Sunday, 1 July 2018

തളരാത്ത പോരാളി

ഭാര്യയ്ക്കു സമ്മാനിക്കാനായി കൊഴുത്ത ഒരാട്ടിന്‍കുട്ടിയുമായി സാംസൺ തിമ്നയിലെത്തി.  പക്ഷേ, അവന്റെ ഭാര്യ അവളുടെ വീട്ടിലുണ്ടായിരുന്നില്ല.

ഭാര്യാപിതാവ്‌ അവനോടു പറഞ്ഞു:
അവളുടെ പിതാവു പറഞ്ഞു: "നിന്റെ കടംകഥയുടെ ഉത്തരം ചോർത്തിക്കൊടുത്തു് മണവാളത്തോഴന്മാർക്കുമുമ്പിൽ നിന്നെ പരാജിതനാക്കിയതിനാൽ നീ അവളെ അതിയായിവെറുക്കുന്നുവെന്നും അതിനാലാണ് അവളെ ഉപേക്ഷിച്ചുപോയതെന്നുംവിചാരിച്ച്‌ ഞാനവളെ നിന്‍െറ കൂട്ടുകാരനു വിവാഹം ചെയ്തുകൊടുത്തു. അവളിപ്പോൾ അവന്റെ വീട്ടിലാണ്. എന്റെ ഇളയമകളെ ഞാൻ നിനക്കു വിവാഹംചെയ്തുതരാം. അവളെ സ്വീകരിച്ചു്, നിന്റെ ഭാര്യയാക്കി കൊണ്ടുപോയ്ക്കൊള്ളൂ"

"എന്റെ ഭാര്യയെ മറ്റൊരുവനു വിവാഹംകഴിച്ചുനല്കിയ നിങ്ങൾ എന്നെ വീണ്ടും അപമാനിക്കാൻശ്രമിക്കുന്നോ? എനിക്കവളോടുള്ള സ്നേഹത്തെപ്രതി നിങ്ങളെ ഞാൻ വെറുതെവിടുന്നു. എന്നാൽ ഇതിനുകൂട്ടുനിന്ന നിങ്ങളുടെ നാട്ടുകാരായ ഫിലിസ്ത്യരെ ഞാൻ വെറുതേവിടില്ല." സാംസണ്‍ കോപത്തോടെ അവിടെനിന്നു പോയി.

അവൻ കുറെയേറെ കുറുനരികളെ പിടികൂടി. ഈരണ്ടെണ്ണത്തെ വാലോടുവാല്‍ചേര്‍ത്തു ബന്ധിച്ച്‌, അവയ്‌ക്കിടയില്‍ തീപ്പന്തം വച്ചുകെട്ടി. അവന്‍ പന്തങ്ങള്‍ക്കു തീകൊളുത്തി. കുറുനരികളെ ഫിലിസ്‌ത്യരുടെ വയലുകളിലേക്ക്‌ ഓടിച്ചുവിട്ടു.

വയലില്‍ വിളഞ്ഞുനിന്നിരുന്ന ഗോതമ്പുചെടികളും വയൽവരമ്പിൽ കൊയ്‌തുകൂട്ടിവച്ചിരുന്ന കറ്റകളും കത്തിച്ചാമ്പലായി. അഗ്നി പടരുന്നതുകണ്ടു ഫിലിസ്ത്യർ ഓടിയെത്തിയെങ്കിലും അവർക്കൊന്നും ചെയ്യാനായില്ല.

അവർ പരസ്പരം ചോദിച്ചു: "ഇതെങ്ങനെ സംഭവിച്ചു? ആരാണിതുചെയ്തത്?"

ഏറെത്താമസിയാതെ അവരുത്തരംകണ്ടെത്തി. "ആ തിമ്‌നാക്കാരന്റെ മരുമകനായ സാംസണ്‍ അവന്റെ ഭാര്യയെ അമ്മായിയപ്പന്‍ അവന്റെകൂട്ടുകാരന്‌ കൊടുത്തതുകൊണ്ടു ചെയ്‌തതാണിത്‌."

പിന്നെ വൈകിയില്ല, ഫിലിസ്‌ത്യര്‍ചെന്ന്‌ അവളെയും അവളുടെ പിതാവിനെയും അഗ്നിക്കിരയാക്കി.

ഇതറിഞ്ഞപ്പോൾ സാംസണ്‍ അത്യന്തം കോപിഷ്ടനായി. തന്റെ ഭാര്യയേയും ഭാര്യാപിതാവിനേയും അപായപ്പെടുത്തിയ സംഘത്തിലുണ്ടായിരുന്ന സകലരേയും അവനൊറ്റയ്ക്കുനേരിട്ടു. അവന്റെ ബലിഷ്ഠകരങ്ങളിൽനിന്നു രക്ഷപ്പെടാൻ ഒരാൾക്കും കഴിഞ്ഞില്ല. അവന‍വരെ കഠിനമായി പ്രഹരിച്ചു കൊലപ്പെടുത്തി.

പിന്നെ യൂദയാനാടിനടുത്തുള്ള ഏത്താമെന്ന സ്ഥലത്തുള്ള പാറക്കെട്ടില്‍പ്പോയി താമസമായി.

സാംസൺ ഫിലിസ്ത്യരോടുചെയ്ത അതിക്രമങ്ങളറിഞ്ഞ ഫിലിസ്ത്യരാജാവു യൂദയായിലേക്കു സൈന്യത്തെയയച്ചു. ആയിരത്തിലധികം സൈനികർ ലേഹി പട്ടണത്തിലെത്തി താവളമടിച്ചു.

യൂദയായിലെ ശ്രേഷ്ഠന്മാർ സൈനികരോടാരാഞ്ഞു: "എന്തുകൊണ്ടാണു നിങ്ങള്‍ ഞങ്ങള്‍ക്കെതിരായി വന്നത്?"

അവര്‍ പറഞ്ഞു: നിങ്ങളിലൊരുവനായ സാംസണ്‍ ഫിലിസ്ത്യരോടുചെയ്‌ത അക്രമങ്ങൾക്കു ശിക്ഷനല്കാന്‍, അവനെ ബന്ധനസ്‌ഥനാക്കുന്നതിനുവേണ്ടിയാണു ഞങ്ങള്‍ വന്നിരിക്കുന്നത്‌."

"സാംസൺ തെറ്റുചെയ്തെങ്കിൽ അവനെ ഞങ്ങൾതന്നെ നിങ്ങളുടെ കൈകളിലേല്പിക്കാം. നിങ്ങളുടെ നിയമമനുസരിച്ചു വിചാരണചെയ്തു ശിക്ഷിച്ചുകൊള്ളുക."

ഇസ്രായേൽശ്രേഷ്ഠന്മാരുടെ നേതൃത്വത്തിൽ യൂദായിലെ മൂവായിരത്തോളമാളുകള്‍ ഏത്താംപാറയിടുക്കില്‍, സാംസണെച്ചെന്നു കണ്ടു.

"ഫിലിസ്‌ത്യരാണു നമ്മുടെ ഭരണാധികാരികളെന്നു  നിനക്കറിഞ്ഞുകൂടേ? നീയെന്തിനാണിപ്പോള്‍ അവരെ ആക്രമിച്ചത്?"

സംഭവിച്ചതെന്തെന്ന് അവനവരോടു പറഞ്ഞു. "അവരെന്നോടു ചെയ്‌തതുപോലെ ഞാനവരോടും ചെയ്‌തു. അതിനു നിങ്ങൾക്കെന്താണിത്ര ആകുലത?"

"നിന്നെത്തേടി ഫിലിസ്ത്യസൈനികർ വന്നിരിക്കുന്നു. നിന്നെ ബന്ധിച്ച്‌, അവരുടെ കൈയിലേല്പിക്കാനാണു ഞങ്ങൾ വന്നിരിക്കുന്നത്. നിന്നെക്കിട്ടിയില്ലെങ്കിൽ അവർ ഇസ്രായേൽക്കാരെ ഒന്നടങ്കം നശിപ്പിക്കും."

"എനിക്കുവേണ്ടി മറ്റാരും ശിക്ഷിക്കപ്പെടേണ്ട. ഞാൻ നിങ്ങൾക്കൊപ്പം വരാം. നിങ്ങളെന്നെ ബന്ധിച്ചുകൊള്ളൂ." സാംസണ്‍ പറഞ്ഞു.

അവര്‍ പുതിയതും ബലവത്തുമായ രണ്ടു കയറുകൾകൊണ്ട്‌ അവനെ ബന്ധിച്ച്‌, ലേഹിയിലേക്കു കൊണ്ടുവന്നു.
അവർ ലേഹിയിലെത്തിയപ്പോള്‍ ഫിലിസ്‌ത്യസൈനികര്‍ ആര്‍പ്പുവിളികളോടെ അവനെക്കാണാനെത്തി. ആയിരത്തിലധികംവരുന്ന ആയുധധാരികളായ സൈനികർക്കുമുമ്പിൽ ബന്ധനസ്ഥനായ സാംസൺ കൂസലില്ലാതെ നിന്നു.

"ഇവനാണോ തിമ്നയിൽ ഫിലിസ്ത്യരെ കൂട്ടത്തോടെ കൊന്നൊടുക്കിയ കൊലയാളി? ഫിലിസ്ത്യരുടെമേൽ കൈവയ്ക്കുന്ന ഏതൊരുവനും പാഠമാകുന്ന ശിക്ഷതന്നെയാണു നിന്നെ കാത്തിരിക്കുന്നതു്..." ഫിലിസ്ത്യ സൈന്യത്തിന്റെ *സഹസ്രാധിപൻ സാംസൺന്റെ മുമ്പിലേക്കു വന്നുനിന്നു പറഞ്ഞു.

"അപരിച്ഛേതിതരായ ഫിലിസ്ത്യരുടെ അടിമത്തത്തിൽനിന്ന്, ഇസ്രായേലിനെ നിയന്ത്രിക്കാൻ യാഹ് വേ തെരഞ്ഞെടുത്തവനാണു ഞാനെന്നു നിങ്ങളിന്നറിയും..." സാംസൺ ഉറക്കെ വിളിച്ചുപറഞ്ഞു.

അപ്പോൾ കർത്താവിന്റെ ചൈതന്യം അവനിൽ നിറഞ്ഞു. അവനെ ബന്ധിച്ചിരുന്ന കയർ, കരിഞ്ഞ ചണനൂലുപോലെ അറ്റു നിലത്തുവീണു. ഞെട്ടിത്തരിച്ചുനിന്ന സഹസ്രാധിപനെ പെട്ടെന്നവൻ എടുത്തുയർത്തി. സംഭവിക്കുന്നതെന്തെന്നു മനസ്സിലാകാതെ, സ്തബ്ദ്ധരായിനിന്ന ഫിലിസ്ത്യ സൈനികർക്കുനേരെ അയാളെ ചുഴറ്റിയെറിഞ്ഞു. സഹസ്രാധിപനൊപ്പം നിരവധി സൈനികരും നിലംപതിച്ചു.

ചത്ത കഴുതയുടെ ഒരു താടിയെല്ല് അവിടെക്കിടന്നിരുന്നു. അതു കൈയിലെടുത്ത്, സാംസൺ സൈനികർക്കിടയിലേക്കു പാഞ്ഞുകയറി.
സാംസൺന്റെ വലംകൈയിൽ കഴുതയുടെ താടിയെല്ല്, ശക്തമായ ആയുധമായി. അതിന്റെയടിയേറ്റ്, ഫിലിസ്ത്യസൈനികരുടെ തലയോട്ടികൾ പിളർന്നു. ഫിലിസ്ത്യരുടെ മൂർച്ചയേറിയ വാളുകൾ, കഴുതയുടെ താടിയെല്ലിനുമുമ്പിൽ സ്വകർമ്മംമറന്നു പകച്ചുപോയി...

സാംസണെ ബന്ധിച്ചുകൊണ്ടുവന്ന ഇസ്രായേൽക്കാർ തങ്ങളുടെ മുമ്പിൽനടക്കുന്ന പോരാട്ടം അദ്ഭുതംകൂറുന്ന മിഴികളോടെ നോക്കിനിന്നു. ഒരു മനുഷ്യൻ, ആയുധധാരികളായ ആയിരം സൈനികരെ ഒറ്റയ്ക്കു നേരിടുന്നു. അന്നേവരെ കേട്ടുകേൾവിപോലുമില്ലാത്ത ഒരപൂർവ്വയുദ്ധത്തിനു് അവർ സാക്ഷികളായി.

ഫിലിസ്ത്യ സൈനികർ, ഒരുവൻപോലുമവശേഷിക്കാതെ മരിച്ചുവീണു...

ഇസ്രായേൽക്കാർ ആർപ്പുവിളിച്ചു. എന്നാൽ ആരും സാംസൺന്റെയടുത്തേക്കു ചെന്നില്ല.

സാംസൺ തളർന്നിരുന്നു. അവനു വലിയ ദാഹമുണ്ടായിരുന്നു. അവൻ ചുറ്റും നോക്കി. ഒരിടത്തും ദാഹനീർ കണ്ടില്ല.

അവന്‍ യാഹ് വേയെ വിളിച്ചുപ്രാർത്ഥിച്ചു: "ഇസ്രായേലിന്റെ ദൈവമായ കർത്താവേ, അവിടുത്തെ ദാസന്റെ കരങ്ങൾക്ക് അവിടുന്നു വലിയ വിജയം നേടിത്തന്നതിനാൽ അങ്ങേയ്ക്കു ഞാൻ നന്ദിപറയുന്നു.  എന്നാൽ ഞാനിപ്പോള്‍ ദാഹംകൊണ്ടു വലയുന്നു. മോശയ്ക്കു പാറപിളർന്നു ദാഹനീർ നല്കിയ കർത്താവേ, ദാഹിച്ചുവലഞ്ഞ്, ഈ അപരിച്ഛേദിതരുടെയിടയിൽ മരിച്ചുവീഴാൻ എനിക്കിടയാകരുതേ...."

അപ്പോൾ അല്പമകലെയായി വരണ്ട ഭൂമി ഒരുറവ തുറന്നു... സാംസൺ അവിടേയ്ക്കു ചെന്നു. ശുദ്ധജലം ആവോളംകുടിച്ചു്, ഊർജ്ജം വീണ്ടെടുത്തു. ഇസ്രായേൽജനം ദൈവത്തെ സ്തുതിച്ചുകൊണ്ടു സാംസണു ചുറ്റുംകൂടി. അവരവനെ ഇസ്രായേലിന്റെ നേതാവും ന്യായാധിപനുമായി അംഗീകരിച്ചു.

എന്നാൽ തിമ്നയിലും ലേഹിയിലും സാംസൺ ഫിലിസ്ത്യർക്കെതിരേചെയ്ത അതിക്രമങ്ങളെക്കുറിച്ചു കേട്ടറിഞ്ഞ ഫിലിസ്ത്യർക്കെല്ലാം അവനോടു കടുത്ത പകയായി. സാംസൺ വധിക്കപ്പെടണമെന്ന ആഗ്രഹം ആബാലവൃദ്ധം ഫിലിസ്ത്യരിലുമുണർന്നു.

അങ്ങനെയിരിക്കേ, സാംസൺ ഗാസപട്ടണത്തിലുള്ള ഒരു വേശ്യാഗൃഹത്തിലെത്തി. കോട്ടകളാൽ ചുറ്റപ്പെട്ട ഗാസയുടെ പട്ടണവാതിൽ സൂര്യാസ്തമയത്തോടെ അടയ്ക്കുമായിരുന്നു. രാത്രി മുഴുവൻ വാതിലടഞ്ഞുകിടക്കുന്നതിനാൽ സൂര്യാസ്തമയത്തിനും ഉദയത്തിനുമിടയിൽ പട്ടണത്തിലുള്ളവർക്കു പുറത്തുപോകാനോ പുറത്തുള്ളവർക്കു പട്ടണത്തിൽ പ്രവേശിക്കാനോ സാദ്ധ്യമായിരുന്നില്ല...

സാംസൺ  വേശ്യാഗൃഹത്തിലുണ്ടെന്നറിഞ്ഞ ഫിലിസ്ത്യർ ഒന്നിച്ചുകൂടി. സ്വജീവൻ വെടിഞ്ഞും സാംസണെ വധിക്കാൻ തയ്യാറായി ആയിരക്കണക്കിനുപേർ ആ സംഘത്തിലുണ്ടായിരുന്നു.

