Monday, 25 December 2017

കാഴ്ചകള്‍: കാഴ്ചപ്പാടുകള്‍

കാനാന്‍ദേശം ഒറ്റുനോക്കാന്‍ ഓരോ ഗോത്രത്തിലുംനിന്ന് ഓരോ നേതാവിനെ വീതം തെരഞ്ഞെടുത്ത ശേഷം മോശ അവരെ ഒന്നിച്ചു കൂട്ടി.

"നമ്മള്‍ വാഗ്ദത്തഭൂമിയുടെ അതിര്‍ത്തിയോടടുക്കുകയാണ്. പൂര്‍വ്വപിതാക്കന്മാരായ അബ്രാഹാമും ഇസഹാക്കും യാക്കോബും ജീവിക്കുകയും മരിക്കുകയും അന്ത്യവിശ്രമംകൊള്ളുകയും നാട്. തലമുറകളോളം നമുക്കായി കര്‍ത്താവു വാഗ്ദാനംചെയ്ത, തേനുംപാലുമൊഴുകുന്ന നാട്. നമ്മള്‍ ഈജിപ്തില്‍ പ്രവാസികളായിരുന്നപ്പോള്‍ അന്യജനതകള്‍ ദേശം കൈയടക്കി. അവരെ കീഴടക്കി നാടുപിടിച്ചടക്കണമെങ്കില്‍, അവിടെ ഇന്നു ജീവിക്കുന്ന ജനതയുടെ ശക്തിദൌര്‍ബ്ബല്യങ്ങള്‍ നമ്മളറിയണം. നിങ്ങള്‍ ശേഖരിക്കുന്ന വിവരങ്ങള്‍വച്ചാണു നമ്മള്‍ യുദ്ധതന്ത്രങ്ങള്‍ മെനയുക. രണ്ടുപേര്‍ വീതമുള്ള ഗണങ്ങളായി പോകുക. കര്‍ത്താവു നിങ്ങളോടൊപ്പമുണ്ടായിരിക്കട്ടെ."

ചാരന്മാര്‍ യാത്രയായി. സിന്‍മരുഭൂമിമുതല്‍ ഹമാത്തിന്റെ കവാടത്തിനടുത്തു റഹോബുവരെയുള്ള പ്രദേശങ്ങളില്‍ അവര്‍ സഞ്ചരിച്ചു.  നെഗെബു കടന്ന് അവര്‍ ഹെബ്രോണിലെത്തി. അവിടെ  അഹിമാന്‍, ഷേഷായി, തല്‍മായി തുടങ്ങിയ ജനതകള്‍ വസിച്ചിരുന്നു. അമലേക്യര്‍, ഹിത്യര്‍, ജബൂസ്യര്‍ തുടങ്ങിയ വംശങ്ങളില്‍പ്പെട്ട ജനങ്ങളും ആ നാട്ടില്‍ വസിച്ചിരുന്നു. ഇസ്രായേല്‍ ചാരന്മാര്‍ എഷ്‌ക്കോള്‍ താഴ്‌വരയില്‍നിന്ന് ഒരു മുന്തിരിക്കൊമ്പു കുലയോടുകൂടെ മുറിച്ചെടുത്തു രണ്ടുപേര്‍കൂടി തണ്ടിന്മേല്‍ ചുമന്നുകൊണ്ടു പോന്നു. കുറെ മാതളപ്പഴങ്ങളും  അത്തിപ്പഴങ്ങളും  അവര്‍ കൊണ്ടുവന്നു.      

നാല്പതു ദിവസങ്ങള്‍ക്കുശേഷം പന്ത്രണ്ടുപേരും കൂടാരങ്ങളില്‍ മടങ്ങിയെത്തി. തങ്ങള്‍ കൊണ്ടുവന്ന ഫലങ്ങളും ധാന്യങ്ങളും അവര്‍ മോശയ്ക്കും ഇസ്രായേല്‍ജനതയ്ക്കുംമുമ്പില്‍ വച്ചു. അവര്‍ പറഞ്ഞു.

"തേനുംപാലുമൊഴുകുന്ന നാടെന്ന വിശേഷണത്തിന് എന്തുകൊണ്ടും അനുയോജ്യമാണ് ആ നാട്. അത്രയ്ക്കു ഫലപുഷ്ടമായ മണ്ണ്. അവിടെനിന്നു ഞങ്ങള്‍ കൊണ്ടുവന്ന ഫലങ്ങളും ധാന്യങ്ങളും ആ നാടിന്റെ സമൃദ്ധിയുടെ അടയാളങ്ങള്‍തന്നെ! എന്നാല്‍ അതുപോലെതന്നെ അതിശക്തരും യുദ്ധവീരന്മാരുമാണ് അവിടുത്തെ ജനങ്ങള്‍. വളരെ വിശാലവും കോട്ടകളാല്‍ ചുറ്റപ്പെട്ടവയുമാണ് അവിടുത്തെ പട്ടണങ്ങള്‍. അതുകൊണ്ട് ആ നാടുപിടിച്ചടക്കാന്‍ നമ്മളെപ്പോലെ അശക്തരും നാടോടികളുമായ  ഒരു ജനത ചിന്തിക്കുന്നതുപോലും മരണതുല്യമായ പ്രവൃത്തിയാണ്‌."

അപ്പോള്‍ കാലെബ് എഴുന്നേറ്റുനിന്നു പറഞ്ഞു: "നമുക്കുടനെതന്നെ ആ ദേശം കൈവശപ്പെടുത്താനാകും. അതു കീഴടക്കാനുള്ള ശക്തി നമുക്കുണ്ട്. കാരണം അതു കര്‍ത്താവു നമുക്കു വാഗ്ദാനംചെയ്ത ദേശമാണ്‌."

"ചെറുപ്പത്തിന്റെ ചോരത്തിളപ്പില്‍ നിനക്കങ്ങനെ തോന്നും. അവിടത്തെ ജനങ്ങളെ കീഴ്‌പ്പെടുത്താന്‍ നമുക്കു കഴിയില്ല; അവര്‍ നമ്മെക്കാള്‍ ശക്തന്മാരാണ്." ദേശം ഉറ്റുനോക്കാന്‍ പോയവരില്‍ ജോഷ്വായും കാലെബും ഒഴികെയുള്ളവര്‍ ഉറക്കെ വിളിച്ചുപറഞ്ഞു.

"ഇസ്രായേല്‍ ജനങ്ങളെ, നിങ്ങള്‍ കേള്‍ക്കണം, ഞങ്ങള്‍ ഒറ്റുനോക്കിയ ദേശം അതിനെ ആക്രമിക്കാന്‍ ചെല്ലുന്നവരെ വിഴുങ്ങിക്കളയുന്നതാണ്; അവിടെ ഞങ്ങള്‍ കണ്ട മനുഷ്യര്‍ അതികായന്മാരാണ്. അവിടെയുള്ള മല്ലന്മാരുടെ മുമ്പില്‍ ഞങ്ങള്‍ വെറും വിട്ടിലുകളാണെന്നു ഞങ്ങള്‍ക്കു തോന്നി. അവര്‍ക്കു ഞങ്ങളെക്കുറിച്ചും അങ്ങനെതന്നെ തോന്നിയിരിക്കണം."

ജനങ്ങള്‍ അവരുടെ വാക്കുകള്‍ വിശ്വസിച്ചു. അവര്‍ മോശയ്ക്കും അഹറോനുമെതിരെ തിരിഞ്ഞു. വാളിനിരയാകാന്‍ നീ  ഞങ്ങളെ ഈ ദേശത്തേക്കു കൊണ്ടുവന്നതെന്തിന്? ഞങ്ങളുടെ ഭാര്യമാരും കുഞ്ഞുങ്ങളും ശത്രുക്കളുടെ അടിമകളായിത്തീരുമല്ലോ? ഈജിപ്തിലേക്കു തിരികെപ്പോകുന്നതാണു നമുക്കു നല്ലത്..."

ജനക്കൂട്ടം മോശയോടു പറഞ്ഞു. "ഞങ്ങളെ ഈജിപ്തിലേക്കു തിരികെക്കൊണ്ടുപോകൂ. നിനക്കതിനു കഴിവില്ലെങ്കില്‍ ഞങ്ങള്‍ മറ്റൊരു നേതാവിനെ തെരഞ്ഞെടുത്ത്, അവനോടൊപ്പം ഈജിപ്തിലേക്കു മടങ്ങും."

അപ്പോള്‍ മോശയും അഹറോനും ജനങ്ങള്‍ക്കുമുമ്പില്‍ കമിഴ്ന്നു വീണു സാഷ്ടാംഗം നമസ്കരിച്ചു. "ന് ന് ന് നിങ്ങളുടെ ഇഷ്ടംപോലെയാകട്ടെ... ദ് ദ് ദ് ദേശമുറ്റുനോക്കാന്‍ പ് പ് പ് പോയവരില്‍ ഭ്ഭ്ഭ്ഭൂരിപക്ഷത്തിന്റെ അഭിപ്രായം മാനിക്കാം. പ് പ് പ് പരാജയപ്പെടാന്‍വേണ്ടി, ന് ന് ന് നമുക്കൊരു യുദ്ധത്തിനിറങ്ങേണ്ട..."

മോശയുടെയും അഹറോന്റെയും പ്രവൃത്തി കാണുകയും വാക്കുകള്‍ കേള്‍ക്കുകയുംചെയ്ത ജോഷ്വായും കാലെബും തങ്ങളുടെ വസ്ത്രത്തിന്റെ മേലങ്കി കീറി.

ജോഷ്വാ ഉറക്കെ വിളിച്ചു പറഞ്ഞു. " ഇസ്രായേല്‍ ജനങ്ങളെ, ശ്രേഷ്ഠന്മാരേ, നിങ്ങള്‍ എന്റെ വാക്കുകള്‍ കേള്‍ക്കണം. മുമ്പില്‍ കാണുന്ന കാഴ്ചകളല്ല, നമ്മുടെ കാഴ്ചപ്പാടുകള്‍ രൂപീകരിക്കേണ്ടത്. നമ്മുടെ കാഴ്ചപ്പാടുകളുടെ അടിസ്ഥാനത്തില്‍ കാഴ്ചകളെ നമ്മള്‍ വിലയിരുത്തണം. ദൈവം തെരഞ്ഞെടുത്ത ജനതയാണു നമ്മള്‍ എന്ന ഉറച്ചബോദ്ധ്യമാകണം നമ്മുടെ കാഴ്ചപ്പടിനെ രൂപപ്പെടുത്തേണ്ടത്. ഈജിപ്തില്‍നിന്നു പുറപ്പെട്ടതിനു ശേഷം ഇന്നിതുവരെ കര്‍ത്താവു നമ്മളെ നയിച്ചതെങ്ങനെയെന്നു ചിന്തിക്കൂ... മുമ്പില്‍ ചെങ്കടലും പിന്നില്‍ ഈജിപ്തിന്റെ സേനയുമായിരുന്നിട്ടും നമ്മള്‍ പരാജയപ്പെട്ടോ? നമുക്കു കുടിക്കാന്‍ വെള്ളമില്ലാതായപ്പോള്‍ മാറായിലെ കയ്പുനീര്‍ അവിടുന്നു ശുദ്ധജലമാക്കിയില്ലേ? നമുക്കു ഭക്ഷിക്കാന്‍ ആകാശമിപ്പോഴും മന്നാ പൊഴിക്കുന്നില്ലേ? കിഴക്കന്‍കാറ്റില്‍ കര്‍ത്താവു നമുക്കായി കാടപ്പക്ഷികളെ അയച്ചില്ലേ? അതുകൊണ്ടു പ്രിയമുള്ളവരേ, ഇന്ന് അന്യര്‍ കൈവശപ്പെടുത്തിയിരിക്കുന്ന ആ ദേശം കര്‍ത്താവു നമുക്കു വാഗ്ദാനംചെയ്ത ദേശമാണ്.  കര്‍ത്താവിന്റെ കൃപയാല്‍ അതു നമുക്കു പിടിച്ചെടുക്കാനാകും. അവിടെയുള്ള ജനതയുടെ ശക്തിയെക്കുറിച്ചു നമുക്കു ഭയാകുലത വേണ്ട... എത്ര ശക്തരായാലും അവര്‍ നമുക്കിരയാണ്. ഇനിയവര്‍ക്കു രക്ഷയില്ല. കാരണം, കര്‍ത്താവു നമ്മോടുകൂടെയാണ്; അവരെ നാം ഭയപ്പെടേണ്ടതില്ല..."

എന്നാല്‍ ജനക്കൂട്ടം മുഴുവന്‍ ജോഷ്വായ്ക്കും കാലെബിനുമെതിരായിത്തിരിഞ്ഞു. മോശ അവരെ തടഞ്ഞില്ല. ജനക്കൂട്ടം ജോഷ്വായെയും കാലബിനെയും എറിഞ്ഞുകൊല്ലാന്‍ കല്ലുകള്‍ പെറുക്കി.

അപ്പോള്‍ കര്‍ത്താവിന്റെ മഹത്വം സമാഗമകൂടാരത്തില്‍ പ്രത്യക്ഷമായി.

മോശ തന്റെ തെറ്റുതിരിച്ചറിഞ്ഞു. കര്‍ത്താവിന്റെ സംരക്ഷണത്തിന്റെ കരങ്ങളെ ചില നിമിഷത്തേക്കു താന്‍ മറന്നതില്‍ മോശ പാശ്ചാത്തപിച്ചു.

കര്‍ത്താവ് മോശയോടരുളിച്ചെയ്തു: "ഈ ജനം എത്രത്തോളമെന്നെ പ്രകോപിപ്പിക്കും? നിങ്ങളുടെ മദ്ധ്യേ ഞാന്‍ പ്രവര്‍ത്തിച്ചിട്ടുള്ള അടയാളങ്ങള്‍ കണ്ടിട്ടും എത്രനാള്‍ നിങ്ങളെന്നെ വിശ്വസിക്കാതിരിക്കും? മഹാമാരിയാല്‍ ഞാനീ ജനതയെ  നിര്‍മ്മൂലനം ചെയ്യും. എന്നാല്‍, അവരെക്കാള്‍ വലുതും ശക്തവുമായ ഒരു ജനതയെ നിന്നില്‍നിന്നു ഞാന്‍ പുറപ്പെടുവിക്കും.      

മോശ കര്‍ത്താവിനോടു പ്രാര്‍ത്ഥിച്ചു: "അ്അ്അ്അവിടുത്തെ ശക്തമായ കരമാണല്ലോ ഇ്ഇ്ഇഈ ജനത്തെ ഈജിപ്തില്‍നിന്നു കൊണ്ടുപോന്നത്.  കക് ക് ര്‍ത്താവേ, അങ്ങ് ഈ ജനത്തിന്റെ മദ്ധ്യേയുണ്ടെന്ന് അവര്‍ക്കറിയാം. കാരണം, ഞ് ഞ് ഞ് ഞങ്ങളങ്ങയെ അഭിമുഖം കാണുന്നു; അ്അ്അ്അവിടുത്തെ മേഘം, ഞങ്ങളുടെ മുകളില്‍ എപ്പോഴും നില്‍ക്കുന്നു. പ് പ് പ് പകല്‍ മേഘസ്തംഭവും ര് ര് ര് രാത്രിയില്‍ അഗ്നിസ്തംഭവുംകൊണ്ട് അ്അ്അ്അവിടുന്നു ഞങ്ങള്‍ക്കു വഴകാട്ടുന്നു. അതിനാല്‍ ഒരൊറ്റയാളെയെന്നപോലെ അ്അ്അ്അങ്ങീ ജനത്തെ സംഹരിച്ചുകളഞ്ഞാല്‍ ഈഇ്ഇ്ഈജിപ്തുകാര്‍ പറയും: അവര്‍ക്കു കൊടുക്കാമെന്നു സത്യംചെയ്ത ദേശത്ത് അ്അ്അ്അവരെയെത്തിക്കാന്‍ കര്‍ത്താവിനു കഴിവില്ലാത്തതുകൊണ്ടു മരുഭൂമിയില്‍വച്ച് അവനവരെക്കൊന്നുകളഞ്ഞു. ഇ്ഇ്ഇ്ഈ ദേശത്തു വസിക്കുന്നവരോടും അവരിക്കാര്യം പറയും. കര്‍ത്താവേ, അങ്ങരുളിച്ചെയ്തിട്ടുള്ളതുപോലെ അ്അ്അ്അങ്ങയുടെ ശക്തി വലുതാണെന്നു പ്രകടമാക്കണമേയെന്നു ഞാന്‍ പ്രാര്‍ത്ഥിക്കുന്നു. ക് ക് ക് കര്‍ത്താവു ക്ഷമാശീലനും അചഞ്ചല സ്‌നേഹം കവിഞ്ഞൊഴുകുന്നവനുമാണ്. അ്അ്അ്അവിടുന്ന് അകൃത്യവും അപരാധങ്ങളും ക്ഷമിക്കുന്നവനാണ്. എ്എ്എ്എന്നാല്‍ കുറ്റക്കാരനെ വെറുതെ വിടാതെ, പിതാക്കന്മാരുടെ അകൃത്യങ്ങള്‍ക്കു മക്കളെ മുമ് മ് മൂന്നും നാലും തലമുറവരെ ശിക്ഷിക്കുന്നവനുമാണെന്ന് അങ്ങരുളിച്ചെയ്തിട്ടുണ്ടല്ലോ. അ്അ്അ്അങ്ങയുടെ കാരുണ്യാതിരേകത്തിനു യോജിച്ചവിധം ഈജിപ്തുമുതലിവിടംവരെ ഞങ്ങളോടു ക്ഷമിച്ചതുപോലെ ഇ്ഇ്ഇഇപ്പോഴും ഞങ്ങളുടെയപരാധം പൊറുക്കണമെന്ന് അങ്ങയോടു ഞാന്‍ യാചിക്കുന്നു."

അപ്പോള്‍ കര്‍ത്താവരുളിച്ചെയ്തു: "നിന്റെ അപേക്ഷ സ്വീകരിച്ചു ഞാന്‍ ക്ഷമിച്ചിരിക്കുന്നു. എന്നാല്‍ ഞാനാണേ, ഭൂമി നിറഞ്ഞിരിക്കുന്ന എന്റെ മഹത്വമാണേ, കര്‍ത്താവായ ഞാന്‍ പറയുന്നു, എന്റെ മഹത്വവും, ഈജിപ്തിലും മരുഭൂമിയിലുംവച്ചു ഞാന്‍ ചെയ്ത അടയാളങ്ങളും കണ്ടിട്ടും എന്നെ പല പ്രാവശ്യം പരീക്ഷിക്കുകയും എന്റെ സ്വരം അവഗണിക്കുകയുംചെയ്ത ഈ ജനത്തിലാരും, അവരുടെ പിതാക്കന്മാര്‍ക്കു ഞാന്‍ വാഗ്ദാനംചെയ്ത ദേശം കാണുകയില്ല. എന്നെ നിന്ദിച്ചവരാരുമതു കാണുകയില്ല. എന്നാല്‍ എന്റെ ദാസനായ കാലെബിനെ അവനൊറ്റുനോക്കിയ ദേശത്തേക്കു ഞാന്‍ കൊണ്ടുപോകും; അവന്റെ സന്തതികള്‍ അതു കൈവശമാക്കും. എന്തെന്നാല്‍, അവനെ നയിച്ച ചൈതന്യം വ്യത്യസ്തമാണ്. അവനെന്നെ പൂര്‍ണ്ണമായി അനുഗമിക്കുകയും ചെയ്തു.      

വഴിപിഴച്ച ഈ സമൂഹം എത്രനാള്‍ എനിക്കെതിരേ പിറുപിറുക്കും. എനിക്കെതിരേ ഇസ്രായേല്‍ ജനം പിറുപിറുക്കുന്നതു ഞാന്‍ കേട്ടിരിക്കുന്നു. അവരോടു പറയുക: എന്നും ജീവിക്കുന്നവനായ ഞാന്‍ ശപഥം ചെയ്യുന്നു: ഞാന്‍ കേള്‍ക്കെ നിങ്ങള്‍ പിറുപിറുത്തതുപോലെ ഞാന്‍ നിങ്ങളോടു ചെയ്യും. നിങ്ങളുടെ ശവങ്ങള്‍ ഈ മരുഭൂമിയില്‍ വീഴും.  നിങ്ങളില്‍ ഇരുപതും അതിലേറെയും വയസ്സുള്ളവരില്‍, എനിക്കെതിരായി പിറുപിറുത്ത ഒരാള്‍പോലും, നിങ്ങളെ പാര്‍പ്പിക്കാമെന്നു ഞാന്‍ വാഗ്ദാനംചെയ്ത ദേശത്തു പ്രവേശിക്കുകയില്ല. യഫുന്നയുടെ മകന്‍ കാലെബും നൂനിന്റെ മകന്‍ ജോഷ്വയുംമാത്രം അവിടെ പ്രവേശിക്കും. എന്നാല്‍, ശത്രുക്കള്‍ക്കിരയാകുമെന്നു നിങ്ങള്‍ ഭയപ്പെട്ട നിങ്ങളുടെ മക്കളെ ഞാനവിടെ പ്രവേശിപ്പിക്കും. നിങ്ങള്‍ തിരസ്‌കരിച്ച ആ ദേശം അവരനുഭവിക്കും.      

നിങ്ങളില്‍ അവസാനത്തെയാള്‍ ഈ മരുഭൂമിയില്‍ വീഴുന്നതുവരെ നിങ്ങളുടെ അവിശ്വസ്തതയ്ക്കു പ്രായശ്ചിത്തം ചെയ്തുകൊണ്ട് നിങ്ങള്‍ നിങ്ങളുടെ മക്കള്‍ക്കൊപ്പം നാല്പതുവര്‍ഷം ഈ മരുഭൂമിയില്‍ നാടോടികളായി അലഞ്ഞു തിരിയും. നാല്പതു ദിവസം നിങ്ങള്‍ ആ ദേശത്തു രഹസ്യ നിരീക്ഷണം നടത്തി. ഒരു ദിവസത്തിന് ഒരു വര്‍ഷം വീതം നാല്പതു വര്‍ഷത്തേക്കു നിങ്ങളുടെ അകൃത്യത്തിനു നിങ്ങള്‍ പ്രായശ്ചിത്തം ചെയ്യണം. എന്നോടു കാട്ടിയ അവിശ്വസ്തതയുടെ രൂക്ഷത അങ്ങനെ നിങ്ങളറിയും.      

കര്‍ത്താവായ ഞാനാണു പറയുന്നത്: എനിക്കെതിരേ ഒത്തുചേര്‍ന്ന ഈ കൂട്ടത്തോടു തീര്‍ച്ചയായും ഞാനിതു ചെയ്യും. അവരില്‍ അവസാനത്തെ മനുഷ്യന്‍വരെ ഈ മരുഭൂമിയില്‍ മരിച്ചുവീഴും."    

കര്‍ത്താവറിയിച്ച കാര്യങ്ങള്‍ മോശ ജനങ്ങളോടു പറഞ്ഞു. ജനങ്ങള്‍ പാശ്ചാത്താപത്തോടെ വിലപിച്ചു.

 നിമിഷങ്ങള്‍ക്കുള്ളില്‍, ദേശം ഒറ്റുനോക്കാന്‍ മോശ അയച്ചവരില്‍ നൂനിന്റെ മകനായ ജോഷ്വയും യഫുന്നയുടെ മകന്‍ കാലെബുമൊഴികെ മറ്റു പത്തുപേരും ജനങ്ങളുടെ മുമ്പില്‍ വീണു മരിച്ചു..

