ടാ. മനുഷ്യന്‍ കാണുന്നതല്ല ഞാൻ കാണുന്നത്‌."

സാമുവൽ ജെസ്സെയോടു പറഞ്ഞു: "ഇവനല്ലാ."

ജെസ്സെ, രണ്ടാമനായ അബിനാദാബിനെ സാമുവലിനുമുമ്പിൽ നിറുത്തി. അവനും തിരഞ്ഞെടുക്കപ്പെട്ടവനായിരുന്നില്ല.

മൂന്നാമനായ ഷമ്മായേയും കർത്താവു നിരസിച്ചു. ജെസ്സെ തന്റെ ഏഴുപുത്രന്മാരെയും പ്രവാചകനുമുമ്പിൽ കൊണ്ടുവന്നു. എന്നാൽ അവരിലാരെയും കർത്താവു തിരഞ്ഞെടുത്തിരുന്നില്ല.

"ഈ ഏഴു പുത്രന്മാർമാത്രമാണോ നിനക്കുള്ളതു്?" സാമുവൽ ജെസ്സേയോടു ചോദിച്ചു.

ജെസ്സെ അല്പനേരം നിശ്ശബ്ദനായി.

"ഇവർക്കെല്ലാം ഇളയവനായി ഒരുവൻകൂടെയുണ്ട്. ഇവരെപ്പോലെ അവനെയും ഒരു സൈനികനാക്കണമെന്നാണു ഞാനാഗ്രഹിച്ചിരുന്നത്. എന്തുചെയ്യാം, അവനതിലൊന്നും താത്പര്യമില്ല." ജെസ്സെ ദീർഘനിശ്വാസമുതിർത്തു. "കുറേ പൊട്ടപ്പാട്ടുകളുണ്ടാക്കും. പിന്നെ, അവൻതന്നെയുണ്ടാക്കിയ കിന്നരംമീട്ടി, ആ പാട്ടുകൾ പാടിനടക്കുകയാണവന്റെ പ്രധാനവിനോദം. മറ്റൊന്നിനുംകൊള്ളാത്തതിനാൽ ഇവിടുള്ള ആടുകളെ മേയ്ക്കുന്ന ജോലി ഞാനവനെയേല്പിച്ചു. ഉള്ളതു പറയാമല്ലോ, അക്കാര്യത്തിൽമാത്രം അവൻ മിടുക്കനാണ്. അവനെയേല്പിച്ച ആടുകളിലൊന്നുപോലും ഇന്നുവരെ ചെന്നായയ്ക്കോ സിംഹത്തിനോ ഇരയായിട്ടില്ല."

അവനെയും വിളിച്ചുവരുത്താന്‍ സാമുവല്‍ ആവശ്യപ്പെട്ടു. ആടുമേയ്ക്കാനല്ലാതെ മറ്റൊന്നിനും അവനെക്കൊള്ളില്ലെന്ന് ജെസ്സെയും പുത്രന്മാരും പറഞ്ഞെങ്കിലും അവനെക്കൂടെ വിളിച്ചുവരുത്തണമെന്ന് സാമുവൽ നിർബന്ധപൂർവ്വം പറഞ്ഞു.

"അവന്‍ വന്നതിനുശേഷംമാത്രമേ,
ഞാനും ബേത്‌ലെഹെമിലെ ഈ ശ്രേഷ്ഠന്മാരും ഭക്ഷണംകഴിക്കുകയുള്ളു" സാമുവൽ പറഞ്ഞു.

അധികംവൈകാതെ ജെസ്സെയുടെ ഇളയപുത്രൻ അവിടെയെത്തി.

കൗമാരത്തിൽനിന്നു യൗവനത്തിലേക്കുകടക്കുന്ന ഒരു കോമളനായിരുന്നു, അവൻ.
പവിഴനിറവും ആകർഷകങ്ങളായ മിഴികളുമുള്ള അവന്റെ
മേൽചുണ്ടിനുമുകളിലും കവിളുകളിലും ചെമ്പൻനിറമുള്ള നനുത്തരോമങ്ങൾ കിളിർത്തുതുടങ്ങിയിട്ടുണ്ട്. ഇടതൂർന്നുവളർന്ന ചുരുണ്ടചെമ്പൻമുടി, നെറ്റിയിലേക്കു വീണുകിടന്നിരുന്നു. ജ്യേഷ്ഠന്മാരെപ്പോലെ ഉയരവും
ഉറച്ചമാംസപേശികളുമില്ലായിരുന്നെങ്കിലും അവന്‍ അതീവസുന്ദരനായിരുന്നു. അവൻ ധരിച്ചിരുന്ന തുകൽവസ്ത്രത്തിന്റെ അരപ്പട്ടയിൽ ഒരു കവിണ തൂക്കിയിട്ടിരുന്നു. അവന്റെ ഇടംകൈയിൽ ഒരു കിന്നരവുമുണ്ടായിരുന്നു.

"ഇതാ, എന്റെ ഇളയപുത്രൻ, ദാവീദ്" ജെസ്സെ മകനെ പ്രവാചകനുമുമ്പിൽ നിറുത്തി. 

പിതാവിന്റെ ആജ്ഞയനുസരിച്ച്, ദാവീദ്, സാമുവേലിനെ പ്രണമിച്ചു.

കര്‍ത്താവ്‌ സാമുവേലിനോടു കല്പിച്ചു: "ഇവന്‍തന്നെയാണു തിരഞ്ഞെടുക്കപ്പെട്ടവൻ.
നീയെഴുന്നേറ്റ്‌ ഇവനെ അഭിഷേകംചെയ്യുക."

സാമുവേൽ, ദാവീവിന്റെ ഇരുതോളുകളിലും കൈകൾപിടിച്ച്, അവനെയുയർത്തി. കുഴലിലെ അഭിഷേകതൈലം അവന്റെ ശിരസ്സിലൊഴിച്ച്, അവനുവേണ്ടി പ്രാർത്ഥിച്ചു. ആ നിമിഷംമുതൽ കർത്താവിന്റെ ആത്മാവ് ദാവീദിൽ ആവസിച്ചു.

ഇസ്രായേലിന്റെ ഭാവിചരിത്രത്തെത്തന്നെ മാറ്റിമറിക്കാനായി നിയുക്തനായ ഒരു രാജാവിന്റെ രാജാഭിഷേകകർമ്മത്തിനാണു തങ്ങൾ സാക്ഷികളാകുന്നതെന്ന്, അപ്പോൾ അവിടെയുണ്ടായിരുന്നവരിൽ ഒരുവൻപോലുമറിഞ്ഞിരുന്നില്ല....