"നേരംപുലരുന്നതിനുമുമ്പു് നമുക്കു പട്ടണവാതിലിനു മുമ്പിലെത്തണം. പട്ടണവാതിൽ തുറന്നാലുടൻ സാംസൺ പുറത്തുവരും. അവനു ചിന്തിക്കാനോ പ്രവർത്തിക്കാനോ പറ്റുന്നതിനുമുമ്പു് അവൻ വധിക്കപ്പെടണം."

ഫിലിസ്ത്യരുടെ കുന്തങ്ങളും വാളുകളും സാംസൺന്റെ രക്തത്തിനായി കൊതിയോടെ കാത്തിരുന്നു...

- - - --- - - --- - - --- - - --- - - --
*സഹസ്രാധിപൻ - ആയിരം സൈനികരടങ്ങുന്ന സൈന്യഗണത്തിന്റെ തലവൻ

Sunday, 24 June 2018

തിമ്നായിലെ കന്യക

സാംസണ്‍ കോമളനായ ഒരു യുവാവായി വളര്‍ന്നുവന്നു. ആറടിയിലധികം ഉയരവും അതിനൊത്ത, ബലിഷ്ഠ ശരീരവും! കരുത്തു വിളിച്ചറിയിക്കുന്ന ഉറച്ച മാംസപേശികള്‍, ഗോതമ്പുനിറമുള്ള അവന്റെ ശരീരത്തെ കൂടുതല്‍ ആകര്‍ഷകമാക്കി. നീണ്ടുവളര്‍ന്ന, ഇടതൂര്‍ന്ന മുടി, നന്നായി ചീകിയൊതുക്കി, തുകല്‍നാടകൊണ്ടു കെട്ടിവച്ചിരുന്നു.

അവന്‍റെ മാതാപിതാക്കള്‍ ജനനംമുതലേ *നാസീര്‍വ്രതക്കാരനായി അവനെ വളര്‍ത്തി. അവന്‍റെ ശിരസ്സില്‍ ഒരിക്കല്‍പോലും ക്ഷൌരക്കത്തി സ്പര്‍ശിച്ചില്ല. വീഞ്ഞോ, ലഹരിപാനീയങ്ങളോ അവനുപയോഗിച്ചിരുന്നില്ല. മുന്തിരിയോ മുന്തിരിചേര്‍ത്ത ഭക്ഷണമോ അവന്‍ കഴിച്ചിരുന്നുമില്ല.

നവയൌവനത്തിലെത്തിയപ്പോള്‍, ദേശമെല്ലാമൊന്നു ചുറ്റിക്കാണുവാന്‍ സാംസണ്‍ ആഗ്രഹിച്ചു. മാതാപിതാക്കളുടെ അനുമതിയോടെ അവന്‍ നാടുകാണാനിറങ്ങി. വയലുകളും മുന്തിരിത്തോട്ടങ്ങളും കുന്നുകളും താഴ്വാരങ്ങളും കളകളാരവത്തോടെയൊഴുകുന്ന ജോര്‍ദ്ദാന്‍നദിയുമെല്ലാം അടയാഭരണങ്ങളൊരുക്കിയ കനാന്‍ദേശത്തിന്‍റെ സൌന്ദര്യമാസ്വദിച്ച്, ആഴ്ചകളോളം അവന്‍ സഞ്ചരിച്ചു.

യാത്രയ്ക്കിടെ, ഫിലിസ്ത്യരുടെ ഗ്രാമമായ തിമ്നായില്‍ അവനെത്തി. ഉയരംകുറഞ്ഞ മലയുടെ താഴ്വരയില്‍, വിശാലമായ ഗോതമ്പുവയല്‍ കതിരണിഞ്ഞുനില്ക്കുന്നു. അതിനപ്പുറത്ത് മുന്തിരിത്തോട്ടങ്ങളും ഉരുളക്കിഴങ്ങു പാടങ്ങളും. അവിടവിടെയായി തണല്‍വിരിച്ചു നില്‍ക്കുന്ന അത്തിമരങ്ങള്‍... മലയുടെ ചരിവില്‍ വിശാലമായ പുല്‍ത്തകിടി. ഗോതമ്പുവയലിനും മുന്തിരിത്തോട്ടത്തിനും നടുവിലായി ഒരറ്റയടിപ്പാത. വിളഞ്ഞുപാകമാകാറായ ഗോതമ്പുപാടത്തുനിന്ന് ഒരു കതിര്‍പറിച്ചെടുത്ത്, അതില്‍നിന്ന് ഓരോകതിര്‍മണികള്‍ ഉതിര്‍ത്തു വായിലിട്ട്, മന്ദമാരുതന്റെ തലോടലേറ്റ്, ആ ഒറ്റയടിപ്പാതയിലൂടെ സാംസണ്‍ നടന്നു.

പെട്ടെന്നാണതു സംഭവിച്ചത് – വഴിയോരത്തെ ഒരത്തിമരത്തിന്‍റെ മറവില്‍നിന്ന്, ഭീമാകാരനായ ഒരു സിംഹം സാംസണുനേരേ ചാടിവീണു. അപ്രതീക്ഷിതമായ ആക്രമണത്തില്‍ സാംസണ്‍ പിന്നിലേക്കു മറിഞ്ഞുവീണു. അവന്‍റെമേല്‍ സിംഹം തന്‍റെ മുന്‍കാലുകളമര്‍ത്തി. വായ പിളര്‍ന്ന്, നീണ്ട ദൃംഷ്ടകള്‍ കഴുത്തിനുനേരേ അടുപ്പിക്കുന്ന ആ ജന്തുവിന്‍റെ കീഴ്ത്താടിക്കുതാഴെ സാംസണ്‍ കടന്നുപിടിച്ചു. ജടവലിച്ചു പറിച്ചെടുത്തു. ഒപ്പം മുട്ടുകാലുയര്‍ത്തി, അതിന്‍റെ വയറില്‍ കനത്ത പ്രഹരമേല്പിച്ചു. മല്പിടുത്തത്തിനൊടുവില്‍ സാംസണ്‍ അ സിംഹത്തെ എടുത്തുയര്‍ത്തി നിലത്തടിച്ചു. പിന്നെ അതിന്‍റെ പിന്‍കാലുകളിലൊന്നില്‍ച്ചവിട്ടി, മറ്റേക്കാല്‍ കൈകൊണ്ടുവലിച്ചുയര്‍ത്തി. സിംഹത്തിന്റെ ശരീരം രണ്ടായി വലിച്ചുകീറി, കുറച്ചകലെയുണ്ടായിരുന്ന പാറക്കൂട്ടത്തിനിടയിലേക്കു വലിച്ചെറിഞ്ഞു.

ഗോതമ്പു വയലിന്‍റെ വശത്തുകൂടെ ഒഴുകിയിരുന്ന അരുവിയിലിറങ്ങി ദേഹശുദ്ധിവരുത്തി. നേരം ഉച്ചയോടടുത്തതിനാല്‍ അത്തിമരത്തില്‍നിന്ന്‍ ഏതാനും പഴങ്ങള്‍ പറിച്ചുതിന്നു. അല്പനേരം അതിനുകീഴില്‍ക്കിടന്നു വിശ്രമിച്ചിട്ടു യാത്രതുടരാമെന്ന്‍ അയാള്‍ കരുതി.

എന്തോ ശബ്ദംകേട്ടാണു സാംസണ്‍ ഉറക്കമുണര്‍ന്നത്. സൂര്യന്‍ പടിഞ്ഞാറേയ്ക്കു താഴ്ന്നുതുടങ്ങിയിരുന്നു. മലഞ്ചരിവിലെ പുല്‍മേട്ടില്‍ തന്‍റെ ആട്ടിന്‍കൂട്ടത്തെ മേയ്ക്കാനെത്തിയ ഒരു ഫിലിസ്ത്യപ്പെണ്‍കുട്ടി അവനെ ശ്രദ്ധിച്ചുകൊണ്ട് അവിടെ നിന്നിരുന്നു.

“നിങ്ങളാരാണ്? കണ്ടിട്ട് ഒരു ഹെബ്രായനാണെന്നു തോന്നുന്നല്ലോ.” അവള്‍ അവനോടു ചോദിച്ചു.

സാംസണ്‍ അവളെ സൂക്ഷിച്ചുനോക്കി. വിടര്‍ന്ന വെള്ളാരംകണ്ണുകളുള്ള, കൃശഗാത്രയായ ഒരു ഫിലിസ്ത്യന്‍ സുന്ദരി. ഒറ്റ നോട്ടത്തില്‍ത്തന്നെ സാംസണ്‍ അവളെ ഇഷ്ടപ്പെട്ടു.

“ഞാനൊരു ഹെബ്രായന്‍തന്നെ. ഇവിടെനിന്ന് ഒരുപാടകലെയുള്ള, സോറാ എന്ന ഗ്രാമത്തില്‍നിന്നു വരുന്നു. ദേശങ്ങള്‍ കാണാനായിറങ്ങിയതാണ്. ആഴ്ചകളായി പല ഗ്രാമങ്ങളിലൂടെയും പട്ടണങ്ങളിലൂടെയും സഞ്ചരിച്ചു. എന്നാല്‍ ഇന്നെന്‍റെ യാത്രയിലെ ഏറ്റവും നല്ല ദിവസമാണെന്നുതോന്നുന്നു. ഇതുവരെ ഒരിടത്തും കാണാന്‍കഴിയാത്ത, ഏറ്റവും സുന്ദരമായ ഒന്നു ഞാനിന്നു കണ്ടെത്തി. ഒറ്റനോട്ടത്തില്‍ത്തന്നെ എനിക്കു നിന്നെ ഇഷ്ടമായി. എന്‍റെ വധുവായി, എന്നോടൊപ്പംപോരാന്‍ നിനക്കു സമ്മതമാണോ?”

“ഞാന്‍ ആരുടെ ഭാര്യയാകണമെന്നു തീരുമാനിക്കേണ്ടത് എന്‍റെ പിതാവാണ്. ദാ, അവിടെ മുന്തിരിത്തോട്ടങ്ങള്‍ക്കുമപ്പുറത്താണു ഞങ്ങള്‍ താമസിക്കുന്നത്. വന്ന് എന്‍റെ പിതാവിനോടു ചോദിക്കൂ.”

“ഞാന്‍ പോയി എന്‍റെ മാതാപിതാക്കളെക്കൂട്ടി വരാം. എന്‍റെ പിതാവുതന്നെ നിന്‍റെ പിതാവിനോടു സംസാരിക്കട്ടെ. അതുവരെയും എനിക്കായി നീ കാത്തിരിക്കുക.”

അവന്‍ അന്നുതന്നെ സേറായിലെക്കുള്ള മടക്കയാത്ര തുടങ്ങി. വീട്ടില്‍ തിരിച്ചെത്തി, മാതാപിതാക്കളെ തന്‍റെ ഇംഗിതമറിയിച്ചു.

“നമ്മുടെ ജനങ്ങളിലോ ബന്ധുക്കളിലോ കന്യകമാര്‍ ഇല്ലാഞ്ഞിട്ടാണോ അപരിച്ഛേദിതരായ ഫിലിസ്ത്യരുടെയിടയില്‍ നീ ഭാര്യയെ അന്വേഷിക്കുന്നത്?” മാതാപിതാക്കള്‍ അവനെ പിന്തിരിപ്പിക്കാന്‍ ശ്രമിച്ചു.

പക്ഷേ, അവരുടെ വാക്കുകള്‍ സാംസണെ പിന്തിരിപ്പിച്ചില്ല. ആ പെണ്‍കുട്ടിയുടെ ലാവണ്യം അത്രമേല്‍ അവന്‍റെ ഹൃദയം കീഴടക്കിയിരുന്നു.

മാതാപിതാക്കള്‍ പലവിധത്തില്‍ പിന്തിരിപ്പിക്കാന്‍ ശ്രമിച്ചെങ്കിലും സാംസണ്‍ തന്റെ തീരുമാനത്തില്‍ ഉറച്ചുനിന്നു. 

ഒടുവില്‍, തന്‍റെ ഹൃദയം കീഴടക്കിയ തിമ്നക്കാരിയായ പെണ്‍കുട്ടിയെ ജീവിതസഖിയാക്കാന്‍ സാംസണ്‍ന്‍റെ മാതാപിതാക്കള്‍ അവനെ അനുവദിച്ചു. തിമ്നായിലെത്തി, തങ്ങളുടെ പുത്രനുവേണ്ടി, അവന്‍റെ പ്രണയിനിയുടെ മാതാപിതാക്കളോടു വിവാഹകാര്യം സംസാരിക്കാനും അവര്‍ തീരുമാനിച്ചു.

മാതാപിതാക്കള്‍ക്കൊപ്പം അവന്‍ വീണ്ടും തിമ്നായിലേക്കു പുറപ്പെട്ടു. താന്‍ സിംഹത്തോട് എതിരിട്ടുജയിച്ച സ്ഥലത്തെത്തിയപ്പോള്‍ സാംസണ്‍ മാതാപിതാക്കളെ വയല്‍വരമ്പില്‍ നിറുത്തിയിട്ടു സിംഹത്തിന്‍റെ ഉടല്‍വലിച്ചെറിഞ്ഞ പാറക്കെട്ടുകള്‍ക്കരികിലേക്കു പോയി. മാംസംമുഴുവന്‍ അഴുകിത്തീര്‍ന്ന, സിംഹത്തിന്‍റെ ഉണങ്ങിയ അസ്ഥികൂടം അപ്പോഴും അവിടെക്കിടന്നിരുന്നു. ആ അസ്ഥികൂടത്തില്‍ ഒരു വലിയ തേനീച്ചക്കൂടുണ്ടായിരുന്നു. അവന്‍ ശ്രദ്ധാപൂര്‍വ്വം അതടര്‍ത്തിയെടുത്തു. പിന്നെ മാതാപിതാക്കള്‍ക്കരികിലെത്തി, അതില്‍നിന്നു തേന്‍പിഴിഞ്ഞ് അവര്‍ക്കു നല്കി. അവനും ഭക്ഷിച്ചു. എന്നാല്‍, താന്‍ സിംഹവുമായി പോരാടി അതിനെ കൊന്നുവെന്നതോ ആ സിംഹത്തിന്‍റെ അസ്ഥകൂടത്തില്‍നിന്നാണു തേനെടുത്തതെന്നോ മാതാപിതാക്കളോടു പറഞ്ഞില്ല.

സാംസണ്‍ മാതാപിതാക്കള്‍ക്കൊപ്പം യുവതിയുടെ വീട്ടിലെത്തി. ഇരുകുടുംബങ്ങളിലെയും മാതാപിതാക്കളുടെ അനുഗ്രഹാശിസ്സുകളോടെ സാംസണ്‍ന്‍റെ പ്രണയസാഫല്യത്തിനു വഴിയൊരുങ്ങി.

വധുവിന്‍റെ പിതാവിന്‍റെ ക്ഷണപ്രകാരം, തിമ്നാക്കാരായ മുപ്പതുചെറുപ്പക്കാര്‍ മണവാളനു തോഴന്മാരായി. തിമ്നായിലെ പതിവനുസരിച്ച്, വിവാഹശേഷം സാംസണ്‍ അവിടെയൊരു വിരുന്നുനടത്തി.

വിരുന്നിനിടെ സാംസണ്‍ മണവാളത്തോഴന്മാരോടു പറഞ്ഞു: “ഞാന്‍ നിങ്ങളോടൊരു കടംകഥ പറയാം. ഏഴു ദിവസത്തിനകം ഉത്തരംപറഞ്ഞാല്‍ ഓരോരുത്തര്‍ക്കും ഓരോ ചണവസ്ത്രവും വിശേഷവസ്ത്രവും ഞാന്‍ തരാം. ഉത്തരംപറയാന്‍ സാധിച്ചില്ലെങ്കില്‍ നിങ്ങളോരോരുത്തരും ഒന്നുവീതം, മുപ്പതു ചണവസ്ത്രങ്ങളും അത്രയുംതന്നെ വിശേഷവസ്ത്രങ്ങളും എനിക്കുതരണം.”