പിറ്റേന്ന് അതിരാവിലെ ജനങ്ങളില്‍ കുറേപ്പേര്‍ എഴുന്നേറ്റു ലമുകളിലേക്കു പോകാനൊരുങ്ങി. അവര്‍ പറഞ്ഞു: "ഞങ്ങള്‍ പാപം ചെയ്തുപോയി! എന്നാല്‍, കര്‍ത്താവു വാഗ്ദാനംചെയ്ത ദേശത്തേക്കു പോകാന്‍ ഇപ്പോഴിതാ ഞങ്ങള്‍ തയ്യാറാണ്."    

മോശ പറഞ്ഞു: നിങ്ങളെന്തിനു വീണ്ടും കര്‍ത്താവിന്റെ കല്പന ലംഘിക്കുന്നു? അതൊരിക്കലും വിജയിക്കുകയില്ല. ശത്രുക്കളുടെമുമ്പില്‍ തോല്‍ക്കാതിരിക്കാന്‍ നിങ്ങളിപ്പോള്‍ മുകളിലേക്കു കയറരുത്. എന്തെന്നാല്‍ കര്‍ത്താവു നിങ്ങളുടെകൂടെയില്ല. അമലേക്യരും കാനാന്യരും നിങ്ങള്‍ക്കെതിരേ നില്‍ക്കും. നിങ്ങളവരുടെ വാളിനിരയാകും. കര്‍ത്താവിനു പുറംതിരിഞ്ഞിരിക്കുന്നതിനാല്‍ അവിടുന്നു നിങ്ങളോടുകൂടെയുണ്ടായിരിക്കുകയില്ല."      

കര്‍ത്താവിന്റെ വാഗ്ദാന പേടകമോ മോശയോ പാളയത്തില്‍നിന്ന് ഇറങ്ങിച്ചെല്ലാതിരുന്നിട്ടും അവര്‍ ധിക്കാരപൂര്‍വം മലയിലേക്കു കയറി, അമലേക്യരുടെ നാട്ടില്‍ പ്രവേശിച്ചു..  അമലേക്യരും കാനാന്യരും അവര്‍ക്കെതിരെ പടനയിച്ചെത്തി, ഹോര്‍മാവരെ അവരെ  തോല്പിച്ചോടിച്ചു.

Saturday, 9 December 2017

പന്ത്രണ്ടു ചാരന്മാര്‍


നം പശ്ചാത്താപത്തോടെ കര്‍ത്താവിനു മുമ്പില്‍ സാഷ്ടാംഗംവീണു കരഞ്ഞു. കര്‍ത്താവു മഹാമാരി പിന്‍വലിച്ചു. മഹാമാരിയില്‍ മരിച്ചവരെ മരുഭൂമിയില്‍ അടക്കി. അത്യാഗ്രഹികളെ സംസ്കരിച്ചതുകൊണ്ട് ആ സ്ഥലത്തിനു കിബ്രോത്ത് ഹത്താവ എന്നുപേരിട്ടു. കിബ്രോത്ത് ഹത്താവയില്‍ ഇസ്രായേലിനു കുറച്ചേറെ ദിനങ്ങള്‍ താമസിക്കേണ്ടതായി വന്നു.

കര്‍ത്താവിന്റെ മേഘം സമാഗമകൂടാരത്തില്‍നിന്നുയര്‍ന്നപ്പോള്‍ ഇസ്രായേല്‍ജനം വീണ്ടും യാത്രതുടര്‍ന്നു. ഏറെ വൈകാതെ അവര്‍ ഹസറോത്തിലെത്തി താവളമടിച്ചു

മോശയ്ക്ക്, സിപ്പോറയെക്കൂടാതെ കുഷ്യ വംശജയായ ഒരു ഭാര്യകൂടെയുണ്ടായിരുന്നു. വിജാതീയ സ്ത്രീയായ  അവളെപ്രതി, അഹറോന്‍റെ സഹോദരിയായ മിരിയാം മോശയെ പരിഹസിച്ചു സംസാരിച്ചു. അഹറോനാകട്ടെ, അവളെ തടഞ്ഞതുമില്ല.

കര്‍ത്താവു മേഘസ്തംഭത്തില്‍ ഇറങ്ങിവന്നു സമാഗമകൂടാരവാതില്‍ക്കല്‍ നിന്നു. അവിടുന്നു മിരിയാമിനെയും അഹറോനെയും വിളിച്ചു. അവര്‍ മുന്നോട്ടു ചെന്നപ്പോള്‍ അവിടുന്നരുളിച്ചെയ്തു: "നിങ്ങളുടെയിടയില്‍ ഒരു പ്രവാചകനുണ്ടെങ്കില്‍ കര്‍ത്താവായ ഞാന്‍ ദര്‍ശനത്തില്‍ എന്നെത്തന്നെ അവനു വെളിപ്പെടുത്തിക്കൊടുക്കും; സ്വപ്നത്തില്‍ അവനോടു സംസാരിക്കുകയും ചെയ്യും. എന്‍റെ ദാസനായ മോശയുടെ കാര്യത്തില്‍ അങ്ങനെയല്ല. എന്‍റെ ജനത്തിന്‍റെ മുഴുവന്‍ ചുമതലയും അവനെയേല്പിച്ചിരിക്കുന്നു. അവ്യക്തമായിട്ടല്ല, സ്പഷ്ടമായി മുഖാഭിമുഖം അവനുമായി ഞാന്‍ സംസാരിക്കുന്നു. അവന്‍ കര്‍ത്താവിന്‍റെ രൂപം കാണുകയും ചെയ്യുന്നു. എന്നിട്ടും എന്‍റെ ദാസനായ മോശയ്‌ക്കെതിരായി സംസാരിക്കാന്‍ നിങ്ങള്‍ ഭയപ്പെടാതിരുന്നതെന്ത്?"

കര്‍ത്താവിന്‍റെ കോപം അവര്‍ക്കെതിരേ ജ്വലിച്ചു. അവിടുത്തെ മഹത്വം അവരെ വിട്ടുപോയി. കര്‍ത്താവിന്‍റെ മേഘം  കൂടാരത്തിനു മുകളില്‍നിന്നു നീങ്ങിയപ്പോള്‍ മിരിയാം കുഷ്ഠംപിടിച്ചു മഞ്ഞുപോലെ വെളുത്തു. അവളെക്കണ്ട അഹറോന്‍ നടുങ്ങി.
       
അഹറോന്‍ മോശയുടെ കാല്‍ക്കല്‍ വീണു. "പ്രഭോ, ഞങ്ങള്‍ ബുദ്ധിഹീനമായിട്ടാണു പ്രവര്‍ത്തിച്ചത്; ആ പാപം ഞങ്ങളുടെമേല്‍ ചുമത്തരുതേ! ശരീരം മുഴുവനഴുകി, പാതിജീവനോടെ ജീവിക്കുന്ന അവസ്ഥയിലേക്ക് എന്‍റെ സഹോദരിയെ തള്ളരുതേ...."    

മോശ കര്‍ത്താവിനോടു നിലവിളിച്ചു: "കര്‍ത്താവേ, ഞാന്‍ കേണപേക്ഷിക്കുന്നു, അവളെ സുഖപ്പെടുത്തണമേ!"
     
കര്‍ത്താവു മോശയോടു പറഞ്ഞു: "ഏഴുദിവസം അവളെ പാളയത്തിനു പുറത്തു പാര്‍പ്പിക്കുക; അതിനുശേഷം അകത്തു കൊണ്ടുവരാം. അപ്പോള്‍ അവള്‍ സൗഖ്യമാകും."      

 അങ്ങനെ മിരിയാമിനെ ഏഴു ദിവസത്തേക്കു പാളയത്തില്‍നിന്നു പുറത്താക്കി. അവളെ അകത്തു പ്രവേശിപ്പിക്കുന്നതുവരെ ജനം യാത്ര പുറപ്പെടാതെ കൂടാരത്തില്‍ത്തന്നെ കഴിഞ്ഞു. അതിനുശേഷം അവര്‍ ഹസേറോത്തില്‍നിന്നു പുറപ്പെട്ടു.

അഞ്ചുദിവസങ്ങള്‍ക്കുശേഷം പാരാന്‍മരുഭൂമിയില്‍ പാളയമടിച്ചു. അവിടെവച്ചു കര്‍ത്താവു മോശയോടു പറഞ്ഞു. "നിങ്ങള്‍ തേനും പാലുമൊഴുകുന്ന കാനാന്‍ ദേശത്തിനു സമീപമെത്തിക്കഴിഞ്ഞു. ആ ദേശം കീഴടക്കുന്നതിനുള്ള പദ്ധതികളും യുദ്ധമുറകളും തയ്യാറാക്കുന്നതിനുവേണ്ടി, ദേശം ഒറ്റുനോക്കാന്‍ ചാരന്മാരെ അയയ്ക്കുക."

കര്‍ത്താവിന്റെ നിര്‍ദ്ദേശപ്രകാരം ഒരു ഗോത്രത്തില്‍നിന്ന്, ഒരാളെന്ന ക്രമത്തില്‍ പന്ത്രണ്ടുപേരെ മോശ തെരഞ്ഞെടുത്തു.  റൂബന്‍ ഗോത്രത്തില്‍നിന്നു സക്കൂറിന്റെ മകന്‍ ഷമ്മുവാ; ശിമയോന്‍ ഗോത്രത്തില്‍നിന്നു ഷാഫാത്ത്; യൂദാ ഗോത്രത്തില്‍ നിന്നു കാലെബ്; ഇസാക്കര്‍ ഗോത്രത്തില്‍ നിന്ന് ഈഗാല്‍; എഫ്രായിം ഗോത്രത്തില്‍ നിന്നു ജോഷ്വാ; ബഞ്ചമിന്‍ ഗോത്രത്തില്‍ നിന്നു പല്‍തി; സെബുലൂണ്‍ ഗോത്രത്തില്‍നിന്നു ഗദ്ദീയേല്‍; ജോസഫിന്‍റെ ഗോത്രത്തില്‍ നിന്നു ഗദ്ദീ; ദാന്‍ ഗോത്രത്തില്‍ നിന്ന് അമ്മിയേല്‍; ആഷേര്‍ ഗോത്രത്തില്‍ നിന്നു സെത്തൂര്‍; നഫ്താലി ഗോത്രത്തില്‍ നിന്നു വോഫെസിയുടെ മകന്‍ നഹ്ബി; ഗാദ് ഗോത്രത്തില്‍നിന്നു മാക്കിയുടെ മകന്‍ ഗവുവേല്‍ എന്നിവരായിരുന്നു കാനാന്‍ദേശം ഒറ്റുനോക്കാനായി മോശ തെരഞ്ഞെടുത്ത ഗോത്രത്തലവന്മാരായ പന്ത്രണ്ടുപേര്‍.

തങ്ങള്‍ക്കായി കര്‍ത്താവു വാഗ്ദാനംചെയ്ത കാനാന്‍ദേശത്തേയ്ക്കു ചാരവൃത്തിക്കായി പോകാന്‍ അവര്‍ തയ്യാറെടുത്തു.

"ആ നാട്ടിലെ ജനങ്ങളെങ്ങനെയുള്ളവരാണ്, അവരുടെ രാജാവിനുള്ള സൈനികബലമെത്ര, എന്തൊക്കെയാണു നാടിന്റെ ബലഹീനതകള്‍, നമ്മള്‍ ആ നാടാക്രമിക്കുമ്പോള്‍, രാജ്യത്തിന്റെ ഏതുഭാഗത്തുനിന്നാണു യോദ്ധാക്കള്‍ക്കു കടന്നുചെല്ലാനെളുപ്പം തുടങ്ങിയ കാര്യങ്ങളെല്ലാം സൂക്ഷമതയോടെ നിങ്ങള്‍ മനസ്സിലാക്കണം. എല്ലായ്പോഴും കര്‍ത്താവു നിങ്ങളോടൊപ്പമുണ്ടായിരിക്കും. അവിടുത്തെസ്തുതികള്‍ നിങ്ങളുടെ നാവില്‍നിന്ന് ഒരിക്കലുമൊഴിയാതിരിക്കട്ടെ. " മോശ പന്ത്രണ്ടുപേരെയും ആശീര്‍വദിച്ചുകൊണ്ടു പറഞ്ഞു.

Saturday, 2 December 2017

കാടപ്പക്ഷികള്‍ വീണ്ടും ...



"സ്രായേല്‍ ജനവും അവര്‍ക്കൊപ്പം ഈജിപ്തില്‍നിന്നുപോന്ന അന്യവര്‍ഗ്ഗക്കാരും കര്‍ത്താവിനെതിരായി വീണ്ടും പിറുപിറുത്തു തുടങ്ങി.

"ആരാണു ഞങ്ങള്‍ക്കു ഭക്ഷിക്കാന്‍ മാംസം തരുക? ഈജിപ്തില്‍ വെറുതെ കിട്ടിയിരുന്ന മത്സ്യവും പച്ചക്കറികളും ഞങ്ങള്‍ക്കിന്ന് ഓര്‍മ്മകള്‍മാത്രം!  ഇവിടെ ഞങ്ങളുടെ പ്രാണന്‍ പോകുന്നു. ഈ *മന്നയല്ലാതെ മറ്റെന്തു കിട്ടാനുണ്ടിവിടെ?" ഇസ്രായേല്‍ കുടുംബങ്ങള്‍ ഓരോന്നും സ്വന്തം കൂടാരവാതില്‍ക്കലിരുന്നു വിലപിക്കുന്നതു മോശ കേട്ടു.

കര്‍ത്താവിന്റെ കോപം ആളിക്കത്തി; അവിടുത്തെ കോപാഗ്നിയാല്‍ പാളയത്തിന്റെ ചിലഭാഗങ്ങള്‍ ദഹിച്ചുപോയി. ജനം പരിഭ്രാന്തരായി മോശയോടു നിലവിളിച്ചു. മോശ സാഷ്ടാംഗംവീണു കര്‍ത്താവിനോടു പ്രാര്‍ത്ഥിച്ചു. വിവേകമില്ലാത്ത പിറുപിറുക്കലുകള്‍ക്ക് കര്‍ത്താവിനോടു മാപ്പുചോദിച്ചു. മോശയുടെ ആത്മാര്‍ത്ഥമായ വാക്കുകള്‍ക്കു കര്‍ത്താവു വിലകല്പിച്ചതിനാല്‍ അഗ്നി ശമിച്ചു.

"അങ്ങയുടെ ദാസനോട് ഇത്ര കഠിനമായി വര്‍ത്തിക്കുന്നതെന്തുകൊണ്ട്? അങ്ങെന്നോടു കൃപ കാണിക്കാത്തതെന്തുകൊണ്ടാണ്? ഈ ജനത്തിന്റെ ഭാരമെല്ലാം അങ്ങെന്തിനാണ്  എന്‍റെമേല്‍ ചുമത്തിയിരിക്കുന്നത്? ഈ ജനത്തിനു നല്‍കാന്‍ എവിടെനിന്നു മാംസം കിട്ടും? ഞങ്ങള്‍ക്കു ഭക്ഷിക്കാന്‍ മാംസം തരുകയെന്ന് അവര്‍ കരയുന്നത് അങ്ങു കാണുന്നില്ലേ?" മോശ കര്‍ത്താവിനോടു പരാതിപ്പെട്ടു.:

"ഇനിയും നീ ഒറ്റയ്ക്കീ ഭാരം  വഹിക്കേണ്ടാ. ജനത്തിലെ ശ്രേഷ്ഠന്‍മാരിലും പ്രമാണികളിലുംനിന്ന് എഴുപതുപേരെ വിളിച്ചുകൂട്ടി, സമാഗമ കൂടാരത്തിനരികില്‍ കൊണ്ടുവരുക. നിന്‍റെമേലുള്ള ചൈതന്യത്തില്‍നിന്ന് ഒരു ഭാഗം അവരിലേക്കു ഞാന്‍ പകരും. നിന്നോടൊപ്പം അവരും ജനത്തിന്‍റെ ചുമതല വഹിക്കും; നീ  ജനത്തോടു പറയുക: നാളത്തേക്കു നിങ്ങളെത്തന്നെ ശുദ്ധീകരിക്കുക. നിങ്ങള്‍ക്കു ഭക്ഷിക്കാന്‍  കര്‍ത്താവു മാംസം തരും, ഒന്നോ രണ്ടോ അഞ്ചോ പത്തോ ഇരുപതോ ദിവസത്തേക്കല്ല, നിങ്ങളുടെ മൂക്കിലൂടെ പുറത്തുവന്ന് ഓക്കാനം വരുന്നതുവരെ ഒരു മാസത്തേക്കു നിങ്ങളതു ഭക്ഷിക്കും. എന്തുകൊണ്ടെന്നാല്‍, നിങ്ങളുടെയിടയില്‍ വസിക്കുന്ന കര്‍ത്താവിനെ ഉപേക്ഷിക്കുകയും ഈജിപ്തില്‍നിന്നു പോന്നത് ബുദ്ധിമോശമായിപ്പോയി എന്നു നിങ്ങള്‍ വിലപിക്കുകയും ചെയ്തു."  

"എന്നോടൊത്തുള്ള യോദ്ധാക്കള്‍തന്നെയുണ്ട്, ആറു ലക്ഷംപേര്‍ . അതിനുമെത്രയോ ഇരട്ടിയാണു മറ്റുള്ളവര്‍! എന്നിട്ടും ഒരു മാസത്തേക്ക് അവര്‍ക്കു ഭക്ഷിക്കാന്‍ മാംസം നല്‍കുമെന്ന് അങ്ങു പറയുന്നു, ഇതെങ്ങനെ സംഭവിക്കും?"      

"എന്‍റെ കൈക്കു നീളം കുറഞ്ഞുപോയോ? എന്‍റെ വാക്കു നിറവേറുമോ ഇല്ലയോ എന്നു നീ കാണും." കര്‍ത്താവു മോശയ്ക്കു മറുപടി നല്‍കി.  

മോശ ചെന്നു കര്‍ത്താവിന്റെ വാക്കുകള്‍ ജനത്തെയറിയിച്ചു. ഇസ്രായേല്‍ ശ്രേഷ്ഠന്മാരില്‍നിന്ന് എഴുപതുപേരെ ഒരുമിച്ചുകൂട്ടി, സമാഗമ കൂടാരത്തിനു ചുറ്റും നിറുത്തി. തെരഞ്ഞെടുക്കപ്പെട്ടവരില്‍ എല്‍ദാദ്, മെദാദ് എന്നീ രണ്ടുപേര്‍ പാളയത്തിനുള്ളില്‍നിന്നു പുറത്തുവന്നില്ല.

കര്‍ത്താവു മേഘത്തിലിറങ്ങിവന്നു, അവിടുന്നു മോശയുടെമേലുണ്ടായിരുന്ന ചൈതന്യത്തില്‍ ഒരു ഭാഗം എഴുപതു നേതാക്കന്മാരുടെമേല്‍ പകര്‍ന്നു. അപ്പോള്‍ അവര്‍ പ്രവചിച്ചു. സമാഗമകൂടാരത്തിലേക്കു പോകാതെ പാളയത്തിലിരുന്ന എല്‍ദാദ്, മെദാദ് എന്നിവര്‍ക്കും ചൈതന്യം ലഭിച്ചു.  അവര്‍ പാളയത്തിനുള്ളില്‍വച്ചു തന്നെ പ്രവചിച്ചു.      

എല്‍ദാദും മെദാദും പാളയത്തില്‍വച്ചു പ്രവചിക്കുന്നുവെന്ന് ഒരു യുവാവ് ഓടിയെത്തി മോശയോടു പറഞ്ഞു. ഇതു കേട്ടപ്പോള്‍, മോശയുടെ തിരഞ്ഞെടുക്കപ്പെട്ട ശുശ്രൂഷകരില്‍ ഒരുവനായയ ജോഷ്വ പറഞ്ഞു: "പ്രഭോ, അവരെ വിലക്കുക."      

മോശ ജോഷ്വയോടു പറഞ്ഞു: "കര്‍ത്താവിന്റെ ജനം മുഴുവന്‍ പ്രവാചകന്മാരാവുകയും അവിടുന്നു തന്റെ ആത്മാവിനെ അവര്‍ക്കു നല്‍കുകയും ചെയ്തിരുന്നെങ്കിലെന്നു ഞാനാശിക്കുന്നു. എന്നെക്കാള്‍ വലിയ പ്രവാചകര്‍ നമുക്കിടയിലുണ്ടാകണം...."  

മോശയും ഇസ്രായേലിലെ നേതാക്കന്മാരും പാളയത്തിലേക്കു മടങ്ങിയപ്പോള്‍ കര്‍ത്താവ് ഒരു കാറ്റയച്ചു.അതു കടലില്‍നിന്നു കാടപ്പക്ഷികളെ കൊണ്ടുവന്നു. ഒരു ദിവസത്തെ യാത്രയുടെ ദൂരം വ്യാസാര്‍ദ്ധത്തില്‍ കൂടാരത്തിനുചുറ്റും രണ്ടു മുഴം കനത്തില്‍ മൂടിക്കിടക്കത്തക്ക വിധം അവ വന്നുവീണു.  ജനം അന്നു പകലും രാത്രിയും പിറ്റേന്നും കാടപ്പക്ഷികളെ ശേഖരിച്ചു. അവര്‍ കാടയിറച്ചി വെയിലില്‍ ഉണക്കിയെടുത്തു.

ഇസ്രായേലിന്റെ മേലുള്ള കര്‍ത്താവിന്‍റെ കോപം അപ്പോഴും ശമിച്ചിരുന്നില്ല. അതിനാല്‍ ഇസ്രായേല്‍ പാളയത്തില്‍ ഒരു മഹാമാരി പടര്‍ന്നുതുടങ്ങി. കാടയിറച്ചി ഭക്ഷിച്ചു തീരുംമുമ്പേ, നിരവധിപേര്‍ രോഗാതുരരായി മരിച്ചുവീണു.


*മന്ന - ഇവിടെ ക്ലിക്കു ചെയ്യുക

Saturday, 25 November 2017

സ്വര്‍ണ്ണക്കാള

കര്‍ത്താവില്‍നിന്നുള്ള സന്ദേശങ്ങള്‍ക്കായി ഉയര്‍ന്ന പര്‍വ്വതശിഖരത്തിലേക്കു കയറിപ്പോയ മോശയെക്കാത്തുനിന്ന ജോഷ്വാ അസ്വസ്ഥനായി. മൂന്നു ദിവസങ്ങള്‍ കഴിഞ്ഞിട്ടും മോശ മടങ്ങിയെത്തിയിട്ടില്ല. മോശമടങ്ങിയെത്താന്‍ ഇനിയും വൈകുന്നതെന്തേ? ഇപ്പോഴിതാ, താഴെ, മലയടിവാരത്തില്‍ ഇസ്രായേല്‍ജനം കൂടാരമടിച്ച ഭാഗത്തുനിന്നും കാഹളധ്വനികളും മനുഷ്യരുടെ അട്ടഹാസങ്ങളുടെ ശബ്ദവും ഉയര്‍ന്നുകേള്‍ക്കുന്നു. ശക്തരായ മറ്റേതെങ്കിലും ജനത ഇസ്രായേല്‍ജനതയെ ആക്രമിക്കാനെത്തിയോ? ഒന്നും വ്യക്തമല്ല. മോശയെ അന്വേഷിച്ചു മുകളിലേക്കു കയറണമോ? അതോ കൂടാരങ്ങളില്‍ എന്താണു സംഭവിക്കുന്നതെന്നറിയാന്‍ താഴേയ്ക്കിറങ്ങണമോ? എന്തുചെയ്യണമെന്ന തീരുമാനത്തിലെത്താന്‍ ജോഷ്വായ്ക്കു കഴിഞ്ഞില്ല.

ഇസ്രായേല്‍ജനത്തിനെതിരേ കര്‍ത്താവിന്റെ കോപം ജ്വലിക്കുന്നതുകണ്ട മോശ ചകിതനായി.

കര്‍ത്താവു പറഞ്ഞു; "അനുസരണമില്ലാത്ത ഈ ജനതയെ ഞാന്‍ പൂര്‍ണ്ണമായും നശിപ്പിക്കും. എന്നാല്‍ നിന്നില്‍നിന്നു ഞാന്‍ വലിയൊരു ജനതയ്ക്കു രൂപം നല്‍കും."

മോശ കര്‍ത്താവിനുമുമ്പില്‍ സാഷ്ടാംഗം പ്രണമിച്ചുകൊണ്ടു പറഞ്ഞു: "കര്‍ത്താവേ, കരുണതോന്നേണമേ! വലിയ ശക്തിയോടും കരബലത്തോടുംകൂടെ അങ്ങുതന്നെ ഈജിപ്തില്‍നിന്നു പുറത്തു കൊണ്ടുവന്ന അങ്ങയുടെ ജനത്തിനെതിരേ അവിടുത്തെ ക്രോധം ജ്വലിക്കരുതേ....   മലകളില്‍വച്ചു കൊന്നുകളയുന്നതിനും ഭൂമുഖത്തുനിന്നു തുടച്ചുമാറ്റുന്നതിനുമുള്ള ദുരുദ്ദേശ്യത്തോടുകൂടിയാണ് അവനവരെ കൊണ്ടുപോയതെന്ന് ഈജിപ്തുകാര്‍ പറയാനിടവരുത്തുന്നതെന്തിന്? അവിടുത്തെ ഉഗ്രകോപം കൈവെടിയണമേ! അങ്ങയുടെ ജനത്തിനെതിരായുള്ള തീരുമാനത്തില്‍നിന്നു പിന്‍മാറണമേ! അവിടുത്തെ ദാസന്മാരായ അബ്രാഹത്തെയും ഇസഹാക്കിനെയും ഇസ്രായേലിനെയും ഓര്‍ക്കണമേ! നിങ്ങളുടെ സന്തതികളെ ആകാശത്തിലെ നക്ഷത്രങ്ങളെപ്പോലെ ഞാന്‍ വര്‍ദ്ധിപ്പിക്കും, ഞാന്‍ വാഗ്ദാനംചെയ്തിട്ടുള്ള ഈ നാടു മുഴുവന്‍ നിങ്ങളുടെ സന്തതികള്‍ക്കു ഞാന്‍ നല്‍കും, അവര്‍ അതെന്നേക്കും കൈവശമാക്കുകയും ചെയ്യുമെന്ന് അവിടുന്നുതന്നെ ശപഥം ചെയ്തു പറഞ്ഞതില്‍നിന്നു പിന്മാറരുതേ"

മോശയുടെ ആത്മാര്‍ത്ഥമായ പ്രാര്‍ത്ഥന കര്‍ത്താവിനെ ശാന്തനാക്കി. അവിടുന്നു പറഞ്ഞു' "നീ പോവുക, നിന്റെ ജനത്തെ അവരുടെ തിന്മകളില്‍നിന്നു പിന്തിരിപ്പിക്കുക...."

ഉടമ്പടിപത്രികയെഴുതിയ രണ്ടു കല്പലകകളുമായി, മോശ  താഴേക്കിറങ്ങി, ജോഷ്വയുടെ സമീപമെത്തി. പലകകളുടെ ഇരുവശത്തും എഴുത്തുണ്ടായിരുന്നു.

മോശയെ കണ്ടപ്പോള്‍ ജോഷ്വായ്ക്ക് ആശ്വാസം തോന്നി. അവന്‍ ഓടിയെത്തി മോശയുടെ കൈകളില്‍നിന്നും ഉടമ്പടിപത്രികകള്‍ വാങ്ങാന്‍ ശ്രമിച്ചു. എന്നാല്‍ മോശ അവ തന്റെ കൈകളില്‍ത്തന്നെ വഹിച്ചു.

"പാളയത്തില്‍ യുദ്ധത്തിന്റെ ശബ്ദം മുഴങ്ങുന്നുണ്ട്." ജോഷ്വാ പറഞ്ഞു.

"വിജയത്തിന്റെ അട്ടഹാസമോ പരാജയത്തിന്റെ മുറവിളിയോ അല്ല നീ കേള്‍ക്കുന്നത്. ദൈവനിഷേധത്തിന്റെ ഗാനാലാപനമാണവിടെ; കര്‍ത്താവിനെ തള്ളിപ്പറയുന്നവരുടെ ആഘോഷോന്മാദ ശബ്ദം."

ജോഷ്വായ്ക്ക് ഒന്നും മനസ്സിലായില്ല. അവന്‍, മിണ്ടാതെ മോശയ്ക്കൊപ്പം മലയിറങ്ങി.

താഴ്വരയില്‍ പാളയത്തിനടുത്തെത്തുന്നതിനു മുമ്പുതന്നെ  സ്വര്‍ണ്ണനിര്‍മ്മിതമായ കാളക്കുട്ടിയെ ജനങ്ങള്‍ വണങ്ങുന്നതും അതിനുമുമ്പില്‍ അവര്‍ നൃത്തം ചെയ്യുന്നതും മോശയും ജോഷ്വായും കണ്ടു; മോശ  കോപംകൊണ്ടു വിറച്ചു. കൈയിലിരുന്ന  അവന്‍ കല്‍പലകകള്‍ വലിച്ചെറിഞ്ഞു. മലയുടെ അടിവാരത്തില്‍ വീണ് അവ തകര്‍ന്നുപോയി.

മോശ അഹറോനോടു കയര്‍ത്തു: "നീ ഈ ജനത്തിന്റെമേല്‍ ഇത്ര വലിയൊരു പാപം വരുത്തിവയ്ക്കാന്‍ അവര്‍ നിന്നോടെന്തുചെയ്തു?"

ഇന്നുവരെ കണ്ടിട്ടില്ലാത്ത, മോശയുടെ മോപംനിറഞ്ഞ മുഖം അഹറോനെ ഭയപ്പെടുത്തി. അയാള്‍ സ്വയം ന്യായീകരിക്കാന്‍ ശ്രമിച്ചു.

അങ്ങയുടെ കോപം എന്റെമേല്‍ ജ്വലിക്കാതിരിക്കട്ടെ. തിന്‍മയിലേക്ക്, ഈ ഈ ജനത്തിനുള്ള  ചായ്‌വ് അങ്ങേയ്ക്കറിയാമല്ലോ. ഞങ്ങളെ നയിക്കാന്‍ ദേവന്മാരെയുണ്ടാക്കിത്തരുക എന്ന് അവരെന്നോടാവശ്യപ്പെട്ടു. പോയിട്ടു ദിവസങ്ങളായെങ്കിലും അങ്ങു മലയില്‍നിന്നു മടങ്ങിവന്നതുമില്ല. ജനക്കൂട്ടം എന്റെ ജീവനപഹരിക്കുമെന്നു ഞാന്‍ ഭയന്നു. സ്വര്‍ണ്ണം കൈവശമുള്ളവര്‍ അതു കൊണ്ടുവരട്ടെയെന്നു ഞാന്‍ പറഞ്ഞു. അവര്‍ കൊണ്ടുവന്നു. ഞാനതു തീയിലിട്ടു. അപ്പോള്‍ ഈ കാളക്കുട്ടി പുറത്തുവന്നു."

"സ്വര്‍ണ്ണം തീയിലിട്ടാല്‍ അതു കാളക്കുട്ടിയായി പുറത്തുവരുമോ? ശത്രുക്കളുടെയിടയില്‍ സ്വയം ലജ്ജിതരാകത്തക്കവിധം അഴിഞ്ഞാടുന്നതിന് ഈ ജനത്തെ നീയെന്തിനനുവദിച്ചു?"

ആ സ്വര്‍ണ്ണക്കാളയെ, അതിനു  ദഹനബലിയര്‍പ്പിക്കാനായി ഒരുക്കിയ അഗ്നികുണ്ഡത്തിലേക്കുതന്നെ  മോശ വലിച്ചെറിഞ്ഞു. അതിനെ ഉരുക്കിചാമ്പലാക്കി. അതിന്റെ ചാരം കുടിനീരില്‍ കലര്‍ത്തി ഇസ്രായേല്‍ക്കാരെ കുടിപ്പിച്ചു.

മോശ, ജോഷ്വായോടൊപ്പം പാളയത്തിന്റെ കവാടത്തില്‍ നിന്നുകൊണ്ടു പറഞ്ഞു: "കര്‍ത്താവിന്റെ പക്ഷത്തുള്ളവര്‍ എന്റെയടുത്തേക്കു വരട്ടെ. ലേവിയുടെ പുത്രന്മാരെല്ലാവരും അവന്റെയടുക്കല്‍ ഒന്നിച്ചുകൂടി.

ജോഷ്വായും ലേവി ഗോത്രജരും ഊരിയ വാളോടെ കാളക്കുട്ടിയെ ആരാധിച്ചവരെ നേരിട്ടു. ഇസ്രായേല്‍ താവളത്തില്‍ വലിയ കൂട്ടക്കൊല നടന്നു. മൂവായിരത്തോളംപേര്‍ അന്നു പരലോകംപൂകി.

എല്ലാം ശാന്തമായപ്പോള്‍ മോശ ജനത്തോടു പറഞ്ഞു: നിങ്ങള്‍ കഠിനപാപം ചെയ്തിരിക്കുന്നു. ഞാന്‍ വീണ്ടും കര്‍ത്താവിന്റെയടുത്തേക്കു കയറിച്ചെല്ലാം; നിങ്ങളുടെ പാപത്തിനു പരിഹാരംചെയ്യാന്‍ എനിക്കു കഴിഞ്ഞേക്കും.      
മോശ കര്‍ത്താവിന്റെയടുക്കല്‍ തിരിച്ചുചെന്നു പറഞ്ഞു: ഈ ജനം വലിയ പാപം ചെയ്തുപോയി. അവര്‍ തങ്ങള്‍ക്കായി സ്വര്‍ണ്ണംകൊണ്ടു ദേവന്മാരെ നിര്‍മ്മിച്ചു. അവിടുന്നവരുടെ പാപം ക്ഷമിക്കണം; അല്ലെങ്കില്‍, അവിടുത്തെ  ജീവന്റെ പുസ്തകത്തില്‍ നിന്ന് എന്റെ പേരു മായിച്ചുകളഞ്ഞാലും.      

കര്‍ത്താവു മോശയോടു പറഞ്ഞു: എനിക്കെതിരായി പാപംചെയ്തവനെയാണ് എന്റെ പുസ്തകത്തില്‍നിന്നും ഞാന്‍ തുടച്ചുനീക്കുക. നീ പോയി ഞാന്‍ നിന്നോടു പറഞ്ഞിട്ടുള്ള സ്ഥലത്തേക്കു ജനത്തെ നയിക്കുക. അവരെ സന്ദര്‍ശിക്കുന്ന ദിവസം അവരുടെ പാപങ്ങളെപ്രതി ഞാനവരെ  ശിക്ഷിക്കും. നീയും ഈജിപ്തില്‍നിന്നു നീ കൂട്ടിക്കൊണ്ടുവന്ന ജനവും ഇവിടെനിന്നു പുറപ്പെട്ട്, അബ്രാഹത്തോടും ഇസഹാക്കിനോടും യാക്കോബിനോടും അവരുടെ സന്തതികള്‍ക്കായി നല്‍കുമെന്നു ഞാന്‍ ശപഥം ചെയ്തിട്ടുള്ള നാട്ടിലേക്കു പോവുക. എന്റെ ദൂതന്‍ നിന്റെമുമ്പേ പോകും. ആ നാട്ടിലുള്ള കാനാന്‍കാരെയും അമോര്യരെയും ഹിത്യരെയും പെരീസ്യരെയും ഹിവ്യരെയും ജബൂസ്യരെയും ഞാന്‍ ഓടിച്ചുകളയും. നീ ഇസ്രായേല്‍ക്കാരോടു പറയുക; നിങ്ങള്‍ ദുശ്ശാഠ്യക്കാരായ ഒരു ജനമാണ്. ഒരു നിമിഷത്തേക്കു നിങ്ങളുടെകൂടെ സഞ്ചരിച്ചാല്‍മതി, നിങ്ങളെ ഞാന്‍ നശിപ്പിച്ചുകളയും. എന്നോടുള്ള വിധേയത്തത്തിന്റെ പ്രതീകമായി, നിങ്ങളുടെ ആഭരണങ്ങള്‍ അഴിച്ചുമാറ്റുവിന്‍."

കര്‍ത്താവു വീണ്ടും  മോശയോടുപറഞ്ഞു: "ആദ്യത്തേതുപോലുള്ള രണ്ടു കല്പലകള്‍ ചെത്തിയെടുക്കുക. നീ ഉടച്ചുകളഞ്ഞ പലകകളിലുണ്ടായിരുന്ന വാക്കുകള്‍തന്നെ ഞാനതിലെഴുതാം."

മോശ കൊണ്ടുവന്ന അശുഭമായ ഈ വാര്‍ത്തകേട്ടു ജനങ്ങള്‍  വിലപിച്ചു.  ഹോറെബുമലയുടെ സമീപത്തുവച്ച് ഇസ്രായേല്‍ജനം ആഭരണങ്ങളഴിച്ചു മാറ്റി. ആരും ആഭരങ്ങളണിഞ്ഞില്ല. കര്‍ത്താവിനും  മോശയ്ക്കുമെതിരായ തങ്ങളുടെ പ്രവൃത്തികളെക്കുറിച്ചു ജനങ്ങള്‍ പശ്ചാത്തപിച്ചു.

Saturday, 18 November 2017

പത്തുകല്പനകള്‍

മോശയും അഹറോനും മലമുകളിലേക്കു കയറി. മലമുകളില്‍ കര്‍ത്താവിന്റെ സാന്നിദ്ധ്യം മോശയെ പൊതിഞ്ഞുനിന്നു.

കര്‍ത്താവു മോശയോടു പറഞ്ഞു: "നിങ്ങളും നിങ്ങളുടെ തലമുറകളും വാഗ്ദത്ത ഭൂമിയില്‍ ദീര്‍ഘനാള്‍ ജീവിക്കുന്നതിനാവശ്യമായ ജീവന്റെ നിയമങ്ങള്‍ ഞാന്‍ നിങ്ങള്‍ക്കു നല്‍കാം. ഒരു സമൂഹമായി നിലനില്‍ക്കാനാവശ്യമായ നിയമങ്ങളും ഞാന്‍ നിങ്ങള്‍ക്കു നല്‍കാം. "

ഇസ്രായേല്‍ജനം അനുഷ്ഠിക്കേണ്ട ദൈവാരാധനയെക്കുറിച്ചുള്ള നിയമങ്ങളും സാമൂഹിക നിയമങ്ങളും കര്‍ത്താവു മോശയുടെ മനസ്സില്‍ പതിച്ചുകൊണ്ടിരുന്നു. കര്‍ത്താവ് ഇസ്രായേല്‍ ജനത്തിനോടു പുതിയൊരുടമ്പടി ചെയ്തു.

മോശയും അഹറോനുംചേര്‍ന്ന്, കര്‍ത്താവിന്റെ വചനങ്ങള്‍ എഴുത്തു ചുരുളുകളിലെഴുതി വച്ചു.

അഹറോനെയും അവന്റെ പുത്രന്മാരെയും തന്റെ പുരോഹിതശുശ്രൂഷകരായി കര്‍ത്താവു ചുമതലപ്പെടുത്തി. കര്‍ത്താവിന്റെ തിരുസാന്നിദ്ധ്യകൂടാരവും അതിനോടുചേര്‍ന്ന ബലിപീഠവും നിര്‍മ്മിക്കാനുള്ള അളവുകളും അവിടുന്നവര്‍ക്കു നല്‍കി.

മോശ മടങ്ങിവന്നു കര്‍ത്താവിന്റെ എല്ലാവാക്കുകളും നിയമങ്ങളും ജനങ്ങളെ അറിയിച്ചു. കര്‍ത്താവു കല്പിച്ചതെല്ലാം ചെയ്യുമെന്ന്, ജനങ്ങള്‍ ഏകസ്വരത്തില്‍ വിളിച്ചുപറഞ്ഞു.

മോശ, മലയടിവാരത്തില്‍ ഒരു ബലിപീഠവും ഇസ്രായേലിന്റെ പന്ത്രണ്ടു ഗോത്രങ്ങളെ സൂചിപ്പിക്കാനായി പന്ത്രണ്ടു സ്തൂപങ്ങളുമുണ്ടാക്കി.

ഊനമറ്റ ഒരു കാളക്കിടാവിനെ മോശ കര്‍ത്താവിനായി ബലിയര്‍പ്പിച്ചു. ബലിമൃഗത്തിന്റെ രക്തത്തില്‍ പകുതി അവന്‍ ബലിപീഠത്തില്‍ തളിച്ചു. ബാക്കി, പാത്രങ്ങളില്‍ ശേഖരിച്ചു.

പിന്നെ, കര്‍ത്താവ് ഇസ്രായേലുമായി ചെയ്യുന്ന ഉടമ്പടിയുടെ വചനങ്ങളെഴുതിയ എഴുത്തുചുരുള്‍ നിവര്‍ത്തി അഹറോന്‍ ഉറക്കെ വായിച്ചു. ഉടമ്പടി വചനങ്ങള്‍ ശ്രവിച്ച ജനങ്ങള്‍ ഉറക്കെ വിളിച്ചുപറഞ്ഞു."ഞങ്ങള്‍ കര്‍ത്താവിനോടു വിശ്വസ്തരായിരിക്കും. ഈ ഉടമ്പടിയിലെ എല്ലാക്കാര്യങ്ങളും ഞങ്ങള്‍ പാലിക്കും."

അപ്പോള്‍ പാത്രങ്ങളില്‍ ശേഖരിച്ച, ബലിമൃഗത്തിന്റെ  രക്തമെടുത്ത്, മോശ ജനങ്ങളുടെമേല്‍ തളിച്ചുകൊണ്ടു പറഞ്ഞു. "ഇ്ഇ്ഇ്ഇസ്രായേല്‍ ജനത കര്‍ത്താവിനോടു ചെയ്യുന്ന ഉ്ഉ്ഉ് ഉടമ്പടിയുടെ രക്തമാണിത്. ഇ്ഇ്ഇ്ഇതു നിങ്ങളെ എക്കാലവും സംരക്ഷിക്കട്ടെ..."

മോശയും അഹറോനും വാര്‍ദ്ധക്യത്തിലായിരുന്നതിനാല്‍ തങ്ങളെ സഹായിക്കാനായി അവര്‍ ജോഷ്വാ, ഹൂര്‍ എന്നീ ചെറുപ്പക്കാരെ സമൂഹത്തില്‍നിന്നു തെരഞ്ഞെടുത്തു.

കര്‍ത്താവു മോശയോടു പറഞ്ഞു: "മലമുകളില്‍ എന്റെ സമീപത്തേക്കു കയറിവന്നു കാത്തുനില്‍ക്കുക. എല്ലാനിയമങ്ങള്‍ക്കും അടിസ്ഥാനമായ നിയമങ്ങളെഴുതിയ കല്പലകകള്‍ നിനക്കു നല്‍കാം. നീ അവ ജനത്തെ പഠിപ്പിക്കുക."

മോശ ഇസ്രായേല്‍ശ്രേഷ്ഠന്മാരോടു പറഞ്ഞു. "ഞ്‍ഞ്‍ഞ്‍ഞാന്‍ ജോഷ്വായോടൊപ്പം സീനായ് മലയില്‍ ക്‍ക്‍ക്‍കര്ത്താവിന്റെ സന്നിധിയിലേക്കു പോകുന്നു. അ്‍അ്‍അ്‍അഹറോനും ഹൂറും ന്്ന്്ന് നിങ്ങള്‍ക്കൊപ്പ, ഇവിടെയുണ്ടാകും. ഞ്‍ഞ്‍ഞ്‍ഞങ്ങള്‍ മടങ്ങി വരുന്നതുവരെ ന്്ന്്നിങ്ങളി വിടെ കാത്തുനില്‍ക്കുവിന്‍..."

മോശയും ജോഷ്വായും മലമുകളിലേക്കു കയറിപ്പോയി. താന്‍ നല്‍കിയ നിയമങ്ങളെക്കുറിച്ച്, കര്‍ത്താവു വീണ്ടും മോശയോടു സംസാരിച്ചു.

കര്‍ത്താവു പറഞ്ഞു: "അടിമത്തത്തിന്റെ ഭവനമായ ഈജിപ്തില്‍നിന്നു നിന്നെ പുറത്തുകൊണ്ടുവന്ന ഞാനാണു നിന്റെ ദൈവമായ കര്‍ത്താവ്. ഞാനല്ലാതെ വേറെ ദേവന്മാര്‍ നിനക്കുണ്ടാകരുത്. മുകളില്‍ ആകാശത്തിലോ താഴെ ഭൂമിയിലോ ഭൂമിക്കടിയിലോ ജലത്തിലോ ഉള്ള ഒന്നിന്റെയും പ്രതിമയോ സ്വരൂപമോ നിര്‍മ്മിക്കുകയോ അവയെ ആരാധിക്കുകയോ ചെയ്യരുത്.

നിന്റെ ദൈവമായ കര്‍ത്താവിന്റെ നാമം വൃഥാ ഉപയോഗിക്കരുത്.

ആറുദിവസം എല്ലാജോലികളും ചെയ്യുകയും അദ്ധ്വാനിക്കുകയും ചെയ്യുക. എന്നാല്‍ ഏഴാംദിവസം കര്‍ത്താവിന്റെ സാബത്താണ്. കര്‍ത്താവിന്റെ സാബത്തു വിശുദ്ധമായി ആചരിക്കുക. അന്നു മറ്റുജോലികളില്‍ വ്യാപൃതനാകരുത്.

നിന്റെ ദൈവമായ കര്‍ത്താവുതരുന്ന നാട്ടില്‍, നീ ദീര്‍ഘമായി ജീവിച്ചിരിക്കേണ്ടത്തിനു്, നിന്റെ പിതാവിനെയും മാതാവിനെയും ബഹുമാനിക്കുക.

ആരെയും കൊല്ലരുത്.

നീയൊരിക്കലും വ്യഭിചാരം ചെയ്യരുത്.

മോഷ്ടിക്കരുത്.

ആര്‍ക്കുമെതിരെ വ്യാജസാക്ഷ്യം നല്‍കരുത്.

അയല്‍ക്കാരന്റെ ഭവനമോ, അവന്റെ ഭാര്യയേയോ, അവന്റെ എന്തെങ്കിലും വസ്തുവകകളോ മോഹിക്കരുത്...."

ഒന്നുരണ്ടു ദിവസങ്ങള്‍ കടന്നുപോയി. മോശ മലയില്‍നിന്നിറങ്ങിവരാന്‍ താമസിക്കുന്നുവെന്നു കണ്ടപ്പോള്‍ ജനങ്ങള്‍ അഹറോന്റെ ചുറ്റുംകൂടി.

"ഞങ്ങളെ ഈജിപ്തില്‍നിന്നു കൊണ്ടുവന്ന മോശയെന്ന മനുഷ്യന് എന്തുസംഭവിച്ചുവെന്നു ഞങ്ങള്‍ക്കറിയില്ല. ഞങ്ങള്‍ക്ക് ഈ മരുഭൂമിയില്‍നിന്നു പുറത്തുകടക്കണം. ഞങ്ങളെ നയിക്കാനായി, നീ ഞങ്ങള്‍ക്കു ദേവന്മാരെ ഉണ്ടാക്കിത്തരൂ."

അഹറോന്‍ പറഞ്ഞു. "നിങ്ങളുടെ ഭാര്യമാരുടെയും പുത്രീപുത്രന്മാരുടെയും കാതിലുള്ള `സ്വര്‍ണ്ണവളയങ്ങള്‍ ഊരിയെടുത്ത്‌ എന്നെയേല്‍പ്പിക്കുക. "

ജനങ്ങള്‍ അഹറോന്‍ പറഞ്ഞതുപോലെ ചെയ്തു. അഹറോന്‍ അതുവാങ്ങി മൂശയിലുരുക്കി ഒരു കാളക്കുട്ടിയെ വാര്‍ത്തെടുത്തു.