“എന്താണു നിന്‍റെ കടംകഥ? കേള്‍ക്കട്ടെ...” മണവാളത്തോഴന്മാര്‍ സാംസണ്‍ന്‍റെ നിബന്ധന സമ്മതിച്ചുകൊണ്ടു ചോദിച്ചു..

താന്‍ കൊലപ്പെടുത്തിയ സിംഹത്തിന്‍റെ അസ്ഥികൂടത്തില്‍നിന്നു തേന്‍ ലഭിച്ചതോര്‍മ്മിച്ചുകൊണ്ടു സാംസണ്‍ ചോദിച്ചു. "ഭോക്താവില്‍നിന്നു ഭോജനവും മല്ലനില്‍നിന്നു മാധുര്യവും പുറപ്പെട്ടു. എന്താണിതെന്നു നിങ്ങളിലാരു പറയും? ആരുത്തരംപറഞ്ഞാലും സമ്മാനം എല്ലാവര്‍ക്കുമുള്ളതാണ്.”

മൂന്നുദിവസം ആലോചിച്ചിട്ടും അവര്‍ക്കാര്‍ക്കും സാംസണ്‍ പറഞ്ഞതിന്‍റെ പൊരുളെന്തെന്നു മനസ്സിലായില്ല. നാലാംദിവസം പുലര്‍ച്ചെ, അവര്‍ സാംസണ്‍ന്‍റെ ഭാര്യയെ സമീപിച്ചു പറഞ്ഞു.

“ഒരു പരദേശിയുടെമുമ്പില്‍ ഞങ്ങളെ അപമാനിതരാക്കാനും ദരിദ്രരാക്കാനുമാണോ നിന്‍റെ പിതാവു ഞങ്ങളെ ക്ഷണിച്ചുവരുത്തി, അവന്‍റെ മണവാളത്തോഴന്മാരാക്കിയത്? നിന്‍റെ ഭര്‍ത്താവില്‍നിന്നു കടംകഥയുടെ പൊരുളറിഞ്ഞു ഞങ്ങളോടു പറഞ്ഞില്ലെങ്കില്‍, ഞങ്ങള്‍ നിന്നെ കുടുംബത്തോടെ ചുട്ടെരിക്കും.”

സാംസണ്‍ന്‍റെ ഭാര്യ ഭയന്നുപോയി. എന്നാല്‍ സംഭവിച്ചതെന്തെന്ന് അവള്‍ അവനോടു പറഞ്ഞില്ല. പകരം കടംകഥയുടെ പൊരുളെന്തെന്നു പറയാന്‍ സാംസണെ നിര്‍ബ്ബന്ധിച്ചു.

അവന്‍റെ മുമ്പില്‍കരഞ്ഞുകൊണ്ട് അവള്‍ പറഞ്ഞു: “നിനക്കെന്നോടു സ്‌നേഹമില്ല. നിന്‍റെ മണവാളത്തോഴന്മാരോടു നീ ഒരു കടംകഥ പറഞ്ഞു. എന്നാല്‍, അതിന്‍റെ പൊരുളെന്തെന്നു നീ എന്നോടു എന്നോടിതുവരെ പറഞ്ഞില്ലല്ലോ...”

“എന്‍റെ മാതാപിതാക്കളോടുപോലും ഞാനതു പറഞ്ഞിട്ടില്ല. നിന്നോടും ഞാനതു പറയുന്നില്ല.”

എന്നാല്‍ അവന്‍റെ ഭാര്യ പിന്മാറാന്‍ തയ്യാറല്ലായിരുന്നു. സാംസണ്‍ അടുത്തെത്തുമ്പോഴെല്ലാം അവള്‍ കണ്ണീരൊഴുക്കി. കടംകഥയുടെ അര്‍ത്ഥമെന്തെന്നുപറയാന്‍ അവനെ നിര്‍ബ്ബന്ധിച്ചുകൊണ്ടിരുന്നു. ഏഴാംദിവസം പുലരുംമുമ്പേ അവളതില്‍ വിജയിക്കുകയുംചെയ്തു.
അന്നു സൂര്യനസ്തമിക്കുന്നതിനുമുമ്പ്, മണവാളത്തോഴന്മാര്‍ കടംകഥയുടെ പൊരുളെന്തെന്നു സാംസണോടു പറഞ്ഞു.

എവിടെനിന്നാണ് അവര്‍ക്കീ ഉത്തരം ലഭിച്ചതെന്നു സാംസണു മനസ്സിലായി. അവന്‍ കോപിഷ്ഠനായി. അഷ്‌കലോണ്‍ എന്ന പട്ടണത്തില്‍ച്ചെന്നു മുപ്പതുപേരെക്കൊന്നു കൊള്ളയടിച്ച്, കടംകഥയുടെ സാരംപറഞ്ഞവര്‍ക്കു വാഗ്ദാനംചെയ്ത സമ്മാനങ്ങള്‍ നല്കി. കോപാക്രാന്തനായ അവന്‍, ഭാര്യയോടു കയര്‍ത്തുസംസാരിച്ചശേഷം തന്‍റെ പിതൃഭവനത്തിലേക്കു പോയി.

സാംസണ്‍ എന്തുകൊണ്ടിങ്ങനെചെയ്തുവെന്ന് അയാളുടെ ഭാര്യാപിതാവറിഞ്ഞിരുന്നില്ല. പുത്രിയോടു വഴക്കടിച്ചും അവളെ കൂടെക്കൂട്ടാതെയും തന്‍റെ നാട്ടിലേക്കു മടങ്ങിയ സാംസണ്‍, മാസങ്ങള്‍കഴിഞ്ഞിട്ടും തിരികെ വരാതായപ്പോള്‍ അവന്‍ തന്‍റെ മകളെ ഉപേക്ഷിച്ചുപോയതാകാമെന്ന് അയാള്‍ കരുതി. സാംസണു മണവാളത്തോഴരായി നല്കിയ യുവാക്കളിലൊരുവനുമായി പുത്രിയുടെ പുനര്‍വിവാഹവുംനടത്തി.

വീണ്ടും ചില മാസങ്ങള്‍ കടന്നുപോയി. സാംസണ്‍ന്‍റെ കോപം പൂര്‍ണ്ണമായി അടങ്ങി. പ്രിയതമയെയെക്കുറിച്ചുള്ള ചിന്തകളാല്‍ സാംസണ്‍ന്‍റെ ഹൃദയം വീണ്ടും തരളിതമായി. ഭാര്യയ്ക്കായി നല്ലൊരു സമ്മാനവും കരുതിവച്ച് സാംസണ്‍ വീണ്ടും തിമ്നായിലെത്തി...

------------------------------------------------------------------------------
*കര്‍ത്താവു മോശയോടരുളിച്ചെയ്തു: ഇസ്രായേല്‍ജനത്തോടു പറയുക, കര്‍ത്താവിനു സ്വയംസമര്‍പ്പിക്കുന്നതിനു നാസീര്‍വ്രതമെടുക്കുന്നയാള്‍ സ്ത്രീയായാലും പുരുഷനായാലും, ഇപ്രകാരം ചെയ്യണം: വീഞ്ഞും ശക്തിയുള്ള ലഹരിപാനീയങ്ങളും വര്‍ജ്ജിക്കണം. അവയില്‍നിന്നുണ്ടാക്കിയ വിനാഗിരി കുടിക്കരുത്; മുന്തിരിയില്‍നിന്നുണ്ടാക്കിയ ഏതെങ്കിലും പാനീയം കുടിക്കുകയോ പഴുത്തതോ ഉണങ്ങിയതോആയ മുന്തിരിങ്ങ തിന്നുകയോ അരുത്. വ്രതകാലംമുഴുവന്‍ മുന്തിരിയില്‍നിന്നുള്ള ഒന്നും - കുരുവോ തൊലിപോലുമോ – തിന്നരുത്. ക്ഷൗരക്കത്തി വ്രതകാലത്ത് അവന്റെ തലയില്‍ സ്പര്‍ശിക്കരുത്. കര്‍ത്താവിന്റെമുമ്പില്‍ വ്രതമനുഷ്ഠിക്കുന്നകാലമത്രയും വിശുദ്ധി പാലിക്കണം; മുടി വളര്‍ത്തണം. വ്രതകാലം തീരുവോളം ശവശരീരത്തെ സമീപിക്കരുത്. പിതാവോ മാതാവോ സഹോദരനോ സഹോദരിയോ മരിച്ചാല്‍പ്പോലും അവരെ സ്പര്‍ശിച്ച് അവന്‍ സ്വയമശുദ്ധനാകരുത്. എന്തെന്നാല്‍, ദൈവത്തിന്റെ മുമ്പിലെടുത്ത വ്രതത്തിന്റെ ചിഹ്നം അവന്റെ ശിരസ്സിലുണ്ട്. വ്രതകാലംമുഴുവന്‍ അവന്‍ കര്‍ത്താവിനു വിശുദ്ധനാണ്. – സംഖ്യാ പുസ്തകം അദ്ധ്യായം 6, ഒന്നുമുതല്‍ എട്ടുവരെയുള്ള വാക്യങ്ങള്‍

Sunday, 17 June 2018

സാംസൺ

ജഫ്തയ്ക്കുശേഷം ഇബ്സാന്‍, ഏലോന്‍, അബ്ദോന്‍ എന്നിവരേയും ഇസ്രായേലിന്റെ ന്യായപാലകരായി കര്‍ത്താവുയര്‍ത്തി. എങ്കിലും നന്മകള്‍ക്കായി ദൈവത്തെ വിളിക്കുകയും സമൃദ്ധിയില്‍ അവിടുത്തെ മറക്കുകയുംചെയ്തിരുന്ന തങ്ങളുടെ പൂര്‍വ്വികരുടെ വഴിയിലൂടെതന്നെ ഇസ്രായേലിന്റെ പിന്‍തലമുറകളും സഞ്ചരിച്ചു.

അബ്ദോന്റെ മരണശേഷം കര്‍ത്താവിനെ മറന്നുജീവിച്ച ഇസ്രയേല്‍ജനതയെ അവിടുന്നു ഫിലിസ്ത്യര്‍ക്ക് ഏല്പിച്ചുകൊടുത്തു. ഫിലിസ്ത്യന്‍ നുകത്തിനുകീഴില്‍ ഇസ്രയേല്‍ വലഞ്ഞിരുന്ന നാളുകളില്‍ ഇസ്രയേലുകാര്‍ വീണ്ടും കര്‍ത്താവിനെവിളിച്ചു പ്രാര്‍ത്ഥിച്ചുതുടങ്ങി.

സോറാ എന്ന ഗ്രാമത്തില്‍ ജീവിച്ചിരുന്ന ദാന്‍ ഗോത്രജനായ മനോവയും ഭാര്യയും കര്‍ത്താവിനെമാത്രം ആരാധിച്ചു ജീവിച്ചവരായിരുന്നു. മനോവയുടെ ഭാര്യ വന്ധ്യയായിരുന്നതിനാല്‍ അവര്‍ക്കു മക്കളുണ്ടായിരുന്നില്ല.

അനപത്യതാ ദുഃഖവും അയല്‍ക്കാരുടെയും ബന്ധുക്കളുടെയും *പരിഹാസവും ഏറെ മനോവിഷമങ്ങളുണ്ടാക്കിയിരുന്നെങ്കിലും പരസ്പരസ്നേഹത്തിലും ദൈവവിശ്വാസത്തിലും മനോവയും ഭാര്യയും മറ്റാരെയുംകാള്‍ മുമ്പിലായിരുന്നു.

അങ്ങനെയിരിക്കേ, ഒരുദിവസം, വീടിനുമുന്നില്‍, വിറകുണക്കിക്കൊണ്ടിരിക്കുപ്പോള്‍, ഒരു മനുഷ്യന്‍ തന്റെനേരേ നടന്നുവരുന്നതു മനോവയുടെ ഭാര്യ കണ്ടു. സാധാരണമനുഷ്യര്‍ക്കില്ലാത്ത ഒരഭൌമതേജസ് ആ മനുഷ്യന്റെ മുഖത്തു ദൃശ്യമായിരുന്നു.

അവന്‍ അവളുടെ മുമ്പിലെത്തി, അവളോടുപറഞ്ഞു: "നിന്നെ വന്ധ്യയെന്നു പരിഹസിക്കുന്നവര്‍ക്കുമുമ്പില്‍ കര്‍ത്താവു നിന്നെ അനുഗൃഹീതയാക്കും.
നീ ഗര്‍ഭംധരിച്ച് ഒരു പുത്രനെ പ്രസവിക്കും. അതുകൊണ്ട്, നീ സൂക്ഷിക്കണം. വീഞ്ഞോ വീര്യമുള്ള പാനീയങ്ങളോ കുടിക്കരുത്. അശുദ്ധമായതൊന്നും ഭക്ഷിക്കയുമരുത്. നിന്റെ പുത്രന്റെ തലയില്‍ ക്ഷൗരക്കത്തി തൊടരുത്. അവന്‍ ആജീവനാന്തം ദൈവത്തിനു **നാസീര്‍ വ്രതക്കാരനായിരിക്കണം. അവന്‍ ഫിലിസ്ത്യരുടെ കൈയില്‍നിന്ന് ഇസ്രായേലിനു മോചനംനല്കും."

അവള്‍ പെട്ടെന്നു പിന്തിരിഞ്ഞ്, വീട്ടിനുള്ളിലായിരുന്ന ഭര്‍ത്താവിനടുത്തേക്കോടി. അവള്‍ ഭര്‍ത്താവിനോടു പറഞ്ഞു: "ഒരു ദൈവപുരുഷന്‍ എന്റെയടുത്തുവന്നു. അവന്റെ മുഖം ദൈവദൂതന്റേതുപോലെയാണു്."

അവന്‍ തന്നോടുപറഞ്ഞെതെല്ലാം അവള്‍ മനോവയോടു പറഞ്ഞു.

"അവന്‍ ആരാണ്? എവിടെനിന്നു വരുന്നു?" മനോവ ചോദിച്ചു.

"ഞാന്‍ ആകെ ഭയന്നുപോയിരുന്നു. എവിടെനിന്നു വരുന്നുവെന്ന് അവനോടു ഞാന്‍ ചോദിച്ചില്ല; അവന്‍ പേരു പറഞ്ഞതുമില്ല."

മനോവ ഭാര്യയോടൊപ്പം വീടിനു പുറത്തേക്കു വന്നു. എന്നാല്‍ അവിടെ ആരെയും കണ്ടില്ല. ചുറ്റുവട്ടത്തെല്ലാം തെരഞ്ഞുവെങ്കിലും ആ മനുഷ്യന്‍ എങ്ങോട്ടുപോയെന്നു കണ്ടെത്താനായില്ല.

തന്റെ ഭാര്യ പറഞ്ഞതുപോലെ ഒരുപക്ഷേ, അതൊരു ദൈവപുരുഷനാകാമെന്നു മനോവയ്ക്കു തോന്നി. അവന്‍ കര്‍ത്താവിനോടു പ്രാര്‍ത്ഥിച്ചു. "കര്‍ത്താവേ, അങ്ങയച്ച ദൈവപുരുഷന്‍, വീണ്ടും ഞങ്ങളുടെയടുക്കല്‍വന്ന്, ജനിക്കാനിരിക്കുന്ന ശിശുവിനുവേണ്ടി ഞങ്ങളെന്താണു ചെയ്യേണ്ടതെന്നറിയിക്കാനിടയാക്കണമേ! "

കുറച്ചുദിവസങ്ങള്‍ക്കുശേഷം വയലിലായിരിക്കുമ്പോള്‍ ദൈവദൂതന്‍ വീണ്ടും ആ സ്ത്രീയുടെ അടുത്തുവന്നു. ഭര്‍ത്താവായ മനോവ അപ്പോഴും അവളോടുകൂടെയുണ്ടായിരുന്നില്ല.

അവള്‍ പറഞ്ഞു. "ദൈവപുരുഷാ, അല്പനേരം അങ്ങെനിക്കായി ഇവിടെ നില്‍ക്കണേ, ഞാനോടിപ്പോയി എന്റെ ഭര്‍ത്താവിനെ വിളിച്ചുകൊണ്ടുവരാം."

അവള്‍ ഓടിച്ചെന്ന്, ഗോതമ്പുവയലിന്റെ മറ്റൊരു‍ഭാഗത്തായിരുന്ന ഭര്‍ത്താവിനോടു പറഞ്ഞു: "കഴിഞ്ഞദിവസം എന്റെയടുത്തുവന്നയാള്‍ വീണ്ടും വന്നിരിക്കുന്നു."

മനോവ ഭാര്യയോടൊപ്പംചെന്ന് അവനോടു ചോദിച്ചു: "ഞങ്ങള്‍ക്കൊരു പുത്രനുണ്ടാകുമെന്ന് ഇവളോടു പറഞ്ഞതു താങ്കളാണോ?

"അതേ, അതു ഞാന്‍തന്നെ"

"നിന്റെ വാക്കുകള്‍ ഞാന്‍ വിശ്വസിക്കുന്നു. ഞങ്ങളുടെ മാനക്കേടു കര്‍ത്താവു നീക്കിക്കളയട്ടെ! നിന്റെ വാക്കുകള്‍ നിറവേറുമ്പോള്‍, ബാലന്റെ ജീവിതചര്യ എങ്ങനെയായിരിക്കണം? അവന്‍ എന്താണു ചെയ്യേണ്ടത്? "

"ഞാന്‍ നിന്റെ ഭാര്യയോടു പറഞ്ഞതെല്ലാം അവള്‍ പാലിക്കട്ടെ. മുന്തിരിയില്‍നിന്നുള്ളതൊന്നും അവള്‍ ഭക്ഷിക്കരുത്. വീഞ്ഞോ ലഹരിവസ്തുക്കളോ ഉപയോഗിക്കരുത്. അശുദ്ധമായതൊന്നും തിന്നുകയുമരുത്. നിങ്ങള്‍ക്കുണ്ടാകുന്ന പുത്രന്‍ ആജീവനാന്തം നാസീര്‍ വ്രതക്കാരനായിരിക്കണം. "

മനോവ ആ മനുഷ്യനെ താണുവണങ്ങി. "ഞങ്ങള്‍ നിനക്കായി ഭക്ഷണമൊരുക്കാം. ഒരാട്ടിന്‍കുട്ടിയെ പാകംചെയ്യുന്നതുവരെ അങ്ങു കാത്തുനില്‍ക്കണമേ!"

"നിനക്കുവേണ്ടി ഞാന്‍ കാത്തുനില്ക്കാം, എന്നാല്‍ നിന്റെ ഭക്ഷണം ഞാന്‍ കഴിക്കുകയില്ല. ആട്ടിന്‍കുട്ടിയെ നീ പാകംചെയ്യുന്നെങ്കില്‍ അതു കര്‍ത്താവിനു ദഹനബലിയായര്‍പ്പിക്കുക"

"അങ്ങു കല്പിക്കുന്നതുപോലെ ഞാന്‍ ചെയ്യാം. താങ്കളുടെ പേരെന്താണെന്ന് എന്നോടു പറയാമോ?"

"എന്റെ പേര് ഒരദ്ഭുതമാണ്. അതു നീ അറിയേണ്ടതില്ല."

മനോവ പിന്നീടൊന്നും ചോദിച്ചില്ല.
അവന്‍ ഒരാട്ടിന്‍കുട്ടിയെ കൊന്നു. ധാന്യബലിയോടൊപ്പം ഒരു ദഹനബലിയായി അവനതിനെ കര്‍ത്താവിനര്‍പ്പിച്ചു. ബലിപീഠത്തില്‍നിന്ന് അഗ്‌നിജ്വാല ആകാശത്തിലേക്കുയര്‍ന്നു. മനോവയും ഭാര്യയും നോക്കിനില്‍ക്കേ അവരോടു സംസാരിച്ച മനുഷ്യന്‍ ബലിപീഠത്തിലെ അഗ്നിജ്വാലയിലൂടെ ഉയര്‍ന്നുപോയി. അതു കര്‍ത്താവിന്റെ ദൂതനായിരുന്നെന്നു മനോവയ്ക്കു മനസ്സിലായി. അവന്‍ ഭാര്യയോടൊപ്പം നിലത്തു കമിഴ്ന്നുവീണു സാഷ്ടാംഗം നമസ്ക്കരിച്ചു.

അധികംനാളുകള്‍ കഴിയുംമുമ്പേ, അവളുടെ ഉദരത്തിലെ ജീവന്റെ തുടിപ്പുകള്‍ അവര്‍ തിരിച്ചറിഞ്ഞു. കാലത്തികവില്‍ അവര്‍ക്കൊരു പുത്രന്‍ ജനിച്ചു. അവര്‍ അവനു സാംസണ്‍ എന്നു പേരിട്ടു.

അവന്റെ അമ്മയോടു കല്പിച്ചിരുന്നതുപോലെ ജീവിതാരംഭംമുതല്‍തന്നെ അവന്‍ നാസീര്‍വ്രതത്തില്‍ പരിശീലിപ്പിക്കപ്പെട്ടു. കര്‍ത്താവിന്റെ ആത്മാവ് അവന്റെമേലുണ്ടായിരുന്നു.

-------------------------------------------------------------------------------------------
* അനപത്യത ദൈവശാപമാണെന്ന വിശ്വാസം ഇസ്രായേലിലുണ്ട്.
**ഒരു വ്യക്തി, തന്നെത്തന്നെ കര്‍ത്താവിനു സമര്‍പ്പിക്കുന്നതിനായി എടുക്കുന്ന വ്രതം

Sunday, 10 June 2018

ജഫ്താ

ഇസ്രായേൽ വീണ്ടും കർത്താവിനെ പരിത്യജിച്ചു്, അന്യദേവന്മാർക്കു പൂജാഗിരികളൊരുക്കി. ബാൽദേവനും അസ്താർത്തെദേവതകൾക്കുംമുമ്പിൽ ബലിവസ്തുക്കളർപ്പിച്ചു. കർത്താവിന്റെ കോപം ഇസ്രായേലിനെതിരേ ജ്വലിച്ചു. അവിടുന്നവരെ അന്യജനതകൾക്കു വിട്ടുകൊടുത്തു. ഫിലിസ്ത്യരും അമോന്യരും ഇസ്രായേലിനുമേൽ ആധിപത്യം നേടി. അവർ ഇടയ്ക്കിടെ ഇസ്രായേലിനെ ആക്രമിക്കുകയും കൊള്ളയടിക്കുകയുംചെയ്തു.  പതിനെട്ടു വർഷം അന്യജനതകൾ ഇസ്രായേലിനെ ഞെരുക്കി. വയലൊരുക്കി വിത്തുവിതയ്ക്കാൻ ഇസ്രായേൽക്കാർ. വിളകൊയ്യാൻ അന്യജനത....

വിളസമൃദ്ധികണ്ട് ആനന്ദിക്കാനല്ലാതെ അതിന്റെ ഫലമനുഭവിക്കാൻ ഇസ്രായേലുകാർക്കായില്ല. കൊയ്ത്തുകാലമാകുമ്പോൾ ഫിലിസ്ത്യരും അമോന്യരും ഇസ്രായേലിലെ വയലുകളെല്ലാം കൊയ്തെടുത്തുകൊണ്ടുപോയി. എതിർക്കാൻ ശ്രമിച്ചവർ വധിക്കപ്പെട്ടു. കട്ടയുടച്ച്, നിലമുഴുതൊരുക്കി, വിത്തുവിതച്ച്, വിതകാത്തുകിടന്നവർ കാലാപെറുക്കി ഉപജീവനം കഴിക്കേണ്ട ഗതികേടിലായി.

ഇസ്രായേൽ കർത്താവിനുമുമ്പിലേക്കു വീണ്ടും തിരിഞ്ഞു. "ഈജിപ്തിൽനിന്നു ഞങ്ങളുടെ പിതാക്കന്മാരെ മോചിപ്പിച്ചുകൊണ്ടുവന്ന ഞങ്ങളുടെ ദൈവത്തെമറന്നു ബാലിനെ സേവിച്ചതിനാൽ, കർത്താവേ അങ്ങേയ്ക്കെതിരായി ഞങ്ങൾ പാപംചെയ്തു. ഞങ്ങളോടു കരുണതോന്നി, ഞങ്ങളുടെ ശത്രുക്കളിൽനിന്നു ഞങ്ങളെ രക്ഷിക്കണമേ!"

എന്നാൽ കർത്താവു് അവരുടെ പ്രാർത്ഥന കേട്ടില്ല. അവിടുന്നു പറഞ്ഞു. "നിങ്ങൾ തിരഞ്ഞെടുത്ത ദേവന്മാരുടെ മുമ്പിൽപ്പോയി കരയുക. അവർ നിങ്ങളെ മോചിപ്പിക്കട്ടെ."

"കർത്താവേ, ഞങ്ങൾ പാപംചെയ്തുപോയി. അങ്ങേയ്ക്കിഷ്ടമുള്ളതു ഞങ്ങളോടു ചെയ്തുകൊള്ളുക."

ഇസ്രായേൽജനം ബാലിന്റേയും അഷേറയുടേയും അസ്താർത്താദേവതകളുടേയും വിഗ്രഹങ്ങളെല്ലാം നീക്കംചെയ്തു. വീണ്ടും കർത്താവിനെമാത്രം ആരാധിച്ചു തുടങ്ങി.അപ്പോൾ, ഗിലയാദിന്റെ പുത്രനും ഒരു കൊള്ളസംഘത്തിന്റെ തലവനും വലിയ പോരാളിയുമായിരുന്ന ജഫ്തയുടെ ഹൃദയത്തിൽ കർത്താവു ചില പരിവർത്തനങ്ങൾ വരുത്തി.

ഗിലയാദിനു് ഒരു വേശ്യയിൽ ജനിച്ച പുത്രനായിരുന്നു ജഫ്ത. ഗിലയാദ് അവനെ തന്റെ ഭവനത്തിലേക്കു കൊണ്ടുവന്നു. തന്റെ ഭാര്യയിൽ ജനിച്ച പുത്രന്മാർക്കൊപ്പം അവനെയും വളർത്തി. എന്നാൽ ഗിലയാദിന്റെ ഭാര്യയും അവളുടെ മക്കളും ജഫ്തയെ വെറുത്തു.
ഗിലയാദ് മരിച്ചപ്പോൾ ജഫ്ത ഒറ്റപ്പെട്ടു. കുടുംബത്തിൽനിന്നും അവൻ പുറംതള്ളപ്പെട്ടു. തന്റെ സഹോദരന്മാരിൽനിന്നു രക്ഷപ്പെടാനായി, തോബ് എന്ന സ്ഥലത്തേക്കു് അവൻ ഓടിപ്പോയി. 

മികച്ച കായികാഭ്യാസിയായിരുന്ന ജഫ്ത വഴിപോക്കരെ കൊള്ളയടിച്ചു് ജീവസന്ധാരണത്തിനുള്ള എളുപ്പവഴിതേടി. കാലക്രമത്തിൽ കുറേ ചെറുപ്പക്കാർ അവനോടൊപ്പം ചേർന്നു. നീചത്തം കൈമുതലാക്കിയ ഒരു കൊള്ളസംഘമായി അവർ വളർന്നു.

വസന്തവൃഷ്ടിക്കുശേഷം കൊയ്ത്തിനുസമയമായപ്പോൾ അമ്മോന്യർ യുദ്ധത്തിനു തയ്യാറായി വന്നു. കർത്താവിന്റെ ആത്മാവു് ജഫ്തയിൽനിറഞ്ഞു. ജഫ്തയ്ക്കു തന്റെ ജീവിതരീതി മടുത്തുതുടങ്ങി. തന്റെ വീഴ്ചകളേറ്റുപറഞ്ഞ് അവൻ കർത്താവിലേക്കു മനസ്സുതിരിച്ചു.

അമ്മോന്യർ യുദ്ധത്തിനുവരുന്നതറിഞ്ഞ ഇസ്രായേൽക്കാർ കർത്താവിന്റെ സന്നിധിയിൽ ഒന്നിച്ചുചേർന്നു പ്രാർത്ഥിച്ചു.

"ഗിലയാദിന്റെ പുത്രനായ ജഫ്തയെ ചെന്നു കാണുക. എന്റെ ആത്മാവിനാൽ ഞാനവനെ ശക്തിപ്പെടുത്തും. അവൻ നിങ്ങളെ സംരക്ഷിക്കും."

കർത്താവിന്റെ കല്പനയനുസരിച്ചു ജഫ്തയെ കൂട്ടിക്കൊണ്ടുവരാനായി ഇസ്രായേലുകാർ തോബിലേക്കു പോയി. ജഫ്തയുടെ സഹോദരന്മാരും അവർക്കൊപ്പമുണ്ടായിരുന്നു.

"അമ്മോന്യരുമായുള്ള യുദ്ധത്തിൽ നീ ഞങ്ങളെ നയിക്കണം."  ഇസ്രായേലുകാർ ജഫ്തയോടാവശ്യപ്പെട്ടു.

"ഞാൻ വേശ്യാപുത്രനല്ലേ? നിങ്ങളെന്നെ വെറുക്കുകയും എന്റെ പിതാവിന്റെ ഭവനത്തിൽനിന്ന് അടിച്ചിറക്കുകയും ചെയ്തില്ലേ? എന്റെ കഷ്ടതകളിൽ ആരെന്നെ സഹായിച്ചു? ഇപ്പോൾ നിങ്ങൾ അപകടത്തിൽപ്പെട്ടപ്പോൾ എന്നെത്തേടി വന്നതെന്തിനു്?"

"ഞങ്ങളുടെ തെറ്റുകൾ നീ ഞങ്ങളോടു പൊറുക്കണം. ശത്രുക്കൾക്കെതിരായ പോരാട്ടത്തിൽ, നീ മുമ്പിൽനിന്ന് ഇസ്രായേലിനെ നയിക്കണമെന്നാണു ഞങ്ങളാഗ്രഹിക്കുന്നതു്. നിന്നോടു ഞങ്ങൾചെയ്ത തെറ്റുകൾക്കു പരിഹാരമായി നിന്നെ ഞങ്ങളുടെ നേതാവായി ഞങ്ങളംഗീകരിക്കുന്നു.. കർത്താവു നിന്നെ ശക്തിപ്പെടുത്തും. നീ അമ്മോന്യരെ പരാജയപ്പെടുത്തി ഇസ്രായേലിനെ രക്ഷിക്കും."

തന്റെ പാപകരമായ ജീവിതശൈലിയിൽനിന്നു പിന്തിരിയാനാഗ്രഹിച്ചിരുന്ന ജഫ്തയ്ക്കു നിനയ്ക്കാതെ കൈവന്ന ഒരവസരമായിരുന്നു അത്. 

ജഫ്‌താ ചോദിച്ചു: "കര്‍ത്താവ്‌ അമ്മോന്യരെ എനിക്കേല്പിച്ചുതന്നാല്‍, ഞാന്‍ നിങ്ങളുടെ നേതാവാകുമെന്നതുറപ്പല്ലേ?"

"കര്‍ത്താവു നമുക്കു സാക്ഷിയായിരിക്കട്ടെ; നീ അമ്മോന്യരെ നീ പറയുന്നതുപോലെ ഞങ്ങള്‍ ചെയ്യും, തീര്‍ച്ച."ഇസ്രായേൽക്കാർ ജഫ്തായോടു് ഉടമ്പടി ചെയ്തു.

ജഫ്‌താ,  അമ്മോന്യരാജാവിന്റെയടുത്തേക്കു തന്റെ സന്ദേശവുമായി ദൂതന്മാരെ അയച്ചു ചോദിച്ചു: "എന്റെ ദേശത്തോടു യുദ്‌ധംചെയ്യാന്‍ നിനക്കെന്നോടെന്താണു വിരോധം?"

അമ്മോന്യരാജാവു ദൂതന്മാർക്കു മറുപടി നല്കി: "ഇസ്രായേല്‍ജനം ഈജിപ്തില്‍നിന്നു വന്നപ്പോള്‍ അര്‍നോണ്‍മുതല്‍ ജാബോക്കും ജോര്‍ദ്ദാനുംവരെയുള്ള എന്റെ സ്‌ഥലം കൈവശപ്പെടുത്തി. അതിപ്പോൾ എനിക്കു തിരികെകിട്ടണം.  യുദ്ധമൊഴിവാക്കാൻ ദേശം എനിക്കു വിട്ടുനല്കുക."