വാര്‍പ്പുവിഗ്രഹത്തെക്കണ്ട ഇസ്രായേല്‍ജനം ആര്‍പ്പുവിളിച്ചു. ജനക്കൂട്ടം വിളിച്ചുപറഞ്ഞു. " ഇതാ ഈജിപ്തില്‍നിന്നു നമ്മളെ കൊണ്ടുവന്ന ദേവന്‍ ...."

ജനങ്ങളുടെ ആവേശംകണ്ടപ്പോള്‍, അഹറോന്‍ കാളക്കുട്ടിയുടെ മുമ്പില്‍ ഒരു ബലിപീഠം പണിതു.

അയാള്‍ ഉറക്കെ പറഞ്ഞു. "നാളെ നമ്മള്‍ കര്‍ത്താവിന്റെ ഉത്സവം കൊണ്ടാടും...."

പിറ്റേന്ന്, ജനങ്ങള്‍ പുലര്‍കാലത്തുണര്‍ന്നു കാളക്കുട്ടിയുടെ പ്രതിമയ്ക്കു മുമ്പില്‍ ദഹനയാഗവും അനുരഞ്ജന യാഗവും നടത്തി.

പിന്നെ തീറ്റയും കുടിയും കഴിഞ്ഞ്, അവര്‍ വിനോടങ്ങളിലേര്‍പ്പെട്ടു.

കര്‍ത്താവ്, തന്റെ കല്പനകലെഴുതിയ രണ്ടു കല്പലകകള്‍ മോശയ്ക്കു നല്‍കി. തന്റെ വിരല്‍ത്തുമ്പാല്‍ കര്‍ത്താവു കല്പലകയിലെഴുതിയത്, അഗ്നിയാല്‍ കല്ലിനെ ഉരുക്കിയതുപോലെ കാണപ്പെട്ടു. 

മലയുടെ താഴ്വരയില്‍നിന്ന്‍, ഇസ്രായേല്‍ജനതയുടെ ആഘോഷങ്ങളുടെ ആരവം മോശയും ജോഷ്വായും കേട്ടു. എന്നാല്‍ അതെന്താണെന്ന് അവര്‍ക്കു മനസ്സിലായില്ല.

കര്‍ത്താവു മോശയോടു പറഞ്ഞു. "വേഗം താഴേക്കു ചെല്ലുക; നിന്റെ ജനം തങ്ങളെത്തന്നെ ദുഷിപ്പിച്ചിരിക്കുന്നു. അവര്‍ ഒരു കാളക്കുട്ടിയെ വാര്‍ത്തെടുത്ത് അതിനെ ആരാധിക്കുകയും അതിനു ബലിയര്‍പ്പിക്കുകയും ചെയ്തിരിക്കുന്നു. ഇവര്‍ ദുശ്ശാഠ്യക്കാരായ ഒരു ജനതയാണെന്നു ഞാന്‍ കണ്ടു കഴിഞ്ഞു. അതിനാല്‍ എന്റെ ക്രോധമാളിക്കത്തി അവരെ വിഴുങ്ങട്ടെ...."

Saturday, 11 November 2017

സീനായ് മലയിലെ ഇടിമുഴക്കങ്ങള്‍

ഇസ്രായേല്‍ജനത ഈജിപ്തില്‍നിന്നു പുറപ്പെട്ടിട്ടു മൂന്നുമാസങ്ങള്‍ കഴിഞ്ഞു.

നന്മവരുമ്പോള്‍ ദൈവത്തെ സ്തുതിച്ചും സന്നിഗ്ദ്ധാവസ്ഥകളില്‍ ദൈവത്തെയും മോശയേയും പഴിച്ചും അവര്‍ മുന്നോട്ടു സഞ്ചരിച്ചുകൊണ്ടിരുന്നു. മൂന്നു മാസവും ഒരു ദിവസവും തികഞ്ഞ ദിവസം ഇസ്രായേല്‍ സീനായ് മലയുടെ താഴ്വാരത്തിലെത്തി. അവരവിടെ താവളമടിച്ചു.

കര്‍ത്താവിനോടു പ്രാര്‍ത്ഥിക്കാനായി മോശ മലമുകളിലേക്കു കയറി.

കര്‍ത്താവു മോശയോടു പറഞ്ഞു: "ഈജിപ്തിനോടു ഞാന്‍ ചെയ്തതെന്തെന്നും നിങ്ങളെ എങ്ങനെ ഞാന്‍ എന്റെയടുക്കലേക്കു കൊണ്ടുവന്നുവെന്നും നിങ്ങള്‍ കണ്ടുകഴിഞ്ഞു. ഈ ഭൂമിമുഴുവന്‍ എന്റെതാണ്. അതുകൊണ്ട്,  നിങ്ങളെന്റെ വാക്കുകേള്‍ക്കുകയും എന്റെയുടമ്പടി പാലിക്കുകയുംചെയ്‌താല്‍, എല്ലാജനതകളിലുംവച്ച്, എനിക്കേറ്റവും പ്രിയപ്പെട്ട,എന്റെ സ്വന്തം ജനമായിരിക്കും നിങ്ങള്‍.  നിങ്ങളെനിക്കു വിശുദ്ധജനവും പുരോഹിതരാജ്യവുമായിരിക്കും."

ഇസ്രായേല്‍ ശ്രേഷ്ടന്മാരെ വിളിച്ചു കൂട്ടി, കര്‍ത്താവറിയിച്ച കാര്യങ്ങള്‍ മോശ വിശദീകരിച്ചു.

"കര്‍ത്താവു കല്പിക്കുന്നതെല്ലാം ഞങ്ങളനുസരിച്ചു കൊള്ളാം." ഇസ്രായേല്‍ ഏകസ്വരത്തില്‍ മോശയോടു പറഞ്ഞു.

മോശ വീണ്ടും കര്‍ത്താവിന്റെ സന്നിധിയിലെത്തി. ജനങ്ങളുടെ വാക്കുകളറിയിച്ചപ്പോള്‍ കര്‍ത്താവു മോശയോടു പറഞ്ഞു.

"ഞാന്‍ നിന്നോടു സംസാരിക്കുമ്പോള്‍ ജനം കേള്‍ക്കുന്നതിനും അവര്‍ നിന്നെ വിശ്വസിക്കുന്നതിനുംവേണ്ടി, ഒരു കനത്ത മേഘത്തില്‍ ഞാന്‍ നിങ്ങളുടെ മദ്ധ്യത്തിലേക്കു വരുന്നു. നീ ചെന്ന്, ഇസ്രായേല്‍ ജനതയെ വിശുദ്ധീകരിക്കുക. മനസ്സിലും ശരീരത്തിലും ആത്മാവിലും എല്ലാവരും വിശുദ്ധിയുള്ളവരായിരിക്കട്ടെ. മൂന്നാംദിവസം എല്ലാവരും തയ്യാറായിരിക്കണം. എന്തെന്നാല്‍, ജനംമുഴുവന്‍ കാണ്‍കേ, ഞാന്‍ സീനായ് മലയില്‍ ഇറങ്ങി വരും. മലയ്ക്കു ചുറ്റും നീ അതിര്‍ത്തി നിശ്ചയിക്കണം. ആരും ആ അതിര്‍ത്തി കടന്നു മലയില്‍ കയറരുത്. അതിര്‍ത്തി കടക്കുന്നതു മനുഷ്യനായാലും വധിക്കപ്പെടും."

കര്‍ത്താവിന്റെ കല്പന, മോശ ജനങ്ങളെയറിയിച്ചു.

"ന് ന് ന് നിങ്ങള്‍ മനസ്സിലും ശരീരത്തിലും ശ് ശ് ശ് ശുദ്ധിയുള്ളവരായിരിക്കുവിന്‍. വ് വ് വ് വസ്ത്രങ്ങളലക്കുകയും ക് ക് ക് കൂടാരങ്ങള്‍ ശുദ്ധീകരിക്കുകയും ചെയ്യുക. അ്അ്അ്ആരും ലൈംഗികവ് വ് വ് വേഴ്ചയില്‍ ഏര്‍പ്പെടരുത്..."

ജനങ്ങള്‍ മോശയുടെ നിര്‍ദ്ദേശങ്ങള്‍ അക്ഷരംപ്രതി പാലിച്ചു.

മൂന്നാം ദിവസം പ്രഭാതത്തില്‍ വലിയ ഇടിമുഴക്കവും മിന്നല്‍പ്പിണരുകളുമുണ്ടായി. മലമുകളില്‍ കനത്ത മേഘം നിറഞ്ഞു. അന്തരീക്ഷത്തിലെങ്ങും കാഹളധ്വനികള്‍ മുഴങ്ങി.

ദൈവത്തെ കാണുന്നതിനായി മോശ ജനങ്ങളെ കൂടാരങ്ങളില്‍നിന്നു പുറത്തു കൊണ്ടുവന്നു. അവര്‍ മലയടിവാരത്തില്‍ നിലയുറപ്പിച്ചു.

സീനായ് മലമുകളില്‍ അഗ്നിജ്വാലയായി കര്‍ത്താവിറങ്ങി വന്നു. മലമുഴുവന്‍ ധൂമാവൃതമായി. ചൂളയില്‍നിന്നെന്നപോലെ പുകഉയര്‍ന്നുകൊണ്ടിരുന്നു. മല ശക്തമായി ഇളകിവിറച്ചു. മോശ കര്‍ത്താവിനോടു സംസാരിച്ചു. കര്‍ത്താവ് ഇടിമുഴക്കത്താല്‍ ഉത്തരം നല്‍കി.

കര്‍ത്താവു മോശയോടു പറഞ്ഞു. " നീ ജനങ്ങള്‍ക്കു മുന്നറിയിപ്പു നല്‍കുക. ഇല്ലെങ്കില്‍ അനേകംപേര്‍ എന്നെ സമീപിക്കുകയും തല്‍ഫലമായി മരിക്കുകയും ചെയ്യും."

മോശ പറഞ്ഞു. "ജ് ജ് ജ് ജനങ്ങള്‍ക്കാര്‍ക്കും സീനായ് മലയിലേക്കു കയറാന്‍ ക് ക് ക് കഴിയില്ല. അ്അ്അ്അങ്ങു കല്പിച്ചതുപോലെ അതിര്‍ത്തി നിര്‍ണ്ണയിച്ച്, മ് മ് മ് മലയെ വിശുദ്ധസ്ഥലമായി ഞ് ഞ് ഞ് ഞങ്ങള്‍  പരിഗണിച്ചു കഴിഞ്ഞു."

"നീ അഹറോനോടൊപ്പം മലയിലേക്കു കയറി വരിക. എന്നാല്‍ ജനങ്ങളും പുരോഹിതന്മാരും അതിര്‍ത്തി ലംഘിച്ച്, എന്റെ പക്കലേക്കു വരാതിരിക്കട്ടെ. അങ്ങനെ സംഭവിച്ചാല്‍ എന്റെ കോപം, അവരുടെമേല്‍ പതിക്കും "

ഇടിമുഴക്കവും കാഹാളധ്വനികളും കേള്‍ക്കുകയും  മിന്നല്‍പ്പിണരുകളും മലയില്‍നിന്നുയര്‍ന്ന പുകയും കാണുകയും ചെയ്തപ്പോള്‍ ജനമെല്ലാം ഭയന്നു വിറച്ച്, അകലെ മാറിനിന്നു.

ജനങ്ങള്‍ മോശയോടു പറഞ്ഞു.

"ദൈവം ഞങ്ങളോടു സംസാരിക്കാതിരിക്കട്ടെ. നീതന്നെ ഞങ്ങളോടു സംസാരിച്ചാല്‍ മതി ദൈവം ഞങ്ങളോടു സംസാരിച്ചാല്‍ ഞങ്ങള്‍ മരിച്ചുപോകും. "

മോശ പറഞ്ഞു: "പ് പ് ബ് ഭയപ്പെടേണ്ട, ന് ന് ന് നിങ്ങളെ പരീക്ഷിക്കുന്നതിനും പ് പ് പ് പാപംചെയ്യാതിരിക്കാനായി ന് ന് ന് നിങ്ങളില്‍ ദൈവഭയമുളവാക്കുന്നതിനുംവേണ്ടിയാണു ക് ക് ക് കര്‍ത്താവു വന്നിരിക്കുന്നത്..."

ജനം അകലെ മാറിനിന്നു. ദൈവം സന്നിഹിതനായിരുന്ന കനത്ത മേഘത്തെ മോശ സമീപിച്ചു. അഹറോന്‍ മോശയെ അനുഗമിച്ചു.

Saturday, 4 November 2017

അമലേക്യര്‍ക്കെതിരെ...

സീന്‍ മരുഭൂമിയിലൂടെയുള്ള യാത്ര ജനങ്ങളെ വലച്ചു. മന്നയും കാടപ്പക്ഷികളും സമൃദ്ധമായി ലഭിച്ചിരുന്നെങ്കിലും ദാഹനീര്‍ പിന്നെയും കിട്ടാക്കനിയായി. തോല്‍ക്കുടങ്ങളില്‍ സംഭരിച്ചിരുന്ന ജലം തീരാറായപ്പോള്‍ ജനം വീണ്ടും പിറുപിറുത്തു തുടങ്ങി.

മോശ അവരോടു പറഞ്ഞു: "ന് ന് നിങ്ങള്‍ എന്തിനെന്നെ ക് ക് കുററപ്പെടുത്തുന്നു? എ്എ്എ്എന്തിനു കര്‍ത്താവിനെ പരീക്ഷിക്കുന്നു?..."

ദാഹിച്ചു വലഞ്ഞ ജനം, മോശയ്ക്കെതിരേ ആവലാതിപ്പെട്ടുകൊണ്ടു ചോദിച്ചു: "നീയെന്തിനാണു ഞങ്ങളെ ഈജിപ്തില്‍നിന്നു പുറത്തേക്കു കൊണ്ടുവന്നത്? ഞങ്ങളും കുട്ടികളും കന്നുകാലികളും ദാഹിച്ചു ചാകട്ടേയെന്നു കരുതിയാണോ? കര്‍ത്താവു കല്പിച്ചുവെന്നു പറയാന്‍, നീയല്ലാതെ ഞങ്ങളാരും കര്‍ത്താവിന്റെ സ്വരം കേള്‍ക്കുന്നില്ലല്ലോ!"

വൈകാതെ ഒരു നീരുറവകണ്ടെത്താന്‍ കഴിഞ്ഞില്ലെങ്കില്‍ ജനക്കൂട്ടം, തന്നെ കല്ലെറിഞ്ഞു കൊല്ലുമെന്നു മോശ ഭയന്നു. മോശ കര്‍ത്താവിനോടു നിലവിളിച്ചു പറഞ്ഞു: "ഇ്ഇ്ഇ്ഈ ജനത്തോടു ഞാനെന്താണു ചെയ്യുക? എ്എ്എ്ഏറെത്താമസിയാതെ അവരെന്നെ കല്ലെറിയും."      

"ഏതാനും ഇസ്രായേല്‍ ശ്രേഷ്ഠന്‍മാരുമൊത്ത് നീ ജനത്തിനു മുമ്പേ പോകുക. നദിയുടെമേല്‍ അടിക്കാനുപയോഗിച്ച വടിയും കൈയിലെടുത്തുകൊള്ളുക. നിനക്കു മുമ്പില്‍ ഹോറെബിലെ പാറമേല്‍ ഞാന്‍ നില്‍ക്കും. നീ ആ പാറയിലടിക്കണം. അപ്പോള്‍ അതില്‍നിന്നു ജനത്തിനു കുടിക്കാന്‍ വെള്ളം പുറപ്പെടും. കര്‍ത്താവു മോശയ്ക്കു മറുപടി നല്കി.

ഇസ്രായേല്‍ ശ്രേഷ്ഠന്‍മാരുടെ സാന്നിദ്ധ്യത്തില്‍ മോശ അങ്ങനെ ചെയ്തു. മോശ അടിച്ച സ്ഥലത്ത്, ശുദ്ധജലത്തിന്റെ ഒരുറവ പാറയില്‍നിന്നു പുറപ്പെട്ടു. കുടിക്കാന്‍ വെള്ളം ലഭിച്ചപ്പോള്‍ ജനങ്ങള്‍ ശാന്തരായി.

ഇസ്രായേല്‍ക്കാര്‍ അവിടെവച്ചു കലഹിച്ചതിനാലും കര്‍ത്താവു ഞങ്ങളുടെയിടയിലുണ്ടോ ഇല്ലയോ എന്നു ചോദിച്ചുകൊണ്ട് കര്‍ത്താവിനെ പരീക്ഷിച്ചതിനാലും മോശ, ആ സ്ഥലങ്ങള്‍ക്കു മാസാ എന്നും മെറീബാ എന്നും പേരിട്ടു.

ആവോളം വെള്ളംകുടിച്ച്, കന്നുകാലികളേയും കുടിപ്പിച്ച്, യാത്രയ്ക്കാവശ്യമായ ജലം തോല്‍ക്കുടങ്ങളില്‍നിറച്ച്,  ഇസ്രായേല്‍ വീണ്ടും കാനാന്‍ദേശത്തേക്കുള്ള യാത്ര തുടര്‍ന്നു.

റഫിദീം എന്ന സ്ഥലത്തെത്തിയപ്പോള്‍ അമലേക്യര്‍  എന്നൊരു ജനത  ഇസ്രായേല്‍ക്കാരെ ആക്രമിക്കാനായെത്തി. അപ്പോള്‍, യുവാവായ ജോഷ്വയോടു മോശ പറഞ്ഞു: "അ്അ്അ്ആളുകളെ തെരഞ്ഞെടുത്ത്, അമലേക്യരുമായി യുയുയുയുദ്ധത്തിനു പുറപ്പെടുക. ഞ്‍ഞ്്ഞാന്‍ നാളെ ദൈവത്തിന്റെ വടി കൈയിലെടുത്തു മലമുകളില്‍ പ്്പ്്പ്്പ്രാര്‍ത്ഥനയോടെ നില്‍ക്കും.

മോശയുടെ നിര്‍ദ്ദേനുസരിച്ചു ജോഷ്വയെന്ന ചെറുപ്പക്കാരന്റെ  നേതൃത്വത്തില്‍ ഇസ്രായേല്യര്‍ അമലേക്യരുമായി യുദ്ധംചെയ്തു.

മോശ, അഹറോന്‍, ഹൂര്‍ എന്നിവര്‍ മലമുകളില്‍ കയറിനിന്നു. മോശ കരങ്ങളുയര്‍ത്തിപ്പിടിച്ചു പ്രാര്‍ത്ഥിച്ചപ്പോഴെല്ലാം ഇസ്രായേല്‍ വിജയിച്ചുകൊണ്ടിരുന്നു. മോശയുടെ കരങ്ങള്‍ താഴ്ത്തിയപ്പോള്‍ അമലേക്യര്‍ക്കായിരുന്നു വിജയം.  മോശയുടെ കൈകള്‍ കുഴഞ്ഞപ്പോള്‍ അഹറോനും ഹൂറും ഒരു കല്ലു നീക്കിയിട്ടു കൊടുത്തു. മോശ അതിന്മേലിരുന്നു. അവര്‍ അവന്റെ കൈകളുയര്‍ത്തിപ്പിടിച്ചുകൊണ്ട്, ഇരുവശങ്ങളിലും നിന്നു. സൂര്യാസ്തമയംവരെ അവന്റെ കൈകള്‍ ഉയര്‍ന്നുതന്നെ നിന്നു. അപ്പോള്‍ ജോഷ്വ, അമലേക്ക്യ സൈനികരെ വാളുകൊണ്ടരിഞ്ഞുവീഴ്ത്തി.
   
കര്‍ത്താവു മോശയോടരുളിച്ചെയ്തു: "ഇതിന്റെ ഓര്‍മ്മ നിലനിറുത്താനായി നീയിതൊരു പുസ്തകത്തിലെഴുതി, ജോഷ്വയെ വായിച്ചു കേള്‍പ്പിക്കുക. ആകാശത്തിനു കീഴില്‍നിന്ന് അമലേക്യരുടെ സ്മരണ ഞാന്‍ നിശ്ശേഷം മായിച്ചുകളയും."

മോശ അവിടെ ഒരു ബലിപീഠം നിര്‍മ്മിച്ച്, അതിനു യാഹ്‌വെനിസ്സിയെന്നു പേരു നല്‍കി. അവന്‍ ഇസ്രായേല്‍ ജനതയോടുപറഞ്ഞു: "കര്‍ത്താവിന്റെ പതാക കൈയിലെടുക്കുവിന്‍. തലമുറതോറും കര്‍ത്താവ് അമലേക്കിനെതിരായി യുദ്ധംചെയ്തുകൊണ്ടിരിക്കും".

വിജയശ്രീലാളിതരായ ഇസ്രായേല്‍ജനത അത്യാഹ്ലാദത്തോടെ പ്രയാണം തുടര്‍ന്നു.

മോശയ്ക്കും അവന്റെ ജനമായ ഇസ്രായേലിനുംവേണ്ടി ദൈവം എന്തെല്ലാം ചെയ്തുവെന്നും അവിടുന്നവരെ ഈജിപ്തില്‍നിന്ന് എപ്രകാരം മോചിപ്പിച്ചു വെന്നും മിദിയാനിലെ പുരോഹിതനും മോശയുടെ അമ്മായിയപ്പനുമായ ജത്രോ, നാടോടികളായ ചില ഇടയന്മാരില്‍നിന്നും കേട്ടറിഞ്ഞു.      

മരുഭൂമിയില്‍ ദൈവത്തിന്റെ മലയുടെ സമീപം കൂടാരമടിച്ചിരുന്ന മോശയുടെ അടുക്കലേക്ക് അവന്റെ ഭാര്യയെയും പുത്രന്മാരായ ഗര്‍ഷോം, ഏലിയാസര്‍ എന്നിവരേയും കൂട്ടിക്കൊണ്ട് ജത്രോ വന്നു.      

മോശ ജത്രോയെ നമസ്‌കരിക്കുകയും ചുംബിക്കുകയുംചെയ്തുകൊണ്ടു സ്വീകരിച്ചു.

ഇസ്രായേല്‍ക്കാര്‍ക്കുവേണ്ടി ഫറവോയോടും ഈജിപ്തുകാരോടും കര്‍ത്താവു ചെയ്ത കാര്യങ്ങളും വഴിയില്‍വച്ചു തങ്ങള്‍ക്കു നേരിട്ട പ്രയാസങ്ങളും കര്‍ത്താവു നല്‍കിയ സംരക്ഷണവുമെല്ലാം മോശ അമ്മായിയപ്പനോടു വിവരിച്ചുപറഞ്ഞു.  കര്‍ത്താവ് ഈജിപ്തുകാരില്‍നിന്ന് ഇസ്രായേലിനെ മോചിപ്പിച്ച് അവര്‍ക്കു ചെയ്ത നിരവധി നന്മകളെക്കുറിച്ചു ജത്രോ ആഹ്ലാദിച്ചു.      

പിറ്റേന്നു പ്രഭാതത്തില്‍ ജനത്തിന്റെ തര്‍ക്കങ്ങള്‍ തീര്‍ക്കാന്‍ മോശ തന്റെ കൂടാരത്തിനുവെളിയില്‍ ഉപവിഷ്ടനായി. പ്രഭാതംമുതല്‍ പ്രദോഷംവരെ ജനങ്ങള്‍ മോശയുടെ ചുറ്റും കൂടിനിന്നു.      