ജഫ്ത വീണ്ടും ദൂതന്മാരെ അയച്ചു. "ഞാന്‍ നിന്നോട്‌ ഒരപരാധവും ചെയ്‌തിട്ടില്ല. ഇസ്രായേല്‍ജനം ഹെഷ്‌ബോണിലും അതിന്റെ ഗ്രാമങ്ങളിലും അരോവറിലും അതിന്റെ ഗ്രാമങ്ങളിലും അര്‍നോണ്‍ തീരത്തുള്ള എല്ലാ പട്ടണങ്ങളിലും മുന്നൂറു വര്‍ഷം താമസിച്ചകാലത്തു നീ എന്തുകൊണ്ടവ വീണ്ടെടുത്തില്ല? മോവാബ്യരുടെയോ അമ്മോന്യരുടെയോ ദേശം ഞാൻ കൈയടക്കിയില്ല. അതിനാൽ, എന്നോടു യുദ്ധംചെയ്യുന്നതു തെറ്റാണ്‌. അന്യായമായി നീ യുദ്ധത്തിനുവന്നാൽ, എന്റെ ദൈവമായ സൈന്യങ്ങളുടെ കര്‍ത്താവ്‌ ഇസ്രായേല്യര്‍ക്കും അമ്മോന്യര്‍ക്കുമിടയിൽ ഇന്നു ന്യായവിധിനടത്തും."

ജഫ്തയുടെ സന്ദേശത്തിന് അമ്മോന്യരാജാവു മറുപടി നല്കിയില്ല. പകരം, ഇസ്രായേലിനെതിരെ അവൻ തന്റെ സൈന്യത്തെയയച്ചു.

ജഫ്താ കർത്താവിനു ദഹനബലിയർപ്പിച്ചു പ്രാർത്ഥിച്ചു.  അവൻ കര്‍ത്താവിനൊരു നേര്‍ച്ചനേര്‍ന്നു. "കർത്താവേ, അങ്ങ്‌ അമ്മോന്യരെ എന്റെ കൈയില്‍ ഏല്പിക്കുമെങ്കില്‍ ഞാന്‍ അവരെ തോല്പിച്ചു  തിരികെവരുമ്പോള്‍ എന്നെ എതിരേല്‍ക്കാന്‍ പട്ടണവാതില്‍ക്കലേക്ക്‌ ആദ്യം വരുന്നതാരായിരുന്നാലും അവന്‍ കര്‍ത്താവിന്റെതായിരിക്കും. ഞാന്‍ അവനെ ദഹനബലിയായി അവിടുത്തേക്കര്‍പ്പിക്കും." 

കർത്താവു മനുഷ്യരിൽനിന്ന് ഒരു നേർച്ചയും നിർബ്ബന്ധപൂർവ്വം ആവശ്യപ്പെടുന്നില്ലെന്നോർക്കാതെ നേർച്ചനേർന്നതു വിവേകശൂന്യമായ പ്രവൃത്തിയാണെന്ന് അവനപ്പോൾ ചിന്തിച്ചില്ല.

കർത്താവിന്റെ ആത്മാവു ജഫ്തയിൽ നിറഞ്ഞു. ജഫ്‌താ അമ്മോന്യരുടെ അതിര്‍ത്തി കടന്നു; അമ്മോന്യസൈനികരെ കര്‍ത്താവ്‌ അവന്റെ കൈയിലേല്പിച്ചു.  അരോവര്‍മുതല്‍ മിന്നിത്തിനു സമീപംവരെയും ആബേല്‍കെരാമിംവരെയും ഒന്നിനുപിന്നാലെ ഒന്നായി ഇരുപതു പട്ടണങ്ങളില്‍ ജഫ്താ ആധിപത്യം സ്ഥാപിച്ചു. അമ്മോന്യസേന പൂർണ്ണമായുമില്ലാതെയായി.

വിജയശ്രീലാളിതനായ ജഫ്താ, തന്റെ നാടായ മിസ്പായിലലേക്കു മടങ്ങിയെത്തി. അവനെ സ്വീകരിക്കാൻ വലിയൊരു ജനക്കൂട്ടം പട്ടണവാതിൽക്കലുണ്ടായിരുന്നു. 

അവനെ അകലെക്കണ്ടപ്പോൾത്തന്നെ
ഒരു പെൺകുട്ടി, തപ്പുകൊട്ടി നൃത്തംവച്ചുകൊണ്ട് അവനെയെതിരേല്‍ക്കാന്‍ ആദ്യമോടിയെത്തി. അവള്‍ ജഫ്തായുടെ ഏകസന്താനമായിരുന്നു. വേറെമകനോ മകളോ അവനില്ലായിരുന്നു. തനിക്കുനേരെ ഓടിയെത്തുന്ന പുത്രിയെക്കണ്ടപ്പോൾ ജഫ്താ തളർന്നുപോയി. കർത്താവിനുനേർന്ന നേർച്ചയെക്കുറിച്ചോർത്ത് അവൻ കരഞ്ഞു. തന്റെ മേലങ്കി കീറി!
കർത്താവിന്റെ നിയമമറിയുന്ന ലേവ്യരോടു് ജഫ്താ തന്റെ നേർച്ചയെക്കുറിച്ചു പറഞ്ഞു.

ലേവ്യർ അവനോടു പറഞ്ഞു: "മോശയുടെ നിയമത്തിൽ ഇങ്ങനെ പറയുന്നു. -നേര്‍ച്ചനേരാതിരുന്നാല്‍ പാപമാകുകയില്ല. എന്നാൽ, നിന്റെ ദൈവമായ കര്‍ത്താവിനുനേരുന്ന നേര്‍ച്ചകള്‍ നിറവേറ്റാന്‍ വൈകരുത്‌; അവിടുന്നു നിശ്‌ചയമായും അതു നിന്നോടാവശ്യപ്പെടും; നീ കുറ്റക്കാരനാവുകയും ചെയ്യും."

ജഫ്താ ഉറക്കെക്കരഞ്ഞു. "അയ്യോ! മകളേ, നീയെന്നെ ദുഃഖത്തിലാഴ്‌ത്തിയല്ലോ. ഞാന്‍ കര്‍ത്താവിനു വാക്കു കൊടുത്തുപോയി. നേര്‍ച്ചയില്‍നിന്നു പിന്മാറാന്‍ എനിക്കു കഴിയില്ലല്ലോ!"

"ആബാ, ധീരനായ ജഫ്തയുടെ മകളാണു ഞാൻ. അങ്ങു കർത്താവിനോടുനേർന്ന നേർച്ച നിറവേറ്റാൻ മടിക്കേണ്ട. നമ്മുടെ ശത്രുക്കളായ അമ്മോന്യരോടു പ്രതികാരംചെയ്യാൻ അങ്ങയെ കർത്താവു സഹായിച്ചല്ലോ! ഒന്നുമാത്രം അങ്ങെനിക്കു ചെയ്‌തുതരണം. എന്റെ സഖിമാരോടൊത്തു പര്‍വ്വതത്തിന്റെ ശാന്തതയിൽ ധ്യാനിക്കുവാനും എന്റെ കന്യാത്വത്തെപ്രതി വിലപിക്കാനും എനിക്കു രണ്ടുമാസത്തെ സമയംതരണം!"

ജഫ്താ അവളുടെ ആവശ്യമംഗീകരിച്ചു. രണ്ടുമാസങ്ങൾക്കുശേഷം അവൻ തന്റെ നേർച്ച നിറവേറ്റി.

"എന്റെ കൈകളാൽ എന്റെ ഏകപുത്രിയെ ബലി നല്കേണ്ടിവന്നതു് എനിക്കുള്ള ശിക്ഷയായി ഞാൻ സ്വീകരിക്കുന്നു... കൊള്ളസംഘത്തെ നയിച്ചുകൊണ്ടു ഞാൻചെയ്ത പാപങ്ങൾക്കുള്ള ശിക്ഷയാണിത് ..." ജഫ്താ കരഞ്ഞു.

അന്നുമുതൽ എല്ലാവർഷവും നാലുദിവസം ഇസ്രായേലിലെ കന്യകകൾ ജഫ്തയുടെ മകളെയോർത്തു വിലാപദിനങ്ങളാചരിച്ചു തുടങ്ങി.

ജഫ്താ ആറുവർഷങ്ങൾമാത്രമാണ് ഇസ്രായേലിൽ ന്യായപാലനം നടത്തിയത്. പുത്രീദുഃഖത്താൽ അവൻ അകാലവാർദ്ധക്യംബാധിച്ചു മരിച്ചു. 

ജഫ്താ മരിക്കുന്നതുവരെ കർത്താവിനെയല്ലാതെ മറ്റൊരു ദൈവത്തേയും ഇസ്രായേൽ ആരാധിച്ചില്ല.

Sunday, 3 June 2018

ഏഹൂദും ഷംഗൂറും

ഒത്ത്നിയേലിന്റെ മരണത്തോടെ ഇസ്രായേൽ വീണ്ടും കർത്താവിനെ മറന്നുതുടങ്ങി. ബാൽദേവനേയും അഷേരാദേവിയേയും അവർ വീണ്ടും ആരാധിച്ചു. ബാലിന്റെയും അഷേരയുടേയും ഉത്സവദിനങ്ങൾ ഇസ്രായേലിൽ അത്യുത്സാഹത്തോടെ കൊണ്ടാടി. കർത്താവിന്റെ കോപം ഇസ്രായേലിനെതിരെ ജ്വലിച്ചു.

മൊവാബിലെ രാജാവായിരുന്ന എഗ് ലോനെ കർത്താവു ശക്തിപ്പെടുത്തി. അമോന്യരും അമലേക്യരും അവന്റെ സഖ്യകക്ഷികളായി. അഹലോൻ തന്റെ സഖ്യരാജ്യങ്ങളോടുചേർന്നു് ഇസ്രായേലിനെ ആക്രമിച്ചു.

പ്രതിരോധത്തിനു നേതൃത്വംനല്കാൻ ഇസ്രായേലിൽ ആരുമുണ്ടായിരുന്നില്ല. ഒറ്റപ്പെട്ട ചെറുത്തുനില്പുകൾക്ക് നാഴികകളുടെ ആയുസ്സുപോലുമുണ്ടായതുമില്ല. എഗലോന്റെ സൈനികർ ഇസ്രായേലിന്റെ മുക്കുംമൂലയുംവരെ തങ്ങളുടെ നിയന്ത്രണത്തിലായി.

കാലം മുമ്പോട്ടുള്ള പ്രയാണം തുടർന്നു. എഗലോൻ ഇസ്രായേലിനെ ഉരുക്കുമുഷ്ടികളാൽ ഞെരിച്ചു. ഇസ്രായേലിലെ ഗോതമ്പു വയലുകളും മുന്തിരിത്തോട്ടങ്ങളും ഈന്തപ്പനകളും സമൃദ്ധമായ വിളവുനല്കി. പച്ചനിറഞ്ഞ, ഇസ്രായേൽമലനിരകളിൽ മേഞ്ഞുനടന്ന ചെമ്മരിയാടുകളൂടെ രോമക്കുപ്പായങ്ങൾ ആവശ്യത്തിലേറെ കമ്പിളി നല്കി. എന്നാൽ ഇതെല്ലാം മൊവാബിനെയാണു സമ്പന്നമാക്കിയതു്. ഇസ്രായേൽജനം ദാരിദ്ര്യത്താൽ വലഞ്ഞു. ഇസ്രായേൽക്കാരുടെ കുഞ്ഞുങ്ങൾ എന്നും വിശന്നു കരഞ്ഞാണുറങ്ങിയത്.

പീഡനങ്ങളുടെയും പട്ടിണിയുടെയും പതിനെട്ടുവർഷങ്ങൾ കടന്നുപോയി.  ബാൽദേവനെയും അഷേറാദേവിയേയും വെടിഞ്ഞ്, ഇസ്രായേൽ വീണ്ടും കർത്താവിങ്കലേക്കു തിരിഞ്ഞുതുടങ്ങി. ഉപവാസത്തോടെയും കണ്ണീരോടെയും ജനങ്ങൾ കർത്താവിനെ വിളിച്ചപേക്ഷിച്ചു.

ഇസ്രായേലിനോടു കർത്താവിനു് അലിവുതോന്നി. ബഞ്ചമിൻഗോത്രത്തിലെ ഗേരയുടെ മകനായ ഏഹൂദിനെ കർത്താവ് ഇസ്രായേലിന്റെ വിമോചകനായി തിരഞ്ഞെടുത്തു. കർത്താവിന്റെ ആത്മാവു് ഏഹൂദിനോടൊപ്പമുണ്ടായിരുന്നു. അവൻ ഇസ്രായേലിലെ പ്രമുഖരുമായി രഹസ്യമായി ചർച്ചകൾനടത്തി. "ഇസ്രായേലിന്റെ മുക്കിലുംമൂലയിലും മൊവാബ്യസൈനികരുണ്ടു്. അതുകൊണ്ടുതന്നെ ഒരു സായുധകലാപം വിജയിക്കാൻ ബുദ്ധിമുട്ടാണു്. വിജയിച്ചാൽത്തന്നെ ഇസ്രായേലിനു വലിയ ആൾനാശം സംഭവിച്ചേക്കാം. അതുകൊണ്ടു നമുക്കു മൊവാബു രാജാവായ എഗലോനുമായി സന്ധിചെയ്യാനായി ചർച്ചകൾ നടത്താം. ഇസ്രായേലിനെ സമാധാനത്തിൽവിടാൻ നമുക്ക് അവനോടാവശ്വപ്പെടാം"

ഇസ്രായേൽജനം തങ്ങളാൽ കഴിയുന്നത്ര സ്വർണ്ണവും വെള്ളിയും സമാഹരിച്ചു. അവയെല്ലാം മൊവാബു രാജാവായ എഗലോനു കാഴ്ചനല്കുന്നതിനായി ഏഹൂദിനെ ഏല്പിച്ചു. ഏതാനും ചുമട്ടുകാരുടെ സഹായത്തോടെ, ഇസ്രായേൽജനം നല്കിയ കാഴ്ചവസ്തുക്കളുമായി, ഏഹൂദ് മൊവാബിലേക്കു പുറപ്പെട്ടു. 

യാത്രപുറപ്പെടുന്നതിനുമുമ്പായി, ഒരു മുഴം നീളവും ഇരുതലയ്ക്കും മൂർച്ചയുമുള്ള ഒരു വാളുണ്ടാക്കി. വലതുതുടയിൽ കെട്ടിയുറപ്പിച്ച തുകലുറയിൽ അതു സുരക്ഷിതമായി വച്ചതിനുശേഷമാണ് ഏഹൂദ് വസ്ത്രം ധരിച്ചത്.

ഗിൽഗാലിലെ ശിലാവിഗ്രഹങ്ങൾക്കടുത്തുള്ള വേനൽക്കാലവസതിയിൽ വിശ്രമിക്കുകയായിരുന്നു എഗലോൻ. ഏഹൂദ് അവിടെയെത്തി, ഇസ്രായേലിന്റെ കാഴ്ചവസ്തുക്കൾ രാജാവിനുമുമ്പിൽ സമർപ്പിച്ചു. അവിടെനിന്നു പുറത്തിറങ്ങിയ ഏഹൂദ്, ചുമട്ടുകാരെ പറഞ്ഞുവിട്ടിട്ടു് എഗലോന്റെ വസതിയിൽ തിരികെയെത്തി. അവൻ രാജാവിനോടു പറഞ്ഞു.

"മഹാനായ എഗലോൻ രാജാവു നീണാൾ വാഴട്ടെ! എനിക്കു് ഒരു രഹസ്യസന്ദേശം അങ്ങയെ അറിയിക്കാനുണ്ടു്."

തന്നോടൊപ്പമുണ്ടായിരുന്ന പരിചാരകരോടു് പുറത്തിറങ്ങി നില്ക്കാൻ രാജാവാവശ്യപ്പെട്ടു. 

ഏഹൂദ് വീണ്ടും പറഞ്ഞു: ''ദൈവത്തിൽനിന്നു് അങ്ങേയ്ക്കുള്ള ഒരു സന്ദേശമാണ് എന്റെ പക്കലുള്ളതു്."

അതുകേട്ടപ്പോൾ എഗലോൻ തന്റെ ഇരിപ്പിടത്തിൽനിന്നെഴുന്നേറ്റ് ഏഹൂദിനടുത്തുവന്നു നിന്നു.  അയാൾ തടിച്ചുകൊഴുത്ത ഒരു മനുഷ്യനായിരുന്നു. ഏഹൂദ്, തന്റെ വലതു തുടയിൽ മറച്ചുവച്ചിരുന്ന വാൾ ഇടതു കൈയാൽ പെട്ടെന്നു വലിച്ചൂരി, എഗലോന്റെ വയറ്റിലേക്കു കുത്തിയിറക്കി. വാൾ, പിടിയുൾപ്പെടെ എഗലോന്റെ വയറിൽ തറഞ്ഞുകയറി. മുറിയുടെ വാതിൽ താക്കോലിട്ടുപൂട്ടി, ഏഹൂദ് പുറത്തുകടന്നു.

ഏഹൂദ് പോകുന്നതുകണ്ടപ്പോൾ പരിചാരകർ മടങ്ങിവന്നു. മുറി പൂട്ടിയിട്ടിരുന്നതിനാൽ രാജാവു മുറി അകത്തുനിന്നു പൂട്ടി, ദിനചര്യയ്ക്കുള്ള രഹസ്യമുറിയിൽ പോയിരിക്കുമെന്നു് അവർ കരുതി. 

ഏറെനേരം കഴിഞ്ഞിട്ടും വാതിൽ തുറക്കാതിരുന്നതിനാൽ, കാര്യവിചാരകന്റെ കൈവശമുണ്ടായിരുന്ന മറ്റൊരു താക്കോൽ കൊണ്ടുവന്നു വാതിൽ തുറന്നു. മുറിയിൽക്കടന്നപ്പോൾ, തറയിൽ മരിച്ചുകിടക്കുന്ന രാജാവിനെയാണവർ കണ്ടതു്. പിടിയോളം ഉള്ളിലേക്കു കയറിയ വാൾപ്പിടിയുടെ ചുറ്റും കൊഴുപ്പു മൂടിക്കിടന്നു.

രാജാവു കൊലചെയ്യപ്പെട്ടുവെന്നു മൊവാബ്യർ തിരിച്ചറിഞ്ഞ സമയത്തിനുള്ളിൽ ഏഹൂദ് ഏറെ ദൂരത്തിലുള്ള സെയിറിലെത്തിക്കഴിഞ്ഞിരുന്നു. അവന്‍ എഫ്രായിം മലമ്പ്രദേശത്ത്‌ എത്തിയപ്പോള്‍ കാഹളം മുഴക്കി. മുൻനിശ്ചയപ്രകാരം അവിടെ കാത്തുനിന്നിരുന്ന ഇസ്രായേല്‍ജനം, മലയില്‍നിന്ന്‌ അവന്റെ നേതൃത്വത്തില്‍ താഴേക്കിറങ്ങി.

ഏഹൂദ് ജനങ്ങളോടു പറഞ്ഞു: ''കര്‍ത്താവ്‌ നിങ്ങളുടെ ശത്രുക്കളായ മൊവാബ്യരെ നിങ്ങളുടെ കൈകളിലേല്പിച്ചിരിക്കുന്നു. നിങ്ങൾ എന്നോടൊപ്പം വരുവിൻ."

ജനങ്ങൾ ആയുധമേന്തി അവന്റെയൊപ്പം പോയി. മൊവാബിന്‌ എതിരേയുള്ള ജോർദ്ദാന്റെ കടവുകള്‍ അവർ പിടിച്ചടക്കി.  രാജാവു വധിക്കപ്പെട്ടുവെന്നുകേട്ടപ്പോൾ മൊവാബ്യർ പരിഭ്രാന്തരായി. സൈനികർപോലും ഭയന്നു. ധീരന്മാരും കരുത്തുറ്റവരുമായ പതിനായിരത്തോളം മൊവാബ്യരെ ഇസ്രായേൽക്കാർ അന്നു കൊലപ്പെടുത്തി. ഒരുവന്‍പോലും രക്‌ഷപെട്ടില്ല.

ആദിവസം മൊവാബ് പൂർണ്ണമായും ഇസ്രായേലിനധീനമായി. പിന്നീടു് ഏഹൂദും അവന്റെ പിൻഗാമിയായി ഷംഗൂറും ഇസ്രായേലിൽ ന്യായപാലനം നടത്തി. ഷംഗൂറിന്റെ കാലത്തു ഫിലിസ്ത്യർ ഇസ്രായേലിനെതിരേ പോരിനിറങ്ങി. ആയുധധാരികളായ ഫിലിസ്ത്യർക്കെതിരേ ചാട്ടവാർമാത്രം കൈയിലേന്തി ഷംഗൂർ പോരാടി. അറുനൂറു ഫിലിസ്ത്യർ ഷംഗൂറിന്റെ ചാട്ടവാറടിയേറ്റുവീണു മരിച്ചു.

ഏഹൂദും തുടർന്നു ഷംഗൂറും ഇസ്രായേലിനെ നയിച്ചഎണ്‍പതു വര്‍ഷങ്ങൾ ഇസ്രായേലിലെങ്ങും ശാന്തിയും സമാധാനവും കളിയാടി.

Sunday, 27 May 2018

ഒത്ത്നിയേല്‍

നാടോടികളായി വര്‍ഷങ്ങളോളമലഞ്ഞ ഇസ്രായേല്‍ജനതയുടെ കൂടാരവാസമവസാനിച്ചു. കാനാന്‍ദേശത്ത്, അവര്‍ക്കു പുരയിടവും കൃഷിഭൂമിയും സ്ഥിരഭവനങ്ങളുമൊരുങ്ങി. യുദ്ധങ്ങളുടെയും പിരിമുറുക്കങ്ങളുടെയും ദിനങ്ങള്‍ സമാധാനപൂര്‍ണ്ണമായ പുലരികള്‍ക്കു വഴിമാറി. എല്പിക്കപ്പെട്ട നിയോഗം വിജയകരമായി നിറവേറ്റി, നൂറ്റിപ്പത്താം വയസ്സില്‍, ജോഷ്വാ നിത്യനിദ്രയില്‍ നിമഗ്നനായി. ഗാഷ് പര്‍വ്വതത്തിനു വടക്ക്, എഫ്രായിംദേശത്തെ തിമ്നാത്ത് ഹെറസ് എന്ന മലനാട്ടില്‍, ഇസ്രായേല്‍ജനം ജോഷ്വായുടെ അന്ത്യവിശ്രമസ്ഥലമൊരുക്കി. . തനിക്കുശേഷം ഇസ്രായേലിനെ നയിക്കാന്‍ ഒരു നേതാവിനെ അഭിഷേകംചെയ്യാതെയാണു ജോഷ്വാ വിടവാങ്ങിയത്.

ഇസ്രായേലുമായി ഉടമ്പടിയുണ്ടാക്കിയ ഗിദയോന്‍കാരൊഴികെ, മറ്റെല്ലാജനതകളെയും പൂര്‍ണ്ണമായി ഇല്ലായ്മചെയ്യാന്‍ ജോഷ്വായുടെ സൈനികര്‍ ശ്രദ്ധിച്ചിരുന്നു. എന്നാല്‍ ഫിലിസ്ത്യരുടെ അഞ്ചു പ്രഭുക്കന്മാര്‍, കാനാന്യരില്‍ ചിലര്‍, ഹിവ്യരിലെ ചെറിയ ഗണം, സിദോന്യര്‍, ഹിത്യര്‍, അമോര്യര്‍, പെരീസ്യര്‍, ജബൂസ്യര്‍ തുടങ്ങിയ ജനവിഭാഗങ്ങളില്‍ കുറേപ്പേര്‍ തുടങ്ങിയ തദ്ദേശവാസികളായ ചിലരെ ജോഷ്വായുടെ വാള്‍മുനയില്‍നിന്നു കര്‍ത്താവു സംരക്ഷിച്ചു നിറുത്തി. ഇസ്രായേലിന്റെ പിന്‍തലമുറക്കാര്‍ കര്‍ത്താവിന്റെ വഴികളിലൂടെ ചരിക്കുമോ എന്നു പരീക്ഷിച്ചറിയാന്‍വേണ്ടിയായിരുന്നൂ അത്.

ജോഷ്വായിലൂടെ ഇസ്രായേലിനു കര്‍ത്താവുചെയ്ത വന്‍കാര്യങ്ങള്‍ നേരിട്ടുകാണുകയും അനുഭവിച്ചറിയുകയുംചെയ്ത തലമുറ, ജോഷ്വായുടെ മരണശേഷവും പൂര്‍ണ്ണഹൃദയത്തോടെ കര്‍ത്താവിനെ ആരാധിച്ചു. മോശയുടെ നിയമത്തില്‍ അനുശാസിക്കുന്നതുപോലെ, കര്‍ത്താവിനു ബലികളര്‍പ്പിച്ചു.
വര്‍ഷങ്ങള്‍ കഴിഞ്ഞപ്പോള്‍ കാനാന്‍ദേശത്തിനുചുറ്റും വസിച്ചിരുന്ന മറ്റു ജനവിഭാഗങ്ങളുമായി ഇസ്രായേല്‍ ഇടകലര്‍ന്നുജീവിച്ചുതുടങ്ങി. അവരുടെ പുത്രിമാര്‍ ഇസ്രായേല്‍ഭവനങ്ങളില്‍ വധുക്കളായെത്തി. ഇസ്രായേലിലെ പെണ്‍കുട്ടികളെ ചുറ്റും ജീവിച്ചിരുന്ന മറ്റുജനതകളില്‍പ്പെട്ടവര്‍ക്കു വിവാഹംചെയ്തുനല്കുകയും ചെയ്തു. കാലാന്തരത്തില്‍ കര്‍ത്താവിനെയോ, അവിടുന്ന് ഇസ്രായേലിനുചെയ്ത, അദ്ഭുതകരമായ കാര്യങ്ങളെക്കുറിച്ചോ അറിയാത്ത പുതിയ തലമുറകള്‍ വളര്‍ന്നുവന്നു. ചുറ്റുമുള്ള ജനതകളുടെ സംസ്കാരങ്ങളുമായി ഇസ്രായേല്‍ ഇഴുകിച്ചേര്‍ന്നു.
മോശയിലൂടെ കര്‍ത്താവു നല്കിയ പത്തുകല്പനകളില്‍ ഒന്നാമത്തേതുതന്നെ ലംഘിച്ചുകൊണ്ട്, ഇസ്രായേല്‍ കര്‍ത്താവിനുമുമ്പില്‍ തിന്മചെയ്തു. ഈജിപ്തിലെ അടിമത്തത്തില്‍നിന്നു തങ്ങളുടെ പിതാക്കന്മാരെ മോചിപ്പിച്ചുകൊണ്ടുവന്ന കര്‍ത്താവിനെ ആരാധിക്കുന്നവര്‍ ഇസ്രായേലില്‍ വിരളമായി.

തങ്ങളുടെ ചുറ്റുമുള്ള ജനതകളുടെ ആചാരാനുഷ്ഠാനങ്ങള്‍ ഇസ്രായേല്‍ജനത അനുകരിച്ചു. ബാല്‍ദേവന്മാരെയും അസ്താര്‍ത്തെ ദേവതകളേയും തങ്ങളുടെ ദൈവങ്ങളായി ആരാധിച്ചു. അഷേരാപ്രതിഷ്ഠകള്‍ക്കുമുമ്പില്‍ ഇസ്രായേല്‍ജനം ബലികളര്‍പ്പിച്ചു. അപൂര്‍വ്വം ചിലര്‍മാത്രം മോശയുടെ നിയമമനുസരിച്ചു ജീവിക്കുകയും കര്‍ത്താവിനെമാത്രം ആരാധിക്കുകയുംചെയ്തു.

കര്‍ത്താവുമായി പൂര്‍വ്വപിതാക്കന്മാര്‍ചെയ്ത ഉടമ്പടി ലംഘിച്ച്, മറ്റുദേവന്മാരെ സേവിച്ചും നമസ്കരിച്ചും അവരുടെ പിന്നാലെപോയ ഇസ്രായേലിനുനേരേ കര്‍ത്താവിന്റെ കോപം ജ്വലിച്ചു.

മെസപ്പൊട്ടോമിയാ ഭരിച്ചിരുന്ന കുഷാന്‍ റിഷാത്തായിം രാജാവിനെ കര്‍ത്താവു പ്രബലനാക്കി. കുഷാന്‍ റിഷാത്തായിമിന്റെ പടയോട്ടത്തില്‍ ചുറ്റുവട്ടത്തുള്ള രാജ്യങ്ങളെല്ലാം മെസപ്പൊട്ടോമിയായുടെ അധീനതയിലായി. ഫലസമൃദ്ധമായ കാനാന്‍ദേശത്തെക്കുറിച്ചു കേട്ടറിഞ്ഞപ്പോള്‍ അവന്‍ തന്റെ സൈനികരെ അവിടേയ്ക്കുമയച്ചു. നയിക്കാന്‍ ഒരു നേതാവോ ഭരിക്കാന്‍ ഒരു രാജാവോ ഇല്ലാതിരുന്ന ഇസ്രായേല്‍, ചെറുത്തുനില്പുകൂടാതെ കീഴടങ്ങി. 

കുടുംബങ്ങളുടെമേല്‍ വലിയ നികുതികള്‍ ചുമത്തിയും നികുതി നല്‍കാത്തവരെ കഠിനശിക്ഷകള്‍ക്കു വിധിച്ചും മെസപ്പൊട്ടോമിയാ ഇസ്രായേലിനെ ചൂഷണംചെയ്തു. ഇസ്രായേലിന്റെ അദ്ധ്വാനഫലം മെസപ്പൊട്ടോമിയായുടെ ഖജനാവിലേക്കൊഴുകി. കുഷാന്‍ റിഷാത്തായിം രാജാവിനുകീഴില്‍ ജീവിതം ദുസ്സഹമായപ്പോള്‍ ഇസ്രായേല്‍ജനം കര്‍ത്താവിന്റെ കരുണയ്ക്കായി പ്രാര്‍ത്ഥിച്ചുതുടങ്ങി.

ഇസ്രായേല്‍ജനം കരഞ്ഞുപ്രാര്‍ത്ഥിച്ചപ്പോള്‍ കര്‍ത്താവിന് അവരുടെമേല്‍ അലിവുതോന്നി. ഇസ്രായേല്‍ മെസപ്പൊട്ടോമിയായുടെ അടിമത്തത്തിലായതിന്റെ എട്ടാം വര്‍ഷത്തില്‍ കാലെബിന്റെ ഏറ്റവുമിളയ സഹോദരനായിരുന്ന കെനാസിന്റെ പുത്രന്‍ ഒത്ത്നിയേലിനെ ഒരു ദര്‍ശനത്തില്‍ കര്‍ത്താവു വിളിച്ചു.

“ഒത്ത്നിയേല്‍, അടിമത്തത്തിന്റെ നുകത്തില്‍നിന്ന് ഇസ്രായേലിനെ മോചിപ്പിക്കാന്‍ തയ്യാറെടുക്കുക. ഭയപ്പെടണ്ട, ഞാന്‍ നിന്നോടുകൂടെയുണ്ടായിരിക്കും.”

ജനംമുഴുവന്‍ ബാല്‍ദേവന്മാരെയും അസ്താര്‍ത്തെ ദേവതകളേയും അഷേരാദേവിയേയും പൂജിക്കുകയും ആരാധിക്കുകയുംചെയ്തുകൊണ്ടിരുന്നപ്പോള്‍ അവരോടൊപ്പംകൂടാതെ കര്‍ത്താവിനെമാത്രമാരാധിച്ച അപൂര്‍വ്വം കുടുംബങ്ങള്‍ ഇസ്രായേലിലുണ്ടായിരുന്നു. അത്തരം കുടുംബങ്ങളിലെ ചെറുപ്പക്കാരെ ഒത്ത്നിയേല്‍ രഹസ്യമായി വിളിച്ചുകൂട്ടി.