മോശ തന്റെ ജനത്തിനുവേണ്ടി ചെയ്യുന്നതെല്ലാം കണ്ടപ്പോള്‍ അമ്മായിയപ്പനായ ജത്രോ അവനോടു ചോദിച്ചു: "നീ ജനത്തിനുവേണ്ടി ചെയ്യുന്നതെന്താണ്? രാവിലെമുതല്‍ വൈകുന്നേരംവരെ ജനമെല്ലാം നിന്റെ ചുറ്റും കൂടിനില്‍ക്കാന്‍ ഇടയാകത്തക്കവിധം നീയിവിടെ ഒറ്റയ്ക്കിരിക്കുന്നതെന്തുകൊണ്ട്?"  
 
"ദൈവഹിതമറിയാനായി ജനമേന്നെ സമീപിക്കുന്നു.   എന്തെങ്കിലും തര്‍ക്കമുണ്ടാകുമ്പോഴും അവരെന്റെയടുക്കല്‍ വരുന്നു. ഞാനവരുടെ കലഹങ്ങള്‍ തീര്‍ക്കുന്നു; ദൈവത്തിന്റെ ചട്ടങ്ങളും നിയമങ്ങളും അവരെ പഠിപ്പിക്കുകയുംചെയ്യുന്നു."  മോശ മറുപടി നല്കി/

ജത്രോ  പറഞ്ഞു: "നീ ചെയ്യുന്നതു ശരിയല്ല. നീയും നിന്റെകൂടെയുള്ള ജനങ്ങളും ഒരുപോലെ ക്ഷീണിച്ചു വിവശരാകും. ഇതു ഭാരമേറിയ ജോലിയാണ്. തനിയെ ഇതുചെയ്യാന്‍ നിനക്കു സാധിക്കുകയില്ല. ഞാന്‍ പറയുന്നതു കേള്‍ക്കുക,  നീ ദൈവത്തിന്റെ മുമ്പില്‍ ജനങ്ങളുടെ പ്രതിനിധിയായിരിക്കണം; അവരുടെ തര്‍ക്കങ്ങള്‍ അവിടുത്തെ അറിയിക്കണം; അവരെ ചട്ടങ്ങളും നിയമങ്ങളും പഠിപ്പിക്കണം. അവര്‍ ചരിക്കേണ്ട മാര്‍ഗവും അനുഷ്ഠിക്കേണ്ട കര്‍ത്തവ്യങ്ങളും അവര്‍ക്കു നിര്‍ദ്ദേശിച്ചു കൊടുക്കണം. എന്നാല്‍ ഇപ്പോള്‍ ചെയ്യുന്നതുപോലെയല്ല.  കഴിവും ദൈവഭയമുള്ളവരും സത്യസന്ധരും കൈക്കൂലി വെറുക്കുന്നവരുമായ ആളുകളെ ജനത്തില്‍നിന്നു തെരഞ്ഞെടുത്ത്, അവരെ ആയിരവും നൂറും അമ്പതും പത്തുംവീതമുള്ള ഗണങ്ങളുടെ അധിപന്മാരായി നിയമിക്കുക. അവര്‍ എല്ലായ്‌പ്പോഴും ജനങ്ങളുടെ തര്‍ക്കങ്ങള്‍ക്കു തീര്‍പ്പു കല്പിക്കട്ടെ. വലിയ കാര്യങ്ങള്‍ നിന്നെ ഏല്പിക്കുകയും ചെറിയവ അവര്‍തന്നെ തീരുമാനിക്കുകയും ചെയ്യട്ടെ. അങ്ങനെ അവര്‍ നിന്നെ സഹായിക്കുമ്പോള്‍ നിന്റെ ജോലി എളുപ്പമാകും. പിതൃതുല്യനായ എന്റെവാക്കുകള്‍ ദൈവകല്പനയാണെന്നു ഗ്രഹിച്ച് ഇപ്രകാരം പ്രവര്‍ത്തിച്ചാല്‍ ജോലി നിര്‍വിഘ്നം തുടരാന്‍ നിനക്കു സാധിക്കും. ജനങ്ങള്‍ സംതൃപ്തരായി തങ്ങളുടെ വസതികളിലേക്കു മടങ്ങുകയും ചെയ്യും."  

മോശ അമ്മായിയപ്പന്റെ ഉപദേശമനുസരിച്ചു പ്രവര്‍ത്തിച്ചു. ഇസ്രായേല്‍ക്കാരില്‍നിന്നു സമര്‍ത്ഥരായ ആളുകളെ തെരഞ്ഞെടുത്ത്, ആയിരവും നൂറും അമ്പതും പത്തും വീതമുള്ള ഗണങ്ങളുടെമേല്‍ അവരെ അധിപന്മാരായി നിയമിച്ചു.  അവര്‍ ജനങ്ങളുടെയിടയില്‍ നീതി നടത്തി. സുപ്രധാനമായ കാര്യങ്ങള്‍മാത്രം മോശയെ ഏല്പിച്ചു.
     
കുറച്ചു ദിവസങ്ങള്‍ക്കുശേഷം സിപ്പോറയേയും മക്കളേയും മോശയ്ക്കൊപ്പംവിട്ട്,. ജത്രോ തന്റെ നാട്ടിലേക്കു മടങ്ങിപ്പോയി. മോശ സന്തോഷത്തോടെ അമ്മായിയപ്പനെ യാത്രയാക്കി.

Saturday, 28 October 2017

സ്വര്‍ഗ്ഗത്തില്‍നിന്നു പൊഴിഞ്ഞ മന്ന

ജനങ്ങളുടെ പിറുപിറുപ്പുകളില്‍ അസ്വസ്ഥനായ മോശ കര്‍ത്താവിനെ വിളിച്ചപേക്ഷിച്ചു. അവിടുന്നവനൊരു തടിക്കഷണം കാണിച്ചുകൊടുത്തു. അത്, ഉറവയിലെ വെള്ളത്തിലിടാന്‍ ആവശ്യപ്പെട്ടു. ആ തടിക്കഷണം ഉറവയിലെ വെള്ളത്തിലിട്ടതിനുശേഷം മോശ അല്പം വെള്ളം രുചിച്ചുനോക്കി. വെള്ളത്തിന്റെ കയ്പുരസം പൂര്‍ണ്ണമായി വിട്ടുമാറിയിരിക്കുന്നു. ഉറവ ശുദ്ധജലം പുറപ്പെടുവിച്ചു തുടങ്ങിയെന്നുകണ്ടപ്പോള്‍ ജനങ്ങള്‍ ഉത്സാഹത്തോടെ ഉറവയ്ക്കു ചുറ്റുംകൂടി. ദാഹംതീരുവോളം വെള്ളംകുടിച്ചു. കാലിയായ തോല്‍ക്കുടങ്ങളില്‍ ജലം നിറച്ചുവച്ചു.

കര്‍ത്താവു മോശയോടു കല്പിച്ചതനുസരിച്ച്, അഹറോന്‍ സംസാരിച്ചു.

"ഇസ്രായേലിലെ ഓരോരുത്തരോടും കര്‍ത്താവരുള്‍ചെയ്യുന്നു. നീ നിന്റെ ദൈവമായ കര്‍ത്താവിന്റെ സ്വരം ശ്രദ്ധാപൂര്‍വം ശ്രവിക്കുകയും അവിടുത്തെ ദൃഷ്ടിയില്‍ ശരിയായതു പ്രവര്‍ത്തിക്കുകയും അവിടുത്തെ കല്പനകളനുസരിക്കുകയും ചട്ടങ്ങള്‍ പാലിക്കുകയുംചെയ്താല്‍ ഞാന്‍ ഈജിപ്തുകാരുടെമേല്‍ വരുത്തിയ മഹാമാരികളിലൊന്നും നിന്റെമേല്‍ വരുത്തുകയില്ല; ഞാന്‍ നിന്നെ സുഖപ്പെടുത്തുന്ന കര്‍ത്താവാണ്."

ജനക്കൂട്ടം വീണ്ടും ദൈവത്തെ സ്തുതിച്ചു. തങ്ങളുടെ വീഴ്ചകള്‍ക്ക്, അവര്‍ കര്‍ത്താവിനോടു മാപ്പുചോദിച്ചു.

തോല്‍ക്കുടങ്ങളില്‍ ശുദ്ധജലം നിറച്ച്, കന്നുകാലികളേയും കുടിപ്പിച്ച്, ഇസ്രായേല്‍ വീണ്ടും യാത്രതുടര്‍ന്നു.

ദിവസങ്ങള്‍ക്കുശേഷം അവര്‍ ഏലിംദേശത്തെത്തി. അവിടെ പന്ത്രണ്ടു നീരുറവകളും എഴുപത് ഈന്തപ്പനകളുമുണ്ടായിരുന്നു. അവിടെ ജലാശയത്തിനുസമീപം അവര്‍ കുറച്ചുദിവസങ്ങള്‍ പാളയമടിച്ചു വിശ്രമിച്ചു. പിന്നെ തങ്ങളുടെ ലക്ഷ്യത്തിലേക്കുള്ള യാത്രതുടര്‍ന്നു.

ഈജിപ്തില്‍നിന്നു പുറപ്പെട്ടതിനുശേഷം രണ്ടുമാസവും പതിനഞ്ചുദിവസവും പിന്നിട്ട ദിവസം, അവര്‍ സീനായ് മലയ്ക്കപ്പുറത്ത്, സീന്‍ മരുഭൂമിയിലെത്തി.

ജനക്കൂട്ടം വീണ്ടും പിറുപിറുത്തു തുടങ്ങി. തോല്‍ക്കുടങ്ങളില്‍ക്കരുതിവച്ച  വെള്ളവും ഏലിംദേശത്തുനിന്നു ശേഖരിച്ച ഈന്തപ്പഴങ്ങളുമല്ലാതെ മറ്റൊന്നും അവര്‍ക്കു ഭക്ഷിക്കാനുണ്ടായിരുന്നില്ല. മോശയ്ക്കും അഹറോനുമെതിരേ അവര്‍ കയര്‍ത്തു.

"ഈജിപ്തില്‍ ഇറച്ചിപ്പാത്രത്തിനടുത്തിരുന്നു തൃപ്തിയാവോളം അപ്പം തിന്നുകൊണ്ടിരുന്നപ്പോള്‍ കര്‍ത്താവിന്റെ കരത്താല്‍ കൊല്ലപ്പെട്ടിരുന്നുവെങ്കില്‍ എത്രനന്നായിരുന്നു! എന്നാല്‍,  എല്ലാവരേയും പട്ടിണിയിട്ടു കൊല്ലാനായി ഞങ്ങളെ ഈ മരുഭൂമിയിലേക്കു നിങ്ങള്‍ കൊണ്ടുവന്നിരിക്കുന്നു."

"ഇ്ഇ്ഇ്ഇന്നോളം കര്‍ത്താവു നിങ്ങള്‍ക്കായി ചെയ്ത അ്അ്അ്അദ്ഭുതങ്ങള്‍ നിങ്ങള്‍ മ് മ് മ് മറക്കരുത്." മോശ പറഞ്ഞു.

"കര്‍ത്താവിനു് ഈജിപ്തില്‍ത്തന്നെ ഞങ്ങള്‍ക്കു സമൃദ്ധിനല്‍കാന്‍ കഴിയുമായിരുന്നു. എന്നാല്‍ നിങ്ങള്‍ ഞങ്ങളെ ഈ ദുരിതത്തിലേക്കു കൊണ്ടുവന്നു."

എന്തുമറുപടി നല്കുമെന്നറിയാതെ നിന്ന മോശയോടു കര്‍ത്താവു പറഞ്ഞു. " ഞാന്‍ നിങ്ങള്‍ക്കായി ആകാശത്തില്‍നിന്നപ്പം വര്‍ഷിക്കും. ജനങ്ങള്‍ പുറത്തിറങ്ങി ഓരോ ദിവസത്തേക്കും ആവശ്യമുള്ളതു ശേഖരിക്കട്ടെ. അങ്ങനെ, അവര്‍ എന്റെ നിയമമനുസരിച്ചു നടക്കുമോ ഇല്ലയോ എന്നു ഞാന്‍ പരീക്ഷിക്കും. ആറാം ദിവസം നിങ്ങള്‍ ശേഖരിക്കുന്നത് അകത്തു കൊണ്ടുവന്നൊരുക്കിവയ്ക്കുമ്പോള്‍ അതു ദിനംപ്രതി ശേഖരിക്കുന്നതിന്റെ ഇരട്ടിയുണ്ടായിരിക്കും."

മോശയ്ക്കുവേണ്ടി  അഹറോന്‍ എല്ലാ ഇസ്രായേല്‍ക്കാരോടുമായി പറഞ്ഞു: "കര്‍ത്താവാണു നിങ്ങളെ ഈജിപ്തില്‍നിന്നു പുറത്തേക്കു കൊണ്ടുവന്നതെന്ന്, ഇന്നു സന്ധ്യയാകുമ്പോള്‍ നിങ്ങള്‍ ഗ്രഹിക്കും. പ്രഭാതമാകുമ്പോള്‍ നിങ്ങള്‍ കര്‍ത്താവിന്റെ മഹത്വം ദര്‍ശിക്കും. നിങ്ങള്‍ക്കു ഭക്ഷിക്കാന്‍ വൈകുന്നേരം മാംസവും രാവിലെ വേണ്ടുവോളം അപ്പവും കര്‍ത്താവു തരും.കാരണം, തനിക്കെതിരായ നിങ്ങളുടെ പിറുപിറുപ്പുകള്‍ കര്‍ത്താവു കേട്ടിരിക്കുന്നു.  നിങ്ങള്‍ ഞങ്ങള്‍ക്കെതിരേ പിറുപിറുക്കാന്‍ ഞങ്ങളാരാണ്? നിങ്ങളുടെ ആവലാതികള്‍ ഞങ്ങള്‍ക്കെതിരായിട്ടല്ല, കര്‍ത്താവിനെതിരായിട്ടാണ്."

അന്നു വൈകുന്നേരമായപ്പോള്‍ വീശിയടിച്ച കിഴക്കന്‍കാറ്റില്‍, കാടപ്പക്ഷികള്‍ വന്നു  പാളയം മൂടി. ഇസ്രായേല്‍ജനങ്ങള്‍ കാടപ്പക്ഷികളെ ശേഖരിച്ചു കൊന്നു പാകം ചെയ്തു.

പിറ്റേന്നു രാവിലെ പാളയത്തിനു ചുററും മഞ്ഞുവീണുകിടന്നിരുന്നു.  മഞ്ഞുരുകിയപ്പോള്‍ മരുഭൂമിയുടെ ഉപരിതലത്തില്‍ പൊടിമഞ്ഞുപോലെ വെളുത്തുരുണ്ടു ലോലമായ ഒരു വസ്തു കാണപ്പെട്ടു. അതെന്താണെന്ന് ഇസ്രയേല്‍ക്കാര്‍ക്കു മനസ്സിലായില്ല. അപ്പോള്‍ മോശ അവരോടു പറഞ്ഞു: "ക് ക് ക് കര്‍ത്താവു നിങ്ങള്‍ക്കു ഭക്ഷണമായി തന്നിരിക്കുന്ന അപ്പമാണിത്. ക് ക് ക് കര്‍ത്താവു കല്‍പിച്ചിരിക്കുന്നതിപ്രകാരമാണ്: ഒ്്ഒ്ഒ്ഓരോരുത്തനും തന്റെ കൂടാരത്തിലുള്ള ആളുകളുടെയെണ്ണമനുസരിച്ച്, അ്അ്അ്ആളൊന്നിന് ഒരു *ഓമെര്‍വീതം ശേഖരിക്കട്ടെ.

ഇസ്രായേല്‍ക്കാര്‍ അപ്രകാരം ചെയ്തു; എന്നാല്‍ ചിലര്‍ കൂടുതലും ചിലര്‍ കുറവും ശേഖരിച്ചു. പിന്നീട് ഓമെര്‍കൊണ്ടളന്നുനോക്കിയപ്പോള്‍ കൂടുതല്‍ ശേഖരിച്ചവര്‍ക്കു കൂടുതലോ, കുറവു ശേഖരിച്ചവര്‍ക്കു കുറവോ ഉണ്ടായിരുന്നില്ല. ഓരോരുത്തനും ശേഖരിച്ചത് അവനു ഭക്ഷിക്കാന്‍മാത്രമുണ്ടായിരുന്നു.      
ഇസ്രായേല്‍ക്കാര്‍ ആ അപ്പത്തിനു മന്നാ എന്നു പേരു നല്കി. അതു വെളുത്തതും തേന്‍ചേര്‍ത്ത അപ്പത്തിന്റെ രുചിയുള്ളതുമായിരുന്നു.

മോശ അവരോടു പറഞ്ഞു: "അ്അ്അ്ആരും അതില്‍നിന്നല്പംപോലും ന് ന് ന് നാളത്തെ പ്രഭാതത്തിലേക്കു ന് ന് ന് നീക്കിവയ്ക്കരുത്. "    

എന്നാല്‍, അവര്‍ മോശയെ അനുസരിച്ചില്ല. ചിലര്‍ അതില്‍ നിന്നും ഒരു ഭാഗം പ്രഭാതത്തിലേക്കു നീക്കിവച്ചു. അതു പുഴുത്തു മോശമായി.
   
പിന്നീട്,  പ്രഭാതംതോറും ഓരോരുത്തരും തങ്ങള്‍ക്കു ഭക്ഷിക്കാവുന്നിടത്തോളം ശേഖരിച്ചുകൊണ്ടിരുന്നു. ബാക്കിയുള്ളതു സൂര്യനുദിച്ചുയരുമ്പോള്‍ ഉരുകിപ്പോയിരുന്നു. ആറാംദിവസം, ഒരാള്‍ക്കു രണ്ട് ഓമെര്‍വീതം ഇരട്ടിയായി അവര്‍ മന്നാ' ശേഖരിച്ചു; അതിനുശേഷം സമൂഹനേതാക്കള്‍ വന്നു്, വിവരം മോശയെ കണ്ടു.    

അപ്പോള്‍ മോശയ്ക്കുവേണ്ടി അഹറോന്‍ അവരോടു പറഞ്ഞു: "കര്‍ത്താവിന്റെ കല്പനയിതാണ്, നാളെ പരിപൂര്‍ണ്ണ വിശ്രമത്തിന്റെ ദിവസമാണ് - കര്‍ത്താവിന്റെ വിശുദ്ധമായ സാബത്തുദിനം. സാബത്തുദിനമാകയാല്‍  പാളയത്തിനുവെളിയില്‍ നാളെ അപ്പം കാണുകയില്ല. ആറു ദിവസം നിങ്ങളതുശേഖരിക്കണം. ഏഴാംദിവസം സാബത്താകയാല്‍ അതുണ്ടായിരിക്കുകയില്ല. വേണ്ടത്ര അപ്പം ഇന്നു ചുട്ടെടുക്കുവിന്‍. വേവിക്കേണ്ടതു വേവിക്കുകയും ചെയ്യുവിന്‍. ബാക്കി വരുന്നത് അടുത്ത പ്രഭാതത്തിലേക്കു സൂക്ഷിക്കുവിന്‍."

മോശ കല്പിച്ചതുപോലെ, മിച്ചംവന്നത് അവര്‍ പ്രഭാതത്തിലേക്കു മാററിവച്ചു. അതു ചീത്തയായിപ്പോയില്ല. അതില്‍ പുഴുക്കളുണ്ടായതുമില്ല.

എന്നാല്‍ ഏഴാംദിവസം ജനങ്ങളില്‍ ചിലര്‍ അപ്പം ശേഖരിക്കാനായി പുറത്തിറങ്ങി. അവര്‍ ഒന്നും കണ്ടില്ല.

കര്‍ത്താവു മോശയോടു ചോദിച്ചു: "നിങ്ങളെത്രനാള്‍ എന്റെ കല്പനകളും നിയമങ്ങളും പാലിക്കാതിരിക്കും?"

മോശ ജനങ്ങളോടു പറഞ്ഞു. "ക് ക് ക് കര്‍ത്താവു നിങ്ങള്‍ക്കു സാബത്തു നിശ്ചയിച്ചിരിക്കുന്നു. അ്അ്അ്അതുകൊണ്ടാണ്, ആറാം ദിവസം അ്അ്അ്അവിടുന്നു രണ്ടു ദിവസത്തേക്കുള്ള അപ്പം ന്ന്ന്നിങ്ങള്‍ക്കു തരുന്നത്. എ്എ്എ്ഏഴാംദിവസം ഓരോരുത്തനും തന്റെ വസതിയില്‍തന്നെ ക്‍ക്‍ക്‍കഴിയട്ടെ; അ്അ്അ്ആരും പുറത്തു പോകരുത്." അതനുസരിച്ച്, പിന്നീട് ആഴ്ചയിലെ ഏഴാംദിവസം ജനങ്ങള്‍  വിശ്രമിച്ചു.  

മോശ പറഞ്ഞു: "ക് ക് ക് കര്‍ത്താവിന്റെ ക് ക് ക് കല്പനയിതാണ്: ഇ്ഇ്ഈജിപ്തില്‍നിന്നു ഞാന്‍ നിങ്ങളെ ക്‍ക്‍ക്‍കൊണ്ടുപോരുമ്പോള്‍, മ് മ് മ് മരുഭൂമിയില്‍ വച്ചു നിങ്ങള്‍ക്കു ഭക്ഷിക്കാന്‍തന്ന അ്അ്അ്അപ്പം നിങ്ങളുടെ പിന്‍തലമുറകള്‍ കാണുന്നതിനുവേണ്ടി അ്അ്അതില്‍നിന്ന് ഒരു ഓമെര്‍ എടുത്തു സൂക്ഷിച്ചുവയ്ക്കുവിന്‍."  
     
കര്‍ത്താവു മോശയോട് കല്പിച്ചതുപോലെ അഹറോന്‍ അതു സാക്ഷ്യപേടകത്തിനു മുമ്പില്‍ അതു സൂക്ഷിച്ചുവച്ചു.  

മനുഷ്യവാസമുള്ള സ്ഥലത്തെത്തുന്നതുവരെ നാല്പതു വര്‍ഷത്തേക്ക്, ഇസ്രായേല്‍ക്കാര്‍ മന്നാ ഭക്ഷിച്ചു. കാനാന്‍ ദേശത്തിന്‍റെ അതിര്‍ത്തിയിലെത്തുന്നതുവരെ മന്നാ മാത്രമാണവര്‍ ഭക്ഷിച്ചത്.      

------------------------------------
*ഓമെര്‍ - ധാന്യങ്ങള്‍ അളക്കുന്ന ഒരു തോത്. (നമ്മുടെ ഇടങ്ങഴി, നാഴി തുടങ്ങിയവ പോലെ)

Saturday, 21 October 2017

ചെങ്കടലിനു നടുവില്‍


ഈജിപ്തു സൈന്യം ഇസ്രായേല്‍ജനതയുടെനേരെ അടുത്തുകൊണ്ടിരിക്കവേ,  ജനക്കൂട്ടം മോശയ്ക്കും അഹറോനുമെതിരെ ശാപവാക്കുകള്‍ വിളിച്ചുപറഞ്ഞുകൊണ്ടിരുന്നു.

മോശ കൈവിരിച്ചു പ്രാര്‍ത്ഥിച്ചു. കര്‍ത്താവു മോശയോടു പറഞ്ഞു: "നീ എന്തിനെന്നെ വിളിച്ചുകരയുന്നു? മുമ്പോട്ടു പോകാന്‍ ഇസ്രായേല്‍ക്കാരോടു പറയുക."

കണ്‍മുമ്പില്‍ പരന്നുകിടക്കുന്ന ചെങ്കടലിനുനേരെ മോശ നോക്കി. ആരെയും വിഴുങ്ങാന്‍ മടിയില്ലാത്ത കടലിനെ ജയിക്കാന്‍, കര്‍ത്താവു തങ്ങളെ സഹായിക്കുമെന്ന് അയാള്‍ ഉറച്ചുവിശ്വസിച്ചു.