“നിങ്ങളോരോരുത്തരും നിങ്ങളുടെ ചുറ്റുവട്ടത്തുള്ള കുടുംബങ്ങള്‍ സന്ദര്‍ശിക്കണം. ഇതുവരെ അവരാരാധിച്ച ബാല്‍ദേവന്മാരും അസ്താര്‍ത്തെ ദേവതകളും അഷേരാദേവിയും ഇസ്രായേലിനെ വീണ്ടും അടിമത്തത്തിലേക്കു നയിച്ചതെങ്ങനെയെന്ന് അവരെ ബോദ്ധ്യപ്പെടുത്തണം. ഇസ്രായേലിനെ രക്ഷിക്കാന്‍ കഴിവില്ലാത്ത അന്യദേവന്മാരെ ഉപേക്ഷിച്ച്, പൂര്‍ണ്ണമനസ്സോടെയും പൂര്‍ണ്ണ ഹൃദയത്തോടെയും പൂര്‍ണ്ണാത്മാവോടുംകൂടെ ഇസ്രായേലിന്റെ ദൈവമായ, കര്‍ത്താവിലേക്കു തിരിയാന്‍ മുഴുവന്‍ജനങ്ങളും തയ്യാറായാല്‍ മേസെപ്പൊട്ടോമിയാതീര്‍ത്ത അടിമത്തത്തിന്റെ നുകം തകര്‍ക്കാന്‍ കര്‍ത്താവു നമ്മളെ സഹായിക്കുമെന്ന് ജനങ്ങള്‍ക്കു തിരിച്ചറിവു നല്കണം.”
അന്നവിടെക്കൂടിയ ചെറുപ്പക്കാര്‍ ഇസ്രായേലിലെങ്ങും ഒത്ത്നിയേലിന്റെ നിര്‍ദ്ദേശങ്ങള്‍ പ്രാവര്‍ത്തികമാക്കി. ഇസ്രായേലിലെ മുഴുവന്‍ജനങ്ങളും അന്യദേവന്മാരെ വെടിഞ്ഞ്‌, കര്‍ത്താവിലേക്കു മനസ്സുതിരിച്ചു.

യുദ്ധംചെയ്യാന്‍ ആരോഗ്യമുള്ള ഇസ്രായേലിലെ മുഴുവന്‍ ചെറുപ്പക്കാരെയും ഒത്ത്നിയേല്‍ സംഘടിപ്പിച്ചു. ഇസ്രായേലിന്റെ വിവിധഭാഗങ്ങളില്‍ സ്ഥിതിചെയ്യുന്ന മെസപ്പൊട്ടോമിയായുടെ സൈനികത്താവളങ്ങളെല്ലാം ഒരേസമയം ആക്രമിക്കുവാന്‍ അവന്‍ പദ്ധതി തയ്യാറാക്കി. ഇസ്രായേല്‍പ്പോരാളികളെ പല ഗണങ്ങളായി തിരിച്ചു. ഓരോ സൈനികത്താവളവും ആക്രമിക്കാന്‍ നാലുഗണങ്ങളെന്ന ക്രമത്തില്‍ മെസെപ്പോട്ടോമിയന്‍ സൈനികത്താവാളങ്ങളുടെ നാലിരട്ടി ഇസ്രായേല്‍ പോരാളിക്കൂട്ടങ്ങള്‍ തയ്യാറായി. എന്താണു ചെയ്യേണ്ടതെന്ന വ്യക്തമായ നിര്‍ദ്ദേശങ്ങള്‍ ഒത്ത്നിയേല്‍ എല്ലാവര്‍ക്കും നല്കി.

യുദ്ധത്തിനുപോകുന്ന ചെറുപ്പക്കാര്‍ക്കുവേണ്ടി, ഇസ്രായേല്‍കുടുംബങ്ങളെല്ലാം കര്‍ത്താവിന്റെമുമ്പില്‍ ഉപവാസത്തോടെ പ്രാര്‍ത്ഥിച്ചു.

യുദ്ധത്തിനായി മുന്‍കൂട്ടി തീരുമാനിച്ച ദിവസം, സന്ധ്യമയങ്ങിയപ്പോള്‍ ഇസ്രായേല്‍പ്പോരാളികളുടെ ഓരോ ഗണവും തങ്ങള്‍ക്കായി നിശ്ചയിക്കപ്പെട്ട സൈനികത്താവളങ്ങള്‍ക്കു ചുറ്റും സുരക്ഷിതരായി ഒളിച്ചു. രാത്രിയുടെ മൂന്നാംയാമത്തിന്റെ തുടക്കത്തില്‍, സൈനികത്താവളങ്ങളിലെല്ലാവരും ഗാഢനിദ്രയിലാണ്ടപ്പോള്‍, ഇസ്രായേല്‍ക്കാരുടെ ഒളിയിടങ്ങളില്‍ തീപ്പന്തങ്ങള്‍ ജ്വലിച്ചു. എന്താണുസംഭവിക്കുന്നതെന്നു കാവല്‍ക്കാര്‍ക്കു മനസ്സിലാക്കാനാകുന്നതിനുമുമ്പേ, നാലുവശത്തുനിന്നും ഇസ്രായേല്‍പ്പോരാളികള്‍ ഇരച്ചുകയറി. 

പിറ്റേന്നു നേരംപുലര്‍ന്നപ്പോള്‍ ഇസ്രായേല്‍ജനങ്ങള്‍ ഒന്നുചേര്‍ന്നു കര്‍ത്താവിന്റെ ബലിപീഠത്തില്‍ ദഹനബലികളര്‍പ്പിച്ചു. മോശയുടെ നിയമപുസ്തകച്ചുരുള്‍ നിവര്‍ത്തി, ജനങ്ങളെല്ലാം കേള്‍ക്കുന്നത്ര ഉച്ചത്തില്‍ നിയമത്തിലെ ഓരോ വരിയും ഒത്ത്നിയേല്‍ ഉറക്കെ വായിച്ചു. ജനക്കൂട്ടം കര്‍ത്താവിനു സ്തുതികളാലപിച്ചു.

ഒരാള്‍പോലുമവശേഷിക്കാതെ, ഇസ്രായേലിലുണ്ടായിരുന്ന മെസെപ്പോട്ടോമിയന്‍സൈനികര്‍ എല്ലാവരും വധിക്കപ്പെട്ടു. ഇസ്രായേലിലെങ്ങുംവിജയകാഹളദ്ധ്വനികളുയര്‍ന്നു. 

കുറെ ദിവസങ്ങള്‍ക്കുശേഷംമാത്രമാണ് ഇസ്രായേലില്‍ നടന്നെതെന്തെന്നു കുഷാന്‍ റിഷാത്തായിം രാജാവു മനസ്സിലാക്കിയത്. ഒരു സൈനികവ്യൂഹത്തോടൊപ്പം കലാപകാരികളെ അടിച്ചമര്‍ത്താനായി കുഷാന്‍ റിഷാത്തായിം പുറപ്പെട്ടു. അവന്റെ വരവു പ്രതീക്ഷിച്ചിരുന്ന ഒത്ത്നിയേല്‍ ഇസ്രായേല്‍ പോരാളികളോടൊപ്പം അവനെ കാത്തിരിക്കുകയായിരുന്നു. 

താഴ്വരയിലൂടെ കടന്നെത്തിയ മെസപ്പൊട്ടോമിയന്‍സേനയെ ഒത്ത്നിയേലും കൂട്ടരും കുന്നിന്‍മുകളില്‍നിന്നാക്രമിച്ചു. വലിയ പോരാട്ടത്തില്‍ കുഷാന്‍ റിഷാത്തായിമിന്റെ ഭടന്മാരില്‍ ഭൂരിപക്ഷവും വധിക്കപ്പെട്ടു. രാജാവിനെയും മറ്റു ഭടന്മാരെയും ഒത്ത്നിയേല്‍ ജീവനോടെ പിടികൂടി.

കുഷാന്‍ റിഷാത്തായിമിനെ ബന്ധിച്ച്, അവന്റെതന്നെ ഭടന്മാരുടെ മുമ്പില്‍ നിറുത്തി.
ഒത്ത്നിയേല്‍ പറഞ്ഞു: “നിങ്ങളുടെ രാജാവൊഴികെ മറ്റുള്ളവര്‍ക്കെല്ലാം നിങ്ങളുടെ സ്വദേശത്തെക്കു തിരിച്ചുപോകാം. എന്നിട്ടു നിങ്ങള്‍ക്കു പുതിയ രാജാവിനെ തിരഞ്ഞെടുക്കാം. അവനോടു പറയണം, ഇസ്രായേലിനെതിരെ ചിന്തിക്കുകപോലും ചെയ്യരുതെന്ന്. ഇസ്രായേലിനെതിരെ തിരിഞ്ഞാല്‍ അവനും ഇതുതന്നെയാകും വിധിയെന്ന് അവനെപ്പറഞ്ഞുമനസ്സിലാക്കുകയും വേണം.” ഒത്ത്നിയേലിന്റെ വാക്കുകള്‍ അവസാനിക്കുംമുമ്പേ അവന്റെ വാള്‍ കുഷാന്‍ റിഷാത്തായിമിന്റെ ശിരസ്സറുത്തു.

പിന്നീടു തന്റെ മരണംവരെയുള്ള നാല്പതുവര്‍ഷക്കാലം ഒത്ത്നിയേല്‍ ഇസ്രായേലില്‍ ന്യായപാലനം നടത്തി. അക്കാലമെല്ലാം ഇസ്രായേലിലെങ്ങും സമാധാനം നിലനിന്നു.
ഒത്ത്നിയേല്‍ ജീവിച്ചിരിക്കുമ്പോള്‍ ഇസ്രായേലില്‍ ഒരാള്‍പോലും അന്യദേവന്മാരെ ആരാധിച്ചില്ല. എന്നാല്‍ അവന്റെ മരണത്തോടെ ഇസ്രയേല്‍ തങ്ങളുടെ അവിശ്വസ്തതയുടെ വഴികളിലേക്കു തിരികെപ്പോയിത്തുടങ്ങി.

Sunday, 20 May 2018

നിറവേറിയ വാഗ്ദാനം

ജോഷ്വാ ഇസ്രായേൽശ്രേഷ്ഠന്മാരെ വിളിച്ചുകൂട്ടി പറഞ്ഞു: 

"നമുക്കു വിശ്രമിക്കാനുള്ള സമയമായിട്ടില്ല. ഇസ്രായേലിലെ എല്ലാ ഗോത്രങ്ങൾക്കും ഭൂമി അവകാശമായി ലഭിക്കണമെങ്കിൽ, ചുറ്റുവട്ടത്തുള്ള കൂടുതൽദേശങ്ങൾ നമ്മൾ പിടിച്ചടക്കണം. ഗാസാ, അഷ്ദോദ്, അഷ്കലോൺ, എക്രോൺ, എക്രോണിന്റെ അതിർത്തിമുതൽ ഈജിപ്തിനു കിഴക്കുവരെയുള്ള ദേശങ്ങൾ, ലബനോൻ, ഗബാല്യരുടെ ദേശം, ഗഷൂര്യരുടെ ദേശങ്ങൾ, സിദോന്യരുടെ ദേശങ്ങൾ തുടങ്ങിയവയെല്ലാം ആക്രമിച്ചുകീഴടക്കി, അന്നാട്ടുകാരെയെല്ലാം ഉന്മൂലനംചെയ്യേണ്ടിയിരിക്കുന്നു. 

അതിനാൽ, അലസതവെടിയുക; നമുക്കായി കർത്താവു വാഗ്ദാനം നല്കിയിട്ടുള്ള ദേശങ്ങൾ കീഴടക്കാനായി നമ്മൾ യുദ്ധംചെയ്യുമ്പോൾ, അവിടുന്നു നമ്മോടൊപ്പം യുദ്ധംചെയ്യും.

എനിക്ക്, എൺപത്തിയഞ്ചുവയസ്സു പൂർത്തിയായിരിക്കുന്നു. എങ്കിലും കർത്താവിന്റെ കൃപയാൽ, മുപ്പതുകാരന്റെ കരുത്തോടെ വാളും കുന്തവുമുപയോഗിച്ചു പോരാടാൻ എനിക്കു കഴിയും. തയ്യാറാകുക, ഈ ദേശമെല്ലാം പിടിച്ചെടുക്കുന്നതുവരെ നമുക്കു പോരാടാം. ഞാൻ നിങ്ങൾക്കൊപ്പം, മുമ്പേ നടക്കാം''

ഇസ്രായേൽ വീണ്ടും യുദ്ധസജ്ജമായി. ചുറ്റുവട്ടത്തുള്ള നാട്ടുരാജ്യങ്ങളിലെല്ലാം പരിഭ്രാന്തി പടർന്നു. അവർ ഒറ്റയ്ക്കും കൂട്ടായും ചെറുത്തുനില്ക്കാൻ ശ്രമിച്ചു. എന്നാൽ ഒരാൾപോലുമവശേഷിക്കാതെ, മുഴുവൻപേരെയും ഇസ്രായേൽ വാളിനിരയാക്കി. ആരാജ്യങ്ങളിലെ സ്വത്തുവകകളും കന്നുകാലികളെയും ഇസ്രായേൽ കൊള്ളയടിച്ചു.
കാനാൻദേശം പൂർണ്ണമായും ഇസ്രായേലിനു സ്വന്തമായി. അന്നാട്ടുകാർ മുഴുവൻ, ഒരാൾപോലുമവശേഷിക്കാതെ ഉന്മൂലനംചെയ്യപ്പെട്ടു. 

ഹിവ്യ വംശജരായ ഗിബയോൻനിവാസികൾ ഇസ്രായേലുമായി സന്ധിചെയ്തിരുന്നതിനാൽ അവർമാത്രം ഇസ്രായേല്യർക്കിടയിൽ ജീവനോടെ അവശേഷിച്ചു.

പിടിച്ചെടുത്ത പ്രദേശങ്ങൾ, നറുക്കെടുപ്പിലൂടെ ഇസ്രായേലിലെ പതിനൊന്നുഗോത്രങ്ങൾക്കായി വീതിച്ചുനല്കി. ലേവി ഗോത്രജർ പുരോഹിതഗണവും ഇസ്രായേലിന്റെ പൊതുസ്വത്തുമായതിനാൽ അവർക്കായി പ്രത്യേക ദേശം നല്കിയില്ല.

കർത്താവു മോശയോടു കല്പിച്ചതനുസരിച്ചു്, ഏഴു് *അഭയനഗരങ്ങളും ജോഷ്വാ നിർമ്മിച്ചു. ഗലീലിയിലെ കേദഷ്, എഫ്രായിമിലെ ഷെക്കം, കിര്യാത്ത് അർബ, ഹെബ്രോൺ, ബേസർ, റാമോത്ത്, ഗോലാൻ എന്നിവയാണു് ഇസ്രായേലിലെ അഭയ നഗരങ്ങൾ..
പിതാക്കന്മാരായ അബ്രാഹത്തിനും ഇസഹാക്കിനും യാക്കോബിനും നല്കിയ വാഗ്ദാനം കർത്താവു നിറവേറ്റി. ഇസ്രായേലിനു നൽകുമെന്നു പിതാക്കന്മാരോടു കർത്താവു വാഗ്ദാനം നൽകിയദേശം ഇസ്രായേലിനു സ്വന്തമായി.


'ഇസ്രായേല്‍ഗോത്രങ്ങള്‍ക്കെല്ലാം ദേശം വിഭജിച്ചു നല്കിയശേഷം, റൂബന്‍, ഗാദ് ഗോത്രങ്ങളേയും മനാസ്സെയുടെ അര്‍ദ്ധഗോത്രത്തേയും ജോഷ്വാ തന്റെയടുത്തു വിളിച്ചുകൂട്ടി.