കര്‍ത്താവിന്റെ മേഘസ്തംഭം  ഇസ്രായേല്‍ ജനതയുടെ പിന്നിലേക്കു മാറി. ഈജിപ്തുകാരുടെ മുമ്പില്‍ മൂടല്‍മഞ്ഞു നിറഞ്ഞു. മുമ്പോട്ടു യാത്രചെയ്യാന്‍ അവര്‍ക്കു സാധിക്കാത്തവിധം കാഴ്ച മറഞ്ഞു.

ഈജിപ്തിന്റെ സര്‍വ്വസൈന്യാധിപന്‍ സേനാംഗങ്ങളോടു പറഞ്ഞു. "ഈ മൂടല്‍ മഞ്ഞു മാറുംവരെ നമുക്കിവിടെ കൂടാരമടിക്കാം.  ഇസ്രായേലുകാര്‍ക്കു ചെങ്കടല്‍ത്തീരത്തുനിന്നു മുമ്പോട്ടു പോകാനിനി വഴിയില്ല. തിരക്കു കൂട്ടേണ്ടതില്ല, അവര്‍ നമ്മുടെ കൈകളിലകപ്പെട്ടുകഴിഞ്ഞു."

രാത്രിയില്‍ മേഘസ്തംഭം മാറി അഗ്നിസ്തൂപം ആകാശത്തു പ്രത്യക്ഷപ്പെട്ടു. മൂടല്‍മഞ്ഞിനിടയില്‍ ആകാശത്തുകണ്ട അഗ്നിനാളങ്ങള്‍ ഈജിപ്തുകാരെ പരിഭ്രാന്തരാക്കി.

കര്‍ത്താവു മോശയോടു കല്പിച്ചു. "നിന്റെ വലതുകരം ചെങ്കടലിനുനേരെ നീട്ടുക"

മോശ അപ്രകാരംചെയ്തു. അപ്പോള്‍ കടലിനുമീതേ, ഒരു കിഴക്കന്‍ കാറ്റു വീശിത്തുടങ്ങി. ശക്തമായ കിഴക്കന്‍കാറ്റില്‍ കടലിലെ ജലം വിഭജിക്കപ്പെട്ടു. വലിയ ജനക്കൂട്ടത്തിനു കടന്നുപോകാന്‍തക്ക വീതിയില്‍ കടല്‍, വരണ്ട ഭൂമിയായി; വെള്ളം മതിലുപോലെ ഇരുവശങ്ങളിലുമുയര്‍ന്നുനിന്നു.

അപ്രതീക്ഷിതമായ അദ്ഭുതമേകി, ചെങ്കടലിനു നടുവില്‍ ഒരു രാജപാത തുറന്ന കര്‍ത്താവിനെ ജനക്കൂട്ടം ഉറക്കെ സ്തുതിച്ചു. കനത്ത മൂടല്‍മഞ്ഞുമൂലം മുന്നില്‍ നടക്കുന്നതൊന്നും കാണാനാകാതെ കുഴങ്ങിയ ഈജിപ്തുകാര്‍ ഇസ്രായേലിന്റെ സ്തുതികളുടെ ശബ്ദം കേട്ടു. തങ്ങള്‍ക്കും കടലിനും മദ്ധ്യേ കുടുങ്ങിപ്പോയ ഇസ്രായേല്‍ജനത്തിന്റെ വിലാപങ്ങളുടെ ശബ്ദമാണതെന്നാണ് ഈജിപ്തുകാര്‍ കരുതിയത്.

കടലിനു നടുവേ, ഉണങ്ങിയ മണ്ണിലൂടെ ഇസ്രായേല്‍ജനം മുമ്പോട്ടു  നടന്നു. എല്ലാവര്‍ക്കും പിന്നിലായാണ്, മോശയും അഹറോനും നടന്നത്.. അവര്‍ക്കും പിന്നിലായി കര്‍ത്താവിന്റെ അഗ്നിസ്തംഭം ആകാശത്തിലൂടെ നീങ്ങി. അഗ്നിസ്തംഭത്തിന്റെ ചൂടില്‍ മൂടല്‍മഞ്ഞു മറഞ്ഞപ്പോള്‍, ചെങ്കടല്‍കടക്കുന്ന ഇസ്രായേല്‍ക്കാരെ, ഈജിപ്തുപടയാളികള്‍ കണ്ടു.

ആദ്യമുണ്ടായ നടുക്കത്തില്‍നിന്നുണര്‍ന്ന സൈന്യം, അവരെ പിന്തുടര്‍ന്നു. ചെങ്കടലിനു നടുവിലൂടെ ഇസ്രായേല്‍ക്കാര്‍പോയ വഴിയിലൂടെതന്നെ സൈന്യം മുമ്പോട്ടു നീങ്ങി.  അവര്‍ ചെങ്കടലിനു മദ്ധ്യത്തിലെത്തിയപ്പോഴേയ്ക്കും ഇസ്രായേല്‍ജനംമുഴുവനും കടല്‍കടന്നു കഴിഞ്ഞിരുന്നു.

കര്‍ത്താവു മോശയോടു പറഞ്ഞു. "പിന്തിരിഞ്ഞു നിന്റെ കരം വീണ്ടും ചെങ്കടലിനുനേരേ നീട്ടുക."

മോശ ചെങ്കടലിനുനേരെ ഒരിക്കല്‍ക്കൂടെ തന്റെ വലതുകരം നീട്ടി. വശങ്ങളില്‍ ഉയര്‍ന്നുനിന്ന ജലമതില്‍ തകര്‍ന്നു. ഈജിപ്തുകാര്‍ പിന്തിരിഞ്ഞോടി. വെള്ളം മടങ്ങിവന്ന് ഈജിപ്തുകാരെയും അവരുടെ തേരുകളെയും കുതിരപ്പടയാളികളെയും മൂടി. അവരിലൊരാള്‍പോലും രക്ഷപ്പെട്ടില്ല. നേരംപുലര്‍ന്നപ്പോള്‍ ചെങ്കടല്‍ പഴയതുപോലെയായി. ഇസ്രായേല്‍ക്കാരെ പിന്തുടര്‍ന്നു കടലിലിറങ്ങിയ തേരുകളെയും കുതിരപ്പടയാളികളെയും ഫറവോയുടെ സൈന്യം മുഴുവനെയും കടല്‍വെള്ളം മൂടിക്കളഞ്ഞു. ഒന്നുമറിയാത്തതുപോലെ, ചെങ്കടല്‍ കടല്‍ക്കാറ്റിന്റെ തലോടലേറ്റു മയങ്ങി

കര്‍ത്താവിന്റെ കരങ്ങളുടെ ശക്തിയെന്തെന്നനുഭവിച്ചറിഞ്ഞ ഇസ്രായേല്‍ജനം, കര്‍ത്താവിനെ ഭയപ്പെട്ടു. മോശയ്ക്കും അഹറോനുമെതിരായി ശാപവാക്കുകള്‍ ഉതിര്‍ക്കുകയും കര്‍ത്താവിനെതിരെ പിറുപിറുക്കുകയുംചെയ്തതിനു ജനങ്ങള്‍ മോശയോടു മാപ്പു ചോദിച്ചു.

അപ്പോള്‍ അഹറോന്റെ സഹോദരിയായ മിരിയാം തപ്പു കൈയിലെടുത്തു; കര്‍ത്താവിനെ സ്തുതിച്ചുകൊണ്ട് അവള്‍ ഒരു ഗാനമാലപിച്ചു. സ്ത്രീകളെല്ലാവരും തപ്പുകളെടുത്തു നൃത്തംചെയ്തുകൊണ്ട് അവളെയനുഗമിച്ചു. ‍മുഴുവന്‍ ജനങ്ങളും വലിയ ആഹ്ലാദത്തോടെ ദൈവസ്തുതികളാലപിച്ചുകൊണ്ട് അവരോടൊപ്പം ചേര്‍ന്നു.  ഒരുദിവസത്തെ ആഘോഷങ്ങള്‍ക്കുശേഷം അവര്‍ യാത്രതുടര്‍ന്നു. ഷൂര്‍മരുഭൂമിയിലൂടെ മൂന്നുദിവസം യാത്രചെയ്ത്, അവര്‍ മാറാ എന്ന സ്ഥലത്തെത്തി. മരുഭൂമിയിലൂടെയുള്ള മൂന്നുദിവസത്തെ യാത്രയില്‍ ഒരിടത്തും കുടിവെള്ളം കണ്ടെത്താന്‍ അവര്‍ക്കു കഴിഞ്ഞില്ല. കൈയില്‍, തോല്‍ക്കുടങ്ങളില്‍ സൂക്ഷിച്ചിരുന്ന കുടിവെള്ളമെല്ലാം അപ്പോഴേക്കും തീര്‍ന്നുകഴിഞ്ഞിരുന്നു.

മാറായിലെത്തിയപ്പോള്‍ അവര്‍ ഒരുറവ കണ്ടെത്തി. കുടിവെള്ളം ശേഖരിക്കാനായി തോല്‍ക്കുടങ്ങളുമായി ജനങ്ങളെല്ലാം ഉറവയ്ക്കരികിലേക്കോടിയെത്തി. എന്നാല്‍ അതിലെ ജലം കയ്പുള്ളതും കുടിക്കാന്‍ കൊള്ളാത്തതുമായിരുന്നു. ജലമില്ലാതെ ജനം വലഞ്ഞു. ദാഹത്താല്‍ വലഞ്ഞ കുഞ്ഞുങ്ങള്‍ തളര്‍ന്നുവീണു തുടങ്ങി. കര്‍ത്താവു തങ്ങള്‍ക്കുവേണ്ടി ചെയ്ത അദ്ഭുതങ്ങളെല്ലാം അവര്‍ മറന്നു. ചെങ്കടല്‍കടന്നപ്പോള്‍ പാടിയ സ്തുതിഗീതങ്ങള്‍, വീണ്ടും പിറുപിറുപ്പുകള്‍ക്കു വഴിമാറി.

ജനക്കൂട്ടം മോശയോടു കയര്‍ത്തു. "ദാഹിച്ചു മരിക്കാനായി നീയെന്തിനു ഞങ്ങളെയിവിടെ കൊണ്ടുവന്നു? ഞങ്ങളും ഞങ്ങളുടെ കുഞ്ഞുങ്ങളും ദാഹിച്ചു വലയുന്നു. ഞങ്ങള്‍ക്കു കുടിക്കാന്‍ ശുദ്ധജലം തരൂ. ഈ മരുഭൂമിയില്‍ ഞങ്ങളുടെ കുഴിമാടങ്ങളൊരുക്കാനാണോ നിന്റെ പദ്ധതി?"


Saturday, 14 October 2017

ചെങ്കടല്‍

ഇസ്രായേല്‍ജനം ആഹ്ലാദത്തോടെ യാത്ര തുടര്‍ന്നു. കാനാന്‍ദേശത്തേക്കുള്ള മടക്കയാത്ര....

നാനൂറ്റി മുപ്പതുവര്‍ഷങ്ങള്‍ക്കു മുമ്പ്, ജോസഫും ഈജിപ്തുകാരിയായ ഭാര്യ അസ്നത്തും രണ്ടുമക്കളുമടക്കം എഴുപതുപേരാണ് ഇസ്രായേല്‍ മക്കളായി ഈജിപ്തിലെത്തിയത്. ഇന്നവര്‍ വലിയൊരു ജനതയായി സ്വന്തദേശംതേടി മടക്കയാത്ര തുടങ്ങിയിരിക്കുന്നു.

ആറുലക്ഷം പുരുഷന്മാര്‍ ... അത്രയുംതന്നെ സ്ത്രീകള്‍ ... സ്ത്രീപുരുഷന്മാരുടെ എണ്ണത്തിന്റെ മൂന്നോ നാലോ മടങ്ങു കുട്ടികള്‍ ... ഒപ്പം അവരുടെ എണ്ണമറ്റ മൃഗസമ്പത്ത്.... എഴുപതുപേര്‍ എഴുപതുലക്ഷത്തിലധികംവരുന്ന ജനതയായി വളര്‍ന്നിരിക്കുന്നു!

മോശയെ ദൈവപുരുഷനായി കരുതിയ ഒരു വിഭാഗം ഈജിപ്തുകാരും അവരോടൊപ്പം ചേര്‍ന്നു.

മോശയുടെയും അഹറോന്റെയും പിന്നാലെ, തേനുംപാലുമൊഴുകുന്ന സ്വന്തനാട്ടിലേക്കു മടങ്ങുന്ന ഇസ്രായേല്‍ക്കാരെല്ലാം വലിയ സന്തോഷത്തോടെയും പ്രത്യാശയോടെയും നടന്നു.

കുഴച്ചമാവു പുളിക്കുന്നതിനുമുമ്പേ, അതു തോള്‍സഞ്ചിയിലേന്തി യാത്രപുറപ്പെട്ടതിനാല്‍ അവരുടെ പക്കല്‍ പുളിമാവുണ്ടായിരുന്നില്ല. യാത്രയില്‍ അവര്‍ പുളിപ്പില്ലാത്ത അപ്പം ചുട്ടു. എങ്കിലും ആരും പരാതി പറഞ്ഞില്ല. ഈജിപ്തില്‍നിന്നു തങ്ങളെ മോചിപ്പിച്ച കര്‍ത്താവില്‍ അവര്‍ വിശ്വാസമാര്‍പ്പിച്ചു.

എന്നാല്‍ കര്‍ത്താവ് അവരെ വിശ്വസിച്ചിരുന്നില്ല.

അതിനാല്‍, ഫിലിസ്ത്യരുടെ ദേശത്തുകൂടെ, കരമാര്‍ഗ്ഗമുള്ള എളുപ്പവഴിയ്ക്കു പകരം മരുഭൂമിയിലൂടെയുള്ള വഴിയിലൂടെ ചെങ്കടല്‍ത്തീരത്തേക്കു ജനത്തെ നയിക്കാന്‍ കര്‍ത്താവു മോശയോടു കല്പിച്ചു.

രാത്രിയും പകലും സഞ്ചരിക്കാന്‍സാധിക്കുംവിധം പകല്‍ തണുപ്പും തണലുമേകുന്ന മേഘസ്തംഭമായും രാത്രിയില്‍ ചൂടും വെളിച്ചവും പകരുന്ന അഗ്നിസ്തംഭമായും കര്‍ത്താവ് അവരോടൊത്തു സഞ്ചരിച്ചു. രാത്രിയില്‍ അഗ്നിസ്തംഭവും പകല്‍ മേഘസ്തംഭവും അവരുടെ മുമ്പില്‍നിന്നു മാറിയില്ല.

ഫറവോയുടെ കുതിരപ്പടയാളികളും അറുന്നൂറു രഥങ്ങളുമടങ്ങിയ വലിയൊരു സൈന്യവ്യൂഹം ഇസ്രായേല്‍ ജനതയെ പിടികൂടി തിരികെ കൊണ്ടുവരാനായി പുറപ്പെട്ടു. ഇസ്രായേല്‍ജനം മരുഭൂമിയിലൂടെ ചെങ്കടല്‍ത്തീരത്തേക്കാണു നടക്കുന്നതെന്നു ചാരന്മാരില്‍നിന്നറിഞ്ഞപ്പോള്‍ ഫറവോയും കൂട്ടരും സന്തോഷിച്ചു.

ഫറവോ അട്ടഹസിച്ചുകൊണ്ടു പറഞ്ഞു; "അവര്‍ വഴിയറിയാതെ അലഞ്ഞുതിരിയുന്നു.... മരുഭൂമി അവരെ കുടുക്കിലാക്കിക്കഴിഞ്ഞു... ഇനിയവര്‍ക്കു രക്ഷയില്ല.; ചെങ്കടല്‍ അവരെ തിരികെ നടത്തിക്കും, എന്റെ കുതിരപ്പട്ടാളത്തിന്റെയും തേരാള്‍പ്പടയുടെയും പിടിയില്‍ അവരകപ്പെടും...!"

നാലഞ്ചു ദിവസങ്ങളായുള്ള വിശ്രമമില്ലാത്ത യാത്ര, ജനങ്ങളെയും അവരുടെ ആടുമാടുകളേയും തളര്‍ത്തിത്തുടങ്ങി. ഇനിയല്പം വിശ്രമിക്കണം. എവിടെയാണ് ഇത്രയധികം ജനങ്ങള്‍ക്കായി കൂടാരങ്ങളൊരുക്കുക? മോശ കര്‍ത്താവിനോടാരാഞ്ഞു.

"പിഹഹിറോത്തിനു മുമ്പില്‍ മിഗ്‌ദോലിനും കടലിനും മദ്ധ്യേ, ബാല്‍സെഫോന്റെ എതിര്‍വശത്തു കടലിനടുത്തായി നിങ്ങള്‍ക്കു പാളയമടിക്കാം. അവിടെ പാളയമടിച്ചാലുടന്‍ നിങ്ങളുടെ കടിഞ്ഞൂല്‍ സന്തതികളെക്കുറിച്ചുള്ള എന്റെയീ കല്പനകള്‍ നീ ജനത്തെ അറിയിക്കണം.

നിങ്ങളോടും നിങ്ങളുടെ പിതാക്കന്മാരോടുമുള്ള വാഗ്ദാനപ്രകാരം കര്‍ത്താവു നിങ്ങളെ കാനാന്‍ദേശത്തു പ്രവേശിപ്പിക്കുകയും അവിടം നിങ്ങള്‍ക്കു നല്‍കുകയും ചെയ്യുമ്പോള്‍, നിങ്ങളുടെ എല്ലാ ആദ്യജാതരെയും കര്‍ത്താവിനു സമര്‍പ്പിക്കണം. മൃഗങ്ങളുടെ കടിഞ്ഞൂലുകളിലും ആണ്‍കുട്ടികള്‍ കര്‍ത്താവിനുള്ളവയായിരിക്കും.

എന്നാല്‍, ഒരാട്ടിന്‍കുട്ടിയെ പകരം കൊടുത്തു കടിഞ്ഞൂലിനെ വീണ്ടെടുക്കാം. നിങ്ങളുടെ മക്കളില്‍ ആദ്യജാതരെയെല്ലാം വീണ്ടെടുക്കണം. മൃഗങ്ങളെ നിങ്ങള്‍ വീണ്ടെടുക്കുന്നില്ലെങ്കില്‍, അതിന്റെ കഴുത്തു ഞെരിച്ചു കൊന്നുകളയണം. കാലാന്തരത്തില്‍ ഇതിന്റെ അര്‍ഥമെന്താണെന്നു നിങ്ങളുടെ അനന്തരതലമുറയില്‍പ്പെട്ടവര്‍ ചോദിച്ചാല്‍ പറയണം: അടിമത്തത്തിന്റെ നാടായ ഈജിപ്തില്‍നിന്ന്, കര്‍ത്താവു തന്റെ ശക്തമായ കരത്താല്‍ നമ്മളെ മോചിപ്പിച്ചു. നമ്മളെ വിട്ടയയ്ക്കാന്‍ ഫറവോ വിസമ്മതിച്ചപ്പോള്‍ ഈജിപ്തിലെ ആദ്യജാതരെ - മനുഷ്യരുടെയും മൃഗങ്ങളുടെയും കടിഞ്ഞൂലുകളെയെല്ലാം - കര്‍ത്താവു സംഹരിച്ചു. അതിനാലാണ്, മനുഷ്യരുടെ കടിഞ്ഞൂലുകളെയും മൃഗങ്ങളുടെ കടിഞ്ഞൂലുകളില്‍ ആണ്‍കുട്ടികളെയും നമ്മള്‍ കര്‍ത്താവിനു സമര്‍പ്പിക്കുന്നത്."

കര്‍ത്താവിന്റെ കല്പനപ്രകാരം ബാല്‍സെഫോന്റെ എതിര്‍വശത്തു ചെങ്കടല്‍ത്തീരത്തായി ഇസ്രായേല്‍ജനം കൂടാരമടിച്ചു. അതിനുശേഷം മോശ ജനങ്ങളെ മുഴുവന്‍ ഒന്നിച്ചുകൂട്ടി. കര്‍ത്താവു മോശയോടു കല്പിച്ചതുപോലെ കടിഞ്ഞൂലുകളെക്കുറിച്ചുള്ള ദൈവഹിതം അഹറോന്‍ ജനങ്ങളെയറിയിച്ചു.

ജനക്കൂട്ടം വലിയ ശബ്ദത്തില്‍ കര്‍ത്താവിനെ സ്തുതിച്ചുകൊണ്ടു തങ്ങളുടെ വിധേയത്വമറിയിച്ചു.

ആ രാത്രിയില്‍ വലിയ സന്തോഷത്തോടെ അവര്‍ കൂടാരങ്ങളില്‍ വിശ്രമിച്ചു. ദൈവസ്തുതിയുടെ കീര്‍ത്തനങ്ങള്‍ അന്തരീക്ഷത്തിലുയര്‍ന്നു. ജനങ്ങള്‍ ശാന്തമായി കിടന്നുറങ്ങി.

പക്ഷേ, ഭീതിദമായൊരു വാര്‍ത്തയുമായാണു പുലരിയെത്തിയത്. അകലെ, മരുഭൂമിയില്‍ പൊടിപടലങ്ങളുയര്‍ത്തി, പാഞ്ഞടുക്കുന്ന സൈന്യവ്യൂഹങ്ങളെക്കണ്ട ഇസ്രയേല്യര്‍ നടുങ്ങി. 

മുമ്പില്‍ ചെങ്കടല്‍... പിന്നില്‍ ഈജിപ്തിന്റെ സൈന്യം....

ജനങ്ങള്‍ ഒന്നടങ്കം മോശയുടെയും അഹറോന്റെയുംചുറ്റും തടിച്ചുകൂടി. ജനക്കൂട്ടത്തെ ശാന്തരാക്കാന്‍ ഇരുവരും കിണഞ്ഞുശ്രമിച്ചെങ്കിലും ഫലമുണ്ടായില്ല.

കഴിഞ്ഞരാത്രിയില്‍ പാടിയ സ്തുതിഗീതങ്ങള്‍ ജനം വിസ്മരിച്ചു. അവര്‍ കര്ത്താവിനും മോശയ്ക്കുമെതിരെ പിറുപിറുത്തു.

"ഈജിപ്തില്‍ ശവക്കുഴികളില്ലാഞ്ഞിട്ടാണോ നീ ഞങ്ങളെ മരുഭൂമിയില്‍ക്കിടന്നു മരിക്കാനായി ഇവിടേയ്ക്കു കൂട്ടിക്കൊണ്ടു വന്നിരിക്കുന്നത്?"

"നീ എന്താണു ഞങ്ങളോടു ചെയ്തിരിക്കുന്നത്? എന്തിനാണു ഞങ്ങളെ ഈജിപ്തില്‍നിന്നു പുറത്തുകൊണ്ടുവന്നത്?"

"ഞങ്ങളെ തനിയേ വിട്ടേക്കൂ, ഞങ്ങള്‍ ഈജിപ്തുകാര്‍ക്ക് വേലചെയ്തു കഴിഞ്ഞുകൊള്ളാമെന്ന് ഈജിപ്തില്‍വച്ചു ഞങ്ങള്‍ നിന്നോടു പറഞ്ഞതല്ലേ?"

"ഈജിപ്തുകാര്‍ക്ക്, അടിമവേല ചെയ്യുകയായിരുന്നു, മരുഭൂമിയില്‍ക്കിടന്നു മരിക്കുന്നതിനേക്കാള്‍ മെച്ചം".

മോശ ജനത്തോടു പറഞ്ഞു: "ന് ന് നിങ്ങള്‍ ഭയപ്പെടാതെ ഉ്ഉ്ഉ്ഉറച്ചുനില്‍ക്കുവിന്‍. ന് ന് ന് നിങ്ങള്‍ക്കുവേണ്ടി കര്‍ത്താവിന്നു ചെയ്യാന്‍ പോകുന്ന രക്ഷാകൃത്യം നിങ്ങള്‍ കാണും. ക് ക് ക് കര്‍ത്താവു നിങ്ങള്‍ക്കുവേണ്ടി യുദ്ധം ചെയ്തു കൊള്ളും. ന് ന് ന് നിങ്ങള്‍ ശാന്തരായിരുന്നാല്‍ മതി."

ജനക്കൂട്ടം മോശയുടെ വാക്കുകള്‍ കേള്‍ക്കാന്‍ കൂട്ടാക്കിയില്ല.

ഈജിപ്ഷ്യന്‍ സൈന്യം ഇസ്രായേല്‍ജനതയുടെ നേരെ അടുത്തുകൊണ്ടിരുന്നു. ജനക്കൂട്ടം മോശയ്ക്കും അഹറോനുമെതിരെ ശാപവാക്കുകള്‍ വിളിച്ചുപറഞ്ഞുകൊണ്ടിരുന്നു

Wednesday, 11 October 2017

പെസഹാക്കുഞ്ഞാടിന്റെ രക്തം

മോശ കര്‍ത്താവിനുമുമ്പില്‍ ഉപവസിച്ചു പ്രാര്‍ത്ഥിച്ചു. 

"ഇ്ഇ്ഇ്ഇനിയും ഇസ്രായേല്‍ജനതയെ വിട്ടയയ്ക്കാന്‍ ഫ്ഫ്ഫറവോ മനസാകാത്തതെന്തേ? സ് സ് സ് സകലത്തിന്റെയും കര്‍ത്താവായ യഹോവയേ, അ്അ്അ്അങ്ങു കൂടുതല്‍ ശക്തിയോടെ ഇടപെടണമേ!"

മൃദുവായ ശബ്ദത്തില്‍ കര്‍ത്താവു മോശയോടു പറഞ്ഞു: "ഇനിയൊരു മഹാമാരികൂടെ ഞാന്‍ ഈജിപ്തിനുമേലയയ്ക്കും. പിന്നെ നിങ്ങള്‍ അവനോടപേക്ഷിക്കേണ്ടാ, എത്രയും പെട്ടെന്ന് ഈജിപ്തില്‍നിന്നു വിട്ടുപോകാന്‍ അവന്‍ നിങ്ങളോടപേക്ഷിക്കും. ഫറവോയും അവന്റെ സേവകരും ഈജിപ്തിലെ ജനംമുഴുവന്‍, മോശ ഒരു മഹാപുരുഷനാണെന്നു കരുതുന്ന ദിനങ്ങള്‍ വരും. എല്ലാ ഇസ്രായേല്‍ ജനങ്ങളും ഈജിപ്തുകാരുടെ പക്കല്‍നിന്നു സ്വര്‍ണ്ണവും വെള്ളിയുംകൊണ്ടുള്ള ആഭരണങ്ങള്‍ ചോദിച്ചുവാങ്ങാന്‍ നീ പറയൂ. അവരതു നല്‍കും. ഞങ്ങളുടെ ആഭരണങ്ങള്‍ ഒന്നും തിരികേ തരേണ്ട, നിങ്ങള്‍ ഞങ്ങളുടെ നാട്ടില്‍നിന്നു ദൂരെയെവിടെയെങ്കിലും പോയാല്‍മതിയെന്ന് ഈജിപ്തുകാര്‍ പറയുന്ന ദിനങ്ങള്‍ വരുന്നു. നിങ്ങളുടെ അദ്ധ്വാനമാണ് ഈ നാടിനെ സമൃദ്ധിയിലേക്കുയര്‍ത്തിയത്. അതിനാല്‍ ഈജിപ്തിലെ സ്വര്‍ണ്ണവും വെള്ളിയും നിങ്ങളോടൊപ്പം കൊണ്ടുപോകാന്‍ മടിക്കേണ്ടതില്ല. അതു നിങ്ങള്‍ക്കവകാശപ്പെട്ട സമ്പത്താണ്‌." 

മോശയും അഹറോനും വീണ്ടും ഫറവോയെ സന്ദര്‍ശിച്ചു. മോശയ്ക്കുവേണ്ടി അഹറോന്‍ ഫറവോയോടു സംസാരിച്ചു.

"ഇനിയും നീ ഇസ്രായേല്‍ ജനതയെ തടഞ്ഞുവച്ചാല്‍ കര്‍ത്താവിന്റെ സംഹാരദൂതന്‍ ഈജിപ്തിലൂടെ കടന്നുപോകും. സിംഹാസനത്തിലിരിക്കുന്ന ഫറവോമുതല്‍ തിരികല്ലില്‍ ജോലിചെയ്യുന്ന ദാസിവരെ ഈജിപ്തിലെ എല്ലാ മനുഷ്യരുടേയും കടിഞ്ഞൂല്‍ സന്താനങ്ങള്‍ മരിക്കും. മനുഷ്യരുടെ മാത്രമല്ല, മൃഗങ്ങളുടെയും കടിഞ്ഞൂലുകള്‍ ചാകും. ഇസ്രായേല്‍ക്കാര്‍ക്കും ഈജിപ്തുകാര്‍ക്കുമിടയില്‍ കര്‍ത്താവു ഭേദംകല്പിക്കുകയും ചെയ്യും."

ഫറവോ ആ വാക്കുകള്‍ക്കു വില നല്‍കിയില്ല. മോശ കോപത്തോടെ അവിടംവിട്ടിറങ്ങി.

കര്‍ത്താവു മോശയോടു കല്പിച്ചു: "ഇസ്രായേല്‍മക്കളോടു പറയുവിന്‍, ഇന്നു നിങ്ങള്‍ വര്‍ഷത്തിന്റെ ആദ്യമാസത്തിലെ ആദ്യദിവസമായി കരുതണം. ഈ മാസം പത്താംദിവസം ഓരോ കുടുംബത്തലവനും ഒരോ കുടുംബത്തിനും ഒരാട്ടിന്‍കുട്ടിയെവീതം കരുതിവയ്ക്കണം. തെരഞ്ഞെടുക്കുന്ന ആട്ടിന്‍കുട്ടി ഒരു വയസ്സുള്ളതും ഊനമറ്റതുമായിരിക്കണം. ഏതെങ്കിലുമൊരു കുടുംബം ആട്ടിന്‍കുട്ടിയെ ഭക്ഷിക്കാന്‍മാത്രം വലുതല്ലെങ്കില്‍ ആളുകളുടെ എണ്ണംനോക്കി അയല്‍ക്കുടുംബത്തേയും പങ്കുചേര്‍ക്കുക. പത്താംദിവസംമുതല്‍ പതിന്നാലാം ദിവസംവരെ ആ ആട്ടിന്‍കുട്ടിയെ പ്രത്യേകമായി സൂക്ഷിക്കണം. പതിന്നാലാംദിവസം ഇസ്രായേല്‍സമൂഹം മുഴുവന്‍ ആ ആട്ടിന്‍കുട്ടികളെ കൊല്ലണം. അതിന്റെ രക്തത്തില്‍നിന്നു കുറച്ചെടുത്ത് ആടിനെ ഭക്ഷിക്കാന്‍ കൂടിയിരിക്കുന്ന വീടിന്റെ രണ്ടു കട്ടിളക്കാലുകളിലും മേല്‍പ്പടിയിലും പുരട്ടണം. അതിന്റെ മാംസം തീയില്‍ ചുട്ട്, പുളിപ്പില്ലാത്ത അപ്പവും കയ്പുള്ള ഇലകളുംചേര്‍ത്ത്, അന്നുരാത്രിയില്‍ ഭക്ഷിക്കണം. ചുട്ടല്ലാതെ, വെള്ളത്തില്‍ വേവിച്ചോ, അല്ലാതെയോ ഭക്ഷിക്കരുത്. പാകംചെയ്ത വീട്ടില്‍വച്ചുതന്നെ പെസഹാ ഭക്ഷിക്കണം. മാംസത്തില്‍നിന്ന് അല്പംപോലും പുറത്തുകൊണ്ടുപോകരുത്., അരമുറുക്കി, പാദരക്ഷകളണിഞ്ഞ്, വടി കൈയ്യിലേന്തി, തിടുക്കത്തിലാണതു ഭക്ഷിക്കേണ്ടത്. കാരണം അതു കര്‍ത്താവിന്റെ പെസഹയാണ്. ആ രാത്രിയില്‍ എന്റെ സംഹാരദൂതന്‍ ഈജിപ്തിലൂടെ കടന്നുപോകും. ഈജിപ്തിലെ മനുഷ്യരുടെയും മൃഗങ്ങളുടെയും കടിഞ്ഞൂലുകളെയെല്ലാം അവന്‍ സംഹരിക്കും. കട്ടിളയിലുള്ള, പെസഹാകുഞ്ഞാടിന്റെ രക്തം നിങ്ങള്‍ ആ വീട്ടില്‍ താമസിക്കുന്നുവെന്നതിന്റെ അടയാളമായിരിക്കും. കുഞ്ഞാടിന്റെ രക്തംതളിച്ച വീടുകളെ സംഹാരദൂതന്‍ ഉപദ്രവിക്കുകയില്ല. ഒരു സ്മരണാദിവസമായി നിങ്ങള്‍ വര്‍ഷംതോറും ഇതേദിവസം പെസഹാതിരുനാള്‍ ആചരിക്കണം."

ജോസഫ് ഇസ്രായേല്‍ക്കാരെക്കൊണ്ടു സത്യംചെയ്യിച്ചിരുന്നതനുസരിച്ച്, പരിമളദ്രവ്യങ്ങള്‍ പുരട്ടി സംരക്ഷിച്ചിരുന്ന ജോസഫിന്റെ മൃതശരീരം, കാനാന്‍ദേശത്തേക്കു കൊണ്ടുപോകാനായി മോശ ഒരുക്കിവച്ചു.

കര്‍ത്താവിന്റെ കല്പന മോശയും അഹറോനും ഇസ്രായേല്‍ജനതയെ അറിയിച്ചു.

"ഇനി വരുന്ന തലമുറകള്‍തോറും നിങ്ങളുടെ സന്തതിപരമ്പരകള്‍ എല്ലാ വര്‍ഷവും കര്‍ത്താവിന്റെ പെസഹാ തിരുനാള്‍ ആചരിക്കണം. ഇതിന്റെ അര്‍ത്ഥമെന്തെന്നു നിങ്ങളുടെ മക്കള്‍ ചോദിക്കുമ്പോള്‍ പറയണം, ഈ ദിവസം കര്‍ത്താവിന്റെ സംഹാരദൂതന്‍ ഈജിപ്തിലൂടെ കടന്നുപോയി, ഈജിപ്തിലെ ആദ്യജാതാരെ സംഹരിച്ചപ്പോള്‍ ഇസ്രായേല്‍ക്കാരെ സംരക്ഷിച്ചതിന്റെ അനുസ്മരണമാണ് ഈ തിരുനാള്‍ "

ജനങ്ങളെല്ലാം മോശ പറഞ്ഞതുപോലെ ചെയ്തു.

പെസഹാദിവസം പാതിരാകഴിഞ്ഞപ്പോള്‍ മുതല്‍ ഈജിപ്തിലെങ്ങും കൂട്ടനിലവിളിയുയര്‍ന്നു. ഫറവോയുടെ കൊട്ടാരംമുതല്‍ ജയിലറകളില്‍വരെ ഈജിപ്തിലെല്ലാം ആദ്യസന്താനമായി ജനിച്ച മനുഷ്യരും മൃഗങ്ങളും പ്രായഭേദമെന്യേ, ജീവന്‍ വെടിഞ്ഞു.

ആ രാത്രിയില്‍ത്തന്നെ ഫറവോ മോശയേയും അഹറോനേയും വിളിപ്പിച്ചു.

"ഇസ്രായേല്‍ക്കാരെ മുഴുവനും അവരുടെ ആടുമാടുകളെയും സകല സമ്പത്തിനുമൊപ്പം ഈജിപ്തില്‍നിന്നു കൊണ്ടുപോയിക്കൊള്ളൂ. നിങ്ങള്‍ പോയി കര്‍ത്താവിനു ബലിയര്‍പ്പിക്കൂ. എന്നെയും ഈജിപ്തിനെയും അനുഗ്രഹിക്കൂ. കാണുന്നില്ലേ, ഞങ്ങള്‍ മുഴുവന്‍ നശിച്ചുകൊണ്ടിരിക്കുകയാണ്."

ഈജിപ്തിലെ ജനങ്ങളും ഇസ്രായേല്‍ക്കാരെ നിര്‍ബ്ബന്ധിച്ചു. "ഞങ്ങളുടെ പൊന്നും വെള്ളിയുമെല്ലാം നിങ്ങള്‍ക്കു നല്‍കാം. ഈ ദേശം വിട്ടുപോയിക്കൊള്ളൂ. ഇല്ലെങ്കില്‍ ഞങ്ങളെല്ലാവരും മരിക്കും."

നേരംപുലരുന്നതിനുമുമ്പുതന്നെ മോശയുടെ നേതൃത്വത്തില്‍ ഇസ്രായേല്‍ജനം പുറപ്പെട്ടു. ഇസ്രായേല്‍ ജനം ഈജിപ്തിലെത്തിയിട്ട്, നാനൂറ്റിമുപ്പതു സംവത്സരങ്ങള്‍ പൂര്‍ത്തിയായ ദിവസമായിരുന്നു, അന്ന്!

ഈജിപ്തിന്റെ അതിര്‍ത്തിയായ സുക്കൊത്തിലേക്കാണ് അവര്‍ നടന്നത്. സ്ത്രീകളെയും കുട്ടികളെയും കൂടാതെ ആറുലക്ഷം പുരുഷന്മാര്‍ ആ സംഘത്തിലുണ്ടായിരുന്നു!

തിടുക്കത്തില്‍ പുറപ്പെട്ടതിനാല്‍ യാത്രയ്ക്കുള്ള ആഹാരമൊരുക്കാനോ മാവു പുളിപ്പിക്കാനോ അവര്‍ക്കു സമയം ലഭിച്ചില്ല. യാത്രയില്‍ അവര്‍ പുളിപ്പില്ലാത്ത അപ്പം ചുട്ടു.

ദിവസങ്ങള്‍ കടന്നുപോയി. ഫറവോ തിടുക്കത്തില്‍ തന്റെ ആലോചനാസംഘത്തെ വിളിച്ചുകൂട്ടി.

"നമ്മുടെമേല്‍ പതിച്ച ദുരന്തത്തില്‍ മനംനൊന്ത്, ഞാന്‍ വിഡ്ഢിത്തം പ്രവര്‍ത്തിച്ചുപോയി. നമ്മുടെ അടിമകളായ ഇസ്രായേല്‍ക്കാരെ വിട്ടയച്ചതു ഭോഷത്തംതന്നെയാണ്. ഈജിപ്തിലെ ജോലികള്‍ചെയ്യാന്‍ ഇനിയാരാണുള്ളത്?"

ഇസ്രായേല്‍ക്കാരെ തിരികെ കൊണ്ടുവരണമെന്നുതന്നെയായിരുന്നു ആലോചനാസംഘത്തിലെ മുഴുവന്‍പേരുടെയും അഭിപ്രായം.

"ആടുമാടുകളും സ്ത്രീകളും കുട്ടികളുമൊക്കെയായി അവര്‍ക്ക് ഒരുപാടുദൂരം സഞ്ചരിക്കാനാകില്ല. മികച്ച കുതിരകളും തേരുകളുമായി സൈന്യമൊരുങ്ങട്ടേ! മുഴുവന്‍ ഇസ്രായേലികളെയും ഈജിപ്തിലേക്കു മടക്കി കൊണ്ടുവരട്ടേ!" ഫറവോ കല്പനപുറപ്പെടുവിച്ചു.

കുതിരപ്പടയാളികളും തേരുകളുമടങ്ങിയ വലിയൊരു സൈന്യം ഇസ്രായെല്യരെ പിടികൂടി തിരികെ കൊണ്ടുവരാനായി പുറപ്പെട്ടു.

Saturday, 7 October 2017

കന്മഴ പെയ്തപ്പോള്‍

മോശ വീണ്ടും ഫറവോയുടെ മുമ്പിലെത്തി. മോശയ്ക്കുവേണ്ടി അഹറോന്‍ സംസാരിച്ചു. "കര്‍ത്താവു ചോദിക്കുന്നു, എന്റെ ജനത്തെ വിട്ടയയ്ക്കാതിരിക്കത്തക്കവിധം നീ ഇനിയുമവരുടെനേരേ അഹങ്കാരം പ്രകടിപ്പിക്കുമോ? ഈജിപ്തില്‍ ഇന്നുവരെ ഉണ്ടായിട്ടില്ലാത്തവിധം കഠിനമായ കന്മഴ നാളെ ഈ സമയത്തു ഞാന്‍ വര്‍ഷിക്കും. ജീവനോടെ അവശേഷിക്കുന്ന കന്നുകാലികളടക്കം വയലിലുള്ളവയെ എല്ലാം സുരക്ഷിത സ്ഥാനങ്ങളിലെത്തിച്ചാല്‍ നന്ന്!  വയലില്‍ നില്‍ക്കുന്ന സകല മനുഷ്യരുടെയും മൃഗങ്ങളുടെയും മേല്‍ കന്മഴ പെയ്യുകയും അവയെല്ലാം ചത്തുപോവുകയും ചെയ്യും."
     
ഫറവോയുടെ സേവകരില്‍ കര്‍ത്താവിന്റെ വാക്കിനെ ഭയപ്പെട്ടവര്‍ തങ്ങളുടെ ദാസരെയും മൃഗങ്ങളെയും വേഗം വീടുകളിലെത്തിച്ചു.  എന്നാല്‍ കര്‍ത്താവിന്റെ വാക്കിനെ ഗൗനിക്കാതിരുന്നവര്‍ തങ്ങളുടെ ദാസരെയും മൃഗങ്ങളെയും വയലില്‍ത്തന്നെ നിര്‍ത്തി.    

പിറ്റേന്നു പുലര്‍ച്ചെ, മോശ ആകാശത്തിലേക്കു തന്റെ കൈ നീട്ടി.      

കര്‍ത്താവ് ഇടിയും കന്മഴയും ഭൂമിയിലേക്കയച്ചു. തീജ്വാലകളോടെ വലിയ കല്ലുകള്‍ ആകാശത്തുനിന്നു കൂട്ടമായി ഭൂമിയില്‍ പതിച്ചു. പെരുമഴ പോലെ ഈജിപ്തിലെ വയലുകളിലെങ്ങും കല്ലുകള്‍ പെയ്തിറങ്ങി. മിന്നല്‍പ്പിണരുകള്‍പോലെ കല്ലുകള്‍ക്കൊപ്പം ആകാശത്തിലഗ്നിയെരിഞ്ഞു.

ഇസ്രായേല്‍ക്കാര്‍ വസിച്ചിരുന്ന ഗോഷെനിലൊഴികെ ഈജിപ്തിലെ വയലുകളിലുണ്ടായിരുന്ന മനുഷ്യരെയും മൃഗങ്ങളെയുമെല്ലാം കന്മഴ നശിപ്പിച്ചു. അവിടെയുണ്ടായിരുന്ന ചെടികളെയും വന്‍മരങ്ങളെയും നിശ്ശേഷം തകര്‍ത്തുകളഞ്ഞു.
   
ഫറവോ മോശയെയും അഹറോനെയും ആളയച്ചു വരുത്തി: "ഞാന്‍ തെറ്റു ചെയ്തിരിക്കുന്നു. കര്‍ത്താവു നീതിമാനാണ്. ഞാനും എന്റെ ജനവും തെറ്റുകാരാണ്. ഈ ഇടിമുഴക്കത്തിനും കന്മഴയ്ക്കും അറുതിവരാന്‍വേണ്ടി നിങ്ങള്‍ കര്‍ത്താവിനോടു പ്രാര്‍ഥിക്കുവിന്‍. ഞാന്‍ നിങ്ങളെ വിട്ടയയ്ക്കാം. ഇനി നിങ്ങള്‍ അല്പംപോലും വൈകേണ്ടാ.  
 
മോശയ്ക്കുവേണ്ടി  അഹറോന്‍ ഫറവോയോടു പറഞ്ഞു: "ഞാന്‍ പട്ടണത്തില്‍നിന്നു പുറത്തു കടന്നാലുടന്‍ കര്‍ത്താവിന്റെ നേര്‍ക്കു കൈകള്‍ വിരിച്ചു പ്രാര്‍ത്ഥിക്കാം. അപ്പോള്‍ ഇടിമുഴക്കം അവസാനിക്കുകയും കന്മഴ നിലയ്ക്കുകയും ചെയ്യും. അങ്ങനെ, ഭൂമി മുഴുവന്‍ കര്‍ത്താവിന്റെതാണെന്നു നീ ഗ്രഹിക്കും."

മോശ ഫറവോയുടെ അടുക്കല്‍ നിന്നു പുറപ്പെട്ട് പട്ടണത്തിനു വെളിയിലേക്കു പോയി, കര്‍ത്താവിന്റെ നേര്‍ക്കു കൈകള്‍ വിരിച്ചു പ്രാര്‍ത്ഥിച്ചു.      

ഇടിമുഴക്കവും കന്മഴയും നിലച്ചു. ആകാശത്തിലെ അഗ്നിനാളങ്ങള്‍ ഭൂമിയിലേക്കു പതിക്കാതെയായി. മനുഷ്യരുടെമേലുണ്ടായിരുന്ന വൃണങ്ങളും പേനുകളും അപ്രത്യക്ഷമായി. ഈച്ചകള്‍ എവിടെയോ പോയ്‌ മറഞ്ഞു.

ഈജിപ്തിനെ ബാധിച്ചിരുന്ന മഹാമാരികളും കന്മഴയും ഇടിമുഴക്കവും പൂര്‍ണമായി നിലച്ചെന്നു കണ്ടപ്പോള്‍, ഫറവോ തന്റെ വാക്കില്‍നിന്നു പിന്മാറി. അവന്‍ ഇസ്രായേല്‍ക്കാരെ വിട്ടയച്ചില്ല.

മോശ കര്‍ത്താവിനു മുമ്പില്‍ കൈകള്‍ വിരിച്ചു പ്രാര്‍ത്ഥിച്ചു: "ക് ക് ക് കര്‍ത്താവേ, ഇത്രയേറെ അ്അ്അ്അടയാളങ്ങള്‍ക്കു ശേഷവും ഫറവോ ഹ്ഹ്ഹ്ഹൃദയം കഠിനമാക്കുന്നതെന്താണ്? ഇ്ഇ്ഇ്ഇസ്രായേല്‍ ജനത്തെ അവന്‍ വിട്ടയയ്ക്കാത്തതെന്താണ്?"