"കര്‍ത്താവിന്റെ ദാസനായ മോശ നിങ്ങളോടു കല്പിച്ചതെല്ലാമനുസരിച്ച നിങ്ങളെ ഞാനഭിനന്ദിക്കുന്നു. ദേശംമുഴുവന്‍ പിടിച്ചടക്കി, ഇസ്രായേലിന്റെ എല്ലാ ഗോത്രങ്ങള്‍ക്കുമായി വിഭജിച്ചുനല്കുന്നതുവരെ നിങ്ങള്‍ മുന്നണിയില്‍നിന്നു യുദ്ധംചെയ്തു. ജോര്‍ദ്ദാനക്കരെ, മോശ നിങ്ങള്‍ക്കവകാശമായി നല്കിയ ദേശത്തേക്കു് ഇനി നിങ്ങള്‍ക്കു മടങ്ങാം. മോശ നിങ്ങള്‍ക്കു നല്കിയിട്ടുള്ള കല്പനകളും നിയമങ്ങളുമനുസരിക്കുന്നതില്‍ പ്രത്യേകശ്രദ്ധവയ്ക്കണമെന്നു ഞാന്‍ നിങ്ങളെ ഓര്‍മ്മിപ്പിക്കുന്നു. നിങ്ങളുടെ ദൈവമായ കര്‍ത്താവിനെ സ്നേഹിക്കുകയും പൂര്‍ണ്ണമനസ്സോടും പൂര്‍ണ്ണാത്മാവോടുംകൂടെ അവിടുത്തെ ആരാധിക്കുകയുംചെയ്യുന്നതില്‍ നിങ്ങള്‍ എല്ലായ്പ്പോഴും ഉത്സുകരായിരിക്കണം."

ജോഷ്വാ അവരെ അനുഗ്രഹിച്ചു യാത്രയാക്കി. തങ്ങളുടെ സഹോദരഗോത്രങ്ങളോടു യാത്രപറഞ്ഞ്, മനാസ്സെയുടെ അർദ്ധഗോത്രവും റൂബന്‍, ഗാദ് ഗോത്രങ്ങളും ജോര്‍ദ്ദാനക്കരെ, അവര്‍ക്കവകാശമായി ലഭിച്ച ദേശങ്ങളിലേക്കു യാത്രയായി.

ഇസ്രായേല്‍ഭവനങ്ങളിലെല്ലാം സന്തോഷവും സമൃദ്ധിയുംനിറഞ്ഞ വര്‍ഷങ്ങള്‍ കടന്നുവന്നു. കാലം, ആര്‍ക്കുവേണ്ടിയും കാത്തുനില്‍ക്കാതെ അതിന്റെ പ്രയാണം തുടര്‍ന്നു. തനിക്കു നൂറ്റിപ്പത്തുവയസ്സു പൂര്‍ത്തിയായ ദിവസം, ജോഷ്വാ ഇസ്രായേലിന്റെ പന്ത്രണ്ടു ഗോത്രങ്ങളേയും ഷെക്കമില്‍ വിളിച്ചുകൂട്ടി. 

"സകല മനുഷ്യരും പോകേണ്ടവഴിയേ, ഞാനും കടന്നുപോകാനുള്ള സമയമടുത്തിരിക്കുന്നു. നിങ്ങളുടെ ദൈവമായ കര്‍ത്താവു നിങ്ങള്‍ക്കു വാഗ്ദാനം നല്കിയിരുന്ന കാര്യങ്ങള്‍ ഒന്നൊഴിയാതെ എല്ലാം സഫലമായിരിക്കുന്നുവെന്നു നിങ്ങള്‍ കണ്ടുകഴിഞ്ഞു. നിങ്ങള്‍ അവിടുത്തെ ഉടമ്പടി ലംഘിച്ചു്, അന്യദേവന്മാരെ സേവിക്കുകയും അതുവഴി കര്‍ത്താവിന്റെ കോപം ജ്വലിപ്പിക്കുകയും ചെയ്യരുതു്. അങ്ങനെ ചെയ്താല്‍, കര്‍ത്താവു നല്കിയ ദേശത്തുനിന്നും നിങ്ങളെ നിര്‍മ്മാര്‍ജ്ജനംചെയ്യാനും നിങ്ങളുടെമേല്‍ സകലതിന്മകളും വരുത്താനും കര്‍ത്താവു മടിക്കില്ലെന്നും നിങ്ങളറിയണം. വാഗ്ദാനങ്ങള്‍ നിറവേറ്റിയതുപോലെ, തന്റെ കല്പനകള്‍ ലംഘിക്കുന്നവരുടെമേല്‍ ഉണ്ടാകുമെന്നു മുന്നറിയിപ്പു നല്കിയിട്ടുള്ള ശാപങ്ങളും അവിടുന്നു നിറവേറ്റുമെന്നോര്‍ക്കുക.

ഇന്നുവരെ കര്‍ത്താവു നമ്മളെ നയിച്ച വഴികളെക്കുറിച്ച് എപ്പോഴും ചിന്തിക്കുക.
നമ്മുടെ പൂര്‍വ്വപിതാവായ അബ്രഹാം, യൂഫ്രട്ടീസിനക്കരെ മെസപ്പെട്ടോമിയായില്‍ ജനിച്ചു വളര്‍ന്നു. അബ്രഹാമിന്റെ പിതാവായ തേരഹ് വരെയുള്ള തലമുറകള്‍ അന്യദേവന്മാരെ സേവിക്കുകയും അവരുടെ വിഗ്രഹങ്ങളെ പൂജിക്കുകയുംചെയ്തിരുന്നു. എന്നാല്‍ പിതാവായ അബ്രഹാത്തെ, കര്‍ത്താവു വിളിച്ചു വേര്‍തിരിച്ചു, ജോര്‍ദ്ദാന്‍ നദീതീരത്തു് കാനാന്‍ദേശത്തുകൂടെ നയിച്ചു.

അബ്രഹാമിനു പുത്രനായി ഇസഹാക്കിനെയും ഇസഹാക്കിനു യാക്കോബിനേയും കര്‍ത്താവു നല്കി. യാക്കോബിനെ, 'ഇസ്രായേല്‍' എന്നു കര്‍ത്താവു വിളിച്ചു. യാക്കോബിന്റെ പന്ത്രണ്ടു മക്കളുടെ പരമ്പരകള്‍ ഇസ്രായേലിന്റെ പന്ത്രണ്ടു ഗോത്രങ്ങളായി. 

കാനാന്‍ദേശത്തു ക്ഷാമകാലമായപ്പോള്‍ ഇസ്രായേലും മക്കളും ഈജിപ്തിലേക്കു പോയി. ഇസ്രായേലിന്റെ പുത്രനായ ജോസഫ്, ഫറവോ കഴിഞ്ഞാല്‍ ഈജിപ്തിലെ സര്‍വ്വാധികാരങ്ങളൂം കൈയാളുന്ന ഭരണാധികാരിയാകാന്‍ കര്‍ത്താവിടയാക്കി. നൂറ്റാണ്ടുകള്‍ കഴിഞ്ഞപ്പോള്‍ ജോസഫിനെയറിയാത്ത ഫറവോമാരുടെ പുതിയ തലമുറകള്‍ അധികാരത്തിലെത്തി. ഇസ്രായേല്‍ജനത്തെ അവര്‍ അടിമകളാക്കി.

ര്‍ത്താവു മോശയേയും അഹറോനെയും ഫറവോയ്ക്കു മുമ്പിലേക്കയച്ചു. ഈജിപ്തിനുമേല്‍ മഹാമാരികളയച്ച്, കര്‍ത്താവു നമ്മളെ അവിടെനിന്നു മോചിപ്പിച്ചു.

നമ്മുടെ പിതാക്കന്മാര്‍ ചെങ്കടല്‍ത്തീരത്തെത്തിയപ്പോള്‍, ഈജിപ്തുകാരുടെ സൈന്യം അരെ പിന്തുടര്‍ന്നെത്തി. കര്‍ത്താവു ചെങ്കടല്‍ രണ്ടായി പിളര്‍ത്തി, ഇസ്രായേലിനെ മറുകര കടത്തി. രഥങ്ങളൂം കുതിരപ്പടകളുമായി പിന്തുടര്‍ന്ന ഈജിപ്തുകാരെ, കര്‍ത്താവു ചെങ്കടലില്‍ മുക്കിക്കളഞ്ഞു.

ജോര്‍ദ്ദാനു മറുകരെ, അമോര്യരുടെ നാട്ടിലേക്കു കര്‍ത്താവു നമ്മെ നയിച്ചു. അമോര്യര്‍ നമുക്കെതിരായി യുദ്ധംചെയ്തെങ്കിലും കര്‍ത്താവവരെ നമുക്കേല്പിച്ചുതന്നു.

മൊവാബു രാജാവായ ബാലാക്ക്, ഇസ്രയേലിനെ ശപിക്കാനായി ബാലാം പ്രവാചകനെ അളയച്ചു വരുത്തി. എന്നാല്‍ അവന്‍ നമ്മെ അനുഗ്രഹിക്കുന്നതിനു കര്‍ത്താവിടയാക്കി. 

നമ്മള്‍ ജോര്‍ദ്ദാന്‍കടന്നു ജറീക്കോയിലെത്തി. ഇന്നാട്ടിലുണ്ടായിരുന്ന സകലരെയും യുദ്ധത്തില്‍ വധിച്ചു്, ദേശം പിടിച്ചടക്കാന്‍ കര്‍ത്താവു നമ്മെ സഹായിച്ചു. നമ്മദ്ധ്വാനിക്കാത്ത ഭൂമിയും പണിയാത്ത പട്ടണങ്ങളും നമുക്കു ലഭിച്ചു. നമ്മള്‍ നട്ടുവളര്‍ത്താത്ത മുന്തിരിത്തോട്ടത്തിന്റെയും ഒലിവു തോട്ടത്തിന്റെയും ഫലം നമ്മള്‍ ഇന്നനുഭവിക്കുന്നു. നമ്മുടെ വാളിന്റെയോ വില്ലിന്റെയോ സഹായത്താലല്ല, കര്‍ത്താവിന്റെ കൃപയാലാണു്, നമുക്കിതെല്ലാം സാദ്ധ്യമായത്.

അതിനാല്‍ കര്‍ത്താവിനെ ഭയപ്പെടുകയും ആത്മാർത്ഥതയോടും വിശ്വസ്തയോടുംകൂടെ അവിടുത്തെ സേവിക്കുകയും ചെയ്യുവിന്‍. യൂഫ്രട്ടീസ് നദിക്കരയിലെ മെസപ്പൊട്ടോമിയയിലും നൈല്‍നദീതീരത്തെ ഈജിപ്തിലും നിങ്ങളുടെ പിതാക്കന്മാര്‍ സേവിച്ചിരുന്ന ദേവന്മാരെയുപേക്ഷിച്ചു്, കര്‍ത്താവിനെ ആരാധിക്കുവിന്‍. ഇവിടെ, ഈ ജോര്‍ദ്ദാന്‍തീരത്തെ അമോര്യര്‍ സേവിച്ചിരുന്ന ദേവന്മാരെയും നിങ്ങള്‍ പിഞ്ചെല്ലരുത്.

ര്‍ത്താവു പരിശുദ്ധനായ ദൈവമാണ്, അസഹിഷ്ണുവായ ദൈവം! നിങ്ങളുടെ പാപങ്ങളുമതിക്രമങ്ങളും അവിടുന്നു ക്ഷമിക്കില്ല. കര്‍ത്താവിനെയുപേക്ഷിച്ചു്, അന്യദേവന്മാരെ സേവിച്ചാല്‍, അവിടുന്നു നിങ്ങള്‍ക്കെതിരേ തിരിയും. നിങ്ങള്‍ക്കു നന്മകള്‍നല്കിയ കര്‍ത്താവുതന്നെ നിങ്ങള്‍ക്കു തിന്മ വരുത്തുകയും നിങ്ങളെ നശിപ്പിക്കുകയും ചെയ്യും."

"ഞങ്ങള്‍ കത്താവിനെമാത്രം സേവിക്കും." ജനങ്ങള്‍ വിളിച്ചു പറഞ്ഞു.

'"കര്‍ത്താവിനെ സേവിക്കാന്‍ നിങ്ങള്‍ തീരുമാനിച്ചിരിക്കുന്നുവെന്നതിനു നിങ്ങള്‍തന്നെ സാക്ഷി.'' ജോഷ്വാ പറഞ്ഞു.

"അതേ, ഞങ്ങള്‍തന്നെ സാക്ഷി. ഞങ്ങള്‍ കര്‍ത്താവിനെവിട്ടു് അന്യദേവന്മാരെ സേവിക്കാനിടയാകാതിരിക്കട്ടെ. നമ്മളേയും നമ്മുടെ പിതാക്കന്മാരെയും അടിമത്തത്തിന്റെ ഭവനമായ ഈജിപ്തില്‍നിന്നു കൊണ്ടുപോരുകയും നമ്മുടെ കണ്മുമ്പില്‍, മഹാദ്ഭുതങ്ങള്‍ പ്രവര്‍ത്തിക്കുകയും നമ്മുടെ വഴികളിലും നാം കടന്നുപോയ ജനതകളുടെയിടയിലും നമ്മളെ സംരക്ഷിക്കുകയുംചെയ്തതു നമ്മുടെ ദൈവമായ കര്‍ത്താവാണു്. ഈ ദേശത്തു വസിച്ചിരുന്ന സകല ജനതകളേയും തരത്തി, ഇവിടം നമുക്കവകാശമായി നല്കിയതും കര്‍ത്താവാണു്. അതിനാല്‍ ഞങ്ങളും ഞങ്ങളുടെ തലമുറകളും കര്‍ത്താവിനെ സേവിക്കും. അവിടുന്നുമാത്രമാണു ഞങ്ങളുടെ ദൈവം."

"നിങ്ങളുടെയിടയിലുള്ള അന്യദേവന്മാരെയുപേക്ഷിച്ച്, നിങ്ങളുടെ ഹൃദയം ഇസ്രായേലിന്റെ ദൈവമായ കര്‍ത്താവിലേക്കു തിരിയിട്ടെ!'' ജോഷ്വാ കര്‍ത്താവിന്റെ നിയമങ്ങളും ചട്ടങ്ങളും ജനങ്ങള്‍ക്കു നല്കുകയും ഇസ്രായേല്‍ജനതയും കര്‍ത്താവുമായി പുതിയൊരുടമ്പടി സ്ഥാപിക്കുകയും ചെയ്തു. കര്‍ത്താവിന്റെ നിയമഗ്രന്ഥത്തില്‍ ജോഷ്വാ ഈ ഉടമ്പടിയെഴുതി. പിന്നീടു് വലിയൊരു കല്ലുയര്‍ത്തി കര്‍ത്താവിന്റെ കൂടാരത്തിനുമുമ്പില്‍, ഒരു ഓക്കുമരച്ചുവട്ടില്‍ സ്ഥാപിച്ചു.

"നമ്മുടെ ഉടമ്പടിയുടെ ഓര്‍മ്മയ്ക്കായി ഈ കല്ല്, ഞാനിവിടെ സ്ഥാപിക്കുന്നു. നിങ്ങള്‍, നിങ്ങളുടെ ദൈവത്തോടു് അവിശ്വസ്തമായി പെരുമാറാതിരിക്കാന്‍ ഇതു നിങ്ങള്‍ക്കു സാക്ഷിയായിരിക്കട്ടെ."

ഈജിപ്തില്‍നിന്നു കൊണ്ടുവന്ന, ജോസഫിന്റെ അസ്ഥികള്‍ ഷെക്കമില്‍ സംസ്കരിച്ചു. പിതാവായ യാക്കോബ്, മോറില്‍നിന്നു നൂറു വെള്ളിനാണയത്തിനു വാങ്ങിയതായിരുന്നു ആ സ്ഥലം.

അധികം വൈകാതെ ജോഷ്വാ അന്തരിച്ചു. അവന്റെ മൃതശരീരം എഫ്രായിം മലമ്പ്രദേശത്തുള്ള തിമ്നാത്ത്സേറയില്‍ സംസ്കരിച്ചു. അഹറോന്റെ പുത്രനും പ്രധാനപുരോഹിതനുമായിരുന്ന ഏലിയാസറും കാലയവനികയ്ക്കു പിന്നില്‍ മറഞ്ഞു. അവന്റെ മൃതശരീരം എഫ്രായിം മലമ്പ്രദേശത്തുതന്നെയുള്ള ഗിബയായില്‍ സംസ്കരിച്ചു.
------------------------------------------------------------------------


ബൈബിള്‍ പഴയനിയമത്തിലെ ആറാമത്തെ പുസ്തകമായ 'ജോഷ്വാ ' പൂര്‍ണ്ണമായി. അടുത്തയാഴ്ച മുതല്‍ ഏഴാമത്തെ പുസ്തകമായ 'ന്യായാധിപന്മാര്‍' (Judges) ആരംഭിക്കുന്നു.