"ആദിയില്‍ത്തന്നെ മനുഷ്യനെ സ്വതന്ത്ര ഹൃദയത്തോടെയാണു ഞാന്‍ സൃഷ്ടിച്ചത്. നന്മയും തിന്മയും അവന്റെ മുമ്പിലുണ്ട്. നന്മയോടൊപ്പം രക്ഷയും തിന്മയോടൊപ്പം ശിക്ഷയുമുണ്ട്. തെരഞ്ഞെടുക്കാനുള്ള സ്വാതന്ത്ര്യം ഞാന്‍ മനുഷ്യനു നല്‍കിയിരിക്കുന്നു. അനുഗ്രഹവും ശാപവും മനുഷ്യന്റെ തെരഞ്ഞെടുപ്പിലാണ്. ഫറവോ ഇനിയും നന്മയുടെ മാര്‍ഗ്ഗത്തില്‍ വരുന്നില്ലെങ്കില്‍ അവനും അവന്റെ രാജ്യവും കൂടുതല്‍ കഠിനമായ ശിക്ഷകളിലൂടെ കടന്നുപോകേണ്ടതായി വരും. നിങ്ങള്‍ വീണ്ടും ഫറവോയുടെ അടുത്തുപോയി ഞാന്‍ പറയുന്നത് അവനെ അറിയിക്കുക. അനുഗ്രഹമോ ശാപമോ അവന്‍തന്നെ തെരെഞ്ഞെടുക്കട്ടെ! "

മോശയും അഹറോനും ഫറവോയുടെ അടുത്തുചെന്നു. അഹറോന്‍ മോശയ്ക്കുവേണ്ടി സംസാരിച്ചു: :ഹെബ്രായരുടെ ദൈവമായ കര്‍ത്താവു പറയുന്നു, എത്രനാള്‍ നീ എനിക്കു കീഴ്‌വഴങ്ങാതെ നില്‍ക്കും? എന്നെ ആരാധിക്കാനായി എന്റെ ജനത്തെ വിട്ടയയ്ക്കുക.  അവരെ വിട്ടയ്ക്കാന്‍ വിസമ്മതിച്ചാല്‍, നിന്റെ രാജ്യത്തേക്കു ഞാന്‍ വെട്ടുകിളികളെ അയയ്ക്കും, അവ ദേശത്തെ കാഴ്ചയില്‍നിന്നു മറച്ചുകളയും; കന്മഴയില്‍നിന്നു രക്ഷപ്പെട്ടവയെയെല്ലാം വെട്ടുക്കിളികള്‍ തിന്നുകളയും. നിന്റെയും നിന്റെ സേവകരുടെയും ഈജിപ്തുകാരെല്ലാവരുടെയും വീടുകളില്‍ അവ വന്നു നിറയും. "

ഫറവോയുടെ സേവകര്‍ അവനോടു പറഞ്ഞു: "ഇനിയുമെത്രനാള്‍ നമ്മളീ മനുഷ്യരുടെ ഉപദ്രവം സഹിക്കണം? ഈജിപ്തു നശിച്ചുകൊണ്ടിരിക്കയാണെന്ന് ഇത്രയുമായിട്ടും അങ്ങ് അറിയുന്നില്ലേ? അവരുടെ ദൈവമായ കര്‍ത്താവിനെയാരാധിക്കാന്‍ അവരെവിട്ടയച്ചാലും."

ഫറവോ മോശയോടു പറഞ്ഞു: നിങ്ങള്‍ പോയി നിങ്ങളുടെ ദൈവമായ കര്‍ത്താവിനെ ആരാധിക്കുന്നതു ഞാന്‍ തടയുന്നില്ല. എന്നാല്‍, ആരെല്ലാമാണ് പോകുന്നതെന്നു നിങ്ങളെന്നെ അറിയിക്കണം."

മോശയ്ക്കുവേണ്ടി അഹറോന്‍ പറഞ്ഞു: ഇസ്രായേല്‍ജനത മുഴുവന്‍ ഒരുമിച്ചാണു പോകേണ്ടത്. ഞങ്ങളുടെ ആടുമാടുകളെയും കൊണ്ടുപോകണം. കാരണം, ഞങ്ങള്‍ പോകുന്നത് കര്‍ത്താവിന്റെ പൂജാമഹോത്സവമാഘോഷിക്കാനാണ്.      

"ഞാന്‍ നിങ്ങളോടൊപ്പം നിങ്ങളുടെ കുഞ്ഞുങ്ങളെയും വിട്ടയയ്ക്കുകയോ? നിങ്ങളുടെയുള്ളില്‍ എന്തോ ദുരുദ്ദേശ്യമുണ്ട്. അതിനാല്‍ അതു ഞാനനുവദിക്കുകയില്ല. നിങ്ങളില്‍ പുരുഷന്മാര്‍മാത്രം പോയി കര്‍ത്താവിനെ ആരാധിച്ചാല്‍ മതി."

"ഇല്ല, ഞങ്ങള്‍ക്കതല്ലവേണ്ടത്! ഇസ്രായേല്‍ജനതയെ മുഴുവന്‍ വിട്ടയയ്ക്കാന്‍ തയ്യാറാകുന്നതുവരെ  കര്‍ത്താവിന്റെ കരം നിന്നില്‍നിന്നു നീങ്ങിപ്പോകുകയില്ല."

മോശയും അഹറോനും കൊട്ടാരംവിട്ടിറങ്ങി.

മോശ തന്റെ വടി ഈജിപ്തിന്റെമേല്‍ നീട്ടി. ഈജിപ്തിലെങ്ങും അന്ധകാരം വ്യാപിച്ചു. മൂന്നുദിവസത്തേക്ക് ഈജിപ്തില്‍ പ്രകാശമുണ്ടായിരുന്നില്ല. ഇസ്രായേലുകാര്‍ താമസിക്കുന്ന ഗ്രാമങ്ങളില്‍ മാത്രം പ്രകാശമുണ്ടായിരുന്നു. ഫറവോ മോശയെ രാജസദസ്സിലേക്കു വിളിപ്പിച്ചു.

"നിങ്ങള്‍ പോയി കര്‍ത്താവിനുബലിയര്‍പ്പിച്ചുകൊള്ളുക. സ്ത്രീകളെയും കുട്ടികളെയും കൂടെ കൊണ്ടുപോയിക്കൊള്ളൂ. എന്നാല്‍ നിങ്ങളുടെ ആടുമാടുകളെ ഇവിടെ നിറുത്തണം."

"അതുപറ്റില്ല. ഞങ്ങളുടെ ആടുമാടുകളില്‍നിന്നു ബലിയര്‍പ്പിക്കാന്‍ കര്‍ത്താവ് ആവശ്യപ്പെട്ടേക്കാം. അതുകൊണ്ടു ഞങ്ങള്‍ക്കവയെ കൂടെ കൊണ്ടുപോയേ പറ്റൂ. ഞങ്ങള്‍ക്കുവേണ്ട ഹോമദ്രവ്യങ്ങളും ബലിവസ്തുക്കളും നീ തരണം" അഹറോന്‍ മോശയുടെ വക്താവായി.

ഫറവോ കോപിഷ്ഠനായി.

"ഇറങ്ങിപ്പോകൂ എന്റെ മുമ്പില്‍നിന്നും! ഇനി നീയെന്റെ കണ്മുമ്പില്‍ വന്നാല്‍ അന്നു നിന്റെ മരണദിനമായിരിക്കും."

"അ്അ്അ്ങ്ങനെയാകട്ടെ. ഞാനിനി ന് ന് നിന്റെ മുമ്പില്‍ വ് വ് വ് വരില്ല."

ഫറവോയുടെ കൊട്ടാരത്തില്‍ നിന്നു പടിയിറങ്ങിയ മോശ, കവാടത്തിനു മുമ്പില്‍നിന്നുകൊണ്ടു തന്റെ വടി ഈജിപ്തിനുമേല്‍ നീട്ടി.

"ക് ക് ക് കന്മഴയെ അതിജീവിച്ച എല്ലാ ചെടികളും തിന്നു നശിപ്പിക്കുന്നതിനു വ് വ് വ് വെട്ടുകിളികള്‍ വരട്ടെ."

അന്നു പകലും രാത്രിയുംമുഴുവന്‍ ആ നാടിന്റെമേല്‍ കര്‍ത്താവ് കിഴക്കന്‍ കാററു വീശിച്ചു. പ്രഭാതമായപ്പോള്‍ കിഴക്കന്‍കാറ്റു വെട്ടുകിളികളെ കൊണ്ടുവന്നു.      

വെട്ടുകിളികള്‍ ഈജിപ്തിനെയാകെ ആക്രമിച്ചു. അവ രാജ്യം മുഴുവന്‍ വ്യാപിച്ചു.  അവ ദേശമാകെ മൂടിക്കളഞ്ഞു. കന്മഴയെ അതിജീവിച്ച ചെടികളും മരങ്ങളില്‍ ബാക്കിനിന്ന പഴങ്ങളും അവ തിന്നുതീര്‍ത്തു. ഈജിപ്തില്‍ മരങ്ങളിലും വയലിലെ ചെടികളിലും പച്ചയായി ഒന്നുംതന്നെയവശേഷിച്ചില്ല.      

ഫറവോ തിടുക്കത്തില്‍ മോശയെയും അഹറോനെയും വിളിപ്പിച്ചു: "നിങ്ങളുടെ ദൈവമായ കര്‍ത്താവിനും നിങ്ങള്‍ക്കുമെതിരായി ഞാന്‍ തെററു ചെയ്തുപോയി.  ഇപ്രാവശ്യംകൂടി എന്നോടു ക്ഷമിക്കണം. മാരകമായ ഈ ബാധ എന്നില്‍നിന്നകററുന്നതിനു നിങ്ങളുടെ ദൈവമായ കര്‍ത്താവിനോടു പ്രാര്‍ത്ഥിക്കുവിന്‍. ഞാന്‍ നിങ്ങളുടെ ജനത്തെ വിട്ടയയ്ക്കാം."
   
മോശ സമ്മതിച്ചു. അവന്‍ കര്‍ത്താവിനോടു പ്രാര്‍ത്ഥിച്ചു.    

കര്‍ത്താവു വളരെ ശക്തമായ പടിഞ്ഞാറന്‍ കാററു വീശിച്ചു. അതു വെട്ടുകിളികളെ തൂത്തുവാരി ചെങ്കടലിലെറിഞ്ഞു. അവയിലൊന്നുപോലും ഈജിപ്തിലവശേഷിച്ചില്ല.

എല്ലാം ശാന്തമായെന്നു കണ്ടപ്പോള്‍ ഫറവോ വീണ്ടും മനസ്സുമാറ്റി. ഇസ്രായേല്‍ജനത്തെ വിട്ടയയ്ക്കാന്‍ അവന്‍ തയ്യാറായില്ല!!!


Friday, 6 October 2017

മഹാമാരികള്‍

ഫറവോ മോശയുടെ വാക്കുകള്‍ക്കു വിലകല്പിച്ചില്ല. ഇസ്രായേല്‍ജനത്തെ വിട്ടയയ്ക്കാന്‍ അയാള്‍ തയ്യാറായില്ല.

മോശ കൊട്ടാരംവിട്ടിറങ്ങി. അവന്‍ അഹറോനോടു പറഞ്ഞു.
"എ്എ്എ്ന്റെ വടി കൈയിലെടുത്ത്, ന് ന് ന് നദികളുടെയും തോടുകളുടെയും കുളങ്ങളുടെയുംമേല്‍ നീട്ടി, ഈഈഈഈജിപ്തു മുഴുവന്‍ തവളകളെക്കൊണ്ടു ന് ന് ന് നിറയ്ക്കുക. "

അഹറോന്‍ അപ്രകാരംചെയ്തു.  തവളകളെക്കൊണ്ട് ഈജിപ്തുദേശം മുഴുവന്‍ നിറഞ്ഞു.

ഫറവോ തന്റെ മന്ത്രവാദികളെ വിളിച്ചു. അവരുടെ മാന്ത്രികവിദ്യകളാല്‍ അവര്‍ വിദൂരസ്ഥലങ്ങളില്‍നിന്നുപോലും തവളകളെ ഈജിപ്തിലേക്കു വരുത്തി. എന്നാല്‍ ഒന്നിനെപ്പോലും ഈജിപ്തിനു പുറത്തേക്കയയ്ക്കാന്‍ അവര്‍ക്കായില്ല...

ശുദ്ധജലമില്ലാതെയും തവളകളുടെ ശല്യത്താല്‍ വലഞ്ഞും ദുരിതപൂര്‍ണ്ണങ്ങളായ ഏഴുദിനരാത്രങ്ങള്‍ ഈജിപ്തുകാര്‍ പിന്നിട്ടു.  ഇസ്രായെല്‍ക്കാരുടെ ഗ്രാമങ്ങള്‍മാത്രം ദുരിതങ്ങളില്‍നിന്നകന്നു നിന്നു.

തന്റെ മന്ത്രവാദികള്‍ക്ക് ഈജിപ്തിനെ ഈ ദുസ്ഥിതിയില്‍നിന്നു മോചിപ്പിക്കാനാകില്ലെന്നു മനസ്സിലായപ്പോള്‍ ഫറവോ മോശയേയും അഹറോനെയും കൊട്ടാരത്തിലേക്കു  വിളിപ്പിച്ചു.

"എന്നില്‍നിന്നും എന്റെ ജനത്തില്‍നിന്നും ഈ തവളകളെയകറ്റിക്കളയുന്നതിനു കര്‍ത്താവിനോടു നിങ്ങള്‍ പ്രാര്‍ത്ഥിക്കുവിന്‍; കര്‍ത്താവിനു ബലിയര്‍പ്പിക്കാനായി നിന്റെ ജനത്തെ ഞാന്‍ വിട്ടയയ്ക്കാം.      

മോശയ്ക്കു വേണ്ടി അഹറോന്‍ ഫറവോയോടു പറഞ്ഞു: "തവളകളെ ഈജിപ്തിലെ ഭവനങ്ങളില്‍നിന്നും നിന്റെ രാജകൊട്ടാരത്തില്‍നിന്നുമകറ്റി നദിയില്‍ ഒതുക്കി നിറുത്തുന്നതിനായി ഞങ്ങള്‍ പ്രാര്‍ത്ഥിക്കാം. കര്‍ത്താവിനു തുല്യനായി മറ്റാരുമില്ലെന്ന് അങ്ങനെ നീ ഗ്രഹിക്കും."  

ഫറവോയോടു പറഞ്ഞതുപോലെ, തവളകളുടെ ശല്യമൊഴിവാക്കാന്‍ മോശ കര്‍ത്താവിനോടപേക്ഷിച്ചു.      

വീടുകളിലും അങ്കണങ്ങളിലും വയലുകളിലുമുണ്ടായിരുന്ന തവളകള്‍ ചത്തൊടുങ്ങി.  ജനങ്ങളവയെ വലിയ കൂനകളായി കൂട്ടി. നാട്ടില്‍ ദുര്‍ഗന്ധം വ്യാപിച്ചപ്പോള്‍ വലിയ കുഴികളുണ്ടാക്കി അവയെയെല്ലാം മൂടിക്കളഞ്ഞു.      
നാട്ടില്‍സ്വൈരം ലഭിച്ചെന്നു കണ്ടപ്പോള്‍ ഫറവോയുടെ മനസ്സുമാറി . ഇസ്രായേല്‍ക്കാരെ വിട്ടയയ്ക്കാന്‍ അവന്‍ തയ്യാറായില്ല. ദിവസങ്ങള്‍ കഴിഞ്ഞിട്ടും ഫറവോ വാക്കുപാലിക്കുന്നില്ലെന്നു കണ്ടപ്പോള്‍ മോശ കൊട്ടാരത്തിലെത്തി ഫറവോയെ കാണാന്‍ ശ്രമിച്ചു. എന്നാല്‍ കാവല്‍ക്കാര്‍ അവനെ കടത്തിവിട്ടില്ല.

മോശ അഹറോനോടു പറഞ്ഞു: ഇ്ഇ്ഇ്ഇതാ എ്എ്എന്റെ വടികൊണ്ടു ന് ന് ന് നിലത്തെ പൂഴിയിലടിക്കുക. അ്അ്അ്പ്പോള്‍ അതു പേനായിത്തീര്‍ന്ന് ഈജിപ്തുമുഴുവന്‍ വ് വ് വ്വ്യാപിക്കും.      

അഹറോന്‍ വടിയെടുത്തു കൈനീട്ടി കാവല്‍ക്കാരുടെ മുമ്പില്‍വച്ചുതന്നെ നിലത്തെ പൂഴിയിലടിച്ചു. ഉടനെ ഈജിപ്തിലെ മനുഷ്യരുടെയും മൃഗങ്ങളുടെയുംമേല്‍ പേന്‍ നിറഞ്ഞു. ഈജിപ്തിലെ പൂഴി മുഴുവന്‍ പേനായിത്തീര്‍ന്നു.

ഫറവോ മന്ത്രവാദികളെ വിളിപ്പിച്ചു. ഈജിപ്തിലെ മന്ത്രവാദികള്‍ ഫറവോയോടു പറഞ്ഞു: "ഈ മനുഷ്യരോടൊപ്പം ദൈവകരം പ്രവര്‍ത്തിക്കുന്നുണ്ട്. ഞങ്ങള്‍ നിസ്സഹായരാണ്."

എങ്കിലും ഫറവോ മനസ്സുമാറ്റിയില്ല.

പിറ്റേന്നു ഫറവോ സ്നാനത്തിനായി നദിയിലേക്കു വരുന്ന വഴിയില്‍ മോശ അഹറോനോടൊപ്പം കാത്തുനിന്നു.

ഫറവോയെ കണ്ടപ്പോള്‍ മോശയ്ക്കുവേണ്ടി അഹറോന്‍ ഉറക്കെ വിളിച്ചുപറഞ്ഞു:

"കര്‍ത്താവ് ഇപ്രകാരം പറയുന്നു: എന്നെ ആരാധിക്കാനായി എന്റെ ജനത്തെ വിട്ടയയ്ക്കുക. എന്റെ ജനത്തെ വിട്ടയയ്ക്കാത്തപക്ഷം, നിന്റെയും സേവകരുടെയും ജനത്തിന്റെയുംമേല്‍ ഞാന്‍ ഈച്ചകളെയയയ്ക്കും. അങ്ങനെ ഈജിപ്തുകാരുടെ ഭവനങ്ങള്‍ ഈച്ചകളെക്കൊണ്ടു നിറയും. അവര്‍ നില്‍ക്കുന്ന സ്ഥലംപോലും ഈച്ചക്കൂട്ടങ്ങള്‍ പൊതിയും. എന്നാല്‍, എന്റെ ജനം വസിക്കുന്ന ഗോഷെന്‍ പ്രദേശത്തെ ഞാന്‍ ഒഴിച്ചുനിര്‍ത്തും; അവിടെ ഈച്ചകള്‍ ഉണ്ടായിരിക്കയില്ല. അങ്ങനെ ഭൂമിയില്‍ ഞാനാണു സകലത്തിന്റെയും കര്‍ത്താവെന്നു നീ ഗ്രഹിക്കും."

ഫറവോ അവരെ ശ്രദ്ധിച്ചതേയില്ല.  

വൈകാതെ ഈജിപ്തുരാജ്യം മുഴുവന്‍ ഈച്ചകളുടെ കൂട്ടംകൊണ്ടു നിറഞ്ഞു തുടങ്ങി.  അപ്പോള്‍ ഫറവോ മോശയെയും അഹറോനെയും വിളിച്ചു പറഞ്ഞു: " എന്തിനു നിങ്ങള്‍ രാജ്യംവിട്ടുപോകണം? നിങ്ങള്‍ ഈജിപ്തിനുള്ളില്‍ എവിടെവേണമെങ്കിലും നിങ്ങളുടെ ദൈവത്തിനു ബലിയര്‍പ്പിച്ചുകൊള്ളുവിന്‍."

മോശ പറഞ്ഞു: "അ്അ്അ്അതു ശരിയാകില്ല. ഇ്ഇ്ഇ്ഈജിപ്തുകാര്‍ക്കരോചകമായ വസ്തുക്കളാണു ദ് ദ് ദൈവമായ കര്‍ത്താവിനു ഞങ്ങള്‍ ബ് ബ് ബ് ബലിയര്‍പ്പിക്കുന്നത്. അതിനാല്‍ , അ്അ്അ്അവര്‍ കാണ്‍കെ ബലിയര്‍പ്പിക്കുകയാണെങ്കില്‍ അ്അ്അ്അവര്‍ ഞങ്ങളെ കല്ലെറിയുകയില്ലേ?  ക് ക് ക് കര്‍ത്താവിന്റെ ക് ക് കല്പനയനുസരിച്ച്, മൂന്നുദിവസത്തെ യാത്രചെയ്തു മ് മ് മ് മരുഭൂമിയിലെത്തി, അവിടെവച്ചു ഞങ്ങള്‍  അ്അ്അ്അവിടുത്തേക്കു ബലിയര്‍പ്പിക്കട്ടെ."

"എന്തു സംഭവിച്ചാലും രാജ്യത്തിനു പുറത്തേക്കു പോകാന്‍ നിങ്ങളെ ഞാന്‍ അനുവദിക്കുകയില്ല. നിങ്ങള്‍ പോയാല്‍ തിരിച്ചുവരുകയില്ല. ഈജിപ്തിലെ വയലുകളിലും ഇഷ്ടികച്ചൂളകളിലും കെട്ടിടനിര്‍മ്മാണ സ്ഥലങ്ങളിലും പണിചെയ്യാന്‍ ആളില്ലാതെയാകും."

മോശയുടെ നിര്‍ദ്ദേശപ്രകാരം അഹറോന്‍ സംസാരിച്ചു തുടങ്ങി. "നീയിനിയും ഞങ്ങളെ  വിട്ടയയ്ക്കാന്‍ വിസമ്മതിച്ചാല്‍ കര്‍ത്താവിന്റെ കരം, വയലിലുള്ള നിന്റെ മൃഗങ്ങളുടെമേല്‍ പതിക്കും; അവയെ മഹാമാരി ബാധിക്കും.  ഇസ്രായേല്‍ക്കാരുടെയും ഈജിപ്തുകാരുടെയും മൃഗങ്ങള്‍ക്കുതമ്മില്‍ കര്‍ത്താവു ഭേദം കല്പിക്കും. ഇസ്രായേല്‍ക്കാരുടേതില്‍ ഒന്നുപോലും നശിക്കയില്ല. കര്‍ത്താവു നാളെ, ഈ രാജ്യത്തിതുചെയ്യുമെന്നു സമയവും നിശ്ചയിച്ചിരിക്കുന്നു."

ഫറവോ അവരുടെ വാക്കുകള്‍ ശ്രദ്ധിക്കാതെ കടന്നുപോയി.
 
അടുത്ത ദിവസംതന്നെ കര്‍ത്താവ് അപ്രകാരം പ്രവര്‍ത്തിച്ചു. കുതിര, കഴുത, ഒട്ടകം, കാള, ആടു തുടങ്ങി, ഈജിപ്തുകാരുടെ മൃഗങ്ങളില്‍ പകുതിയിലധികവും ചത്തൊടുങ്ങി. എന്നാല്‍, ഇസ്രായേല്‍ക്കാരുടെ മൃഗങ്ങളെല്ലാം സുരക്ഷിതമായിരുന്നു.

രാജ്യത്തു കനത്ത നാശനഷ്ടങ്ങളുണ്ടായെന്നറിഞ്ഞിട്ടും ഫറവോ മനസ്സുമാറ്റിയില്ല. ഈജിപ്തിലെ ഇസ്രായേല്‍ക്കാരെ അഹോരാത്രം പണിയെടുപ്പിച്ച് രാജ്യത്തിനുണ്ടായ നഷ്ടം നികത്താന്‍ ഫറവോ നിര്‍ദ്ദേശിച്ചു. ഇസ്രായേല്‍ക്കാരുടെ യാതനകള്‍ വര്‍ദ്ധിച്ചു.

മോശയും അഹറോനും ഒരിക്കല്‍ക്കൂടി ഫറവോയെ സന്ദര്‍ശിച്ചു. ചൂളയില്‍നിന്നെടുത്ത കുറെ ചാരം അവര്‍ കൈകളില്‍ വസിച്ചിരുന്നു.

 "ഇസ്രായേല്‍ ജനതയെ പീഡിപ്പിക്കുന്ന നിന്റെയും നിന്റെ ജനതയുടെയുംമേല്‍ പൊട്ടിയൊലിക്കുന്ന വ്രണങ്ങള്‍ നിറയാനായി ഞങ്ങളിത് ആകാശത്തേക്കു വിതറുന്നു."

മോശ, ചാരം അന്തരീക്ഷത്തിലേക്കെറിഞ്ഞപ്പോള്‍, അതു മനുഷ്യരിലും മൃഗങ്ങളിലും പൊട്ടിയൊലിക്കുന്ന വ്രണങ്ങളുണ്ടാക്കി.

എങ്കിലും ഫറവോ മനസ്സു മാറ്റിയില്ല.